Komana Kanu Kaayi Kakakuma?
Hadaha mweluka chahosha Bayibolu nawu kaayi kakakuma. (1 Yowanu 2:17) Komana chumichi chinatalishi mukwila nawu Bayibolu yahosha nawu hamaseki hakekala wanyi antu? Komana Iseki akadijilumuna chikupu chakwila hihakashalahu chuma hela chimu chikweti wumiku?
ÑAKWILU YAMUBAYIBOLU YANAWA MALWIHU EJIMA AYEDI YIDI YAKWILA NAWU INEHI!
Yumanyi Yikabula Kukuma?
ANTU
Chahoshaña Bayibolu: Nzambi “wadileñeli [iseki] dibuli kwikala damukunkulwayi wadiwumbili mushakami antu.”—ISAYA 45:18.
ISEKI
Chahoshaña Bayibolu: “Ikiñu dawantu dimu hidikuya, ikiñu dikwawu hidikuhiñamu, iseki saña dashakamina haya nyaka.”—MUKWAKUTAÑISHA 1:4.
MUCHATALISHA: Kwesekeja naBayibolu, iseki hiyakadijilumunaku, dikatwalekahu haya nyaaka nawa antu akatwalekahu kushakamahu. Hanu dinu, kukuma kwakaayi kwatalisha mudihi?
TOÑOJOKENU HACHUMICHI: Bayibolu yesekeja kukuma kwakanu kaayi nachuma chamwekeni mumafuku aNowa. Hayina mpinji, iseki ‘denzeli namadombu.’ (Kutachika 6:13) Hela chochu, Nowa wadiña waloña. Dichi Nzambi wamukiñili Nowa nichisaka chindi, ilaña wayijilumwini antu atama nadibaji. Bayibolu yashimuna chuma chamwekeni haniyi mpinji nayu: “Kaayi kamuyina mpinji kajilumukili hampinji yikenzelelimu namenji.” (2 Petulu 3:6) Dikwadiña kukuma kwakaayi kadiñaku hayina mpinji. Hanu yumanyi yajilumwiniwu? Antu diwu ajilumwiniwu heseki bayi isekiku. Dichi Bayibolu neyi yinakuhosha hakukuma kwakaayi, hiyahoshaña hakujilumuka kwesekiku. Ilaña yahoshaña hakukuma kwawantu atama adi hamaseki ninshakaminu yachu.
Yumanyi Yikakuma?
MAKABI NIKUTAMA
Chahoshaña Bayibolu: “Hakuleha chanti muntu watama hakekala nawa mwokuku; mwalala, wakakeñakeña hindi hadiñilañayi, hihakamwekanaku. Ilaña akwakudizoza akaswana ituña, akatiya kuwaha nankashi nakushakama chachiwahi chamwena.”—MASAMU 37:10, 11.
MUCHATALISHA: Dibaji damumafuku aNowa hidafumishilihu kutama haya nyaakaku. Hanyima yadibaji, antu atama atachikili cheñi kukabisha antu. Hela chochu, katataka Nzambi keña yafumishihu kutama. Neyi chahosheliyi ñimbi yamasamu nindi: “Muntu watama hakekala nawa mwokuku.” Nzambi wakafumishahu kutama kwejima kuzatisha Wanta windi, nfulumendi yayulilaña mwiwulu yikayulaña antu amwovwahilaña Nzambi.
TOÑOJOKENU HACHUMICHI: Komana anlomboli amukaayi akwovwahilaña Wanta waNzambi? Bayibolu yashimuna nawu akawovwahilaña wanyi. Ilaña akadikañaña naWanta waNzambi. (Masamu 2:2) Chumanyi chikafumamu? Wanta waNzambi wakasinsa mawanta awantu nawa “wakemana mbe haya nyaka.” (Danyeli 2:44) Muloñadi chiyuulu chawantu chichatela kukumina?
CHUMA CHITUNAKUKEÑA NIMULOÑA WAWENI—Kufumishahu Chiyuulu Chawantu.
Chahoshaña Bayibolu: “Mudi muntu wendaña himwekala yakuyula nyendu yinduku.”—YEREMIYA 10:23.
MUCHATALISHA: Antu hiyayileñeli nawu adiyuuleña aweniku. Akañanyaña kuyuula akwawu nikuyimanishila kukala kwawu.
TOÑOJOKENU HACHUMICHI: Mukanda waBritannica Academic wahosha nawu nfulumendi yakañanyaña “kumanisha wuzweñi mukaayi, nzala, yikatu, wubanji wadimwekenaña, njita niwubanji wukwawu.” Watwalekahu cheñi nawu: “Antu amakwawu . . . akuhwelela nawu nfulumendi yimu hohu diyi yinateli kufumishahu kukala mukaayi kejima.” Dichi hela chakwila nfulumendi jejima jikukwatankana, kaayi akutwalekahu kukayuula kudi antu abula kuwanina anakukañanya kumanisha kukala kutunashimuni hewulu. Wanta waNzambi hohu diyi nfulumendi yikweti ñovu chikupu yakumanisha kukala kwejima haya nyaaka.
Dichi, kwesekeja nachinahoshi Bayibolu, kukuma kwakaayi, nshakaminu yamakonu, hichuma chatela kutiyawu antu amawahi womaku. Ilaña hichuma chitunakutalila muloña kanu kaayi kanakisañaniwu akakasinsa kudi kaayi kaNzambi kakaha!
Yumiyi yikamwekana mpinjinyi? Chibaaba chinalondelihu chikushimuna ñakwilu yamuBayibolu.
You May Also Like
KAPOSHI KAKUTALILA
‘Kukuma’—Komana Kwatalisha Mudi?
Komana mweluka nenu nsañu yahosha Bayibolu ‘hakukuma’ hinsañu yayiwahi?
