ANTU ahoshaña nsañu yayivulu nawa yashiyashana kutalisha hawumi nikufwa. Antu amakwawu atoñojokaña nawu neyi afwa akutwalekahu kuhanda, hadaha mumujimba wacheñi hela kwiluña dacheñi. Amakwawu niwena nawu akusemuka nakwikala chuma chacheñi. Amakwawu niwena nawu kufwa dikukuma kwayuma yejima.

Munateli kwikala nayitoñojoka yambukaku kutalisha haniyi nsañu, kwesekeja nankulilu yenu hela chisemwa chenu. Antu akweti yitoñojoka yashiyashana hachuma chamwekanaña neyi muntu nafwi. Dichi tunateli kudihu netu: Kudihu muntu wunateli kutwinka ñakwilu yalala yanilu lwihu?

Akulumpi jansakililu anatañishi hadi yaaka yayivulu nsañu yakutwamba yakwila nawu wumi wamuntu wafwaña wanyi. Antu amavulu ekala muniji nsakililu, chidi neyi akwaKristu, aHindu, aYudeya, aMuzilemu nijinsakililu jikwawu, akuhwelelela nawu wumi wafwaña wanyi, dikwila nawu mujimba wafwaña spiritu yatwalekañahu kuhanda. Kwambukaku, aBudahizimu wena akuhwelela nawu kuhitila mukukulilaku chikupu, kwikala nañovu hela kwikala nañovu yamuyitoñojoka, chamuleñelaña muntu kuzañalala chikupu nawa iku kuzañalala akutenaña nawu Nirvana.

Muloña waniyi ntañishilu, antu amavulu mwahita kaayi kejima akuhwelela nawu neyi muntu nafwi wayaña nakushakama cheñi mwituña dikwawu. Cheñi antu amavulu akukuhwelela nawu kufwa kwalema muloña kwaleñela muntu kuhanda munjila yikwawu nawa ahoshaña nawu kufwa hinkeñelu yaNzambi. Hanu Bayibolu yahoshahu nawudi haniyi nsañu? Mwani tañenu chibaaba chinalondelihu. Ñakwilu yimukuwana yikuyizañalesha.