Bayibolu yafumbaña nawu: “Chihandilu chenu chiikali chakadi kusweja kukeña mali, iku munakuzañalala nayuma yimudi nayu.”—Aheberu 13:5.

Makonu, mukaayi mudi yuma yayivulu yinakutuñatuñawu antu yinakwilawu nawu twatela kwikala nayu. Ilaña Bayibolu yahoshaña nawu munateli ‘kuzañalala nayuma yimudi nayu.’ Munjilanyi?

Tondolwelenu “kusweja kukeña mali.” Antu elaña chuma chidi chejima hela chakwila chinateli kuletela wubanji kumujimba, kujimbesha yisaka, amabwambu, niyilwilu yayiwahi, kushilahu tuhu nikalemesha kayinkañawu muloña ‘wakukeña mali.’ (1 Timotewu 6:10) Yuma yajimbeshañawu ochiyalema! Nkumininaku, wakeñesha maheta “hakela nindi yinanwaninuku.”—Mukwakutaŋisha 5:10.

Lemeshenu antu, bayi yumaku. Mwalala, yuma yakumujimba yakwashanaña. Ilaña yuma yakumujimba kwila yitukeña hela kutusakilila nehi, antu hohu diwu anateli kwila mwenimu. Kwikala ‘nebwambu’ walala kunateli kutukwasha kuzañalala nayuma yitudi nayu.—Yishimu 17:17.

Bayibolu yafumbaña nawu: “Muchima wazañajala hiyitumbu yayiwahi.”—Yishimu 17:22.

Kufwana “yitumbu yayiwahi,” muzañalu wunateli kuyikwasha kuumika yikatu. Hanu dinu tunateli kwikala ñahi namuzañalu neyi twakata?

Sakililenuña. Neyi tusha maana hakukala kutukweti, “mafuku ejima” akwikala atama. (Yishimu 15:15) Ilaña Bayibolu yahosha nawu, “sakililenuña.” (Akolosi 3:15) Dizenu kusakilila hayuma yejima yimudi nayu muchihandilu, hela chakwila yantesha. Yuma yidi neyi lubanji lwetena dinakuhuma, mpepela yinakukunka chanti, chimwemweta chamuntu itwakeña, yumiyi yinateli kuleta muzañalu muchihandilu chetu.

Ililenuku antu amakwawu yuma. Hela chakwila twakola kumujimba wanyi, “mukuhana mwekala muzañalu chikupu kubadika wekala mukutambwila.” (Yilwilu 20:35) Neyi akwetu atusakilila, twatiyaña kuwaha hama, nawa chumichi chatukwashaña kubula kusha maana hakukala kutukweti. Tunateli kwikala namuzañalu neyi tukwashaña antu kwikala namuzañalu muchihandilu chawu.

Bayibolu yafumbaña nawu: “Mwiluki yuma yalema nankashi.”—Afwilipi 1:10.

Adisumbula abulaña kwikala nampinji yakushakama hamu anateli kujaha wulu wawu. Adisumbula atela kulemesha wulu wawu, chuma chimu chalema nankashi muchihandilu.

Zatilenuña hamu. Chatela mukeñeña kwila yuma nkawenu, fuukulenuhu kuzatila hamu. Bayibolu yahosha nawu “Antu ayedi anabadiki wumu.” (Mukwakutañisha 4:9) Munateli kutelekela hamu yakuda, kuya kumaha hela kunookela hamu.

Mwekeshenu kukeña kwenu. Bayibolu yakoleshaña eyala namumbanda kudikeña nikudilemesha wumu namukwawu. (Aefwesesa 5:28, 33) Kutumba chimwemweta, kudikumbata hela kwinka mwinikwenu chawaana kunateli kukolesha wulu wenu. Nawa chuma chikwawu chalema, adisumbula atela kubulakana hohu namwinikwawu bayi namuntu wacheñiku.—Aheberu 13:4.