Ifuku dimu hamulungu namwaana, aKenneth naFilomena, ashakamaña muCuraçao, ayili nakutala eyala namumbanda adizileñawu nawu Bayibolu.

Kenneth washimwini nindi, “Chitwashikili, twawanini kwitala kwakushinka nimotoka hosi. Ilaña muchima wami wanlejeli nawu mutumini mumbanda foni.”

Iwu mumbanda wakwili nakuhosha nindi nfumwindi hosiyi nayi kumudimu. Hela chochu, iwu mumbanda chelukiliyi nindi aKenneth naFilomena adi hachisu, wedikili nakuyileja nindi eñili mwitala.

Cheñililiwu aKenneth naFilomena, elukili nawu iwu mumbanda wadiña nakudila. Kenneth chatachikiliyi kulomba kulonda adizi, iwu mumbanda watachikili cheñi kudila. Dichi, aKenneth naFilomena amwihwili chuma chaletesheli yadileña.

Iwu mumbanda walumbulwili nindi wafuukwilihu kudijaha hayoyina mpinji nawa wasonekeleña mukanda wakumushika nachu nfumwindi kulonda yadikudiki, chelili Kenneth yamutumini foni, dihalekeliyi kusoneka. Wayilejeli nindi wadiña nachineñi, dichi amulejeli jinsona jakukundeja muBayibolu. Awa mazu akukundeja apulwishili wumi waniwu mumbanda.

Kenneth wahosheli nindi, “Twamusakililili Yehova hakutukwasha kulonda tumupulwishi iwu mumbanda waneñeli, sweje-e hakutulombola hadaha kuzatisha kañelu hela spiritu Yindi yajila, kulonda etu tutumi foni!” *

Komana aKenneth naFilomena akuhweleleli mwalala hakwiluka nawu Nzambi wapulwishaña kuzatisha kañelu hela spiritu Yindi yajila? Indi kwiji foni yatuminiyi Kenneth yadiña hohu chilulakenu chankayi namuvu?

Tuneluki wanyi. Ilaña chuma chituneluki chakwila nawu Nzambi wazatishaña añelu kukwasha antu kuspiritu. Chakutalilahu, Bayibolu yahosha nawu Nzambi wazatishili kañelu kumulombola mukwakushimwina Fwilipu kulonda yayi nakumumukwasha kaEtiyopiya wakeñeleña wukwashu wakuspiritu.—Yilwilu 8:26-31.

Jinsakililu jajivulu jakoleshaña antu kukuhwelela muyileñaleña yakuspiritu yañovu, yikwawu ayimonaña neyi hiyileñaleña yelaña nkeñelu yaNzambi hela yakiñaña antu. Antu amavulu akuhwelela nawu añelu ekala kwoku nawa ayikwashaña munjila yikwawu. Hela chochu, antu amakwawu hiyakuhwelela mudi añeluku.

Komana añelu ekala kwoku? Neyi dimu, afuma kudihi? Wunsahwinyi walala kutalisha hadi añelu? Komana anateli kuyikwasha? Tushinshikenu hawunsahu walala.