Nasemukilili mumukala wadiña muSaxony, wuyateneneñ nawu German Democratic Republic (GDR). Twadiña nakushakama chiwahi hetala nawa anvwali andizishili kwikala nayilwilu yayiwahi. Antu adiña muGDR akuhweleleli wanyi mudi Nzambi, dichi antu amavulu amuSaxony alemesheli wanyi nsakililu. Ninami nelukili nami Nzambi kwosi. Chinashikijili yaaka 18 naluwankeni nayitoñojoka yakwila nawu, Nzambi wekala kwosi ninsañu yakwila nawu antu ejima esekana.

Muloñadi chinakeñeleli nsañu yakwila nawu antu ejima esekana? Muloña nakeñeli iyi nhoshelu. Dichi, nelukili nami yuma yejima atela kuyanzañana nakwesekeja, muloña chumichi chikuleñela antu amu kubula kuheta nankashi hela kwikala atuzweñi. Natachikili kuzata mwizanvu dawantu akeñaña nawu yuma yikali yesekana. Chinashikijili yaaka 14, nazatileña mudimu wakuwahisha yipapilu yanatileñawu kulonda yikazatiki cheñi. Antu adiña mutawuni yaAue munashakamineña atiyili kuwaha chinazatileña nañovu chakwila akwanshimbi adiña munidi iluña anyikeli wuloku. Hela chakwila nachidiña kansi, nadilukili nawakulumpi apolitiki amakwawu amu GDR. Namweneña nami inakuzata mudimu wawuwahi nawa chihandilu chami chakumbidi chikekala chiwahi.

Yuma yahimpikili mukukashimwisha. Mu 1989 Mpwembu yaBerlin ayihumwini kudi izanvu dafumini kuEastern Europe dawantu akeñaña nawu yuma yikali yesekana. Kukala kwatwalekelihu. Nelukili nami muGDR mwadiña wuñanji waheña. Chakutalilahu, antu abulileña kudiñinja munidi izanvu ayimweneña nawu amukunkulwayi. Nadihwili nami, chumanyi chinaleteshi? Komana etu twekala munidi izanvu twakuhwelela wanyi netu antu ejima esekana? Komana nhoshelu yakwila nawu antu ejima esekana yadiña yamukanwa hohu? Natiyili kutama chikupu.

Dichi nafuminimu nakutachika kwimba tumina nikuleña nyevulu. Chineli natañilileña hashikola hadizishileñawu tumina, nafwilileña kuya kuyunivesiti kulonda nakekali ñimbi wakuluka yitembi. Dichi, yilwilu yami yayiwahi yandizishiliwu hinachidiña kansi yaluwankeni. Natachikili hohu kudiluñisha chiseki nawa nekalili nawambanda amavulu hampinji yimu. Tumina, kuleña nyevulu nichiseki jamanishili wanyi chineñi chinadiña nachu. Ninyevulu yinaleñeleña yantiyishileña woma. Indi chihandilu chikekala ñahi kumbidi? Nawa muloñadi Nzambi chaleñeleliyi antu?

 Nkumininaku nawanini ñakwilu yinakeñeleña nawa iyi ñakwilu yahayamishili. Ifuku dimu namelela, twahanjekeleña nawakwetu akwashikola hayuma yikamwekana kumbidi. Mandy * niyena wadiña mukwashikola nawa Chinsahu chaYehova. Wankwashili chikupu hadina ifuku namelela. Wahosheli nindi: “Andreas, neyi wunakukeña kuwana ñakwilu yamalwihu eyi ahosha hachikekala chihandilu kumbidi, yaña wukasandujoli muBayibolu.”

Nakuhweleleli wanyi chikupu mwahosheliyi, hela chochu, nayili nakukeña ñakwilu muBayibolu. Mandy wanlejeli kutaña Danyeli kapetulu 2, nsañu yinatañili yanhayamishili. Iwu wuprofwetu washimuna mawanta añovu mukaayi ashiyashana, anatwalekihu kwikala nañovu nimunanu mafuku. Mandy wanlejeli cheñi wuprofwetu wukwawu wamuBayibolu wahosha hachihandilu chetu. Natachikili kuwana ñakwilu yamalwihu ami! Hanu dinu hinyi wasonekeli iwu wuprofwetu nawa hinyi wunateli kushimuna yuma yikamwekana kumbidi chakadi kutwamba? Dikwila nawu kwekala Nzambi ntahidi?

Mandy wanlejeli nindi tukudizaña naHorst niAngelika, aYinsahu adisumbula ankwashili kwiluka chiwahi chahosha Izu daNzambi. Nashikeneni dakwiluka nami aYinsahu jaYehova diyi nsakililu yimu hohu yazatishaña nikuleja antu ijina daNzambi dakwila nawu, Yehova. (Masamu 83:18; Matewu 6:9) Nadizili nami Yehova Nzambi wayinka antu kukooleka kwakushakama haya nyaaka muparadisa hamaseki. Masamu 37:9 yahosha nawu: “Akumuchiñeja Yehova akaswana ituña.” Natiyili nami iku kukooleka akuhana kudi muntu wudi wejima wakeñaña kwikala nayilwilu yakeñañayi Nzambi neyi chinalumbululiwu muBayibolu.

Dichi, hashimbwili hakwila nihimpi yilwilu yami kulonda yesekani nachahosha Bayibolu. Chinekalili ñimbi natachikili kuditiya, chatachi nateleleli kwikala wadizoza. Nawa champeleleli wanyi kuleka yilwilu yatama yinadiña nayu. Namusakililaña Yehova chikupu hakumwekesha kudiwunjika, luwi nihakwinka mpinji antu ejima azataña nañovu kulonda eleña yuma yahosha Bayibolu!

Nsañu yakwila nawu antu ejima esekana ninsañu yakwila nawu Nzambi kwosi yanluwañesheli hinadiña nayaaka 18, ilaña Bayibolu yinatwalekihu kunkwasha muchihandilu chami kufuma tuhu hayina mpinji. Yuma yinadizili yankwashili kuleka kwakama yuma yikamwekana kumbidi nawa nekalili nachihandilu chachiwahi. Mu 1993, napapatisheweli nakwikala Chinsahu chaYehova nawa mu 2000, nasumbwili Tabitha, mukwetu Chinsahu wadikita. Twadikitili chikupu mumudimu wakushimwina kulonda tukwashi antu amakwawu kwiluka chahosha Bayibolu. Antu amavulu itwawanineña adiña nachihandilu neyi chinadiña nachu, chaluwankana nansañu yakwila nawu antu ejima esekana ninsañu yakwila nawu Nzambi kwosi. Natiyileña kuwaha chikupu chinayikwashileña kumwiluka Yehova.

Chinatachikili kupompa nawaYinsahu jaYehova, anvwali jami atiyileña kutama. Kufuma tuhu hayina mpinji, anamoni nawu chihandilu chami chinakuwahilaku muloña wakudikunda nawaYinsahu jaYehova. Nidi wamuzañalu muloña anvwali jami ichi anakutaña Bayibolu nikuya kukupompa kwawaYinsahu jaYehova.

Ami niTabitha tunakushakama chiwahi muwulu muloña twalondelaña nshimbi jamuBayibolu jahosha hawulu. Chakutalilahu, wulu wetu wunatwalekihu kukola muloña tunakulondela lunshimbi lwakwikala ashinshika kudi wumu namukwawu.—Aheberu 13:4.

Naleki kwakama kufwa niyuma yikamwekana kumbidi. Natiyaña kuwaha kwikala muchisaka chawakwetu akwakwitiya amukaayi kejima, ekala mukuwunda nawa anuñañana. Munichi chisaka twadimonaña netu kwosi wabadika mukwawu. Ichi dichuma chinakeñeli nawa chinakeñeleña kwila muchihandilu chami.