IMBUJOLENU CHIKUHWELELU CHAWU | REBEKA
‘Neteji Kuya’
REBEKA washinshikileña mpata yamalola nawa yanyitondu yanti nampinji yamelela. Hanyima yakwenda hadi nyilungu yantesha, watachikili kwinjilila kushakama hanyima yangameli. Mukala wasemukililiyi waHarana washalili kwakulehi chikupu, kukabeta kaluwunda namusela. Hadaha hakamonahu cheñi chisaka chindiku. Watoñojokeleña nankashi chakahandañayi sweje-e chashikiliyi kwakwihi nakwayileñayi.
Mukanka wawantu niatunyama wahitili muKenani nakuketwisha maluña atama akuNegebi. (Kutachika 24:62) Hadaha Rebeka wamweni anyikoku. Idi ituña dadiña isaña hohu datama kudimamu, ilaña dadiña iluña dadiwahi kuhembelamu ayimuna. Dadiña iluña dawinimbu kudi muntu wamulombweleña. Wadiña nansañu yayiwahi yayileñayi nakumuleja mwanta windi nindi Rebeka wukwikala ñoda ñoda Isaka. Rebeka watela wajinokeleña nindi kwiji wakahandaña ñahi munidi ituña. Indi nfumwindi Isaka wadiña nachineñi wukusumbukayi nindi wudi ñahi? Kanda adimoneñahu dehi. Wukutiya kuwaha neyi yamumona Rebeka? Rebeka wukutiya ñahi neyi yamumona Isaka?
Mumatuña amavulu makonu, ntanjikilu yakuya nakumusumbwila muntu mumbanda yekalaku wanyi. Ilaña kumaluña amakwawu yekala kwoku. Hela chakwila chisemwa chenu cheteja hela nehi, mukwiteja nenu Rebeka wayileña nakusumbuka namuntu wabulili kwilukayi. Wadiña mumbanda wahamuka chikupu nawa wachikuhwelelu. Twatela kwikala naniyi yililu neyi chihandilu chetu chinahimpiki. Kudi yililu yikwawu yayiwahi yamwekeshaña nawu Rebeka wadiña nachikuhwelelu.
‘NIYITAHILI CHEÑI ANGAMELI JEYI MENJI’
Chihandilu chaRebeka chahimpikili munjila yamwekeneña neyi chochekala yuma yejima. Wakulilili muHarana hela kwakwihi naHarana, musumba wamuMesopotamiya. Anvwali jindi adiña ambukaku chikupu nawantu amuHarana. Hiyadifukwileña kudi Sin nzambi wakakwejiku. Ilaña Yehova diyi wadiña Nzambi yawu.—Kutachika 24:50.
Rebeka wadiña kankaña wasweja lubanji. ilaña wadiña wawunda nawa wabula kudivwimba. Wadiña wadikita nawa wadiña nayilwilu yayiwahi. Chisaka chawu chadiña chaheta nawa adiña nawañamba, ilaña Rebeka hiyamuleleleña hela kumuhemba neyi mwana kamwantaku; amudizishili kuzata nyidimu chikupu. Neyi chazatileñawu anyana awambanda munana mafuku, Rebeka wadiña nanyidimu yayivulu yakuzata kushilahu nikutaha menji. Namelela, wanoneleña nsaba nakusha hachifwiji hakuya nakutaha menji kwishima.—Kutachika 24:11, 15, 16.
Ifuku dimu namelela iku natahi dehi menji, mukulumpi weyala wenjili lufuchi nakumuwana. Wamwilili nindi: “Anyinkuhu mwani, tumenji twantesha twamunsaba yeyi ninwi.” Walombeli nakavumbi nawa munjila yayiwahi. Rebeka welukili nindi iwu iyala nafumi kwakulehi. Watulili nsaba yindi swayi-swayi nakumwinka iwu iyala menji, bayi neyi tumenjiku ilaña menji amavulu akunwa nawa atuuta. Wamweni nindi iwu iyala wadiña namukanka wawangamela ikumi adiña kwakwihi nawa chizawu chamenji chadiña kanda achinzeshi namenji akuyinwisha. Wamweni nindi iwu iyala wabokweli nakumutala nawa wakeñeleña nindi yamukwashi chikupu. Wahosheli nindi: ‘Niyitahili Kutachika 24:17-19.
cheñi angameli jeyi menji, nichiyakumanishawu kunwa.’—Rebeka hatahili tumenji akunwisha angamela ikumi hohuku, ilaña watahili menji amavulu akunwa angameli ejima. Neyi ngameli wumu nazeyi chikupu, nateli kunwa malita amenji akubadika ha 95. Neyi angameli ejima ikumi adiña nampwila dikwila nawu Rebeka watahili menji hadi maora amavulu. Neyi chinamwekeshiwu, angameli afwili mpwila chikupu. * Komana Rebeka welukili nindi angameli ejima afwili mpwila? Inehi. Wakeñeleña hohu kukwashana, wafwilileña chikupu kuzata hakumina ñovu jindi kulonda yamwekeshi chisambu kudi iwu mukulumpi wabulili kwilukayi. Iwu iyala watiyili kuwaha. Dichi wadiña nakumushinshika chadiña nakwilayi yataha menji yahuñunwina muchizawu, yafunta cheñi lufuchi nakutaha amakwawu nakuhunwinamu cheñi.—Kutachika 24:20, 21.
Rebeka wadiña wadikita nawa wachisambu
Chuma chakoñeliyi Rebeka chatukwashaña makonu. Tunakushakama mumpinji yinaswejuwu antu lwisu. Neyi chiyashimwineñahu dehi, antu anekali ‘akwakudikeña aweni,’ abulaña kukwasha akwawu. (2 Timotewu 3:1-5) AkwaKristu anakufwila kutondolwelela ichi chilwilu atela kutoñojoka hachuma cheliliyi iwu kankaña wamumbanda washimunawu muBayibolu, watahileña menji kwishima.
Rebeka welukili chikupu nindi iwu mukulumpi wadiña nakumushinshika. Eliyeza chamushinshikileñayi Rebeka hamufwilileñaku, ilaña wahayamini nawa wazañaleli. Chamanishiliyi Rebeka kutaha menji, amwinkeli yawaana, yingelingeli yayiwahi. Kuhiñahu, wamwihwili nindi: ‘Indi eyi wumwana kanyi? Anleji mwani. Kwitala dawatata yeyi kudihu kwakushikena?’ Rebeka chamulejeliyi nsañu yachisaka chawu, Eliyeza wazañaleli chikupu. Hadaha washikeneni kwiteja nindi: ‘Kwetu kudi nimatahu awuma amavulu niyadya yayivulu, nikwakukama antu kudi kwoku,’ wetejeli munjila yayiwahi, chayileñawu akwawu naniwu mukulumpi. Rebeka wayili lufuchi nakuleja mama yindi yuma yamwekeni.Kutachika 24:22-28, 32.
—Chakadi nikujina, Rebeka amudizishili kutambwila antu. Ichi dichuma chinakubula kumwekana makonu, chitwatela kwimbujola chikuhwelelu chaniwu kankaña wadiña naluwi. Neyi tumukuhwelela Nzambi tukwikala nachisambu. Yehova wekala nachisambu muloña wenkaña antu ejima nawa wakeñaña nindi akwakudifuukula indi eleña momumu. Neyi tumwekesha chisambu kudi antu akabula kutukwasha, tukumuzañalesha Tata yetu wamwiwulu.—Matewu 5:44-46; 1 Petulu 4:9.
‘KAMUSUMBWILI MWANAMI MUMBANDA’
Ona mukulumpi weyala wadiña heshima hinyi? Wadiña ñamba yaAbarahama, manakwa nkaaka yaRebeka weyala. Dichi, amutambwilili kwitala daBetuweli, tata yaRebeka. Iwu ñamba hadaha wadiña Eliyeza. * Amwinkeli yakuda, ilaña wakanini nindi chiña yasambili kushimuna mujimbu wendeleliyi. (Kutachika 24:31-33) Tunateli kufwikija chahosheleñayi iku nazañalali, chamweniyi ñovu yaNzambi yindi, Yehova, chiyamukwashili hanilu lwendu lwalema. Munjilanyi?
Fwikijenu chadiña nakulumbululayi Eliyeza iyi nsañu, iku tata yaRebeka Betuweli nimana kwaRebeka Labani anakutiyilila nakanañachima. Wayilejeli nindi Yehova wamukiswili chikupu Abarahama muKenani nawa Abarahama niSara avwalili mwana weyala, Isaka, wakaswana maheta ejima. Abarahama wamwinkeli iwu ñamba mudimu walema: Wakumukeñela Isaka mumbanda hakachika kawantaña jaAbarahama akuHarana.—Kutachika 24:34-38.
Abarahama wamusanyikishili Eliyeza nindi bayi yakamukeñela Isaka mumbanda wamuKenaniku. Muloñadi? Muloña aKenani hiyamulemesheleña hela kudifuukula kudi Yehova Nzambiku. Abarahama welukili nindi Yehova wakayijilumuna awa antu mukuhita kwampinji muloña wayuma yatama yelileñawu. Abarahama hakeñeleña mwanindi wakeñeliyi, Isaka, yadibombi nanawa antu elileña yuma yatamaku. Welukili cheñi nindi mwanindi wadiña namudimu walema wakushikija yikaninu yaNzambi.—Kutachika 15:16; 17:19; 24:2-4.
Eliyeza watwalekelihu nakuyileja atata yaRebeka nimanakwindi nindi chashikiliyi heshima kwakwihi naHarana, walombeli kudi Yehova Nzambi. Wamulombeli Yehova yamukwashi kumutondela Isaka mumbanda wakusumbula. Munjilanyi? Eliyeza wamulombeli Nzambi nindi mumbanda wunakukeñayi nindi Isaka yamusumbuli watela kwinza heshima. Chikumulombayi menji, wukwiteja kumwinka Eliyeza nikunwisha angameli jindi. (Kutachika 24:12-14) Hinyi wenjili nawa wazatili iwu mudimu? Rebeka! Fwikijenu chadi kutiyayi Rebeka neyi chakwila watiyiliku chalumbulwileñayi Eliyeza iyi nsañu kuchisaka chindi!
Betuweli niLabani atiyili kuwaha nansañu yashimwineñayi Eliyeza. Ahosheli nawu: ‘Chumichi chinafumi kudi Yehova.’ Kwesekeja nachisemwa, akunkulwili nawu akumusumbwisha Rebeka kudi Isaka. (Kutachika 24:50-54) Komana chumichi chayili mukwila nawu Rebeka hateleleli kuhoshahuku haniyi nsañu?
Henohu kunashali dehi nyilungu yantesha, Eliyeza wahosheli iyi nsañu naAbarahama kuhitila mukumwihula, nindi: ‘Indi neyi mumbanda yakakaana kwinza nanami?’ Abarahama wakwili nindi: ‘Eyi wakayiña nakusanyika kuwunasanyiki.’ (Kutachika 24:39, 41) Kwitala daBetuweli niwena ahosheluhu nsañu yakumwihula yomweni kansi wamumbanda neyi wukwiteja. Eliyeza chamweniyi nindi yuma yendeleliyi yinawahi, chikwachili walombeli nindi yafunti swayi-swayi kuKenani naRebeka. Ilaña chisaka chaRebeka chakeñeli nawu ashakamiku ntahi hadi mafuku ikumi. Hakwila amanishi iku kukala, elili nawu: ‘Tutambiki chañadima tutiyi mukanwa kindi yomweni.’—Kutachika 24:57.
Rebeka washikili hampinji yakufuukulahu yuma yalema muchihandilu chindi. Wukuhosha nindidi? Wadi kutachika kuyilembelela atata yindi namanakwindi nindi kulonda yabuli kuya kwiluña dabulili kwilukayi? Indi kwiji wukwiteja nindi hikukooleka Kutachika 24:58.
kwakwovwahila wunlomboli waYehova wayuma yakamwekana? Chakwiliyi, wamwekesheli chatoñojokeleñayi hanichi chuma chakala chamwekeni mukukashimwisha, chikuhimpa chihandilu chindi. Wakuminini dakuhosha nindi: ‘Neteji kuya.’—Wadiña nachikuhwelelu chakola chikupu. Makonu, yisemwa yetu kutalisha hamaluwi yambuka chikupu, ilaña tunateli kudiza yuma yayivulu kudi Rebeka. Chuma chalemesheliyi Rebeka, hikwila mwakeñeliyi Nzambi yindi, Yehova, bayi yenaku. Makonu neyi hitukukeña kusumbula hela kusumbuka, Izu daNzambi datukwashaña, kutalisha hadi muntu imunakukeña kusumbula hela kusumbuka nindi nichimunateli kwikala iyala hela mumbanda wamuwahi. (2 Akorinda 6:14, 15; Aefwesesa 5:28-33) Twatela kwimbujola chakutalilahu chaRebeka chakwila yuma yakeñañayi Nzambi.
‘ONA IYALA HINYI?’
Chisaka chaBetuweli chamukiswilili Rebeka. Kuhiñahu, yena ninleli yindi Debora niañamba amakwawu awambanda ayilejeli kuya naEliyeza hamu niantu jindi. (Kutachika 24:59-61; 35:8) Chihahitili kapinji kantesha, afumini muHarana. Ilu lwendu lwadiña lwalulehi, lwamakilomita 800 hela kubadikahu, hadaha endeli hadi nyilungu yisatu. Lwadiña lwendu lwakala chikupu. Rebeka wadiña wamonahu dehi angameli amavulu, dichi hitunateli kukuhwelela netu wadiña weluka wanyi kwendela hangamelaku. Bayibolu yashimuna nawu chisaka chawu chadiña chawatubiña, bayi akwakulanda nakulandulula endesheleña makalu awa ngameliku. (Kutachika 29:10) Akwakwenda hangameli abaña hela chakwila anendi hohu kadiluña kantesha.
Hampinji yayileñawu, Rebeka watalileña hohu kumbidi, wakeñeleña Eliyeza yamuleji yuma yayivulu hadi Isaka nichisaka chindi. Fwikijenu hampinji yoteleñawu kesi nawufuku heteku, Eliyeza nakumuleja Rebeka chikaninu chamukaniniwu Abarahama kudi Yehova ibwambu Dindi. Nzambi wakafumisha mwana muchisaka chaAbarahama wakaleta nkisu kudi antu ejima. Toñojokenu muzañalu watiyiliyi Rebeka chelukiliyi nindi chikaninu chaYehova chikashikijewa kuhitila mudi nfwimwindi Isaka nimudi yena nawa!—Kutachika 22:15-18.
Rebeka wamwekesheli chilwilu chakudizoza chabulaña kumwekeshawu antu amavulu
Nkumininaku, ifuku dashikili ditwashimuna kumatachikilu achinu chibaaba. Chapandakeniwu mumukala waNegebi iku itena hidikuhuma, Rebeka wamweni muntu nakwendujola mwisaña. Wamwekeneña neyi kudi yuma yinakutoñojokayi. ‘Wasulukili hangameli swayi-swayi,’ nawa twatañaña nawu, hadaha wasulukili chakadi nikuhembelela ngameli yafukami nawa wamwihwili muntu wamulombweleña nindi: ‘Ona iyala wunakwenda mumpata wunakwinza nakutukinkilila hinyi?’ Chiyamulejeluwu nawu Isaka diyi, wadibutili ihina dindi kumesu. (Kutachika 24:62-65) Muloñadi? Ichi chadiña chinjikijilu chakumwekesha kalemesha kudi nfumwindi wukumusumbula. Antu amakwawu makonu anateli kuhosha nawu kalemesha kamuchidiwu hiyaaku yakunyima. Mwamweni, hela chakwila amayala nawambanda anateli kudizilaku kukudizoza kwaRebeka, hadi etu ejima wetu hinyi wabulaña kukeña nindi amulemesheña?
Isaka, iyala wadiña nayaaka 40, wachidiña nakumudila mama yindi Sara wafwili, henohu munahiti dehi yaaka yisatu. Tunateli kwiteja netu Isaka wadiña iyala wamuwahi nankashi. Isaka wakoolekeli chelili amusumbwili mumbanda wadikita, wachisambu nawa wadizoza! Ashakamini ñahi? Bayibolu yashimunaña nawu: “Wamukeñeli.”—Kutachika 24:67; 26:8.
Anetu nawa hela chakwila munahiti dehi nkulakaji yayaaka 39, tunateli kwiteja netu chadiña chapela kumukeña Rebeka. Yumanyi yitunateli kudizilaku kukuhamuka, kudikita, chisambu nikudizoza kwindi? Wejima wetu, atwansi, akulumpi, amayala, ambanda, adimumaluwi hela ajiki, twatela kwimbujola chikuhwelelu chindi.
^ par. 10 Kwadiña kwela dehi melela. Kwosi wunsahu wamwekeshaña nawu Rebeka washimbwili kwishima. Kwosi hashimunawu cheñi nawu chisaka chindi chakamini hampinji yamanishiliyi kutaha menji, hela nawu kwenjili muntu nakumutala muloña washimbwiliku.
^ par. 15 Eliyeza hiyanamuteni muniyi nsañuku, hadaha diyi ñamba atuminuwu. Ifuku dimu Abarahama wafuukwili kumushila Eliyeza maheta neyi kwakabula kwikala nswana, Eliyeza diyi wadiña mukulumpi nawa akuhweleleliyi hakachi kawañamba jindi. Ichi dichamulumbululawu iwu ñamba muniyi nsañu.—Kutachika 15:2; 24:2-4.