MADOMBU MUYISAKA NIWUVUMBI WAKUKANJIKIJA: Chinleji chawaUnited Nations chinakumwekesha nawu, “Mumbanda wumu hakachi kawambanda asatu amuhumpulahu dehi kukola nsañu yawuvumbi kudi kajila kindi.” Chawushona, “chinleji chinakumwekesha nawu mukaayi kejima, wumu hakachi kawambanda atanu akamukaama chakukanjikija hela akafwila kumukanjikija.”

WUBANJI MUNYIKWAKWA: Chinakutiyakana nawu, muUnited States mudi mazanvu awambanji akubadika ha 30,000 akwamadombu. MuLatin America, muntu wumu hakachi kawantu asatu amwetahu dehi.

KUJAHAÑANA: Chinakumwekesha nawu kwakwihi nahafu yamiliyoni yawantu ayijahili muchaaka chimu, kubadika antu afwili munjita. MuSouthern Africa nimuCentral America ajahilimu antu amavulu kubadika ajahiliwu mumatuña amukaayi. Antu akubadika ha 100,000 ayijahili muLatin America muchaaka chimu nawa antu 50,000 ayijahili muBrazil. Kunateli kumwekana njila yakumanishilamu madombu chikupu?

Muloñadi madombu chiyanatandili? Yuma yinakuletesha madombu yinabombelumu: yitoñojoka yawantu yakulemesha antu aya mpuhu nawa akweti mali, kubula kulemesha mawumi awantu, kunwa walwa nikuzatisha yitumbu yashetana, kudikunda kwawatwansi nawatumpululu nikadiwu kakwetiwu ambanji kakwila nawu kwosi watela kuyibabesha.

Kuhosha hohu chalala, mumatuña amakwawu antu anakuzata nañovu kulonda amanishi madombu. Wunsahu wunakumwekesha nawu wubanji wakujahañana wunakehi nankashi mudi yaaka 10 yinahituhu mumusumba waSão Paulo, wamuBrazil mwekala antu amavulu. Hela chochu, madombu anatwalekuhu muniwu musumba nawa hakachi kawantu 100,000 anakujahahu antu 10. Chumanyi chinateli kumanisha madombu chikupu?

Chuma chinateli kumanisha madombu chiña antu ahimpa yililu yawu. Hakwila akwamadombu ahimpi yililu yawu, yidi neyi kudinka wanta, lwisu nikudikeña awenawu, atela kwikala nayililu yakukeñañana, kalemesha nikutoñojokelaku akwawu.

Chumanyi chikumusañumuna muntu kulonda yahimpi chikupu? Toñojokenu chatañishaña Bayibolu:

• “Kumukeña Nzambi yowu kwila mwatulejañayi.”—1 Yowanu 5:3.

• “Kwakama Yehova yowu kuhela yatama.” * —Yishimu 8:13.

 Kumukeña Nzambi nikubula kwila yuma yikumuneñesha diyi yuma yikuyileñela akwamadombu kuhimpa nawa chakubula kutwamba, ilaña atela kuhimpa chikupu yililu yawu. Yumiyi yinateli kuzatika?

Tuhanjekenu hadi Alex, * washakamini mukaleya hadi yaaka 19 muBrazil hamuloña wamadombu. Wekalili Chinsahu chaYehova mu 2000, hanyima yakudiza Bayibolu nawaYinsahu. Komana nahimpi chikupu yililu yindi yamadombu? Eñañi, nawa Alex waditoñeshaña hayuma yatama yejima yakoñeliyi. Wahoshaña nindi, “Namukeñi Nzambi muloña nañanakeni chikupu. Hamuloña wakusakilila nikumukeña Yehova kunankwashi kuhimpa yililu yami.”

César, wakuBrazil niyena wadiña ikombu wendeleña namata. Dichadiña chihandilu chindi hadi yaaka 15. Chumanyi chamuletesheli yahimpi? Hadiñayi mukaleya, amuwanini kudi aYinsahu jaYehova nawa atachikili kudiza nindi Bayibolu. César walumbulwili nindi: “Dikadiña katachi kwiluka nkeñelu yawumi. Namukeñeli Nzambi. Natachikili kumutiya Nzambi woma, nakuleka kufuntila kuyuma yatama yinelileña yamuneñesheleña Yehova. Hinakeñeleña kumwekesha muchima wakubula kusakilila haluwi lwindiku. Kukeña nikumutiya woma dikwaleñeleli nihimpi.”

Indi iyi yakutalilahu yinakutudizishadi? Bayibolu yikweti ñovu yakuhimpa yihandilu yawantu chikupu nikuhimpa yitoñojoka yawu. (Aefwesesa 4:23) Alex, itwashimuna dehi, wabombelelihu nindi: “Yuma yinadizili muBayibolu yidi neyi menji atooka anakumwañikila, anakuntookesha nakumanisha yitoñojoka yatama. Natoñojokeleña nami iku kukala hikwamba kamanaku.” Eñañi, neyi twinzesha yitoñojoka yetu yejima nansañu yamuBayibolu, tunateli kufumisha yililu yejima yatama. Izu daNzambi dikweti ñovu yakutookesha. (Aefwesesa 5:26) Chafumañamu antu atama nawa adikeña aweni ahimpaña yililu yawu, nakwikala antu amawahi, awunda. (Aroma 12:18) Ekalaña nakuwunda muchihandilu chawu neyi azatishaña nshimbi yamuBayibolu.—Isaya 48:18.

A Yinsahu jaYehova akubadika ha 8 miliyoni mumatuña 240 anawani njila yakumanishilamu madombu. Antu akunyichidi niakuyisemwa yejima aneluki kumukeña nikumutiya Nzambi woma nikudikeña wumu namukwawu nakushakama mukuwunda neyi chisaka chimu mukaayi kejima. (1 Petulu 4:8) Nshakaminu yawu yinakumwekesha nawu kwakekala kaayi mwakabula madombu.

Bayibolu yakana nawu katataka Nzambi yamanishi madombu heseki dejima. Kaayi kamakonu kamadombu kakumona ‘ifuku daNzambi dakusompesha nikujilumuka kwawantu asekeshaña Nzambi.’ (2 Petulu 3:5-7) Kwosi akwamadombu akakabishaña akwawu. Tunateli kukuhwelela ñahi netu Nzambi nakukeña kufumishahu madombu?

Bayibolu yahosha nawu Nzambi wahela “muntu wakeña madombu.” (Masamu 11:5) Nleñi wakeña kuwunda niwuñaji. (Masamu 33:5; 37:28) Dichakabulilayi kwitejayi akwamadombu kutwalekahu haya nyaaka.

Ituña dadiha mwakekala kuwunda dinakwinza. (Masamu 37:11; 72:14) Kwila mudiza nsañu yayivulu yinakushimuna chimwatela kwila hakwila mukashakami munidi ituña mwakabula madombu, nehi?