Toñojokenu hawubwambu wekala nawanyana ampamba. Adikeña nankashi wumu namukwawu. Nancy Segal, mpamba nawa mukulumpi Wezanvu Dadizaña hadi Ampamba, wahosheli nindi ampamba amakwawu “elukaña munatalishi mukwawu neyi yahosha chakadi kuyilumbulwila.” Mpamba wumu wamumbanda wahosheli hawubwambu windi namuhelindi mpamba nindi: “Twadiluka chikupu.”

Chumanyi chaleteshaña adiluki chikupu? Kusandujola kwamwekeshaña nawu hela chakwila chumichi chenzaña muloña weluña nianvwali, majinizi niwena azataña mudimu weneni waleteshaña ampamba kudiluka nankashi.

TOÑOJOKENU HACHUMICHI: Nleñi waleñeli yuma yejimiyi yakuhayamisha watwiluka chikupu wejima wetu hamuntu-hamuntu. Ñimbi yamasamu Davidi wamushimekeli nindi: ‘Wannuñili chachiwahi mwivumu damama yami. Chantuñiluwu mwakujinda hiyakuswekeleyi mujimba wamuku. Chinadiñi nichidi wamwisu, mesu eyi anmweni, asonekeli mumukanda weyi yidi yami yejima.’ (Masamu 139:13, 15, 16) Nzambi hohu diyi weluka chekala nyijimba yetu niyuma yejima yatumwekenaña muchihandilu chetu yahimpa yilwilu yetu. Maana akwetiyi Nzambi abadika nichelukayi majinizi etu aleteshaña twiluki netu watwiluka nankashi.

Davidi walombeli nindi: “Eyi Yehova, wunantali chachiwahi wunañiluki. Eyi weluka nichinashakamaña, nichinanyamukaña washinshikaña munatoñojokaña neyi hiwuchidi kwakulehi. Mukanwa kami mwosi izu nidimu dakubula eyi Yehova kudiluka chikupuku.” (Masamu 139:1, 2, 4) Kubombelahu, Yehova weluka chitwatiyaña nawa “welukaña yafuukulaña yitoñojoka yejima.” (1 Kushindulula 28:9; 1 Samweli 16:6, 7) Awa mavasi anakutulejadi hadi Nzambi?

Hela chakwila tukusha yitoñojoka yetu yejima mukulomba wanyi, Nleñi yetu welukaña yitoñojoka yetu nichitwatiyaña hayuma yitunakwila. Nawa welukaña yuma yayiwahi yitwakeñaña kwila, hela chakwila twakañanyaña kwila yuma yafwilaña muchima wetu. Mwamweni, chineli Nzambi washili kukeña munyichima yetu hakutachika, watiyaña kuwaha kumona yitoñojoka yetu nichitwafwilaña kwila yuma yayiwahi.—1 Yowanu 4:7-10.

Nsona yatulejaña nawu

• “Muloña mesu aYehova atalaña antu aloña, nimatu indi atiyililaña kukulomba kwawu kwakulembelela,”—1 PETULU 3:12.

• Nzambi wakana nindi “Nukukuleja maana nukukuleja ninjila yeyi yiwukwenda. Nukukulombola nadisu dami.”—MASAMU 32:8.

Neyi twiluka netu Nzambi welukaña kukala kutunakuhitamu nichitunakutiya chinateli kutukwasha kuumika kukala? Talenu chamumwekeneni Anna, wakuNigeria. Wahosheli nindi, “namweneña nami chaswayi nikufwa muloña wamakabi inamweneña. Nadiña ntuluwa nawa nahembeleña mwana muchipatela wakatili chikatu chahydrocephalus (kwikala namenji amavulu kuwoñu), hankwatiliwu nakansa yakumayeli nawa anlaadikili, natachikili kuzatisha radiotherapy niyitumbu yachemotherapy. Chankalili nankashi kushakama muchipatela hampinji yoyimu namwanami wadiña wakata.”

Chumanyi chamukwashili Anna kuumika? Wahosheli nindi, “natoñojokeleña hansona ya Afwilipi 4:6, 7 yahoshaña nawu ‘kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu.’ Mpinji yejima neyi nanuka iyi nsona, nelukileña nami Yehova wudi kwakwihi nanami muloña nelukili nami wañiluka chikupu kubadika chinadiluka ami aweni. Amanakwami niahela muchipompelu niwena ankolesheleña nankashi.

“Hela chakwila nichidi wakata, kushilahu nimakabi amakwawu, chihandilu chami namwanami chinawahi. Chineli Yehova wudi kukabadi ketu, tunadizi kubula kusha maana hakukala kutunakumona. Yakoba 5:11 yahoshaña nawu: ‘Antu anomiki tuyimoneña netu akweti muzañalu. Enu munatiyi chomikiliyi Yoba nawa muneluki nkisu oju Yehova jamukiswililiyi, muneluki nenu Yehova wukweti wushona chikupu niluwi’.” Yehova welukili kukala kwaYoba kwejima, ninetu tunateli kukuhwelela netu welukaña kukala kwejima kutunakuhitamu.