Komana tunateli kukuhwelela chikupu netu yikaninu yaNzambi yejima yikashikijewa? Yesu welukili nindi yikashikijewa nawa ntañishilu yindi yakwashili antu amutiyilileña kwikala nachikuhwelelu. Talenu chakutalilahu chashimwiniyi mumpanji yindi yahampidi, chekala haMatewu 5:18, nindi: “Inakuyileja chalala nami, iwulu niiseki keña jihiti, ilaña kwosi kansona hela kamu kakehelamu kamuNshimbi kakahitaku, sampu yuma yejima yinamwekani dehi.”

Kansona kanyanya kamuchiHeberu hi י (yod), diyi nsona yatachi yansona yaTetragiramatoni yemenañaku ijina daNzambi dajila, Yehova. * Kutalisha hamazu aweni ninsona yekala muNshimbi yaNzambi, asoneki niAfwarisi amweneña “kansona kamu” kadi kejima nawu kalema.

Yesu wadiña nakuhosha nindi iwulu niiseki keña jihiti, ilaña kansona kanyanya kamuNshimbi hikakahita chakadi kushikijewaku. Hela chochu, Bayibolu yatwilejaña nawu idi iwulu niiseki ditwamonaña dikashakama haya nyaaka. (Masamu 78:69) Dichi awa mazu anakumwekesha hatooka to-o nawu kwosi nikansona kanyanya kamuNshimbi kakabula kushikijewaku.

Komana Yehova Nzambi washa muchima nikutuyuma tanyanya? Eña, washaku muchima. Toñojokenu hachumichi: A Isarela akushankulu ayilejeli nawu hiyatela kufumpa ifwaha damwana kamukoku wahaChipandakenuku. (Kwidika 12:46) Hadaha, kadiña kalunshimbi kanyanya hohu. Komana elukili chuma chayikanishililu kubula kufumpa ifwaha? Inehi. Yehova Nzambi welukili nindi ilu lushimbi lwakudamini kuwuprofwetu wahosha hadi Mesiya wakwila nawu kwosi ifwaha dakakotoka hampinji yakamujihawu hamutondu wakuyandishila.—Masamu 34:20; Yowanu 19:31-33, 36.

Mazu aYesu atudizishañadi? Ninetu tunateli kukuhwelela chikupu netu yikaninu yaYehova Nzambi yejima yikashikijewa muyuma yejima. Mwamweni nsona yanyanya yachiHeberu yatukoleshaña chikupu!