Nasemukilili muMulhouse, kumusela waFrance, mukamukala kanyanya mwekala mandombu nankashi. Kufuma tuhu kuwansi wami yitoñojoka yami yadiña hohu yamadombu nawantu amuchituñilu. Muchisaka chetu, ambanda ayilemesheleña wanyi nawa kwosi amayala enhwileña ambanda neyi kudi chuma chinakukeña kwilawu. Kufuma kuwansi, anlejeleña nawu ambanda mudimu wawu wakuchinsambu nakwakamena amayala nianyana.

Chihandilu chami chakuwansi chadiña chakala. Atata afwili nawalwa hinadiña nayaaka ikumi. Chimwahitili yaaka 5, yaya wumu wadijahili. Chaaka chochimu, nammweni wupondi wamwekeni muchisaka nawa chumichi chanhayamishili chikupu. Antaña jami andizishili chakuzuña ndombu kuzatisha mapoku nimata. Chinekalili chiluwañimbi, natachikili kudichata mujimba wejima nanchatu nikunwa walwa.

Chinashikijili yaaka 16, nanwineña mabotolu awalwa 10 hela 15 hefuku nawa hashimbwili wanyi natachikili kuzatisha yitumbu yashetana. Hakwila nitwalekuhu nayilwilu yami yatama, nalandishileña yikuñu chakwila natachikili kwiya. Chinashikijili yaaka 17 adiña ankasahu dehi mukaleya. Ankasili mapampa 18 muloña wawukombi nimadombu.

Chinadiña muyaaka yamuma 20, chihandilu chami chatamini chikupu. Nanwineña tushiki twadamba 20 nawa nazatishileña yitumbu yikwawu yashetana. Kakavulu nakeñeleña kufwa muloña wakusweja kuzatisha yitumbu yashetana. Natachikili kulandisha yitumbu yashetana nawa nendeleña hohu najimpoku nimata. Ifuku dimu, nakeñeli kuloza muntu, kukooleka chidaña chakwatili hachikuñu chamushipi windi nakupempuka. Chinashikijili yaaka 24, amama afwili nawa naswejeli kuzuwa. Antu akweti woma neyi ammona inakwinza, atemukileña nakuya kwishinadi damukwakwa. Hamuloña wakusweja kuzuña, nakamineña mumasewuzi hela muchipatela kunsa yamulungu nakunchima yilonda.

Chinashikijili yaaka 28, nasumbwili. Neyi chimuneluki namulemesheleña wanyi ñodami. Namutukileña nikumuhumpula  chikupu. Hitwelilileña yuma hamu neyi adisumbulaku. Natoñojokeleña nami nukumwinkaña hohu yingelingeli yakwiya. Nkumininaku, kwamwekeni chuma chinabulili kukuhwelela. Ñodami watachikili kudiza Bayibolu nawaYinsahu jaYehova. Chadiziliyi katachi, walekeli kunwa makanya, walekeli kutambula mali inamwinkeleña akwiya nawa wanfuntishilili yingelingeli yinamwinkeleña. Nahilili chikupu. Namukañesheleña kudiza Bayibolu nawa namufutumwinineña wishi wamakanya kumesu. Cheñi namusawileña hakachi kawantu amuchituñilu.

Ifuku dimu nawufuku, iku nasheti, nocheli itala detu. Ñodami wampulwishili ami nimwanetu wayaaka 5 mukesi.

Walwa chinwamanini mumutu, natachikili kudinka nyiloña. Mumuchima wami, natoñojokeli nami Nzambi hanateli kuñanakenaku. Nanukili mpinji yimu yahosheleñayi mukakwitiya wumu nindi antu atama ayaña muhelu. Nawa ndotolu yami wanlejeli nindi, “Eyi kweyi chinamani. Wukahanda wanyi.”

Chelili itala dinahi dehi, twabuukilili kwawanvwali jañodami. A Yinsahu chiyenjili nakumutala ñodami, nayihwili nami, “Nzambi nateli kuñanakena nshidi jami jejima?” Antañilili 1 Akorinda 6:9-11 muBayibolu. Haniwu mukanda ashimunahu yilwilu yahelayi Nzambi, hahosha cheñi nawu: “Ninenu amakwawu dichi chimwadiñi.” Awa mazu amwekesheli nawu natela kuhimpa. Kuhiñahu, aYinsahu anlejeli nawu Nzambi wankeña, antañilil 1 Yowanu 4:8. Natiyili kuwaha, nayilili aYinsahu nami andizisheña Bayibolu kayedi mumulungu nawa natachikili kuya nakupompa nawu. Nalombelaña mpinji yejima kudi Yehova.

Mudi kakweji kamu, nalekeli kuzatisha yitumbu yashetana niwalwa. Natachiki kutiya neyi mumujimba wami mudi ndombu. Naloteleña yilota yatama, mutu wakatileña, mwivumu, mavuku niyikatu yikwawu. Hampinji yoyimu, natiyileña neyi Yehova nakunkwata kuchikasa nikunkolesha. Natiyili neyi chatiyiliyi kapostolu Pawulu. Kwesekeja nachamukwashiliwu Pawulu kudi Nzambi, wasonekeli nindi: “Natweshi kwila yuma yejima mudi yena wankoleshaña.” (Afwilipi 4:13) Chimwahitili mpinji, nalekeli kunwa makanya.—2 Akorinda 7:1.

Bayibolu yinankwashi kuwahisha chihandilu chami nichisaka chetu. Nalekeli kumukabisha ñodami. Natachikili kumulemesha nikuhosha mazu adi neyi “mwani” “ninasakililiku.” Nekalili cheñi tata yawantu wamuwahi kudi mwanetu wamumbanda. Hanyima yakudiza Bayibolu hadi chaaka chimu, nadihanini kudi Yehova nawa napapatisheweli, nembujoleli chakutalilahu chañodami.

Neluki nami nshimbi yamuBayibolu yinahandishi. Niantaña jami abula kwikala aYinsahu elukili nawu kachi nafwa dehi nayitumbu yashetana hela kunjaha muloña wamadombu.

Chihandilu chami chahimpikili chikupu nantañishilu yamuBayibolu yashimuna mudimu wanami iyala hamu neyi tata yawantu. (Aefwesesa 5:25; 6:4) Twatachikili kuzatila hamu neyi chisaka. Chayinu mpinji, chatela nimwileña ñodami nami yazatileña hohu muchinsambu, twatiyaña kuwaha kushimwina hamu mumudimu wampinji yejima. Niyena watiyaña kuwaha kunkwasha mumudimu wunazataña neyi eluda muchipompelu.

Luwi niwushona waYehova Nzambi wunankwashi chikupu muchihandilu chami. Nidi nampwila yakushimuna yilwilu yaYehova kudi antu amonañawu nawu amukunkulu, muloña dichammweneñawu ninami kudi antu amavulu. Neluki nami Bayibolu yikweti ñovu yakukwasha wudi wejima kwikala nachihandilu chachiwahi nawa chikweti nkeñelu. Bayi neyi Bayibolu yinankwashi hohu kukeña nikulemesha amayala niambandaku, ilaña yinankwashi nikudilemesha amaweni.