Eña, añelu atama ekala kwoku. Afuma kudihi? Anukenu nenu Nzambi wayileñeli añelu nawuswa wakudifuukwila. Hanyima yakuleña iyala nimumbanda watachi, Adama naEva, chileñaleña chawanina chakuspiritu wazatishili wuswa windi wakudifuukwila munjila yatama nawa waleñeleli antu kutachika kudikaña hamaseki. Wayidimbili Adama naEva adikañi naNzambi. (Kutachika 3:1-7; Chimwekeshu 12:9) Bayibolu hiyashimuna ijina daniwu chileñaleña wakuspiritu hela chifulu chadiñayi nachu mwiwulu henohu kanda yadikañiku. Ilaña chelili yadikañi, Bayibolu yamutena chikupu nawu Satana, dikwila nawu “Mukwakudikaña,” nawa Diyabolu, dikwila nawu “Mukwakudimbana.”—Matewu 4:8-11.

Chawushona, iyi yilwilu yatama yakudikaña hiyakuminini hohanaku. Mumafuku aNowa añelu abula kushimunawu kuvula “adiwili maluña awu amawahi akushakamamu” muchisaka chaNzambi chamwiwulu. Asulukili hamaseki nakuvwala nyijimba yawuntu kulonda eleña yilwilu yatama niwuvumbi, kwila yuma yabulili kwikala munkeñelu yayileñeleliwu.—Yuda 6; Kutachika 6:1-4; 1 Petulu 3:19, 20.

Yumanyi yayimwekeneni ana añelu atama? Chelili Nzambi yaleti dibaji deneni dajilumwini iseki dejima, awa añelu avwalili nyijimba yakuspiritu nakufunta mwiwulu. Hela chochu, Nzambi hayitejeli awa añelu adiña nayilwilu yatama kufunta ‘hayifulu yawuku.’ Dichi, wayikasa nakuyisha mwiluña mudi “mwidima [wakuspiritu] wasweja,” mwatenañawu nawu Tatarusi. (Yuda 6; 2 Petulu 2:4) Awa andemoni adisha muchiyuulu chaSatana Diyabolu, “nyuuli wawandemoni, wadifwikijaña neyi hikañelu kachejeji.”—Matewu 12:24; 2 Akorinda 11:14.

Bayibolu yashimunaña nawu Wanta waNzambi wawuMesiya, nfulumendi yamwiwulu, yatachikili kuyuula mu 1914. * Kufuma tuhu haniyi mpinji, Satana niandemoni jindi ayihañili mwiwulu nakuyinatila hakamwihi neseki. Yuma yatama niyilwilu yawuvumbi yinasweji hanu hamaseki, yinakumwekesha ndulu yidiwu nayu nikutama kunakutiyawu.—Chimwekeshu 12:9-12.

Hela chochu, kusweja kwayuma yatama yidi neyi madombu niyilwilu yawuvumbi yinakumwekesha nawu kukuma kwayuma yatama kudi mukamwihi. Katataka, iyi yileñaleña yakuspiritu yatama akuyijilumuna. Hanyima yakwila Wanta waNzambi wunayuuli dehi muparadisa hamaseki hadi yaaka 1,000, awa aspiritu atama akayinka cheñi kukooleka kukwawu kwakukumishaku kulonda akeseki antu. Nkumininaku akayijilumuna haya nyaaka.—Matewu 25:41; Chimwekeshu 20:1-3, 7-10