LUZIA NAKUBALAKATA NAMWENDU WINDI WAKUCHIMUSWA. Hadiñayi kansi, wakatili chikatu chapoliomyelitis, chikatu chafwana nankashi chakisañanaña nyijila yamumujimba nawa chasambukilaña. Mumbanda wazatilileñayi Luzia hadiñayi nayaaka 16 wamulejeli nindi, “Nzambi wakubabesheli muloña wovwahilileña wanyi amama yeyi.” Hela chakwila hanahiti yaaka, Luzia wuchidi kwanuka chaneñeliyi.

DAMARIS CHELUKILIYI NINDI WUDI NAKANSA YAKUWOÑU, tata yindi wamwihwili nindi: Chumanyi chiwuneli hakwila wukati ichi chikatu? Kwatela kudi chuma chatama chiwuneli. Dichinakubabesheliyi Nzambi.” Damaris waneñeli nankashi hakutiya awa mazu.

Hadi yaaka yayivulu nankashi antu akuhwelela nawu Nzambi watubabeshaña nayikatu. Mukanda waManners and Customs of Bible Lands wahosha nawu antu amavulu mumafuku aKristu akuhweleleli nawu “yikatu yejileña muloña wanshidi yamuntu wunakati hela ntaña yindi nawa anakumubabesha.” Chimwahitili yaaka yayivulu kufuma hafwiliyi Kristu, mukanda waMedieval Medicine and the Plague wahosheli nawu “antu amavulu akuhweleleli nawu Nzambi waleteli yikatu kulonda yayibabeshi hanshidi jakoñeleñawu.” Chelili antu afwi nachipupu muEurope muyaaka yamuma 1400, komana Nzambi wababesheleña antu atama? Indi kwiji chipupu chenjili muloña watububu twaletaña yikatu mumujimba, neyi chahoshañawu asandujolaña jayitumbu? Amakwawu anateli kwihula nawu, komana Nzambi wazatishaña yikatu kulonda antu akabakaneña muloña wanshidi jawu? *

TOÑOJOKENU CHUMICHI: Muloñadi Yesu chokililiyi akata neyi chakwila Nzambi wababesheleña antu nayikatu kulonda akabakani? Wadi kudiwula wanyi wuñaji nikuloña kwaNzambi? (Matewu 4:23, 24) Yesu waditadikishilihu naNzambi wanyi. Wahosheli nindi: “Mpinji yejima nelaña yuma yamutiyishaña kuwaha” nawa, “inakwila kwesekeja nachanlejeliyi Tata kwila.”—Yowanu 8:29; 14:31.

Bayibolu yahosha hatooka. Yehova Nzambi ‘wawuñaji hohu.’ (Kuhituluka 32:4) Chakutalilahu, Nzambi kwila yakojeja ndeki kuholoka, nakujaha antu amavulu akadi muloña, hakukeña hohu kubabesha muntu wumu wudi mundekiku! Kwesekeja nakuloña kwaNzambi, Abarahama, kambuña Nzambi washinshika wahosheli nindi Nzambi hamba ‘kayijilumuna hamu nanawa atamaku.’ Wahosheli cheñi nindi “chinjila kwila mwenomu.” (Kutachika 18:23, 25) Bayibolu yahosha cheñi nawu ‘Nzambi hakoñaña chuma chatamaku’; helaña yuma ‘yaheñaku.’—Yoba 34:10-12.

Neyi tunakukabakana bayi neyi Nzambi nakutubabeshaku. Yesu yomweni wamwekesheli chumichi chelili yena nawatumbanji twindi amoni iyala wadiña mpuntamesu kufuma tuhu hakusemuka kwindi. “Atumbanji twindi amwihwili nawu: ‘Rabi, hinyi wavulumwini hakwila iwu iyala yavwaliki mputamesu, iwu iyala tahindi anvwali jindi?’ Yesu waakwili nindi: ‘Iwu iyala hela anvwali jindi hiyavulumwiniku, ilaña chumichi chamwekeni kulonda nyidimu yaNzambi yimwekeni kuhitila mudi yena.’”—Yowanu 9:1-3.

Kwesekeja nansañu yelukiliwu kunyima, atumbanji twaYesu atela ahayamini chayilejeliyi nindi kwosi wavulumwini hakachi kaniwu iyala hela anvwali jindi. Bayi neyi Yesu wookili hohu ona iyala mpuntamesuku, ilaña wolweli ntañishilu yakutwamba yakwila  nawu Nzambi diyi watubabeshaña neyi tunakukabakana. (Yowanu 9:6, 7) Ejima anakukabakana nayikatu anateli kwikala namuzañalu neyi eluka nawu Nzambi hidiyi wunakukojejaku.

Nsona yatulejaña nawu

• “Nzambi hiyamwesekaña nayuma yatamaku, hela yena yomweni hesekaña muntu hela wumuku.” (YAKOBA 1:13) Dichi, “yuma yatama” yinakabishi antu hadi yaaka yayivulu, yidi neyi yikatu nikufwa keña ayifumishihu.

• Yesu Kristu ‘wokili ejima adiña akata.’ (MATEWU 8:16) Chokiliyi ejima akata enjili kudi yena, Mwana kaNzambi wamwekesheli yuma yikela Wanta waNzambi mukaayi kejima kumbidi.

• Nzambi “Wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila hela kukataku. Yuma yakusambila yinahiti dehi.”—CHIMWEKESHU 21:3-5.

Muloñadi antu chinakukabakenawu nankashi? Antu anadihuli ilu lwihu hadi yaaka yayivulu. Neyi Nzambi diyi wakojejaña wanyi makabi, hinyi dinu wayiletaña? Tukuhanjeka ñakwilu yanawa malwihu muchibaba chinalondelihu.