CHIHANDILU chinakushakamawu antu makonu dichakeñeleñayi Nzambi wanyi. Iseki kachi dinenzali nawantu ovwahilaña chiyuulu chaNleñi, nakuhetela muwunlomboli windi nikwimbujola kukeña kwindi niyilwilu yindi yayiwahi. Nzambi wakeñeleña nindi antu ejima ekali namuzañalu hampinji yinakuhembawu yisaka yawu, nawa nindi adizi yuma yayiha nikwilisha iseki dejima kwikala Paradisa.

• “Diyi wakumishaña majita mwakumina iseki dejima.”—Masamu 46:9.

• ‘Mpinji yatoñolawu yashikili, yakujilumuna antu anakukisañana iseki.’ —Chimwekeshu 11:18.

• “Mwenimbu hakahosha nindi, Ami nakataku.”—Isaya 33:24.

• “Antu ami inatonda akaluña luñe-e nanyidimu yamakasawu.”—Isaya 65:22.

Hanu iwu wuprofwetu wakashikijewa ñahi? Nzambi watonda Mwanindi, Yesu, kwikala Mwanta wanfulumendi yaloña yakayuulaña adinu iseki iku yidi mwiwulu. Bayibolu yatena iyi nfulumendi nawu Wanta waNzambi. (Danyeli 2:44) Bayibolu yahosha hadi Yesu nawu: “Nzambi wakamwinka itanda . . . , wakekala Mwanta.”—Luka 1:32, 33.

Hadiñayi heseki, Yesu wakoñeli yihayamisha yayivulu yamwekeshaña nawu hakayuulañayi neyi Nyuuli wakawahisha chihandilu chawantu kubadika chitudi nachu makonu.

• Wokili nyisoñu yashiyashana, nakumwekesha chakafumishahu yikatu yejima kudi antu.—Matewu 9:35.

• Wamwenesheli kaluñalwiji, nakumwekesha chakakiñayi antu kuhitila mukufwomona yuma yañovu yadimwekenaña.—Maku 4:36-39.

• Wadiishili makombakaji awantu, nakumwekesha chakenkayi antu yuma yakeñekaña hakwila ahandi.—Maku 6:41-44.

• Wabalumwini menji kwikala vinyu hachawija chawulu, nakumwekesha nindi kudiluñisha wumi.—Yowanu 2:7-11.

Munateli kwikala ñahi nawumi wunakuloñeshelayi Nzambi antu amukeña? Kudi “njila” yimwatela kwendamu. Bayibolu yayilumbulula nawu “njila yanyanya yatwalaña kuwumi nawa antesha diwu ayiwanaña.”—Matewu 7:14.

Njila yaya kuwumi hichumanyi? Nzambi wahosha nindi: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi.” (Isaya 48:17) Neyi mwenda muniyi njila, chihandilu chenu chikekala chachiwahi.

 Yesu wahosheli nindi: “Ami yami njila, yami chalala, yami wumi.” (Yowanu 14:6) Hakwila tukekali nawumi wawuwahi nikuswina kwakwihi naNzambi, twatela kukuhwelela yuma yatañishileñayi Yesu nikumwimbujola.

Munateli kuwana ñahi njila yaya kuwumi? Kwekala nsakililu jajivulu, ilaña Yesu wasoñamishili nindi: “Bayi neyi muntu wejima wantenaña nindi, ‘Mwanta, Mwanta,’ wakeñila muWanta wamwiwuluku, chiña hohu muntu welaña nkeñelu yaTata yami wekala mwiwulu diyi wakeñilamu.” (Matewu 7:21) Wahosheli cheñi nindi: “Mukuyilukila kunyikabu yawu.” (Matewu 7:16) Bayibolu yinateli kuyikwasha kwiluka kudifuukula kwalala.—Yowanu 17:17.

Munateli kutachika kwenda ñahi munjila yaya kuwumi? Mwabombela kwiluka Nsulu yawumi: Hinyi yeniwu? Ijina dindi hinyi? Wekala muntu wamuchidinyi? Nakwiladi? Yumanyi yinakukeñayi nindi twileña? *

Nzambi nakukeña antu eleña yuma yayiwahi kubadika hohu kuzata, kuda, kuhema nikukulisha chisaka. Tukumwiluka Nleñi yetu nikwikala amabwambu jindi. Tukumwekesha netu twamukeña neyi twilaña yuma yakeñayi. Yesu wahosheli nindi: “Iwu diwumi wahaya nyaaka, wakukwiluka eyi Nzambi walala wumu hohu, ninowu iwatemesheli Yesu Kristu.”—Yowanu 17:3.

Neyi twiluka yuma yakeñañayi Nzambi walala nindi twileña chikutukwasha kuhimpa yilwilu yetu. Chinateli kukala. Ilaña tunateli kwikala nachihandilu chachiwahi neyi tutachika kwenda munjila yaya kuwumi.Hakwila muwani ñakwilu yamalwihu ahoshaña hadi Nzambi, aYinsahu jaYehova adizishaña Bayibolu chawaana hampinji niiluña dimunatondi enu aweni. Hanjekenu nanetu kuzatisha webusayiti yetu ya www.pr418.com.