Atata abukilili kuAustralia kufuma kuGermany mu 1949. Enjili nakukeña nyidimu yamumayini niyamalayiti nawa ashakamini mumukala waVictoria. Dikwayisumbwililuwu amama nawa navwalikili mu 1953.

Chimwahitili hohu yaaka yantesha, amama atachikili kudiza Bayibolu nawaYinsahu jaYehova, dichi natachikili kwanuka nsañu yamuBayibolu. Hela chochu, atata hiyakeñeli nsakililu yidi yejimaku. Ekalili asamadombu, akwakuchinisha, nawa amama ayitiyileña woma. Atwalekelihu kudiza Bayibolu mukuswamujoka nawa akeñeli nsañu yadizileñawu. Neyi aTata anafumihu atudizishileña namuhelami nsañu yadizileñawu muBayibolu. Atulejeli haparadisa yakekala hamaseki nichitwatela kwikala namuzañalu neyi tulondela nshimbi yamuBayibolu.—Masamu 37:10, 29; Isaya 48:17.

Chinashikijili yaaka 18, nafumini hetala muloña wamadombu awaTata. Hela chakwila nakuhweleleli yuma yandizishileñawu aMama, ilaña hinayilemesheliluku. Dichi nakañenyi kwilamu. Natachikili kuzata mudimu wamalayiti mumayini. Chinashikijili yaaka 20, nasumbwili. Chimwahitili yaaka yisatu twavweli mwana wamumbanda nawa natachikili kutoñojoka hachihandilu chami. Nelukili chikupu nami Bayibolu yinateli kukwasha chisaka chami, dichi natachikili kudiza Bayibolu naChinsahu chaYehova. Ilaña ñodami wayiheleli aYinsahu. Chinayili nakupompa nawaYinsahu, ñodami wanlejeli nindi nitondihu chuma chimu, hadi kuleka kudiza Bayibolu nakufuma hetala. Nazeyeli chikupu, nalekeli kudiza Bayibolu neyi chakeñeleñayi nawa nalekeli kudikunda nawaYinsahu. Chimwahitili mpinji natachikili kuditoñesha chinakañenyi kulondela chuma chinateleleli kwila.

Ifuku dimu, akwetu mutwazatilileña atachikili kuntalisha nyevulu yanzekesi. Yantiyishili kuwaha ilaña yadiña yatama, dichi natachikili kudinka nyiloña nankashi. Chinanukili yuma yinadizili muBayibolu nelukili chikupu nami Nzambi wukambabesha. Chinaswejeli kutala nyevulu yatama, mpwila yami yaswejeleliku yakutala nyevulu yanzekesi. Mukuhita kwampinji nateñukili.

Chimwahitili yaaka 20, navulameneni chikupu yuma yejima yandizishiliwu kudi amama. Yilwilu yami yamwekesheleña hohu  yuma yinadiña nakwila. Nhoshelu yami yadiña yatama, nawa nahosheleña mazu awuvumbi. Nateñukili nawuvumbi. Hela chakwila nadiña nasumbula, ilaña nadiña nawambanda amakwawu. Ifuku dimu natalili hachibanjilu nakuhosha nami, ‘Nakukeña wanyi.’ Natachikili kudihela.

Twadiseñeli nawa chihandilu chami chatamininiku. Kuhiñahu, nalombeli kudi Yehova namuchima wami wejima. Natachikili cheñi kudiza Bayibolu hela chakwila mwahitili yaaka 20. Haniyi mpinji atata adiñi afwa dehi nawa amama adiñi aChinsahu chaYehova.

Chihandilu chami chahimpikili chikupu nanshimbi yamuBayibolu yinadizili. Haniyi mpinji nafuukwiluhu kwikala nakuwunda kwakanawu muBayibolu. Nafuukwiluhu kuhimpa nhoshelu yami nakwikala wawunda. Nafuukwiluhu cheñi kuleka wuvumbi, kuhema yisela yalwisu, kunwa walwa nankashi nikumwiyila muntu wañiñija mudimu.

Akwetu mutwazatilileña ahayamini chikupu chaletesheli nihimpi muniyi njila. Hadi yaaka yisatu, atwalekeluhu kunkanjikija nawu nitachiki cheñi kwila yuma yatama yinelileña. Neyi nimwekesha chililu chatama, chidi neyi kuhila hela kuhosha mazu atama, atiyileña kuwaha nakubidika nawu: “Aha-a! Joe wamukulu nafunti.” Awa mazu antiyishileña kutama. Namweneña neyi kwiji nakañanyi.

Hamudimu hinazatileña hadiñi nyevulu yanzekesi, hamakina nihayipapilu. Akwetu mutwazatilileña atwalekeluhu kuditemeshela nyevulu hamakompyuta neyi chinelileña kunyima. Nakeñeleña kuleka ichi chaaku, ilaña akwetu ankañesheleña chikupu. Nayili nakulomba wukwashu kudi muntu wandizishileña Bayibolu. Chinadiña nakumulumbulwila kukala kwami wantiyilili nakanañachima. Kuzatisha jinsona jamuBayibolu, wanlejeli chinatela kumanisha iku kukala nawa wankolesheli kulomba wukwashu kudi Yehova mpinji yejima.—Masamu 119:37.

Ifuku dimu napompesheli akwetu mutwazatilileña. Chiyapompeliwu, nayilejeli nami, nonenu walwa muyinki amayala ayedi aditejeleli nawu ateñuka nawalwa. Izanvu dejima davwakukili nakuhosha nawu: “Kwila twila omu nehi. Awa amayala ateñuka nawalwa!” Nahosheli nami: “Ninami nateñuka.” Kufuma tuhu hanidi ifuku, awa amayala elukili chinakabakeneña nanichi chaaku nawa alekeli kunkanjikija kufunta cheñi kuyuma yinelileña.

Mukuhita kwampinji Yehova wakwashili kuleka kutala nyevulu yanzekesi. Mu 1999, napapatisheweli nakwikala Chinsahu chaYehova, nasakililaña hakwikala cheñi nakukooleka kwakwikala nachihandilu chachiwahi.

Neluki dehi chuma chacheni chahelelayi Yehova yuma yinakeñeli nankashi. Chineli hiTata wukweti kukeña, wakeñeleña kunkiña kuyuma yatama yafumaña mukutala nyevulu yanzekesi. Mazu ekala haYishimu 3:5, 6 ankwashili. Ahosha nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.” Nshimbi jamuBayibolu bayi neyi jinankiñi hohuku, ilaña jinakwashi kwikala nachihandilu chachiwahi.—Masamu 1:1-3.

Kunyima, nadimweneña neyi nidi wamukunkulwayi, ilaña chayinu mpinji inakudilemesha nikwikala nakuwunda kwamuyitoñojoka. Nidi nachinleji chachiwahi nawa neluki nami Yehova nañanakeni nikunkwasha. Mu 2000, nasumbwili Karolin, muhela mukwaKristu wamuwahi nawa wamukeña Yehova neyi chinamukeña ami. Twashakamaña mukuwunda. Twatiyaña kuwaha hakwikala hakachi kawamanakwetu akwaKristu awunyonji nawa adikeña amukaayi kejima.