Neyi Nzambi diyi waletaña wanyi nzala yakapwelendendi, wuzweñi wabulaña kumana, majita, yikatu niwubanji wadimwekenaña, hanu dinu jafumaña kudihi? Izu daNzambi Bayibolu dahosha kwafumaña makabi:

1. Kudikeña, Lwisu niKuhelañana. ‘Muntu wayuulaña mukwawu muntu kulonda yamukatishi.’ (Mukwakutañisha 8:9) Antu akabakanaña muloña ayikabishaña kudi antu abula kuwanina, abula kukeña akwawu nawa akweti lukambu.

2. Mpinji Nakululakana. Antu akabakanaña muloña “mpinji nakululakana chayilulakenaña tuhu wejima wawu.” (Mukwakutañisha 9:11) Dichi antu ekalaña heluña dabula kutelela hampinji yabula kutelela, maposu amwekanaña, antu ashañaku maana wanyi nawa aluwañeshaña.

3. Nyuuli Wakaayi Watama. Bayibolu yahosha chuma chacheni chaleteshaña makabi. Yahosha nawu: “Kaayi kejima kadi mumakasa awatama.” (1 Yowanu 5:19) Iwu “watama” diyi Satana Diyabolu, chileñaleña chakuspiritu chañovu wadiña kañelu kaNzambi hakusambila ilaña “hatwalekelihu kwenda muchalalaku.” (Yowanu 8:44) Yileñaleña yikwawu yakuspiritu yadibombeli naSatana nawa yadikañili naNzambi kulonda yili yuma yakuditiyisha kuwaha nakudiilisha kwikala andemoni. (Kutachika 6:1-5) Kufuma tuhu hadikañiliwu, Satana niademoni jindi analuwañeshi nankashi kaayi. Chumichi chinakumwekana nankashi makonu. Nawa Satana nahili chikupu nawa “nakuluwañesha antu ashakama hamaseki hejima,” dichi chinakojeji ‘yihuñu kuvula hanu hamaseki.’ (Chimwekeshu 12:9, 12) Chakadi nikujina, Satana hinyuuli watama. Watiyaña kuwaha neyi antu anakukabakana. Satana diyi wakojejaña antu kukabakana bayi Nzambiku.

TOÑOJOKENU CHUMICHI: Muntu watama muchima nawa welaña yuma yatama diyi wunateli kuleta makabi. Kwambukaku, Bayibolu yahoshaña nawu “Nzambi hikukeña.” (1 Yowanu 4:8) Kwesejeka nayilwilu yindi yakukeña, “Nzambi kwila chatama kwakulehi! Chinaweji kwila yakuheña kwakulehi!”—Yoba 34:10.

Hela chochu, munateli kudihula nenu ‘Nzambi wañovu jejima wukafumishahu mpinjinyi chiyuulu chaSatana chatama?’ Neyi chitunamoni, Nzambi wahela yuma yatama nawa neyi tunakukabakana waneñaña chikupu. Kubombelahu, Izu dindi dahoshaña nawu “Muumbilenuña kwakama kwenu kwejima, muloña yena wayakamenaña.” (1 Petulu 5:7) Nzambi watukeña nawa wukweti ñovu, yakufumishahu makabi ejima niwuñaji waheña neyi chinahoshi chibaba chinalondelihu. *