Amama adiña nayaaka 17 hampinji yinasemukili mu 1960. Atata atushili henohu kanda nisemuki. Ami niamama twashakamineña nawankaka muBurg, kamusumba kanyanya kamuGerman wateneneñawu nawu Democratic Republic, hela East Germany. Antu amavulu munidi iluña adiña antu abula kukuhwelela mudi Nzambi, nawa chisaka chetu nichena dichichadiña. Hitwamwilukili Nzambiku.

Chinakulileña, natiyileña kuwaha kuhanjeka nawankaka awamayala. Andizishileña kwila yuma yayivulu, yidi neyi kukandama kunyitondu nakunkulula nyitayi. Chineli nadiña kansi natiyileña kuwaha kwila yumiyi. Chihandilu chami chadiña chachiwahi nawa chamuzañalu.

Kudi chuma chatama chammwekeneni hinadiña nayaaka 7. Diyi mpinji yinadiña nayaaka yiyedi kushikola. Hampinji yinafuntileña kwitala, nakandamini kupo yamalayiti. Chinakandamini mamita 8 kufuma heseki, malayiti ankokeli nakunnata hamaseki. Chinapapukili muchipatela, hinadiña namakasaku. Makasa ejima ahili chikupu nawa adiña nayilonda chakwila ateleleli kuyiketula kulonda wulembi wubuli kuhita mumashi. Neyi chimuneluki, amama niankaka atiyili woma chikupu. Chineli nadiña kansi, hinelukili chikupu kukala kunakamona muchihandilu chami chineli anketwili makasaku.

Hanyima yakunkombola muchipatela, nafuntili cheñi kushikola. Atwansi adiña nankuseha, kunshinjeka ninkunatila yuma hamujimba muloña natwesheleña wanyi kudikiña. Natiyileña kutama chiyankabishileñawu. Nkumininaku, antwalili Kushikola Yawayifwayi yaBirkenwerder, mwashakamineña atwansi ayifwayi. Chineli iyi shikola yadiña kwakulehi, amama nawa nkaka hiyatwesheleña kuya nakunhempulaku. Nayimweneña hohu neyi tunashinki. Hahitili yaaka 10 chakubula kudimona nawamama niankaka.

Nadizili kuzata nyidimu yayivulu kuzatisha nyendu. Toñojokenu chichinateli kumukalila muntu kuda namafoloku hela masipuni kuzatisha nyendu. Mpinji yikwawu natwesheleña kwila mwenimu. Nadizili cheñi kukosa mazewu nikusakula nsuki kuzatisha nyendu. Natachikili nikuzatisha nyendu hakwinyeka  neyi inakuhosha nawantu. Eña, nyendu yami yabalumukili kwikala makasa.

Chinashikili muyaaka yawukwenzi, nakeñeli nakashi kudiza nsañu jasayansi jakufwikija. Mpinji yikwawu nafwikijileña nikweti makasa akunuña akunkwasha kuzata yuma yejima. Chinashikijili yaaka 14, natachikili kunwa makanya. Natiyileña nami anakunkwasha kwikala nañovu nikudimona neyi chadiña antu ejima. Chadiña tuhu neyi kwiji inakuhosha nami: ‘Eña, ninami nateli kuzata iyi nyidimu. Akwakunwa makanya akulaña namakasa hela chakadi makasa.’

Natwalekelihu kudikita nikudibomba munyidimu yikwawu. Nekalili membala waFree German Youth, Ituña dakwashileña atwansi nawa nadiña nsoneki, dikwila nawu nadiña nachifulu cheneni hakachi kawakwetu. Nadiña cheñi mwizanvu dawakwakwimba, nelileña jinkumbu nikuhema yisela yawayifwayi. Hanyima yakudiza, natachikili kuzata hakampani yadiña mumusumba wetu. Chinakulili, navwalileña chikasa chachifwikija mpinji yejima muloña nakeñeleña kwikala neyi chidiwu antu ejima.

Ifuku dimu hampinji yinahembeleleña masuwa kulonda niyi kumudimu, kwenjili iyala wumu. Wañihwili neyi natela kufwikija Nzambi nanfuntishili cheñi makasa ami. Nahayami. Eña, nakeñeleña kwikala namakasa cheñi, ilaña namweneña neyi chumichi kwila chitwesheka nehi! Chineli nakuhweleleli mudi Nzambi wanyi, nelukili chikupu nami kwekala kwosi Nzambi. Kufuma tuhu hanidi ifu, natachikili kumutemoka iwu iyala.

Chimwahitili mpinji, ibwambu dami mutwazatilileña wañilili nindi tuyi nakutala chisaka chawu. Hampinji yitwanwineña Kofi, anvwali jindi atachikili kuhosha hadi Nzambi, Yehova Nzambi. Dikadiña katachi kutiya nawu Nzambi wukweti ijina. (Masamu 83:18) Hela chochu, nakaanini mumuchima wami nami: ‘Nzambi kwosi hela chakwila wukweti ijina. Nukuyibayisha awa antu.’ Chineli nakuhweleleli yuma yinelukili, netejeli kudiza Bayibolu. Hanyima yakudiza, natwesheli wanyi kukaana nami Nzambi wekalaku wanyi.

Yitoñojoka yami yakwila nami Nzambi wekalaku wanyi, yatachikili kuhimpika chovu-chovu hitwadizileña hawuprofwetu wamuBayibolu. Yuma yayivulu yashimunawu muBayibolu yinashikijewi, hela chakwila ayisonekeleñahu dehi henohu kunashali yaaka yayivulu. Hampinji yimu yitwadizileña Bayibolu, twesekejeli chadiña yuma mukaayi nawuprofwetu wekala haMatewu kapetulu 24, Luka kapetulu 21 ni 2 Timotewu kapetulu 3. Neyi chochatweshañayi ndotolu kwiluka chikatu chamuyeji kuhitila mukushinshika hayinjikijilu, kwiluka yuma yashimunawu muniwu wuprofwetu kwankwashili kwiluka nami tunakushakama mumpinji yatenawu muBayibolu nawu “mafuku akukuminina.” * Nazañaleli chikupu. Iwu wuprofwetu washikijeweli mumesu ami.

Nelukili chikupu nami inakudiza chalala. Natachikili kulomba kudi Yehova nawa nalekeli kunwa makanya, hela chakwila nanwineña chikupu makanya hadi  yaaka 10 yahitilihu. Natwalekelihu kudiza Bayibolu kwakwihi nachaaka. Ha April 27, 1986, ampapatishili mubafwa mukuswamujoka, muloña haniyi mpinji aYinsahu ayilekesheli kushimwina nikupompa muEast Germany.

Muloña wakwila atukaanishili kupompa, twahumañeneneña hohu mumatala mutumazanvu twanyanya mukuswamujoka nawa nadilukili hohu nawakwetu akwakwitiya antesha. Chakadi kukuhwelela, añitejeli kudi akwanshimbi kuya kuWest Germany, kwabulili kuyikaanishawu aYinsahu. Dikadiña katachi muchihandilu chami, kuya kukupompa kweneni kwaBayibolu nawa nadimweni nawamanakwetu niahela amavulu. Ichi chadiña chuma chachiwahi chinamweni.

Chelili Mbañu yaBerlin yihumuki, alekeli kuyikaanisha aYinsahu jaYehova. Nkumininaku, twekalili akasunuka kudifukula kudi Yehova. Nakeñeleña kuzata nankashi mudimu wakushimwina. Ilaña, natiyileña woma kuhanjeka nawantu inabula kwiluka. Natoñojokeleña nami nikutwesha wanyi muloña wawufwayi nimuloña wakwila nashakamineña hohu hetala kufuma kuwansi wami chineli nadiña chifwayi. Ilaña mu 1992, nesekeli kuzataku maora 60 mukakweji. Nazatili chiwahi nawa nadiña namuzañalu chikupu. Dichi nafukwilihu kuzata chochenichi kakweji nikakweji nawa natwalekelihu kuzata hadi yaaka yisatu.

Nanukileña mazu ekala muBayibolu akwila nawu: “Hinyi wunazeyi kubadika chinnazeyi ami?”(2 Akorinda 11:29) Hela chakwila nidi chifwayi, yitoñojoka nidi nayu nikuhosha nahoshaña. Dichi nazatileña nañovu kulonda nikwashi amakwawu. Chineli nidana makasa, nateli kwiluka chatiyañawu antu amonaña kukala. Neluki chichatiyakanaña neyi wunakukeña neyi wuzati chuma, ilaña hiwukutwesha kuchizataku. Nakwashaña antu atiyaña chamuchidiwu. Natiyaña kuwaha chinakwashaña antu amakwawu munjila yamuchidiwu.

Kuhosha hohu chalala, mpinji yikwawu naneñaña. Nakeñaña kwikala neyi chidi akwetu akweti yidi yejima. Nadizatilaña amaweni nyidimu yayivulu, ilaña chansendelaña mpinji yeneni, nazataña nañovu kubadika chinatela kuzata. Ifuku dejima nahoshaña nami: “Natweshi kwila yuma yejima mudi Kristu wankoleshaña.” (Afwilipi 4:13) Ifuku dejima, Yehova wanyikaña ñovu “yakuzata” nachu nyidimu. Neluki nami Yehova waleka wanyi kunkwasha. Dichuma chanleñelaña kubula kuleka kumuzatila.

Yehova wanyinka chisaka, chuma chinabulili hampinji yinadiña kansi. Nasumbula ñodami wamuwahi, Elke, wukweti kukeña niwushona. Kubombelahu, nikweti chisaka cheneni chakuspiritu chawamanakwami niahela mukaayi kejima chawaYinsahu jaYehova.

Nakundejewaña nachikaninu chaYehova chaParadisa, mwakelishayi yuma yejima ‘kwikala yayiha’ kushilahu nimakasa ami. (Chimwekeshu 21:5) Nelukaña chakashikijewa ichi chikaninu neyi nitoñojoka hayuma yakoñeliyi Yesu hampinji yadiñayi hamaseki. Chakubula nikuhita mpinji, wokili chifwayi nikunuña itu deyala waketwiluwu. (Matewu 12:13; Luka 22:50, 51) Yikaninu yaYehova niyihayamisha yaYesu yankwashaña kukuhwelela chikupu nami katataka nikali cheñi namakasa.

Nkisu yabadika yinatambwili namwiluki Yehova Nzambi. Nekali tata yami nawa ibwambu dami nawa mukwakunkundeja nikunkolesha. Natiyaña neyi chatiyiliyi Davidi, wasonekeli nindi: “Yehova diyi ñovu yami . . . anankwashuku; dichi muchima wami hiwukuluña nankashi.” (Masamu 28:7) Ichi chalala dichi chinakukeña kukwatisha chikupu muchihandilu chami. Nachidizaña hela chakwila hinikweti makasaku.