DOREEN waneñeli chikupu chelili nfumwindi yakati kansa yakuwoñu hampinji yadiñayi nayaaka 54. * Andotolu amulejeli nawu wukushakama hohu tukweji twatesha. Wohosheli nindi, “Yuma yanlejeliwu yaneñesheli chikupu. Naneñeli chikupu hadi nyilungu yayivulu. Namweneña neyi iku kukala kudi nawantu acheñi bayi nanetuku. Nadiloñesheli wanyi.”

Chawushona, chuma cheliliyi Doreen chavula kumwekana wanyi. Muntu wudi wejima nateli kukata chikatu chafwana kala mpinji. Tunakuyihameka chikupu antu amavulu anakuzataku mudimu wakwakamena antaña jawu anakuyekela nayikatu yafwana. Hela chochu, kwakamena muntu wakata himudimu wakala. Chumanyi chatela kwila chisaka hakwila amukundeji nikumwakamena ntaña yawu wakata chikatu chafwana? Anhembi anateli kuumika ñahi kukala kwamwekanaña hampinji yinakuhembawu muyeji? Chumanyi chatela kwilukawu neyi muntu hakukeña kufwa? Chatachi, tushinshikenu mudimu wakuhemba muyeji chiwunekalili wakala makonu.

Yuma yinakusondujolawu asayantisiti yinakukwasha antu kubula kufwa swayi. Hayaaka yayivulu yinahitihu, antu afwileña swayi kushilahu tuhu niantu amumatuña aheta. Antu afwileña swayi nachikatu chafwana chamusambusambu hela namaposu. Kwadiña yipatela yantesha nawa ayeji amavulu ayihembeleleña kumatala kudi antaña jawu nawa dikwafwilileñawu.

Makonu, kuyilaku hambidi mujayitumbu kunakwashi andotulu kuuka yikatu kulonda antu atwalekihu kuhanda. Yikatu yaleñeleleña antu kunyima kufwa swayi, chayinu mpinji hiyinakufwa swayi naniyi  yikatuku. Hela chochu, bayi neyi iku kubula kufwa swayi chinayi mukwila nawu muntu nakoliku. Kakavulu ayeji akataña chikupu chakwila hiyakutwesha kudihemba aweniku. Kwakamena ayeji himudimu wakala nawa wakeñekaña mpinji chikupu.

Chochimu, antu hela ashakami kwitala anakufwa hela ayi kuchipatela anakufwa. Antu amavulu makonu eluka wanyi chafwañayi muntu nawa antesha hohu diwu amonahu dehi hafwilayi muntu. Kubula kwiluka yumiyi kunateli kuleñela muntu kudiwula hela kuleka kwakameña ntaña yindi wakata. Chumanyi chinateli kuyikwasha?

Neyi chochatiyileñayi Doreen, antu amavulu aneñaña neyi muntu akeñawu nakati chikatu chafwana. Chumanyi chikuyikwasha kuumika iyi yuma, kusweja kwakama, kutiya woma nikuneña? Kambuña aNzambi washinshika walombeli nindi: “Tuleji kuchinda mafuku etu, kulonda tukwati maana kumuchima.” (Masamu 90:12) Eñañi, lombenu chakufuma hamuchima kudi Yehova Nzambi kulonda yayileji ‘chakuchinda mafuku enu’ chiwahi hakwila muzatishi mafuku enu anashaliku munjila yayiwahi nawantu imwakeña.

Mwatela kufuukula chiwahi hakwila mwili mwenimu. Neyi ntaña yenu wuchidi kuhosha nawa nakukeña wakumwimenaku, mwihulenu yashimuni muntu wakamwimenañaku neyi naleki dehi kuhosha. Kuhanjeka chakubula kuhita mumbadi namuyeji kulonda yashimuni neyi chakwila nakukeña kumusha kumakina akutwalekahu koona, kumutenteka muchipatela hela kumuuka mujila yacheñi, yumiyi yinateli kukeheshaku kukala nikubula kutwika nyiloña antu amuchisaka adi namudimu wakumufuukwilaku muyeji. Kuhanjekela chadimu henohu kuchidi mpinji kunateli kuyikwasha antu amuchisaka kwakameña chiwahi muyeji. Bayibolu yahosha nawu, “Habula mpuña yuma yiwafuukwili kwila hiyamwekanañaku.”—Yishimu 15:22.

Neyi chochitweluka, mudimu waweni wanhembi hikumukundeja muyeji. Mwatela kumuleja muyeji wunakati chikupu nenu mwamukeña nawa mukumukwashaña. Munateli kumukwasha ñahi? Mutañilenuña muyeji nyikanda yinateli kumukwasha nikumwimbila tumina tukumutiyisha kuwaha. Ayeji amavulu akundejewaña neyi antaña jawu ayikwata kumakasa nikuhosha nawu mumesu awunda.

Chikuwaha neyi mukumulejaña muyeji ñeji wejima wunenzi nakumutala. Chileji chimu chahosheli nawu: “Kutiya dichuma chakukumishaku chalekaña kuzatika hakachi kayuma yitanu  yatukwashaña. Muyeji nateli kutiya hela chakwila nakumwekana neyi nakaami, dichi bayi muhosha yuma yimukubula kukeña muyeji kutiyaku neyi nahinduki.”

Neyi chinatwesheki, lombelenu hamu. Bayibolu yashimunaña nawu hampinji yimu, kapostolu Pawulu niamabwambu jindi adiña mukukala kweneni nawa elukili wanyi neyi akuhanda. Akeñeleña wukwashu wamuchidinyi? Pawulu wayilejeli amabwambu jindi nindi: “Ninenu nawa munateli kutukwasha kuhitila mukulomba kwenu kwakulembelela.” (2 Akorinda 1:8-11) Kulomba kwakufuma hamuchima kunateli kukwasha muntu wunaneñi chikupu hela wakata chikupu.

Twaneñaña neyi twiluka netu ntaña yetu nakufwa. Dimuloña waweni, kufwa chikwekalila chuma chatama. Hiyatwileñeli nawu tufweñaku. (Aroma 5:12) Dihafuma Izu daNzambi kutena kufwa nawu “chilumbu.” (1 Akorinda 15:26) Dimuloña waweni wutwabulilaña kukeña kutoñojoka hadi ntaña yetu wunafwi muloña chatwineñeshaña.

Hela chochu, kwiluka chuma chinateli kumwekana kunateli kukwasha antu amuchisaka kubula kutiya woma nikuzata kwesekeja nahanakumini ñovu jawu. Yuma yimu yinateli kumwekana anayishimuni muchikasha “chaNyilungu Yakukumishaku Muchihandilu Chamuntu.” Bayi neyi iyi yuma yejima yinashimuniwu muchikasha yayimwekenaña ayeji ejima hela kuyimwekena mundondaku. Hela chochu, ayeji amavulu iyi yuma yikwawu yinashimuniwu yayimwekenaña.

Neyi munafwishi muntu imwakeña, chikuwaha neyi mukutambika ibwambu denu welili nindi wukayikwashaku. Anhembi niantu amuchisaka atela kwiluka nawu makabi adiña nantaña yawu anamani nawa nakukabakana wanyi. Nleñi yawantu watulejaña mujila yayiwahi nindi, “afu hiyeluka chumaku.”—Mukwakutaŋisha 9:5.

Twatela kushindamena hadi Nzambi hampinji yinakukatiyi ntaña yetu, nihampinji yituchidi nachineñi hanyima yakufwisha ntaña yetu. Nzambi nateli kuyikwasha kuhitila mumazu akukundeja niyuma yikuyililawu akwenu. Doreen wahosheli nindi, “Netejeleña yuma yejima yankwashileñawu akwetu. Kafwampi, wukwashu wutwatambwilili watukwashili chikupu. Ami ninfumwami twelukili chikupu netu Yehova diyi wahosheleña nindi, ‘Nidi nanenu kulonda niyikwashi muniku kukula.’ Hinamba kajimbalamuku.”

Mwamweni, Yehova Nzambi diyi Nhembi wabadika. Chineli diyi Nleñi yetu, weluka makabi etu nichineñi chitwatiyaña. Nakufwila chikupu kutwikwasha nikutukolesha kulonda tuumiki. Sweje-e dinu, washiika nindi katataka yafumishihu kufwa chahaya nyaaka nikusañula antu amavulu afwa dehi anukañayi. (Yowanu 5:28, 29; Chimwekeshu 21:3, 4) Nkumininaku, antu ejima akatiya mazu akapostolu Pawulu akwila nawu: “Kufwa, indi kwimika mushindu kweyi kudi kudihi? Kufwa, indi lumuna lweyi ludi kudihi?”—1 Akorinda 15:55.