“Mwiwulu anashumu itanda dawanta; hetandodu dawanta hashakama wumu. Yena washakama, kumutala wudi neyi chikwelola dajasiperi nidasaridini. Kwitanda dawanta kwanyeñumuka kansuluñunda, kukatala kadi neyi emeraladi.”—Chimwekeshu 4:2, 3.

“Kunatamuki tamu-u, kwi-ndo, yena mukachi. Neyi hamwekanaña kasuluñunda kadi hevu ifuku danvula, dichi chamwekeni nikutamuka kwatamukiluku kwi-ndo. Dimu mwamwekeni neyi kulema kwaYehova.”—Ezekeli 1:27, 28.

Iyi yimwenu yayimwekesheleliwu akapostolu Yowanu nakaprofwetu Ezekeli, yamwekeshaña lubanji lwakulema kwaNzambi muKwakubadika, Yehova, nayuma yitunateli kufwikija, yidi neyi malola amawahi awuseya, kansuluñunda nitanda dalema. Yumiyi yatulejaña nawu Yehova wajila chikupu, wamuwahi nawa wawunda.

Iyi yimwenu yaNzambi yesekana namazu añimbi yamasamu wasonekeli nindi: “Muloña Yehova himuneni, watelela yowu kumuhameka nankashi; watelela kumutiya woma wakubadika watiyañawu akishi ejima. Muloña akishi ejima awantu hiyuma yamukunkulwayi tuhu; ilaña Yehova diyi watuñili mawulu. Kumesu indi kwekala nikulema niwanta; mumalalindi mwekala niñovu nilubanji.”—Masamu 96:4-6.

Hela chakwila Yehova diyi Wabadika Chikupu, watulejaña kulomba kudi yena nawa watiyaña mutwalombaña. (Masamu 65:2) Nzambi watukeña nawa watwakamenaña chikupu chakwila kapostolu Yowanu wasonekeli chakufuma hamuchima nindi: “Nzambi diyi kukeña.”—1 Yowanu 4:8.

‘[Kambanji mukwaKristu Setefwanu], chenzeliyi naspiritu yajila, hakutala mwiwulu swi-i, hakumona lubanji lwakulema kwaNzambi, niYesu nemani kuchikasa chaNzambi chachidiilu. Nindi, talenu! namoni mumawulu munenzuluki, niMwana kamuntu nemani kuchikasa chaNzambi chachidiilu.’—Yililu 7:55, 56.

Chikwashalili mafuku antesha hakwila Setefwanu yamoni ichi chimwenu, Yesu amujahili muloña wanana antu alejeleñayi Setefwanu, anlomboli awaYudeya. Chimwenu chamwekeshaña nawu Yesu wadiña wamumi, amusañwili nikumulemesha. Kapostolu Pawulu wasonekeli kutalisha kuniyi nsañu  nindi: “[Yehova] wamusañwili [Yesu] mudi afu, hakumushakamisha kuchikasa chindi chachidiilu mumawulu, kwabadika nankashi kuyula kwejima, niwanta, niñovu, nimawanta antuumba, nimajina ejima atenañawu, hiwowu amakonu hohuku, nianyaka yakenza nawa.”—Aefwesesa 1:20, 21.

Kubombela hakushimuna chifulu chindi chabadika chamwinkawu, Nsona yamwekeshaña nawu Yesu wakamenaña antu chikupu neyi chochekalayi Yehova. Hampinji yazatileñayi mudimu windi wakushimwina hanu hamaseki, Yesu wokili akata, ayifwayi nawa wasañwili afu. Chadihaniniyi nakufwa, wamwekesheli nindi wakeña chikupu Nzambi niantu. (Aefwesesa 2:4, 5) Chineli wudi kuchikasa chaNzambi chachidiilu, Yesu katataka yazatishi ñovu yindi nikuleta nkisu kudi antu ejima ovwahila.

“Ami [kaprofwetu Danyeli] chinadiñi nakutala, hiyakutenteka matanda awanta; Wakunyaka nanyaka [Yehova] hakutentama. . . . Makombakaji namakombakaji hiyakumukalakela, makumi amakombakaji amakumi amakombakaji hiyakwimana kumesu indi.”—Danyeli 7:9, 10.

Munichi chimwenu chamwiwulu, Danyeli bayi neyi wamweni kañelu wumuku, ilaña wamweni mazaza awañelu. Chadiña chimwenu chakuhayamisha chikupu! Añelu hiyileñaleña yakuspiritu yalema, yikweti maana niñovu. Akweti yifulu yamaneni neyi chochekala aserafwi niakerubi. Bayibolu yahosha hadi añelu mapampa akubadika ha 250.

Añelu bayi neyi hiyantu ashakamineña hamaseki kunyimaku. Nzambi wayileñeli añelu kunyima kwakweni henohu kanda yaleñi antu. Añelu amweneña chaleñeleñayi iseki, nawa amuhamekeleña.—Yoba 38:4-7.

Njila yimu muyamwekeshelañawu añelu ashinshika nawu amukalakelaña Nzambi, hikudibomba mumudimu walema wunakuzatewa makonu hamaseki wakushimwina nsañu yayiwahi yaWanta waNzambi. (Matewu 24:14) Chiyazatañawu muniwu mudimu achishimuna muchimwenu chamweniyi kapostolu Yowanu, wasonekeli nindi: “Hinukumona kañelu mukwawu hakutuuka hakachi kaluzwizu, nasendi nsañu yayiwahi yahaya nyaka, ashimuni kudi antu ejima ashakama heseki, ninyuza yejima, ninyichidi yejima, niakwamadimi ejima, niamumatuña  ejima.” (Chimwekeshu 14:6) Hela chakwila añelu ahoshaña wanyi nawantu makonu neyi chiyahosheleñawu kunyima hampinji jikwawu, ilaña akwashaña antu ashimwinaña nsañu yayiwahi kudi antu amwovu.

“Mwiwulu himukwila njita; Mikeli [Yesu Kristu] nawañelu jindi hiyakwasa njita nanowu chazañombi; chazañombi niyena nawañelu jindi nawa hiyakwasa; kwimika mushindu nehi; mwiwulu himwamwekeni nawa cheñi mwakushakama wenaku. Owu chazañombi muneni hiyakumunatila heseki; yowu kapela mukulu atenañawu nawu Diyabolu, diyi Satana, wadimbaña antu ampata yamunu mwishina ejima. Yena hiyakumunatila hamaseki, niañelu jindi hiyakuyinatila hamu nayena.”—Chimwekeshu 12:7-9.

Mwiwulu himwadiña kuwundaku. Hampinji yayileñeliwu antu, kañelu wumu, wakeñeleña nindi adifukuleña kudi yena, wadikañili naYehova nakwikala Satana dikwila nawu “Mukwakudimbulula.” Añelu amakwawu niwena adikañili nakwikala andemoni. Chineli ekalili nayilwilu yatama, adikañili chikupu naYehova nawa analeñeli antu amavulu kwila yuma yambukaku chikupu nawunlomboli waYehova wawuwahi.

Satana niandemoni jindi atama chikupu nawa akweti wukatu. Hiyayilumbu jawantu nawa analeti yihuñu yasweja hanu hamaseki. Chakutalilahu, Satana wajahili yimuna niambuña aYoba. Kuhiñahu, wajahili anyana kaYoba ejima 10 kuhitila mukuleta “mpepela yeneni” yeteli mwitala muyadiña. Nkumininaku, Satana wamukatishili Yoba ‘namahuti akata nankashi kufumisha kumadachilu ndo nakushika nimukachi kamutu.’—Yoba 1:7-19; 2:7.

Katataka, Satana amujilumuni. Kufuma tuhu hiyamunatiliwu hamaseki, neluki nindi “kunashali dehi mpinji yindi yantesha hohu.” (Chimwekeshu 12:12) Nsañu yayiwahi yidi yakwila nawu Satana akamujilumuna.

“Eyi [Yesu] wunamukuulili Nzambi antu akunyichidi yejima, akumadimi ejima, akumatuña ejima, akunyuza yejima, namashi eyi. Anekali dehi wanta waNzambi niatupristu; hiyakuyuula hamaseki.”—Chimwekeshu 5:9, 10.

Neyi chochamusañwiliwu Yesu kufuma hamaseki nakuya mwiwulu, antu amakwawu niwena akayisañula. Yesu wayilejeli apostolu indi ashinshika nindi: ‘Inakuya nakuyiloñeshela iluña denu. Nawa, . . . ami aweni nakenza cheñi nakuyitambula; kulonda  kunakekalami, diku mwakekali ninenu nawa.’—Yowanu 14:2, 3.

Kudi chuma chayilañawu mwiwulu antu ayañamu. Akatuña nfulumendi yaWanta hamu naYesu yikayuulaña yuma yejima yekala hanu hamaseki nikuyilila yuma yayiwahi. Iwu diwu Wanta walejeliyi Yesu atumbanji twindi nindi alombeña mukulomba kwachitalilu nawu: “Tata yetu wekala mwiwulu, ijina deyi dijili. Wanta weyi winzi. Muchima weyi awili hamaseki neyi chawilañawu mwiwulu.”—Matewu 6:9, 10.

“Ami [kapostolu Yowanu] hinukutiya izu datiyakana dikufuma mwitanda dawanta nindi, Tiya, tabanaka yaNzambi hiyidi nawantu, . . . nawa wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila hela kukataku. Yuma yakusambila yinahiti dehi.’”—Chimwekeshu 21:3, 4.

Iwu wuprofwetu wamuchimwenu wunakuhosha hampinji yakajilumunawu chiyuulu chaSatana nakubalumuna iseki kwikala paradisa kudi Wanta waNzambi, watuñewa naYesu niantu asañulañawu. Yuma yinakukabisha antu nikuyineñesha yakekalaku cheñi wanyi. Kufwa nikwena akakufumishahu.

Indochu antu amavulu afwa dehi nawa akabula kusañulawu nakuya mwiwulu? Akayisañula kumbidi nakushama cheñi haya nyaaka muParadisa hamaseki.—Luka 23:43.