Neyi mwana navwaliki dehi, maminiti 60 atachi ekalaña mpinji yalema nankashi. Muloñadi? Muloña mama yawantu washaña mwana hantulu haniyi mpinji yalema nankashi wakwashaña mwanindi kukula. *

Chumanyi chaleteshaña mama yawantu kwakamena nkemba wunavwaliki? Professor Jeannette Crenshaw wahosheli mumukanda windi waThe Journal of Perinatal Education nindi hormone oxytocin (Homoni yakukeña) “yaleteshaña mama yawantu wunasampuluki kutiya kuwaha neyi naakati mwanindi, nakumutala nikumwamusha.” Haniyi mpinji Hormone yikwawu yalondelañahu “yaleteshaña mama yawantu kulondeja chinakwila mwanindi” nawa ekalaña amabwambu. Chumichi chalemenadi?

Yehova Nzambi * Nleñi yetu diyi wakojejaña mama yawantu kwikala nawubwambu namwanindi wunavwaliki. Mwanta Davidi wamuhamekeli Nzambi ‘chamufumishiliyi mwivumu’ nawa watiyili kuwaha muntulu yamama yindi. Walombeli nindi: “Anshili kumakaseyi kufumisha hinavwalikili, yeyi Nzambi yami hohu kufumisha hinafumini mwivumu damama yami.”—Masamu 22:9, 10.

TOÑOJOKENU HACHUMICHI: Neyi Nzambi waleñeli antu muniyi njila chakwila mama yawantu nakwakamena chikupu mwanindi wunavwaliki nikumukeña, mwalala Nzambi hatumonañaku hamuntu-hamuntu etu, “anyana kaNzambi”?—Yilwilu 17:29.

Yesu Kristu, wamwiluka chikupu Nleñi kubadika antu ejima, wahosheli nindi: “Komana anzwimba ayedi hiyayilandishaña nakadiwayawaya kabula kulema wuseyaku? Hela chochu, kwosi nzwimba niwumu wunateli kuholoka heseki chakadi Tata yenu kwilukaku. Ilaña ninsuki jenu jakumutu jejima ajichinda dehi. Dichi, bayi mutiya womaku; muloña enu mwalema kubadika anzwimba amavulu.”—Matewu 10:29-31.

Etu antu twamonaña tujila twejima twanyanya, ilaña twelukaña wanyi neyi kamu kanaholoki hamaseki. Ilaña Tata yetu wamwiwulu wamonaña tujila twejima kamu nakamu! Nawa atujila, hela  amavulu ñahi, alema wanyi kudi Nzambi kubadika antu. Dichi ‘bayi mutiya woma’ nenu Nzambi hayimonañaku. Ilaña wayikeña nankashi.

Nsona yatulejaña nawu

• “Mesu aYehova adi kwejima, atalaña niatama niamawahi.”—YISHIMU 15:3.

• “Mesu aYehova atalaña antu aloña, nimatu indi atiyililaña chakutambikawu.”—MASAMU 34:15.

• “Nukutiya kuwaha, Nukuzañalala naluwi lweyi; muloña wamweni yihuñu yami; welukili munamwenaña kukala.”—MASAMU 31:7.

Chikutukwasha neyi twiluka netu Nzambi watukeña nawa watutalaña kulonda yatukwashi? Eña chinateli kutukwasha neyi chinahoshi Hannah, * wakuEngland:

“Mpinji yejima natoñojokeleña nami Yehova hankeñaku nawa wakwileña kulomba kwami wanyi. Natoñojokeli nami kubula chikuhwelelu dikwaletesheli. Namweneña nami Nzambi wambabesheleña nawa wandiwili muloña hinadiña walemaku. Nelukili nami Nzambi wakamenaña wanyi.”

Ilaña chayinu mpinji, Hannah weluka chikupu nindi Yehova wamukeña nawa wamwakamenaña. Chumanyi chaletesheli yahimpi yitoñojoka yindi? Wahosheli nindi, “nahimpileña chovu-chovu. Inakwanuka mpanji yinatiyili kunyima yahosheleña hefutu danyiloña daYesu yankwashili kwiluka chikupu nami Yehova wankeña. Nawa neyi kulomba kwami akwakula, kakavulu nadilaña muloña nelukaña nami Yehova wankeña nankashi. Kudiza Bayibolu nikuwanika kukupompa kwawakwaKristu kwankwasha kumwiluka nankashi Yehova, yilwilu yindi nichatwakamenañayi. Ichi dinu neluka nami Yehova watukeña wejima wetu nawa watwakamenaña hamuntu-hamuntu.”

Mazu ahosheliyi Hannah amawahi nankashi. Hanu dinu munateli kwiluka ñahi neyi Nzambi wayiluka nawa wanukaña chimwatiyaña? Chibaba chinalondelihu chikwakula ilu lwihu.