Twavwalikili anyana awamayala awana nawa yami nadiña chilondela wedi. Anvwali jami antwalili nakumpapatisha muChechi yaKatolika, nkumininaku nekalili mwizanvu dakwaya. Nakeñeleña kumuzañalesha Nzambi muloña natiyileña woma chikupu nami akenda kansompesha nikuñocha mukaluña kachinana haya nyaaka.

Chinashikijili yaaka yitanu yakuvwalika, atata atushili. Chumichi channeñesheli chikupu nawa hinadiña namwakwililaku. Nelukili wanyi chuma chaleñeleli atushiyi henohu twayikeñeli nankashi. Amama azatileña hadi mpinji yeneni hanji yamusumba hakwila nawu atukeñeli yakuda etu anyana awana.

Hamuloña wachumichi, nalekeli shikola nakutachika kudikunda nawakwenzi adiña akula dehi. Andizishili kutachika kusanyika, kunwa makanya, kwiya nikuzuña namakofu. Chineli nakeñeli kuyandisha akwetu, nadizili kuzuña jinkonyi, kudikama tumpaña nikalati, kushilahu nikuzatisha yitwa. Nekalili kampululu mukwamadombu. Kakavulu nazuñileña namata nawa mpinji yayivulu nawanikileña nayilonda yamashi mujimba wejima nawa anshili mumukwakwa kwakwihi nakufwa. Nayineñesheli amama chikupu chanwaniniwu muniyi njila nawa ansendeli nakuntwala kuchipatela swayi-swayi.

Chinashikijili yaaka 16, ibwambu dami wejina daJorge wenjili hetala detu. Watulejeli nindi hiChinsahu chaYehova nawa nindi nakukeña kutulejaku nsañu yalema. Watachikili kutuleja yuma yakuhwelelayi kuzatisha Bayibolu. Nadiña kanda niyitañeñahu dehi iyi nsañu nawa natiyili kuwaha hakwiluka ijina daNzambi ninkeñelu yindi. Jorge watulejeli nindi tutachiki kudiza nindi Bayibolu. Dichi twetejeli.

Chinatwalekelihu kudiza Bayibolu, namweni nami natela kuhimpa yilwilu yami. Nateleleli kwikala nayilwilu yakudizoza nikuleka madombu. Kufumba kwekala ha 1 Akorinda 15:33 kwankwashili. Kwahosha nawu, “Kudikunda nawantu atama kwatamishaña maana amawahi.” Nelukili chikupu nami neyi inakukeña kuhimpa yilwilu yami, natela kuleka kudikunda nawantu atama anakunluwañesha. Dichi nalekeli amabwambu amakulu nakukeña amabwambu amaha amuchipompelu chawakwaKristu chalala, antu amanishaña kukala kwawu, bayi najinkonyi hela munjila yamadombuku, ilaña azatishaña nshimbi jamuBayibolu.

Nsañu yikwawu yamuBayibolu yankwashili chikupu yekala hamukanda waAroma 12:17-19. Yahosha nawu: “Bayi mwila mwinenu chatama nakatama kanayiliyuku. . . . Neyi chikutwesheka, shakamenu chachiwahi nawantu ejima, mwejima mumukutweshela enu aweni. Bayi muditendaku, . . . muloña anasoneki nawu: ‘“Yehova nahoshi nindi, Yami nukutenda, yami nukufweta.’” Nelukili nami Yehova yomweni wakwolola wuñanji munjila yindi nawa hampinji yatelela. Chovu-chovu, natwesheli kuhimpa chihandilu chami chamadombu.

Hinamba kavulamena yuma yamwekeneni ifuku dimu namelela hinafuntileña kwitalaku. Izanvu dawakwenzi akwamadombu inadikundileña nawu kunyima anlukukili, nawa mukulumpi wawu wañeteli munyima, nakuñila nindi, “Damwini tutali!” Haniyi mpinji nalombeli kudi Yehova muwihi nami yankwashi kuumika iku kukala . Hela chakwila natiyileña neyi nateleleli kuyeta, ilaña nadiyilili hohu kwami. Ifuku dalondelelihu nadibulakeni cheñi namukulumpi wanidi izanvu. Nahilili nawa nakeñeleña kumufuntishilamu, ilaña namulombeli cheñi Yehova kulonda yankwashi kufwomoka. Nahayamini, kukashimuka mukwenzi hakwinza kudami nakuhosha nindi: “Wuñanakeniku hayuma yamwekana haloshi nawufuku. Kuhosha hohu chalala, inakukeña kwikala neyi eyi. Inakukeña kudiza Bayibolu.” Nazañaleli chikupu muloña nafwomweni kuzuwa kwami! Nasakililaña hachumichi, muloña natachikili kudiza nidi Bayibolu.

Chawushona, chisaka chami hichatwalekelihu kudiza Bayibolu haniyi mpinjiku. Hela chochu, nafuukwilihu chikupu kutwalekahu kudiza nikubula kwiteja muntu hela chuma chidi chejima kunkañesha. Nelukili nami kudikunda nawantu jaNzambi mpinji yejima kukunkwasha kufumisha yitoñojoka yatama nikwikala nachisaka chinakeñeleña. Natwalekelihu kupama nawa mu 1991, napapatisheweli nakwikala Chinsahu chaYehova.

Haniyi mpinji, nazatiliku mudimu wakudikeñela hakasanji kamutayi kawaYinsahu jaYehova muMexico. Hampinji yinazatileña kweniku, twadimweni naClaudia kankaña mukwaKristu wadikita nawa twadisumbwili mu 1999. Namusakililaña Yehova chikupu hakunyika iwu nkwashi washinshika!

Twazatilili hamu muchipompelu Chawatumama muMexico, twakwashileña atumama kudiza hadi Yehova. kufumahu, atutambikili kuya kuBelize nakudizisha antu amunidi ituña Bayibolu. Hela chakwila kunu hitukweti yuma yayivuluku, tukweti yuma yejima yatuzañaleshaña. Kwila tuhimpa chihandilu chetu nachuma chidi chejima nehi.

Mukuhita kwampinji, amama atachikili cheñi kudiza Bayibolu nawa apapatisheweli. Cheñi, yayami niñodindi kushilahu nianyanawu hiyaYinsahu jaYehova chayinu mpinji. Amakwawu adiña amabwambu jami inahanjekeli nawu nsañu yaWanta, niwena chayinu mpinji anakumuzatila Yehova.

Chawushona, antaña jami amakwawu afwa dehi muloña hiyahimpili yilwilu yawu yamadombuku. Neyi natwalekelihu kwila yuma yinelileña, kachi ninami nafwa dehi. Namusakililaña Yehova chankundamishayi kudi yena nikudi akwakudifukula indi, ankwashili mukuwunda nawa andizishili munjila yayiwahi nawu nizatisheña nshimbi yamuBayibolu muchihandilu chami.