KUBADIKA hayaaka 3,000 yinahitihu, nkakulula wakushankulu Yoba welukili nindi atuda amaluzwizu anateli kutudizisha yuma yayivulu hanyidimu yaNzambi yañovu. Ilaña yilwilu yawu yatuleñelaña kuyizatisha muyakutalilahu nimunhoshelu yankiji. Yakutalilahu yayivulu yawatuda amuluzwizu yekala muBayibolu, yatudizishaña yuma yalema yamuchihandilu chetu nihawubwambu wetu naNzambi. Tushinshikenu hayakutalilahu yantesha.

Antu ashakamineña muYerusalema elukili chikupu tumbimbi, twavulileña kutuñila yisakala yatu mumakeki. Tukwawu twatuñilileña yisakala yatu mwikeki datembeli yaSolomoni. Chakadi nikujina, tumbimbi twatuñilileña mwikeki datembeli hachaaka-hachaaka twelukili nawu didu ilaña dadiwahi, munateli kukulishilawu anyanawu chakadi kuyiluwañesha.

Nsoneki Wesamu 84, mwana kaKora, wadiña nakuzatila hatembeli mulungu wumu hakakweji, wayimweneña iyi yisakala mwikeki datembeli. Kufwila kwikala neyi tumbimbi twadiña nayisakala yahaya nyaaka mwitala daYehova, wahosheli nindi: “Matabanaka eyi o chawahawu, eyi Yehova wamazaza! Muchima wami wafwilaña, Mwalala, wakuminaña dakuhwidila nakufwila kuyipañu yaYehova . . . Mwalala, musweswa nawani itala dindi, nikambimbi kanawani chisakala chindi kwakusemena anyanindi, kwokutumeña tweyi, eyi Yehova wamazaza, yeyi Mwanta wami walukanu, yeyi Nzambi yami!” (Masamu 84:1-3) Komana etu, kushilahu nianyanetu, twamwekeshaña mpwila yamuchidiwu nikusakilila kuhitila mukuya kuchipompelu chawantu jaNzambi mpinji yejima?—Masamu 26:8, 12.

Kaprofwetu Yeremiya wasonekeli nindi, “Munkoloña wahaluzwizu weluka yilaaka yindi yamufuukwilawu.” Chakadi nikujina welukili chikupu chatuntukileña anyinkoloña nakuya Mwituña daChikaninu. Mumpinji yachishika, anyinkoloña akubadika ha 300,000 afumaña kuAfrica nakuya kuNorthern Europe kuhitila Muchinekineki chaJordan. Nkoloku yekala munyitu yawu yayilejaña nawu himpinji yakufunta kwasemenañawu. Kufwana atuda amakwawu atuntukaña, ‘asha muchima kuyilaaka yawu yafuntañawu.—Yeremiya 8:7.

Collins Atlas of Bird Migration yahosha nawu, ‘Ñendelu yanawa atujila yamwekeshaña nawu adi namaana.’ Yehova Nzambi wayinka awa atujila maana akwiluka yilaaka, ilaña wamwinka muntu wuswa wakwiluka mpinji niyilaaka. (Luka 12:54-56) Kwambukaku namaana akwetuwu anyinkolaña, maana aNzambi diwu akwashaña antu kwiluka yinjikijilu yampinji yitunakushakamamu. AIsarela adiñaku mumafuku aYeremiya elukileña iyi yinjikijilu. Nzambi washimwini kukala kwadiñawu  naku, wahosheli nindi: “Talenu wena analeki dehi izu daYehova indi dinu maana aduwu nawu adi ñahi?”—Yeremiya 8:9.

Makonu tukweti yakutalilahu yayivulu yinakumwekesha nawu tunakushakama mumpinji yashimunawu muBayibolu nawu “mafuku akukuminina.” (2 Timotewu 3:1-5) Komana mukwimbujola anyinkoloña kulonda mwiluki ‘mpinji’?

Mbuulu amutena mapampa kakavulu muBayibolu nawa awa atujila ekala Mwituña daChikaninu. Neyi wudi hachisakala chidi chatuñilañayi hahaleli, mbuulu ‘wakeñakeñaña yakuda; mesu indi amwenaña hahalehi.’ (Yoba 39:27-29) Mesu indi amonaña chachiwahi chakwila nateli kumona kachinchi kadi hadi 1 kilomita nahadiyi.

Neyi chochamonañayi mbuulu “hahalehi,” Yehova niyena wamonaña jikamwekana kumbidi. Dihafumini Yehova Nzambi kuhosha nindi: “Kufumisha kutachi nashimunaña jakunsa kufumisha kushankulu nashimunaña yichidi kanda ayikoñi.” (Isaya 46:10) Tunateli kuhetela mumaanindi asweja niwuswa windi wakumona neyi tukwovwahilaña kufumba kwaYehova.—Isaya 48:17, 18.

Bayibolu yesekeja cheñi antu amukuhwelelaña Nzambi nawambuulu nawu: ‘Antu amuchiñejaña Yehova, akekala nañovu cheñi. Akajindama nampuula hewulu jinda-a neyi ambuulu.’ (Isaya 40:31) Mbuulu wakeñakeñaña hadi mpepela yitata. Chashikayi hadi mpepela yitata, watandumunaña mpula jindi nakutachika kunyeñumoka hadi mpepela yitata nakuya hahalehi chikupu. Mbuulu hashindamenaña hañovu jindi hakwila yajindami nakuya hahalehiku. Munjila yoyimu, antu amukuhwelela Yehova atela kwiluka nawu diyi wayikana kuyika “ñovu jabadika nankashi.”—2 Akorinda 4:7, 8.

Kwakwihi nakufwa, Yesu wahudikilili nakutala mumusumba weneni wawaYudeya. Wahosheli nindi, “Eyi Yerusalema, Yerusalema, wajahaña atuprofwetu, waasaña malola antu akutemeshelañawu! O mapampa kuvula inakeñeli kukuñwija anyaneyi neyi chakuñwijañayi chaadi anyanindi mumpuula jindi, enu kwenu kwonti kwenu!—Matewu 23:37.

Chilwilu chimu chabadika chamwekeshañawu atuda hikuhemba anyanawu. Atuda asemenaña hamaseki, chidi neyi atusumbi, atela kwikala ababala kulonda amoneña ayilumbu. Neyi kasumbi yamona kabemba, wakokomwenaña kulonda anyanindi aswami mumpuula jindi. Tunyana kakasumbi twakulaku dehi twakeñaña mwakuswama neyi kudi mwaana hela nvula yeneni. Yesu niyena wakeñeleña kukwasha nikukiña antu ashakamineña muYerusalema kuspiritu. Makonu, Yesu watutambikaña kwinza kudi yena kulonda yatunookeshi nikutukiña kukukala nikukwakama kwamuchihandilu.—Matewu 11:28, 29.

Mwamweni, tunateli kudizilaku yuma yayivulu kuniyi yileñaleña yikweti mpuula. Hampinji yimukushinshikaña yilwilu yawu, anukenu nhoshelu yankinji yamuNsona yahosha hadi atuda. Atumbimbi akuyikwashaña kulemesha itala daYehova dakudifukwila. Mukuhwelelenu Nzambi kulonda mwikali namuchima wakuchiñeja wukuyikwasha kutuuka neyi mbuulu. Inzenu kudi Yesu kulonda yayileji chalala chikuyikiña neyi chakiñañayi kasumbi anyanindi. Nawa anyinkoloña ayanukisheña kwikala asoñama kulonda mwiluki yinjikijilu yinakumwekesha mpinji yitunashikimu.