Muchibaaba chinafumihu, twahanjekeli hachinjikijilu chayilejeliyi Yesu atumbanji. Ichi chinjikijilu chamwekeshaña nawu Yesu Kristu watachika dehi kuyuula neyi Mwanta waWanta waNzambi mwiwulu.

Bayibolu yashimwineñahu dehi nawu neyi Yesu nekali dehi Mwanta wakamunata Satana niandemoni jindi heseki. Nyidimu yindi yazatikaña hohu heseki, dimuloña waweni yuma chiyinaswejeli kutaminaku nankashi hamaseki kufuma tuhu mu 1914.—Chimwekeshu 12:7, 9.

Hela chakwila nshakaminu mukaayi yinatami, Yesu, Mwanta waWanta waNzambi, wela yuma yinakwashi antu mukaayi kejima. Muloña wamudimu wakudizisha antu Bayibolu mukaayi kejima washimwiniyi Yesu, antu amavulu anakudiza nawa anakuzatisha yishina yamuBayibolu muchihandilu chawu. (Isaya 2:2-4) Amavulu anadizi chakubula kusweja kulemesha nyidimu yakumujimba, kubula kutwamijaku maheta nichakwikala namuzañalu muchisaka. Awa antu anakudiza chakwikala namuzañalu nawa anekali antu anakukeñayi Nzambi kuyuula muWanta windi.

Hela chakwila Yesu watachika dehi kuyuula mwiwulu, nfulumendi jawantu jichidi kuyuula heseki. Hela chochu, Nzambi namuleji Yesu nindi: “Ikalaku mwanta hadi ayilumbu jeyi.” (Masamu 110:2) Katataka Yesu yajilumuni akwankunyi ejima nikwamwina anakufwila kumwovwahila Nzambi.

Haniyi mpinji, Wanta Nzambi

• Wakafumishahu nsakililu yakutwamba. Nsakililu yinakutañisha nsañu yamakudi hadi Nzambi nawa yinakutamisha chihandilu chawantu akayifumishahu. Bayibolu yesekeja nsakililu yakutwamba nachivumbi. Antu amavulu akahayama chakamujilumunawu.—Chimwekeshu 17:15, 16.

• Wakafumishahu jinfulumendi. Wanta waNzambi wakafumishahu nfulumendi jawantu.—Chimwekeshu 19:15, 17, 18.

• Wakafumishahu antu atama. Indi antu elaña yuma yatama niakaanaña kumwovwahila Nzambi akayila ñahi? “Hakwila antu atama akayifumisha” heseki.—Yishimu 2:22.

• Wakamujiyisha Satana niandemoni. Satana niandemoni akatwesha wanyi “kuluwañesha cheñi akwanyuza.”—Chimwekeshu 20:3, 10.

Yumanyi yakayililawu antu ovwahilaña Wanta waNzambi?

Chineli Yesu wakayuulilaña mwiwulu, wakela yuma yayiwahi kubadika anyuuli jawantu. Akamukwashañaku kudi a 144, 000 akayuulañayi nawu atondawu hadi antu. (Chimwekeshu 5:9, 10; 14:1, 3) Wakazata nañovu kulonda yakashikiji nkeñelu yaNzambi hanu heseki. Yumanyi yakayililawu antu ashakama heseki kudi Wanta waNzambi?

• Wakafumishahu yikatu nikufwa. “Mwenimbu hakahosha nindi ‘Ami nakataku,’” nawa “kufwa hikwakekalaku cheñiku.”—Isaya 33:24; Chimwekeshu 21:4.

• Wakaleta kuwunda nikukiñewa. “Kuwunda kwakamonawu anyaneyi kwakasweja,” nawa “akashakama iwu mwishina damuvinyu windi, iwu mwishina dachikuyu chindi; kwosi wakayitiyisha womaku.”—Isaya 54:13; Mika 4:4.

• Wakayinka nyidimu yayiwahi. “Antu ami inatonda akaluña luñe-e nanyidimu yamakasawu. Hiyakakabakana chamukunkulwayuku.”—Isaya 65:22, 23.

• Wakafumishahu yuma yejima yaletaña wubanji. “Niisaña nimpata yakadi antu yakatiya kuwaha; ikuna dakazañalala dakakenuka neyi wuluya walubanji.”—Isaya 35:1.

• Wakadizisha antu yuma yatela kwilawu hakwila akashakami haya nyaaka. “Iwu diwumi wahaya nyaaka, wakukwiluka eyi Nzambi walala wumu hohu, ninowu iwatemesheli Yesu Kristu.”—Yowanu 17:3.

Nzambi nakukeña nindi mwakadiluñishi iyi yuma yayiwahi. (Isaya 48:18) Chibaaba chinalondelihu chakahosha hayuma yimunateli kwila hakwila nawu mwakekali hakachi kawantu akadiluñisha iyi yuma.