Bayibolu yamwekeshaña nawu hakwila nkeñelu yaNzambi yizatiki, añelu mpinji yikwawu akiñaña akwakudifuukula alala. (Masamu 34:7) Chakutalilahu:

• Hampinji yajilumwineñayi Yehova nyisumba yatama yaSodoma naGomora, añelu amukwashili Loti muntu waloña nichisaka chindi kutemuka.—Kutachika 19:1, 15-26.

• MuBabiloni wakushankulu anyikwenzi asatu awaHeberu ayumbilili muluteñi lwakesi nawu afwi, ilaña Nzambi ‘watemesheli kañelu kindi, nakupulwisha ambuñindi.’—Danyeli 3:19-28.

• Hanyima yakwila iyala waloña Danyeli nakaami dehi muwina wanyitupu yadiña nanzala, wahosheli nindi napuluki muloña “Nzambi yami natemeshi kañelu kindi, najiki mutunwa twawanyitupa.”—Danyeli 6:16, 22.

Mpinji yikwawu, añelu aNzambi azatileñaku nyidimu yadiña muchipompelu chawakwaKristu chakusambila neyi chakwila oyu nyidimu yinakukeñeka hakwila nawu nkeñelu yaYehova yishikijewi. Chakutalilahu:

• Kañelu washinkwili yenzelu yakukaleya nawa wayilejeli apostolu akasiliwu kutwalekahu kushimwina mutembeli.—Yilwilu 5:17-21.

• Kañelu wamulejeli Fwilipu kuya nakushimwina munjila yahita muchinkalampata chafuma kuYerusalema nakushika kuGaza kulonda yamushimwini kaEtiyopiya wayili kuYerusalema nakudifukula.—Yilwilu 8:26-33.

• Chashikili mpinji yatoñweliyi Nzambi nindi antu abulili kwikala aYudeya ekali akwaKristu, kañelu wamwekeni kudi mukulumpi wawamashidika awaRoma Konelisu muchimwenu nawa wamulejeli nindi yamutambiki kapostolu Petulu kwitala dindi.—Yilwilu 10:3-5.

• Kapostolu Petulu chamukasiliwu, kañelu wenjili kudi yena nawa wamufumishili mukaleya.—Yilwilu 12:1-11.

Kwosi wunsahu wunakumwekesha nawu Nzambi nakukwasha antu muchihayamisha kuzatisha añelu  neyi chashimunawu muBayiboluku. Hela chochu, kutalisha mumafuku etu Yesu wahosheli nindi: “Ninsañu iyi yayiwahi yaWanta akayishimwina mwahita iseki dejima mwashakamawu antu kulonda yikekali wunsahu kudi akwanyuza yejima, mwaka dinu kukuma kwakenzi.” (Matewu 24:14) Komana mweluka nenu atumbanji twaKristu anakuzata iwu mudimu nawukwashu wawañelu?

Mukanda waChimwekeshu washimuna nawu añelu akutwalekahu kukwasha antu mwahita iseki dejima kulonda adizi hadi Yehova Nzambi ninkeñelu yindi yikwetiyi hadi antu. Kapostolu Yowanu wasonekeli nindi: “Namweni kañelu mukwawu watuukileña muluzwizu, wadiña nansañu yayiwahi yahaya nyaaka yakushimwina kudi antu ashakama hamaseki, akwanyuza yejima, akwanyichidi yejima, akwamadimi ejima niantu ejima. Wadiña nakuhosha nezu datiyakana nindi: ‘Mutiyenu Nzambi woma nikumulemesha muloña mpinji yakusompesha kwindi yinashiki dehi, dichi difukulenu kudi Owu waleñeli iwulu, iseki, kaluñalwiji nituseloki twamenji.’” (Chimwekeshu 14:6, 7) Yuma yayivulu yinakumwekana makonu yinakumwekesha nawu añelu anakukwasha mudimu wakushimwina nsañu yaWanta mwahita kaayi kejima. Mwamweni, neyi muntu wumu mukwanshidi yabalumuki nakufunta kudi Yehova, “añelu jaNzambi azañalalaña.”—Luka 15:10.

Neyi mudimu wakushimwina wunamani dehi chumanyi chikamwekana? Mazaza awañelu “awakwanjita amwiwulu” akamukwasha Yesu Kristu, Mwanta wawanyanta, kuzuña “njita yefuku deneni daNzambi Wañovu Jejima” haAmagedoni. (Chimwekeshu 16:14-16; 19:14-16) Añelu akweti ñovu akashinda antu atama hefuku dawusompeshi, hampinji Mwanta Yesu “yakatendayi antu. . . abulaña kwovwahila nsañu yayiwahi yahosha hadi Mwanta wetu Yesu.”—2 Atesalonika 1:7, 8.

Dichi mwatela kwiluka nenu añelu ayakamenaña ninenu. Ayakamenaña chikupu antu ejima anakukeña kumukalakela Nzambi nawa Yehova natwalekihu kuyizatisha hakukwasha nikukiña ambuñindi ashinshika adi hanu hamaseki.—Aheberu 1:14.

Dichi wejima wetu twatela kufuukulahu chiwahi. Komana tukutiyilila nikwovwahila nsañu yayiwahi yinakushimwinawu mwahita kaayi kejima? A Yinsahu jaYehova amwiluña denu akutiya kuwaha kuyikwasha kulonda muhetelimu muwukwashu wawañelu jaNzambi akweti ñovu chikupu.