SARA wemeni nakudolola hampinji yazatileñayi nawa watalili kwakumina iwulu. Muloña wakwila wayihembeleña chiwahi, añamba jindi adiña namuzañalu nawa adikitileña chikupu. Sara niyena wazatileña nyidimu yindi. Fwikijenu Sara nemani nakutoñojoka iku nakwati makasa mushiñu nawa nakudikanda yivuku. Hadaha dihafuminiyi tuhu nakuchima hatabukili mwitenti mwakamineñawu. Chitembi champembi chazatishiliyi chavuyekeli muloña wakushakama hamwana nikuzowa nanvula hadi yaaka yayivulu, chamwanukishili Sara yaaka yashakaminiwu muchihandilu chakwendujoka. Mpinji yendeli swayi kwila nimelelala nawa mwaana wamwekeñeña kuchinana. Wamweni kwayilileñayi Abarahama * budidi, dichi, wemeni nakutala kwayililiyi Abarahama nindi keña yashiki. Chamweniyi nfumwindi hahalehi nakwinza kukamwihi nampidi, watumbili chimwemweta.

Hahitili yaaka yayivulu kufuma hatwaliliyi Abarahama chisaka chindi kuKenani kwishinadi daKaloña Yufulati. Sara wadihanini kulonda yamukwashi nfumwindi munilu lwendu lwakuya kwiluña dabulili kwilukawu, muloña welukili nindi wadiña namudimu weneni wakuzata hakwila nkeñelu yaYehova yishikijewi yakwikala nawanyana alema nimuza. Mudimwinyi wateleli kuzatayi Sara? Wadiña nshinta nawa wadiña nayaaka 75 haniyi mpinji. Hadaha wadihwili nindi, ‘Indi chikaninu chaYehova chikashikijewa ñahi iku ami nidi ñoda Abarahama?’ Tunateli kuhosha netu chidi hohu chiwahi neyi chakwila wadakameneni hela hadiwunjikiliku.

Ninetu mpinji yikwawu twatela kudihula netu, mpinjinyi yikashikijewa yikaninu yaNzambi? Twatwalekañahu kudiwunjika, sweje-e neyi tunakuhembelela chuma chitwakeña nankashi. Yumanyi yitunateli kudizila kuchikuhwelelu chaniwu mumbanda?

Ichi chisaka dihichinafunti kufuma kuEjipitu. (Kutachika 13:1-4) Ashakamineña hayiitutu yakukabeta kakumusela waBeteli, hela Luzi, neyi chateneneñawu aKenani. Sara wamweneña iluña dadiña Mwituña daChikaninu chineli washikamineña hanidi iluña dahewulu. Mwadiña nyikala yawaKenani ninyikwakwa yaya kumaluña acheñi akwakulehi. Hela chakwila iluña damweneñayi damwekeneña kuwaha, ilaña hidesekeni namukala kwafuminiyi Saraku. Wakulilili mumukala waUri, muMesopotamiya hadiña lwendu lwamakilomita 1,900. Iku dikwashiliyi ataña jindi amavulu, mukala wasweja lubanji mwadiña yisankanu nimaluña amakwawu kwakulandishila niitala dindi dadiwahi dadiña mumpwembu, hadaha mwadiña nimenji! Fwikijenu Sara nakutala kukabeta kakumusela iku naneñi nawa nakutoñojoka hakuwaha kwamukala wawu washiliyi, wadiña nachikuhwelelu chakola chikupu.

Talenu yuma yamoneneniwu kapostolu Pawulu kusoneka henohu munahiti dehi yaaka 2,000. Kutalisha hachikuhwelelu chaSara niAbarahama, wahosheli  nindi: “Neyi atwalekelihu kwanuka iluña kwafuminiwu, mutenowu adi kufunta kwenoku.” (Aheberu 11:8, 11, 15) Sara niAbarahama hiyaditoñesheleña hayuma yashiliwuku. Neyi atachikili kuditoñesha hayuma yashiliwu, mutenowu adi kufunta kumukala wawu. Adi kufunta kuUri, hela chakwila adi kushalahu kukooleka kwayinkeleñayi Yehova. Kachi kwosi nimuntu wayiluka nawa kachi ekala wanyi yakutalilahu yayiwahi yachikuhwelelu yinakwashi antu amavulu.

Chatela yashi muchima hayuma yashiliyi, Sara washili muchima hayuma yadiña kumbidi. Sara watwalekelihu kumukwasha nfumwindi munilu lwendu, wamukwashili kukasa matenti, kuya nayimuna nikulema cheñi matenti neyi anashiki hakukaminawu. Sara womikili cheñi kukala kwakuvulu. Yehova wamukanini cheñi Abarahama, ilaña Sara amutenenihu wanyi!—Kutachika 13:14-17; 15:5-7.

Nkumininaku, Sara wafukwilihu kumuleja nfumwindi Abarahama yitoñojoka yadiña kumuchima windi. Fwikijenu chahililiyi hampinji yahosheliyi nindi: “Tala dinu. Yehova nanlekeshi kuvwala anyana.” Dichi, wamulejeli nfumwindi kuvwala nyana mudi nduñu yindi wamumbanda, Haga. Fwikijenu chikela chatiyiliyi Sara hakumuleja nfumwindi awa mazu. Chuma chamuchidiwu chetejewa wanyi makonu, ilaña mumafuku akunyima chadiña hohu chiwahi iyala kusumbula ambanda ayedi hela nduñu yindi wamumbanda kulonda yasemenimu mwana. * Komana Sara watoñojokeli nindi mudiwu mwana dimwakashikijewela nkeñelu yaNzambi yakwikala namuza wukafuma kudi anyana kaAbarahama? Kuhosha hohu chalala, chumichi chadiña chakala. Abarahama welili ñahi? Twatañaña nawu, “Abarama wetejeli mwizu [daSara].”—Kutachika 16:1-3.

Komana iyi nsañu yinakumwekesha nawu Yehova diwamutumini Sara kuhosha awa mazu? Inehi. Kafwampi, yuma yahosheliyi Sara yinakumwekesha yuma yelañawu antu. Sara watoñojokeli nindi makabi indi afumineña kudi Nzambi nawa watoñojokeli nindi kwosi njila yikwawu yatela kuzatishayi Nzambi. Yuma yafuukwiliyi Sara yamuleteleli kukala. Hela chochu, wamwekesheli muchima wakukeña. Chineli mukanu kaayi mudi antu adikeña aweni kubadika akwawu, twazañalalaña wanyi namuchima wakukeña wamwekesheliyi Sara? Tukwimbujola chikuhwelelu chaSara, neyi tudihana nakumuzatila Nzambi chatela twileña yuma yakuditiyisha etu aweni kuwaha.

Mwahitili hohu mafuku antesha Haga wemitili ivumu naAbarahama. Chelukiliyi nindi wudi nevumu, Haga wadimweni kulema kubadika Sara nawa  wamuheleli nkaka yindi. Chumichi chamuneñesheli chikupu Sara. Muloña wakumwiteja kudi Abarahama nikumukwasha kudi Nzambi, Sara watachikili kumukabisha Haga. Haga wavweli mwana weyala, Ishimeli, nawa mwahitili yaaka. (Kutachika 16:4-9, 16) Mpinji yikwawu yatambwililiwu nsañu kufuma kudi Yehova, Sara wadiña nayaaka 89 Abarahama niyena wadiña nayaaka 99. Oyu nsañu yatambwililiwu okuwaha!

Yehova wamulejeli cheñi ibwambu dindi Abarahama nindi, wakamuvulishila anyanindi. Nzambi wahimpili nijina daAbarahama. Kushika tuhu nihaniyi mpinji achidiña nakumutena nawu Abarama. Ilaña Yehova wamutumbili nindi Abarahama, dikwila nawu ‘Tata yaWantu Amavulu.’ Aha dihamuteneniwu Sara nawu mama yawanyata kudi Yehova. Wahimpili ijina dindi daSarayi, hadaha datalishili mukwila nawu ‘Yikonkojola,’ nakumutumba nindi Sara, ijina ditweluka chikupu. Indi ijina daSara dalumbulukadi? “Mama yawanyanta”! Yehova walumbulwili chaletesheli yamutumbi iwu mumbanda idi ijina: “Nukumukoolekesha, mwamweni nukukwinka mwana weyala nayena; mwalala nukumukoolekesha, wamba kekala nyuza yayeni; anyanta jawantu amba kafuma kudi yena.”—Kutachika 17:5, 15, 16.

Chitiyañenu chaYehova chakwikala nawanyana akakiswila nyuza yejima chikashikijewa kuhitila mudi mwana kaSara weyala. Ijina damwinkeliwu iwu mwana kudi Nzambi, daIsaka, daya mukwila nawu ‘Kuseha.’ Abarahama chelukiliyi nindi Yehova namwinki Sara mwana ‘wadinatili chamesu indi heseki, hakuseha.’ (Kutachika 17:17) Wahayamini nawa watiyili kuwaha chikupu. (Aroma 4:19, 20) Indi Sara welili ñahi?

Chimwahitili mafuku antesha amayala asatu abulili kwilukawu, enjili kwitenti daAbarahama. Mwaana wadiña washika dehi mwiwulu nawa kwatatili, ilaña awa atushinakaji adisumbula ayitambwilili swayi-swayi. Abarahama wamulejeli Sara nindi: “Loñeshaku swayi swayi yesekelu yisatu yawuña wakusalulula, wuwuñi, wili mankendi.” Muyina mpinji antu adikitileña chikupu hakutambwila enyi. Abarahama hamulekeleli ñodindi nyidimu yejimaku; wayili nakuja mwana kañombi nawa waloñesheli yakuda yayivulu. (Kutachika 18:1-8) Ana “amayala” adiña añelu jaYehova! Kapotolu Pawulu welukili iyi nsañu dihafumini yasonekeña nindi: “Bayi mulalamena kumwekesha chisambuku, muloña kuhitila mukumwekesha chisambu, antu amu atambwilili añelu chakadi kwiluka.” (Aheberu 13:2) Komana ninenu munateli kumwekesha chisambu neyi chamwekesheliwu aAbraham niSara?

Kañelu wumu chamulejeleñayi Abarahama chikaninu chaNzambi chakwila nawu Sara wukavwala mwana weyala, Sara wadiña nakutiyilila mwetenti. Chatiyiliyi mazu akwila nawu wakasema mwana hachipimu chashikiliyi, wahayamini chikupu chakwila waseheli nikuseha nakuhosha nindi: “Ami nakula dehi nimwanta wami wakula dehi; ami nakatiyi cheñi kuwaha?” Kañelu wamukwashili Sara kuhitila mukumwihula nindi, “Kudi Yehova komana kudi chuma chakukañanyayi?” Sara watiyili woma chikupu. Wakaanini nindi: “Hinasehi kwamuku.” Kañelu wamulejeli nindi: “Mwalala, wunasehi chi.”—Kutachika 18:9-15.

Komana Sara chaseheliyi chamwekeshaña nawu wadiña nachikuhwelelu wanyi? Inehi mwani. Bayibolu yahosha nawu: “Muloña wachikuhwelelu, Sara amwinkeli ñovu yakuvwala mwana, hela chakwila wadiña wahita dehi hachipimu chakuvwalilahu mwana, muloña wamweni Owu wamukanini nindi washinshika.” (Aheberu 11:11) Sara wadiña wamwiluka Yehova nawa welukili nindi washikijaña chikaninu chidi chejima chakukanayi. Wejima wetu twakeñaña kwikala nachikuhwelelu chamuchidiwu netu? Tukwila chiwahi neyi tumwiluka chikupu Nzambi mwini Bayibolu. Neyi tutañaña Bayiblu tukwiluka netu, Sara welili chiwahi hakwikala nachikuhwelelu chamuchidiwu. Mwamweni, Yehova washinshika nawa washikijaña munakaniyi, mpinji yikwawu nateli kwila mwenimu munjila yikutuhayamisha chikupu hela yikuletesha tusehi.

Chashikijiliyi yaaka 90, Sara wekalili namwana wafwilileñayi muchihandilu chindi chejima. Wavweli mwana nanfumwindi wadiña nayaaka 100 haniyi mpinji. Abarahama wamutumbili iwu mwana nindi Isaka, hela “Kuseha,” neyi chochahosheliyi Nzambi. Tunateli kufwikija Sara nazeboki dehi ilaña natumbi chimwemweta  iku nakuhosha nindi: ‘Nzambi nanseheshi, antu ejima akachitiya akanseha.’ (Kutachika 21:6) Ichi chihayamisha chamukoñeleliwu kudi Yehova chamutiyishileña kuwaha kushika tuhu nimpinji yafwiliyi. Hela chochu, wadiña cheñi namudimu weneni.

Isaka chashikijiliyi yaaka yitanu, chisaka chaloñesheli chawija chakwanakana kusumuka kwamwana. Bayi neyi ejima azañaleliku. Twatañaña nawu Sara ‘watachikili kumona’ yilwilu yatama yakumukabisha mwanindi. Ishimeli mwana kaHaga wadiña nayaaka 19 watachikili kumukabisha Isaka. Iku bayi neyi kwadiña kusenseka hohuku. Chimwahitili yaaka, kapostolu Pawulu amoneneni kutena yilwilu yaIshimeli nawu makabisha. Sara wamweni nindi mwanindi wadiña mukukala naniwu mukwawu wamukabishileña. Sara welukili nindi Isaka wadiña namudimu watela kuzatayi hakwila nkeñelu yaYehova yikashikijewi. Wahamukili nakuhosha naAbarahama yuma yadiña kumuchima windi. Sara wamulejeli Abarahama nindi yamuhañi Haga nimwanindi Ishimeli—Kutachika 21:8-10; Añalija 4:22, 23, 29.

Indi Abarahama watiyili ñahi? Twatañaña nawu: “Chumichi chamutaminini nankashi Abarahama hansañu yamwanidi.” Wamukeñeli nankashi Ishimeli, dichi, hakeñeleña kumuhaña mwanindi wakudisemenaku. Hela chochu, Yehova wamweni kukala kwadiñahu nawa wakwimanishili. Twatañaña nawu: “Nzambi hakumwila Abarahama nindi, Bayi chikutamina hansañu yamukwenzi, hela hansañu yanduñu yeyi wamumbandaku; kumina dakutiya mwizu daSara mwejima mwanahoshiyi, muloña anyaneyi akayitenena mudi Isaka.” Yehova wamulejeli Abarahama nindi, wakamwakamena Haga nimwanindi weyala. Abarahama muntu wachikuhwelelu wetejeli.—Kutachika 21:11-14.

Sara diwadiña ñoda Abarahama yomweni, nkwashi yindi washinshika. Bayi neyi wakuminineña dakumuleja nfumwindi yuma yidi yejima yakeñeleñayiku. Wahosheli nanfumwindi chakadi woma, chamweniyi kukala kwakundamini kuchisaka nikuchihandilu chawu chakumbidi. Chuma cheliliyi chamwekeshaña wanyi nawu hadiña nakavumbiku. Kafwampi, kapostolu Petelu, iyala wadiña wasumbula, wahosheli hadi Sara nindi, hichakutalilahu chachiwahi chamumbanda wamwekesheli kavumbi kudi nfumwindi. (1 Akorinda 9:5; 1 Petulu 3:5, 6) Kuhosha hohu chalala, neyi Sara wamweneni haniyi nsañu, kachi wakañenyi kumulemesha Abarahama nawa kachi mwafumini kukala kweneni muchisaka. Sara wahosheli yuma yakeñekeleña munjila yayiwahi.

Ambanda amavulu atiyaña kuwaha yuma yeliliyi Sara. Adizilaku chakuhanjeka nawanfumu jawu chakufuma hamuchima nawa nakavumbi. Ambanda amakwawu ahoshaña nawu, kachi Yehova wayikwashañaku neyi chochamukwashiliyi Sara. Hela chochu, adizilañaku, kwikala nachikuhwelelu, kukeña nikudiwunjika kwadiña naSara.

Hela chakwila iwu mumbanda akeñawu amuteneni kudi Yehova yomweni nawu “Mama Yawanyanta,” ilaña hakeñeleña kumulemesha neyi mwantaku. Dichaletesheli Abarahama “kuyebañila, nakumudila Sara” hampinji yafwiliyi nayaaka 127. * (Kutachika 23:1, 2) Wamwanukileña chikupu ñodindi, “Mama Yawanyanta.” Chakadi nikujina, Yehova Nzambi niyena wamwanukaña iwu mumbanda washinshika, nawa wafwilaña kumusañula kumbidi muparadisa hamaseki. Wumi wahaya nyaaka ninkisu jajivulu jinakumuhembelela Sara niantu ejima embujolaña chikuhwelelu chindi.—Yowanu 5:28, 29.