Nzambi wamulejeli Adama nindi, “ifuku diwakadya [kumutondu] chalala wakafwa.” (Kutachika 2:17) Ilu lushimbi lwadi kwikala lwamukunkulwayi neyi chakwila Adama amuleñeli nawu wakashinakaja nikufwa. Adama welukili nindi neyi wukuda kumutondu wanyi, wukufwa wanyi.

A Adama naEva hiyateleleli kuda kunona mutondu hakwila nawu ahandiku, muloña mwitempa mwadiña nyitondu yayivulu yasoñeleña nyikaabu. (Kutachika 2:9) Awa adisumbula atachi adi kumwekesha nawu amwovwahila Nzambi wayinkeli wumi neyi chakwila hiyadiili kunona mutonduku. Adi kumwekesha cheñi nawu eteja nawu Nzambi diyi wukweti wuswa wakuyiyuula.

Hakwila twiluki chafwililiwu aAdama naEva, twatela kushinshika hansañu yahanjekeliwu kunyima oyu yatukundama wejima wetu. Satana Diyabolu wazatishili kapela hakutwamba. Bayibolu yahoshaña nawu: “Hakwila kapela diyi wadiñi wasweja kubabala hadi anyama amumpata ejima eliliyi Yehova. Yena hakumwihula mumbanda, Nindi, Chalala Nzambi nahoshi nindi, Nyitondu yejima yamwitempa bayi mwakayidyaku, tahindi?”—Kutachika 3:1.

Ilaña Eva waakwili nindi: “Nyikabu yanyitondu yamwitempa tukutwesha kudya tuhu, hakwinza nyikabu yamutondu wekala mukachi ketempa, Nzambi nahoshi nindi, Bayi mwakayidyaku, hela kukwataku nehi, mwakenda kafwa.” Kuhiñahu kapela kamulejeli nawu: “Chalala, himwakafwaku; muloña Nzambi neluki nindi ifuku dimukudya, mesu enu akatona, mwakekala neyi chadiyi Nzambi, mwakeluka niyayiwahi niyatama.” Dichi, Satana wahosheleña nindi Yehova watwambileña nawa waswekeleña yuma yayiwahi kudi anvwali jetu atachi.—Kutachika 3:2-5.

Eva wetejeli mwahosheli kapela. Wawutalili mutondu. Mutondu wamwekeni chiwahi nankashi! Dichi wolweli chikasa nakukumunaku mukaabu nawa watachikili kuda. Bayibolu yahosha nawu “yomwinkaku ninfumwindi adiñiyi nindi, niyena hakudya.”—Kutachika 3:6.

Nzambi waneñeli hakumona anyanindi akeñayi anafumpi lushimbi mumushikila! Welili ñahi? Yehova wamulejeli Adama nindi: ‘Wamba kafunta cheñi mumaseki; muloña dihu hakufumishiluwu; muloña eyi wulunkuñu, nochu wakafunta cheñi mwomulunkuñu.’ (Kutachika 3:17-19) Dichi “nyaka yejima yahandiliyi Adama yashikili munyaka makulakaji atanu namakulakaji awana nanyaka  makumi asatu [930]; yofwa nikufwa.” (Kutachika 5:5) Adama hayili mwiwulu hela kutwalekahu kuhanda kwiluña dikwawuku. Adama kwosi kwadiñayi henohu Yehova kanda yamuleñi kufuma mulunkuñuku. Dichi hafwiliyi, wajimbesheli wumi windi nakwikala neyi lunkuñu kwamufumishiliwu. Walekeli kwikalaku. Chumichi chatamini nankashi!

Chineli aAdama naEva afumpili lushimbi mumushikila, ekalili antu abula kuwanina nawa hiyadiña nakukooleka kwakushakama haya nyaakaku. Nyijimba yawu yatachikili kuhimpa, ekalili abula kuwanina nawa akwanshidi. Ilaña iyi nshidi hiyayikundamini wena hohuku. Anyanawu niwena aswanini nshidi yawu. Nsona ya Aroma 5:12 yahosha nawu: “Neyi chocheñilili nshidi mukaayi kuhitila mudi muntu wumu [Adama], nikufwa nikwena kwenjili kuhitila munshidi, dichi kufwa kwataandili kudi antu ejima muloña wejima wawu avulumwini.”

Bayibolu yatenaña nshidi nikufwa nawu “chifwiku chabuta nyuza yawantu yejima niihina datanjikawu hanyuza yejima.” (Isaya 25:7) Ichi chifwiku chabuta antu neyi wulembi wafwana wuyakubula kutwesha kutemukawu. Mwamweni, ‘antu ejima anakufwa kuhitila mudi Adama.’ (1 Akorinda 15:22) Dichi tunateli kudihula neyi chehwiliyi kapostolu Pawulu nindi: “Hinyi wukuñamwina kuniwu mujimba wunakuntwala kuniku kufwa?” Kudihu muntu wunateli kuyamwina?—Aroma 7:24.