DAVIDI wadiloñesheli kulonda yatali chuma chayileñeleli amashidika kumutemoka. Atiyili woma nankashi chatemukileñawu kwazuñilileñawu njita. Atemukileña chumanyi? Kapampa kakavulu, Davidi wayitiyileña wejima wawu anakutena ijina damuntu wumu nawoma. Dadiña ijina deyala wumu. Nawa kwenoku, kwemeni chikelamu hachinekineki, wadiña iyala chikupu, hadaha wadiña wamuneni kubadika antu ejima amonayi dehi Davidi.

Davidi welukili chuma chacheni chaleñeleli amashidika kumuchiina Goliyati. Wamwekeneña kutoha chikupu, iyala wamulehi neyi kawumbu. Hela tuhu chakadi nkebu yindi, walemeni kubadika amayala amaneni ayedi neyi ayibomba. Ilaña wadimanyekeli chikupu, wadiña muntu wakola chikupu nawa wakuluka yitembi munjita. Goliyati wabidikileña nakusupisha. Fwikijenu nakuhosha nezu dañovu iku nemani hampidi nakuyisupisha amashidika awaIsarela nimwanta wawu, Sawulu. Wakeñeleña iyala wudi wejima yenzi nakulwa nindi kulonda azuñi iyi ndombu yimani!—1 Samweli 17:4-10.

A Isarela atiyili woma. Mwanta Sawulu watiyili woma. Iku kukala kwelukiliyi Davidi, kwatwalekelihu hadi kakweji kamukuma! Mashidika awaFwilistinu niawaIsarela atwalekelihu nakuditala chakadi kuzuña hampinji yadiñayi Goliyati nakusupishayi hefuku-hefuku. Davidi waneñeli. Chamutiyishileña kutama hakumona mwanta wawaIsarela niamashidika indi, kushilahu niayaya jaDavidi asatu, anakutiya woma chikupu! Kwesekeja nachamweneñayi Davidi, iwu musenji Goliyati bayi neyi wadiña nakusupisha hohu amashidika awaIsarelaku, ilaña watukileña Nzambi yawaIsarela, Yehova. Hanu dinu Davidi, kansi wanyanya chikupu, wukwilahu hodi? Yumanyi yitunateli kudizilaku makonu kuchikuhwelelu chamwekesheliyi Davidi?—1 Samweli 17:11-14.

Tusambilenu ntahi kushinshika hayuma yamwekeni hadi tukweji twatuvulu twahitilihu. Itañwa chidahumineña Davidi wadiña nakubiña nyikoku yatata yindi kumpidi yadiña kwakwihi naBetelemi. Wadiña kansi walubanji, hadaha wachidiña kampululu, kumesu indi kwamwekeneña kuchinana niwutotombu nawa wadiña namesu akwiluka yuma. Neyi kunawundi, wembileña kadada. Lubanji lwayuma yaleñayi Nzambi lwamuzañalesheleña nawa wakulukili yitembi mukwimba kuhitila mukwimbaña mpinji yejima namuzañalu. Ilaña haniyi mpinji yahumineña itañwa, ayili nakumutambika Davidi. Tata yindi wakeñeleña kudimona nindi chakadi kunata mpinji.—1 Samweli 16:12.

Wawanini tata yindi Jesi, nakuhanjika nakashinakaji weyala. Wadiña kaprofwetu washinshika Samweli. Yehova wamutemesheli kuya nakuwayisha mwana wumu hakachi kanyana kaJesi kulonda yakekali mwanta wawaIsarela wakahiñahu. Samweli wadiña wayimona dehi amana kwaDavidi awakulumpi atanu nayedi, ilaña Yehova wamulejeli Samweli nindi hakachi kawu hosi niwumu Innatondi. Chashikiliyi Davidi, Yehova wamulejeli Samweli nindi: “Wumuwayishi manji; diyi yeniwu.” Henohu amana kwaDavidi anakutalaku, Samweli wenzunwini luseñu lwenzeli namanji alema wuseya nakumuhuñunwina Davidi kumutu. Chihandilu chaDavidi chahimpikili kufuma hamuwayishiliwu manji. Bayibolu yahoshaña nawu: ‘Spiritu yaYehova yenjili  nañovu hadi Davidi kufumisha kwifuku odu kutwala nikumbidi.’—1 Samweli 16:1, 5-11, 13.

Komana Davidi watachikili kufwila wanta? Inehi, wahembeleleña kumulombola kudi spiritu yaYehova kulonda yimukwashi kwiluka mpinji yakekalayi nanyidimu yamaneni. Haniyi mpinji, watwalekelihu namudimu windi wakubiña. Iwu mudimu wawuzatili nakudihana nikuhamuka. Mukanka wanyikoku yatata yindi awulukukili kayedi, mpinji yimu kudi mutupa nawa mpinji yikwawu kudi bera. Davidi hakuminini hohu dakuyihaña awa anyama ayisumiku. Ilaña, watachikili kulwisha nawu kulonda yakiñi nyikoku yatata yindi yazeya. Hampinji yejima yiyedi yayilukukiliwu, wayijahili awa anyama ayisumi azuwa!—1 Samweli 17:34-36; Isaya 31:4.

Mukuhita kwampinji, Davidi amutambikili cheñi. Mwanta Sawulu amulejeli nsañu yayiwahi yakoñeliyi Davidi. Hela chakwila Sawulu wachidiña mushidika wañovu chikupu, Yehova walekeli kumutiya kuwaha muloña wadikañili nanshimbi jaNzambi. Yehova wafumishili spiritu yindi hadi Sawulu, dichi iwu mwanta wekalili naspiritu yatama, yakusweja kuzuwa, kujinoka nimadombu. Sawulu chekaliliyi naniyi spiritu yatama, chuma chamuzañalesheleña hohu chadiña tumina. Antu jaSawulu amakwawu adiña eluka dehi nawu Davidi hiñimbi nawa himushidika. Dichi Davidi amutambikili, hashimbwili wanyi amutondeli kwikala ñimbi wamuchota chaSawulu nawa mukwakusenda yitwa.—1 Samweli 15:26-29; 16:14-23.

Atwansi niwena anateli kudizilaku yuma yayivulu kutalisha hachikuhwelelu chaDavidi muniyi nsañu. Munamoni nawu wazatishileña mpinji yindi kwila yuma yamukundamishileña kwakwihi naYehova. Kubombelahu, welukili nyidimu yayiwahi nawa yamuleñeleli kwiñila nyidimu swayi. Sweje-e dinu, wetejeli kumulombola kudi spiritu yaYehova. Hichakutalilahu chachiwahi chitwatela kwimbujola wejima wetu—Mukwakutaŋisha 12:1.

Iku nakumukalakela Sawulu, kakavulu Davidi wayileña kwawu nakubiña nyikoku, mpinji yikwawu washimbwileñaku. Hampinji yimu yenjiliyi, tata yindi Jesi wamutemesheli Davidi kuya nakutala amana kwindi awakulumpi asatu adiña amashidika aSawulu. Davidi wovwahilili nawa wayitwalilili amanakwindi yakuda yayivulu, wayili Kuchinekineki chaEla. Chashikiliyi, watiyili kutama chawaniniyi mashidika awaFwalistinu niawaIsarela itwashimuna kumatachikilu achinu chibaaba anemani hohu chakadi kuzuña. Aditalishilili awa kukabadi kamu kwakunkumuka awa kukabadi kakwawu kwakunkumuka muchinekineki.—1 Samweli 17:1-3, 15-19.

Davidi watiyili kutama nayuma yawaniniyi. Muloñadi amashidika aNzambi wamumi, Yehova, chinakumutemukilawu iwu iyala wamukunkulwayi nawa musenji? Davidi wamweni nindi Goliyati chadiña nakusupishayi wadiña nakumutuka Yehova. Dichi watachikili kuyileja amashidika nindi wukumushinda Goliyati. Hashimbwili wanyi, mana kwaDavidi wawedi Eliyabi, watiyili chahosheleñayi Davidi. Wamuzuwilili mwanyikindi chikupu, nakumuleja nindi wunenzi hohu kunu nakutala chakuzuñawu njita. Ilaña Davidi wamwakwili nindi: ‘Neli ñahi? Nehuleña hohu!’ Watwalekelihu kuhosha hansañu yakumushinda Goliyati, sampu nimuntu wumu chayili nakushimunayi kudi Sawulu. Mwanta wayilejeli nindi amuleti Davidi.—1 Samweli 17:23-31.

Davidi wamulejeli mwanta awa mazu akukolesha  kutalisha hadi Goliyati nindi: “Antu bayi amufwa mutentu munyichima yawuku.” Chalala Sawulu niantu jindi afwili mutentu muloña waGoliyati. Hadaha aluwañesheli hakudesekeja nanona iyala wamuneni, adifwikijileña adi mumbunda hela mwibwambu dindi. Adifwikijileña iwu iyala wataluka nayishindi. Ilaña Davidi hatoñojokeleña muniyi njilaku. Neyi chitukudiza, yena wamweni iku kukala munjila yambukaku chikupu. Dichi wadihanini yomweni kuzuña naGoliyati.—1 Samweli 17:32.

Sawulu wakaanini nindi: “Eyi hiwukutwesha kuya nakulwisha nayeniwu kaFwilistinu muloña eyi wumukwenzi hohu kweyi, yena himukwanjita hohu kufumisha kuwukwenzi windi.” Komana chalala Davidi wadiña kansi? Inehi, ilaña hashikili muchipimu chakwikala mushidikaku nawa watela wamwekeneña wansi. Ilaña Davidi adiña amwiluka dehi nawu hichilobu nawa haniyi mpinji watela wachidiña kansi.—1 Samweli 16:18; 17:33.

Davidi wamulejeli Sawulu chajahiliyi mutupa nibera. Komana wadiña nakudisamba? Inehi. Davidi welukili chayijahiliyi. Wahosheli nindi: “Yehova wampulwishili kwikabu damutupa nikwikabu dabera diyi nawa wukumpulwisha nikudi yeniwu kaFwilistinu.” Nkumininaku Sawulu wetejeli nakumwila nindi: “Yaña Yehova ekali naneyi.”—1 Samweli 17:37.

Komana ninenu mukwikala nachikuhwelelu neyi chaDavidi? Ilukenu nenu, chikuhwelelu chaDavidi hichadiña chakufwikijaku. Wadiña nachikuhwelelu mudi Nzambi yindi muloña wamaana niyuma yamweniyi. Wamwilukili Yehova nindi himuKwakukiña wukweti kukeña nawa Mukwakuhemba yikaninu. Neyi tunakukeña kwikala nachikuhwelelu chamuchidiwu, twatela kutwalekahu kudiza hadi Nzambi mwini Bayibolu. Neyi tuzatishaña yuma yitunakudiza, mwakafuma yuma yayiwahi yikakolesha chikuhwelelu chetu.—Aheberu 11:1.

Hatachi, Sawulu wamuvwikili Davidi chakuvwala chindi chanjita. Chadiña neyi chakuvwala chaGoliyati, chadiña chakutuña nawuneñu hadaha chadiña chakutuña nachikowelu chachilehi chamakalu. Hela chochu, Davidi wesekeli kwenda iku navwali ichi chakuvwala cheneni nawa chalema, nkumininaku wamweni nindi chikumukwasha wanyi. Hadizilihu kwikala mushidikaku, dichi wenjilili wanyi kuvwala yuma yanjita, sweje-e dinu chakuvwala chanjita chavwalileñayi Sawulu iyala wadiña wamulehi chikupu mumuza wejima waIsarela. (1 Samweli 9:2) Wachivuulili nakuvwala chakuvwala chindi chavwalileñayi, chakuvwala chakabiña wunadimanyeki kulonda yakiñi mukanka wanyikoku yindi.—1 Samweli 17:38-40.

Davidi wasendeli mutondu windi wakubiña nachu, fuba nimwonji wakwasa nachu. Iwu mwonji hiwamwekeneña neyi hichitwa chalumbwaku, ilaña chadiña chitwa chanjita. Wadiña nampapa yanyanya, dichitwa chazatishileñayi kabiña chikupu. Washileña ilola mumpapa yakasilileñayi kunyonji yiyedi yachitembi, chazuyayi nañovu wombileñaku mwonji wumu kulonda ilola dihiti chiwahi. Ichi chitwa chadiña nakuzatika chiwahi chikupu chakwila amashidika mpinji yikwawu azatishileña nyonji yamboka-mboka.

Chadimanyekeliyi, Davidi wayili nakudibulakana nachilumbu chindi. Tunateli kudifwikija Davidi chalombeleñayi kuchikumu chakaloña kadiña muchinekineki hampinji yabandaminiyi nakunona tumalola tutanu twasenena. Kuhiñahu wayili kunjita lufuchi.

Goliyati chamweniyi chilumbu chindi, yumanyi yatoñojokeliyi? Twatañaña nawu, “Hakumusekesha muloña Davidi wadiñi wuchidi mukwenzi hohu wuchinana walubanji.” Goliyati hakubuluma nindi: “Ami nikawa mwaka winzi kudami nanyitondu?” Chinamwekani neyi wamweniku hohu mutondu wadiña naDavidi, ilaña mwonji wawumweni wanyi. Wamushiñili Davidi mwijina dawanzambi awaFwilistinu nakusanyika nindi mujimba windi wukuyinka atujila nianyama amumpata.—1 Samweli 17:41-44.

Nimakonu, mazu ahosheliyi Davidi amwekeshaña nawu wadiña nachikuhwelelu chikupu. Fwikijenu kansi weyala nakumwila Goliyati nindi: “Eyi wunenzi kudami nampoku yakabali neyoña nankebu; ilaña ami nenzi kudeyi mwijina daYehova wamazaza Nzambi yanjita jawaIsarela jiwunaswidikiji.” Davidi welukili nindi ñovu jawantu niyitwa yanjita jamukunkulwayi. Goliyati wamusawili Yehova Nzambi nawa Yehova wukwakula. Kwesekeja nachahosheliyi Davidi nindi, “hinjita yambala yaYehova.”—1 Samweli 17:45-47.

Davidi welukili kutoha kwaGoliyati niyitwa yindi.  Ilaña yumiyi hiyamuleñeleli yatiyi womaku. Helili neyi cheliliyi Sawulu nawamashidika indiku. Davidi hadesekejeli naGoliyatiku. Ilaña, wamwesekejeli Goliyati naYehova. Hela chakwila wadiña wamulehi mamita 2.9 kubadika antu ejima, komana wadiña neyi Mwanta wakuleña kwejima? Kwakulehi, kufwana antu ejima wadiña hohu neyi kabubu, dikwila nawu muntu wadiña nakukisañanawu kudi Yehova.

Davidi wayili lufuchi kudi chilumbu chindi nawa wanoneli ilola mufuba yindi. Wadishili mumwonji windi nakudizuya nañovu sampu nichidavumini. Hadaha Goliyati wadiña kwakwihi namuntu wamusendeleleña nkebu yindi, iku nakuswina kwakwihi naDavidi. Chelili Goliyati wadiña wamulehi nankashi hadaha chamukalilili, muloña muntu wamusendeleli nkebu wadiña wamwihi chakwila hadi kutwesha kumukiña kumutuku. Nawa kweniku kumutu dikwapimininiyi Davidi.—1 Samweli 17:41.

Davidi wombili ilola. Fwikijenu chidayileña nakushikena hapiminiyi. Yehova wamukwashili Davidi kulonda yamwasi ilola dimu hohu. Ilola damwasili hapiminiyi, nakwiñila mwihama daGoliyati. Iwu chikelamu waholokeli chamesu heseki! Mukwakumusendela nkebu watemukili hadaha muloña wawoma. Davidi waswinini mukamwihi, wanoneli mpoku yakabali yaGoliyati nawa wamuketwili iwu chikelamu cheyala mutu.—1 Samweli 17:48-51.

Nkumininaku, Sawulu niamashidika indi akwatili ñovu. Abidikili nezu dakushinda nawa ayikupishili aFwilistinu. Iyi njita yazatikili neyi chochamulejeliwu Goliyati kudi Davidi nindi: ‘Yehova . . . wakayihana wejima wenu mumakasa etu.’—1 Samweli 17:47, 52, 53.

Makonu, ambuña Nzambi hiyalwaña njita yamuchidiwuku. Iyi mpinji yahita dehi. (Matewu 26:52) Hela chochu, twatela kwimbujola chikuhwelelu chaDavidi. Kufwana Davidi, twatela kumumona Yehova netu chalala wudi kwoku, netu diyi Nzambi hohu itwatela kukalakela nikukakela. Mpinji yikwawu, tunateli kumona kukala kwetu netu tukutwesha wanyi kukushinda, ilaña kukala kwetu kwantesha neyi tukwesekeja nañovu yaYehova yabadika. Neyi tumutonda Yehova kwikala Nzambi yetu nawa tumukuhwelela neyi cheliliyi Davidi, kwosi kukala kukatutiyisha womaku. Kwosi chuma chatela kukañanyayi Yehova kushindaku!