Nzambi waleña nyijimba yetu nawuswa wakuduka. Neyi muntu wakola tuhu chiwahi kumujimba yadikatisha, mujimba “watachikaña kuuka chilonda cheneni hela chanyanya mujila yakuhayamisha.” (Johns Hopkins Medicine) Mujimba watachikaña kuzata hohenohu nawa mashi alekaña kwidika, nyijila yamashi yatohaña, chilonda chakusukaña nawa mujimba wakolaña.

TOÑOJOKENU CHUMICHI: Neyi chakwila Nleñi yetu waleñeli nyijimba yetu chakwila yikudukaña yayeni yilonda, kwila tumukuhwelela netu wukafumishahu wuñaji waheña nehi? Ñimbi yamasamu wasonekeli nindi, “Wakuswishaña abaluka nyichima; wakasaña hayilonda yawu.” (Masamu 147:3) Neyi chakwila munaneñi chikupu muloña wayuma yimunakuhitamu, munateli kukuhwelela nenu Yehova wakakasa chilonda chenu chayinu mpinji nikumbidi?

Nzambi wakana nindi: “Bayi wutiyaña womaku, ami nidi neyi. Bayi wuyeñashanaku, ami yami Nzambi yeyi, nakakwinkaña ñovu; chalala nakakukwashañaku.” (Isaya 41:10) Muntu weluka nindi Yehova wamwakamenaña wekalaña nakuwunda muyitoñojoka niñovu yakuumika kukala kwashiyashana. Kapostolu Pawulu wateneni iku kuwunda kwamukachi nindi “kuwunda kwaNzambi kwabadika kwiluka kwejima.” Pawulu wahosheli cheñi nindi: “Nikweti ñovu yakuhita muyuma yejima muloña wanowu wanyinkaña ñovu.”—Afwilipi 4:4-7, 9, 13.

Nsona yatukwashaña kukuhwelela yuma yakanayi Yehova kwilila antu kumbidi. Chakutalilahu, nsona ya Chimwekeshu 21:4, 5 (yinasonekiwu hefu dinalondelihu) yatulejaña yuma yakelayi nimuloña wutwatela kumukuhwelela netu wakelamu:

• “Wakakombola madilu ejima” kumesu awantu. Yehova wakafumishahu makabi etu ejima nikwakama kwabula kulema kudi antu amakwawu.

• ‘Washakama hetanda’ mukulema kwamwiwulu, Mwanta Wabadika ñovu yileñaleña yejima, wakazatisha ñovu jindi kukañesha makabi nikutukwasha mutunakankili.

• Yehova watulejaña nindi yikaninu yindi ‘twatela kuyikuhwelela nawa yalala.’ Dikwila nawu yuma yelayi dehi kunyima yamwekeshaña nawu wakashikija yikaninu yindi.

“‘Wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila hela kukataku. Yuma yakusambila yinahiti dehi.’ Nawa Owu washakamini hetanda wahosheli nindi: ‘Talaña! Inakwilisha yuma yejima yiikali yayiha.’ Cheñi wahosheli nindi: ‘Sonekaku, muloña awa mazu atelela kuyikuhwelela nawa alala.’”—Chimwekeshu 21:4, 5.

Iwulu, iseki niBayibolu yatukwashaña kwiluka yilwilu yikwetiyi Tata yetu wamwiwulu. Hela chakwila yileñaleña yatukwashaña kwikala amabwambu jaNzambi, Bayibolu yatulejaña hatooka nawu: “Swinenu kwakwihi naNzambi, niyena wukuswina kwakwihi nanenu.” (Yakoba 4:8) Yilwilu 17:27 yahosha nawu: “Hekala kwakulehi nanetu ejimaku.”

Neyi mwikala nampinji yakumwiluka Nzambi, mukwiluka chikupu nenu “wayakamenaña.” (1 Petulu 5:7) Yumanyi yayiwahi yafumaña mukumukuhwelela Yehova?

Talenu chuma chamumwekeneni Toru wakuJapan. Hela chakwila amukulishili kudi amama yindi akwaKristu, wadiñijili mukadizanvu kawamakombi kuJapan katenañawu nawu yakuza. Wahosheli nindi: “Nelukili nami Nzambi wanheleli nawa wambabeshelaña dichaletesheli akwetu akabakaneña nikufwa sweje-e antaña jami.” Toru wahosheli nindi kwikala munaka kadizanvu kwamuletesheli “yekali namuchima watama nawa wakadi luwi.” Wanukaña chuma chafwilileñayi nankashi nindi, “nakeñeleña kufwa nawansi hanyima yakujaha muntu waya mpuhu kumbadika kulonda niyi mpuhu.”

 Hela chochu, Toru nañodindi Hannah chadiziliwu Bayibolu, Toru wahimpili yilwilu yindi chikupu. Hannah wahosheli nindi, “namweni namesu ami nfumwami chahimpiliyi.” Toru niyena wahosheli chakadi nikujinoka nindi: “Kudi Nzambi watwakamenaña chikupu. Wakeñaña wanyi antu kufwa nawa wanakenaña antu abalumukaña chikupu munyichima. Watiyaña niyuma yitunateli kubula kulejaku muntu wudi wejima niyuma yikubula kutiyishawu antu. Katataka Yehova keña yafumishihu makabi ejima. Nichayinu mpinji, watukwashaña munjila yitunabuli kukuhwelela. Watwakamenaña nikutukwasha neyi tunaneñi.”—Masamu 136:23.

Chakutalilahu chaToru chamwekeshaña nawu, kwiluka netu Nzambi nateli nawa keña yafumishihu makabi ejima nikukombola madilu ejima, kwatukwashaña kuchiñeja yuma yakumbidi nawa chayinu mpinji twekalaña nachihandilu chachiwahi. Chakadi nikujina, hela mukaayi munenzali makabi, kwiluka netu Nzambi watwakamenaña kunateli kutukwasha.