Luwi “hiwuswa wekala namuntu wakutiya chinakutiyayi mukwawu kuhitila mukudifwikija chinateli kutiyayi neyi diyi wadiña nanoku kukala kudi namukwawu.” Ndotolu Rick Hanson wakuluka yitembi mukuuka yikatu yakuwoñu wahosheli nindi, “Luwi twavwalikaña nalu.”

TOÑOJOKENU HACHUMICHI: Muloñadi chitwekalila nachilwilu chaluwi chabula kwikala nawatunyama ninyitondu? Bayibolu yahosha nawu Nzambi waleñeli antu muchinfwana chindi. (Kutachika 1:26) Atuleña muchinfwana chaNzambi, dikwila nawu tunateli kwimbujola yilwilu yindi nikuyimwekesha. Dichi, neyi luwi luletesha antu kukwasha akwawu anakukabakana, dikwila nawu anakumwekesha chilwilu chaluwi chikwetiyi Nleñi yawu Yehova Nzambi.—Yishimu 14:31.

Nzambi watutiyilaña luwi nawa watiyaña kutama neyi tunakukabakana. Bayibolu yahosha hadi aIsarela omikili makabi asweja hiyadiñawu muwuduñu muEjipitu nawa akabakeni yaaka 40 muchinkalampata nawu: “Mwejima mwakabiluwu wena, dimu mwakabiliyi yena nawa.” (Isaya 63:9) Bayi neyi Nzambi welukili hohu makabi awuku. Ilaña watiyili kutama chakabakeneñawu. Wahosheli nindi: “Ami neluki chakabañawu.” (Kwidika 3:7) Nzambi wahosha nindi, ‘muntu wukukunkeyi, nakunki hakantu kadisu dami.’ (Zekariya 2:8) Neyi antu atwila katama niyena watiyaña kutama.

Bayibolu yatulejaña nawu hela chakwila tunateli kudinka nyiloña nikutoñojoka neyi kwiji tunateleli wanyi luwi lwaNzambi, “Nzambi wabadika nyichima yetu nawa weluka yuma yejima.” (1 Yowanu 3:19, 20) Nzambi watwiluka kubadika nichitwadiluka etu aweni. Weluka kukala kwetu, yitoñojoka yetu, kushilahu tuhu nichitwaditiyaña. Watutiyilaña luwi.

Nsona yatulejaña nawu

• “Henohu wakatambika Yehova waketiya. Wakabilela yena wakela nindi Yamonu.”—ISAYA 58:9.

• “Muloña ami neluki yitoñojoka yinayitoñojokaña, hiyitoñojoka yakumwena, hiyitoñojoka yakutamaku, kulonda hanyaka yenu yakukuminina nakayinki yakukuhwelela. Henohu dihu mwamba kantambika mwamba kaya nakulomba kudami ninami namba kayitiyilila.”—YEREMIYA 29:11, 12.

• “Shaku madilu ami muchumpa cheyi; ochu hiyadi mumukanda weyuku?”—MASAMU 56:8.

Kwiluka nawu Nzambi watutiyilaña luwi kunateli kutukwasha kuumika kukala kutwamonaña? Talenu chuma chamumwekeneni Maria:

Wahosheli nindi “Chelili mwanami wayaaka 18 yafwi nachikatu chakansa, natiyili kutama chikupu. Namuhilili Yehova hakubula kuuka mwanami!

Chimwahitili yaaka 6, muhela wamuchipompelu wenjili nakunkundeja washakamini nzo-o nakuntiyilila chinamulejeleña nami Yehova wanhela. Hanyima yakutiyilila kukala kwami hamaora amavulu chakadi kunketwisha walejeli nsona yahimpili yitoñojoka yami. Yadiña 1 Yowanu 3:19, 20 yahosha nawu: “Nzambi wabadika nyichima yetu nawa weluka yuma yejima.” Walenjeli nindi Yehova weluka kukala kutwamonaña.

Hela chakwila wanlejeli awa mazu, chankalili kuleka kuneña! Dichi natañili nsona yaMasamu 94:19, yahoshaña nawu: ‘Chinekalaña nayitoñojoka yayivulu mumuchima wami, kukundeja kundeja kuwankundejaña kwatiyishaña muchima wami kuwaha nankashi.’ Natiyili neyi iji nsona asonekeleli ami! Nkumininaku, namulejelimu Yehova kukala kwami muloña nelukili nami watutiyaña nawa watwiluka.”

Twakundejewaña neyi twiluka netu Yehova watwiluka nawa watwakamenaña! Hanu dinu, muloñadi makabi chiyanaswejeliwu? Indi kwiji muloña wakwila Yehova nakukeña kutubabesha muloña wayuma yatama yitwakoñaña? Komana Nzambi wakafumishahu makabi ejima? Awa malwihu akuyakula muyibaba yinalondelihu.