Hela chakwila kubula kutiya kwawanvwali jetu atachi, aAdama naEva kwaleteli nshidi nikufwa kudi antu ejima, hikwahimpili nkeñelu yaNzambi hadi antuku. Mumukanda windi wejima, Nzambi wahosha kapampa kakavulu nindi nkeñelu yindi yahimpa wanyi.

• “Akwakuloña akaswana ituña, akashakamamu haya nyaka.”—Masamu 37:29.

• “Naminyi dehi kufwa chahaya nyaka; Yehova wakakombola madilu mumesu awantu ejima.”—Isaya 25:8.

• “Chilumbu wakukumishaku, dikwila nawu kufwa, akamujilumuna.”—1 Akorinda 15:26.

• “Kufwa hikwakekalaku cheñiku, nawa hikwakekala cheñi kudishona, kudila hela kukataku.”—Chimwekeshu 21:4.

Nzambi ‘wakaminya ñahi kufwa,’ hela netu ‘kumujilumuna’ chilumbu chetu kufwa? Neyi chitunamoni, Bayibolu yinahoshi hatooka nawu ‘Akwakuloña akashakama haya nyaka.’ Ilaña yahoshaña cheñi nawu “hamaseki hihekala muntu waloña welaña chachiwahiku.” (Mukwakutañisha 7:20) Hakushinda kufwa, komana Nzambi wakafumpa nshimbi jindi yomweni? Chinjila kwila mwenomu! Hamba kafumpa nshimbiku, muloña ‘hiNzambi wabulaña kutwamba.’ (Titusa 1:2) Hanu dinu Nzambi wakela ñahi hakushikija nkeñelu yindi yaleñeleliyi antu?

Yehova Nzambi wawanini njila yayiwahi yakukuulilamu muchidi wamuntu kukufwa kuhitila mukuhana ifutu danyiloña. Neyi Bayibolu yihosha hefutu danyiloña, yatenaña chuma chesekana kulema wuseya chafwetañawu hakuwahisha chinakisiki. Dichi, chineli antu ejima hiyakwanshidi nawa ayifuukwila kufwa, Bayibolu yahoshaña hatooka nawu “Kwosi wukutwesha kumukuula mana kwindi hela hantesha, hela kumwinka Nzambi wuseya wakumukuula nachu kutwesha nehi; Muloña wumi wawu kuwukuula wakala, chiña kuchileka chikupu haya nyaka.”—Masamu 49:7, 8.

Neyi muntu wabula kuwanina yafwa, wafwetaña hohu wuloku wanshidi yindi; hanateli kudikuula yomweni hela kukuula muntu wudi wejima kunshidiku. (Aroma 6:7) Twakeñekeleña muntu wadiña wawanina nawa wakadi nshidi kulonda yahani wumi windi, bayi hanshidi yindiku, ilaña hanshidi jetu.—Aheberu 10:1-4

Iwu dimuntu watemesheliyi Nzambi. Watemesheli Mwanindi, Yesu, kufuma mwiwulu kwinza nakuvwalika hamaseki neyi muntu wawanina nawa wakadi nshidi. (1 Petulu 2:22) Yesu wahosheli nindi wenjili “nakuhana wumi windi kwikala ifutu danyiloña dakukuula nachu antu amavulu.” (Maku 10:45) Wafwili kulonda yamushindi chilumbu kufwa hakwila twiikali nawumi.—Yowanu 3:16.

Makonu, wuprofwetu wamuBayibolu wunakushikijewa, tunakushakama ‘mumpinji jakala,’  chinakumwekesha nawu tunakushakama “mumafuku akukuminina” anshakaminu yamakonu yatama. (2 Timotewu 3:1) Mafuku akukuminina akamana ‘hefuku dawunsompeshi nawa dakujilumuna antu abulaña kumwakama Nzambi.’ (2 Petulu 3:3, 7) Ilaña antu amukeña Nzambi akapuluka kuniku kujilumuka nawa akayinka “wumi wahaya nyaaka.”—Matewu 25:46.

Yihita yawantu amakwawu yakekala nakukooleka kwakwikala nawumi wahaya nyaaka neyi anasañuki. Yesu wasañwili muntu hayiliyi kumusumba waNena. Mwana weyala wasemukili nkawindi wamumbanda nfwila wafwili, dichi Yesu “wamutiyilili wushona,” nawa wamusañwili. (Luka 7:11-15) Kapostolu Pawulu wasonekeli nindi: “Nachiñejaña mudi Nzambi . . . nami kwamba kekala kusañuka kwawantu aloña niabula kuloña.” Iku kuchiñeja kwamwekeshaña Nzambi chakeñeshayi antu.—Yilwilu 24:15.

Yihita yawantu yinateli kuchiñeja kushakama haya nyaaka. Bayibolu yahosha nawu: “Akwakuloña akaswana ituña, akashakamamu haya nyaka.” (Masamu 37:29) Hayina mpinji, akazañalala nankashi hakumona mazu asonekeli kapostolu Pawulu yaaka 2000 yinahitihu hiyakushikijewa, akwila nawu: “Kufwa, indi kwimika mushindu kweyi kudi kudihi? Kufwa, indi lumuna lweyi ludi kudihi?” (1 Akorinda 15:55) Kufwa, chilumbu watiyishaña antu woma akamushinda!