Katataka, neyi nfulumendi yaNzambi yamwiwulu yinatachiki kuyuula antu ejima, hamaseki hakekala muzañalu chakwila antu ejima akashakamaña mukunuñañana, hakekala yuma yayiwahi nawa akazataña nyidimu yayiwahi. Nzambi wamutonda Yesu Kristu kulonda yakayuuli iseki. Kwambukaku nawanyuuli amavulu amakonu, Yesu wakayililaña antu akayulañayi yuma yayiwahi. Chiyuulu chindi chikashindamena hakukeña, luwi niwushona nawa wakekala Mwanta wamuwahi.—Isaya 11:4.

Antu akekala mwituña dadiha hiyakadambula mumatuña hela munyichidiku. Ejima akekala anuñañana. (Chimwekeshu 7:9, 10) Antu ejima akashakamaña hamaseki akamukeña Nzambi niakwawu antu nawa akazatilaña hamu hakushikija nkeñelu yaNzambi yatachi yakuhemba chiwahi mukala wawu, iseki.—Masamu 115:16.

Neyi Wanta waNzambi wunatachiki kuyuula iseki, Nzambi wakawahisha janchilu, yuma yejima yikekala chiwahi. (Masamu 24:1, 2) Yesu chawundishiliyi mpepela yafwana, wamwekesheli yuma yinateli kwilayi nañovu yaNzambi. (Maku 4:39, 41) Hampinji yakayuulañayi Kristu kwakela wanyi wubanji wadimwekenaña. Hakayuulaña Wanta waNzambi, wejima wetu twakashakamaña mukuwunda nawanyama nawa kwosi wakakisaña isekiku.—Hoseya 2:18.

Antu ejima akekala akola kumujimba. Kwosi muntu wukakataña, kushinakaja hela kufwa. (Isaya 35:5, 6) Antu akadiluñisha mukala walubanji nawa wakadi majilu neyi mwashakamineña antu atachi mwitempa daEdeni. Neyi chochichadiña muEdeni, mwituña dadiha, iseki dakasoñaña yakuda yayivulu nawa antu ejima akashakamañamu akekala nayakuda yayivulu. (Kutachika 2:9) Kufwana muza waNzambi wakushankulu wawaIsarela, antu ejima muParadisa ‘akadaña yakudya yawu nakwikuta.’—ALevi 26:4, 5.

Hakayuulaña nfulumendi yaNzambi kaayi kejima, antu ejima akekala mukuwunda nawa akaditiyilaña luwi nikudakamena. Kwakekala kwosi majita hela kuzatisha wuswa chatama nawa antu ejima akekala nayuma yakeñañawu. Bayibolu yashiika nawu: “Akashakama iwu mwishina damuvinyu windi, iwu mwishina dachikuyu chindi; kwosi wakayitiyisha womaku.”—Mika 4:3, 4.

Yisaka yejima yakekala namatala awu hiyakakamaña nawu akujimbesha matala awuku nawa nyidimu yejima yakazatañawu yikekala yayiwahi. Neyi chahosha Bayibolu nawu, antu akashakamaña mwituña dadiha daNzambi, “hiyakakabakana chamukunkulwayuku.”—Isaya 65:21-23.

Bayibolu yatushiika nawu: “Iseki dejima dakawanina kumwiluka Yehova.” (Isaya 11:9) Antu akekala muWanta waNzambi, akadizila kumaana abulaña kukuma akwetiyi Nleñi yawu, Yehova nikuyuma yayiwahi yaleñeliyi. Hiyakazatishaña maana awu kutuñilamu yitwa yanjita hela kukatisha antu amakwawuku. (Isaya 2:4) Ilaña, akeluka chakushakama mukuwunda wumu namukwawu nichakuhemba iseki.—Masamu 37:11.

Nzambi wazatili nañovu kuloñesha iseki kulonda tudiluñisheña chihandilu chachiwahi mafuku ejima. Wakeñaña nindi antu akashakameña hamaseki haya nyaaka. (Masamu 37:29; Isaya 45:18) Hakwila yakeli mwakaniniyi Nzambi ‘wakaminya kufwa chahaya nyaka.’ (Isaya 25:8) Bayibolu yakana nawu: “Kufwa hikwakekalaku cheñiku, nawa hikwakekala cheñi kudishona, kudila hela kukataku.” (Chimwekeshu 21:4) Nzambi wakayinka antu ejima akapuluka hakajilumunayi kanu kaayi katama niantu ejima akasañulayi mwituña dadiha dinakwinza kukooleka kwakushakama haya nyaaka.—Yowanu 5:28, 29; Yilwilu 24:15.

 Nichayinu mpinji, antu amavulu anakudiloñesha kushakama muWanta waNzambi wudi kwakwihi nakwinza. Hela chakwila awanina wanyi, anakuzata nañovu kulonda ekali antu etejayi Nzambi kushakama mwituña dindi dadiha. Munjilanyi? Kuhitila mukumwiluka Yehova Nzambi ninowu atemesheliyi Yesu Kristu.—Yowanu 17:3.

Ilukenu nsañu yayivulu yinakuhosha chimunateli kupuluka hakukuma kwakanu kaayi nichimukashakama mwituña dadiwahi dinakwinza katataka. Itejenu kudiza Bayibolu chakuhanjeka nawaYinsahu jaYehova, kuzatisha mukanda waMunateli Kwikala naMuzaalu Haya Nyaaka!