Bayi Muleka Kuhamekaku

‘Yitoñojoka yeyi ochinayimona kulema, Eyi Nzambi! Kuyichinda ochiyavula!’—MASAMU 139:17.

1, 2. Muloñadi chitwatela kuhamekela Izu daNzambi, nawa ñimbi yamasamu washimwini ñahi kuhameka kwindi?

 CHUMA chawaninuwu chadiña chakuhayamisha. Hampinji yadiña nakuloñeshawu tembeli yaYehova muYerusalema, Kapristu Muneni Hilikiya wawanini ‘mukanda wanshimbi jaYehova jakusoneka kudi Mosi,’ chakubula kujina wadiña mukanda waweni wasonekeluwu kwakwihi nayaaka 800 kunyima! Wunateli kutoñojoka chatiyiliyi Mwanta Yosiya mukakwakama Nzambi chelili aleti wuna mukanda kumesu indi? Chalala, wawilemesheli nawa chakubula kunata mpinji wamulejeli nsoneki Shafwani kuwitaña.—2 Kushindulula 34:14-18.

² Makonu, Izu daNzambi, dejima hela chibalu, anateli kuditaña kudi mabiliyoni awantu. Komana chumichi chinelishi jiNsona kwikala jabula kulema, nawa jamukunkulwayi? Inehi! Walala wudi wakwila nawu jikweti yitoñojoka yayeni yaWatwesha yejima, jasonekawu kulonda jitwikwasheña. (2 Timotewu 3:16) Hakushimuna yitoñojoka yindi kutalisha Hezu daNzambi, ñimbi yamasamu Davidi wasonekeli nindi: ‘Yitoñojoka yeyi ochinayimona kulema, Eyi Nzambi! Kuyichinda ochiyavula!’—Masamu 139:17.

3. Chumanyi chinamwekeshi nawu Davidi wadiña muntu walemesha yuma yakuspiritu?

³ Davidi watwalekeluhu chikupu kumulemesha Yehova, Niizu dindi, nikuloñesha kwindi kwakudifukula kwalala. Masamu amavulu asonekeliyi Davidi amwekeshaña chatiyileñayi. Chakutalilahu, haMasamu 27:4, wasonekeli nindi: ‘Kudi chuma chimu chinamulombi Yehova, nafwili nami nichimoni; dichenichi nami, nishakami mwitala daYehova mafuku ejima inukwikala wamumi, nami nibanjili Yehova chawahayi, nitali nakuhameka mutembeli yindi.’ MuchiHeberu chacheni, nhoshelu yakwila nawu ‘kutala nakuhameka’ yalumbulula kulabajala nakushinshikisha, kusandujola, kutala nachiseki, kuzañalala, nikukomoka. Chalala, Davidi wadiña muntu weluka chikupu wulunda windi naNzambi, wahamekeleña hayuma yahanineñayi Yehova kulonda kukolesha chikuhwelelu chindi nawa wadiluñishileña chikupu nachuma chanyanya chejima chawalala wakuspiritu chamulejeleñayi Nzambi. Chachiwahi kwimbujola chakutalilahu chindi chakuhameka.—Masamu 19:7-11.

Hamekenuña haKukooleka kwaKwiluka Chalala ChamuBayibolu

4. Chumanyi chamuletesheli Yesu ‘kuzañalala nankashi mudi spiritu yajila’?

⁴ Kutiyishisha Izu daNzambi hikwashindamena hakusweja maana hela hakudiza kwamukaayi kwaletaña kudivwimbaku. Ilaña, kwashindamena haluwi lwasweja lwaYehova lwahanañayi kudi akwakudizoza, antu akweti nyichima yashinshika asha maana kuyuma yakuspiritu. (Matewu 5:3; 1 Yowanu 5:20) Hampinji yatoñojokeliyi Yesu hawalala wakwila nawu antu amakwawu abula kumaninina majinawu adiña nakuyisoneka mwiwulu, ‘wazañaleli nankashi mudi spiritu yajila yena mpinji oyu nindi, Eyi Tata, Mwanta wewulu niiseki, nakusakilili chiwajindili akwamaana niakwakashinshi yumiyi, hiwukuyimwekesha kudi anyikeki.’—Luka 10:17-21.

5. Muloñadi atumbanji twaYesu chiyabuliluwu kudiwula chalala chaWanta chayilejeliyi?

⁵ Hanyima yakuhosha kuna kulomba kwakufuma mumuchima, Yesu washetumukili kudi atumbanji twindi nakuhosha nindi: “Mesu amonaña yuma yimwamonañenu anakooleki. Nukuyileja nami, atuprofwetu amavulu nawanyanta ankanu akeñelaña nawu amoni yuma yimwamonañenu, hiyayimwenuku; akeñelaña nawu atiyi yuma yimwatiyañenu, hiyayitiyiluku.” Eña, Yesu wayikolesheli atumbanji twindi ashinshika kubula kudiwula chalala chaWanta chalema chayilejeleñayi.  Ichi chalala hiyachimwekesheli kwikiñu dakusambila dawañamba jaNzambuku, nawa hiyachimwekesheli kudi “akwamaana niakwakashinshi” amumafuku aYesuku!—Luka 10:23, 24.

6, 7. (a) Nyiloñanyi yitukweti yakuhameka chalala chaNzambi? (b) Chambwinyi chinakumwekana makonu hakachi kansakililu yalala nayakutwamba?

⁶ Mumafuku etu, tukweti nyiloña yayivulu yakuhameka hachalala chaNzambi, muloña Yehova kuhitila mudi ‘nduñu wamaana nikashinshi,’ nayinki antu jindi kashinshi kakeni Mwizu dindi. (Matewu 24:45; Danyeli 12:10) Kutalisha kumpinji yakukuminina, kaprofwetu Danyeli wasonekeli nindi: ‘Amavulu akaya lufuchi niniku niniku, nikwiluka kwakweni kwakavula.’ (Danyeli 12:4) Komana himuneteji nenu makonu kwiluka kwaNzambi ‘kunavuli’ nawa nawu ambuña aYehova anakuyinka yakudya yayivulu yakuspirituku?

⁷ Ochaambu chitunakumona hakuvula kwakwiluka kutalisha hadi Nzambi ninkeñelu yindi hakachi kawantu jaNzambi nakuluwankana kwansakililu yaBabiloni Muneni! Chafumañamu, amavulu atiyaña kutama nansakililu yakutwamba anakwinza kukudifukula kwalala. Hiyantu afwana anyikoku abulaña kukeña “kutiyañana nanyiloña yindi [Babiloni Muneni]” hela “kutambula nindi yipupu.” Yehova niantu jindi anakutambika antu amuchidiwu kwinza muchipompelu chalala chawiniKristu.—Chimwekeshu 18:2-4; 22:17.

Antu Anakuhameka Anakuhwila Kudi Nzambi

8, 9. Indi mazu aHagayi 2:7 anakushikijewa ñahi makonu?

⁸ Yehova washimweneñahu dehi kutalisha hatembeli yindi yachifwikija, nindi: ‘Nakakankisha nyuza yejima, niyuma yatiyaña nyuza yejima kuwaha yakenza, nakenzesha italidi nakulema.’ (Hagayi 2:7) Iwu wuprofwetu wakuhayamisha washikijeweli mumpinji yaHagayi hampinji yatuñulwileñawu tembeli muYerusalema kudi antu jaNzambi ashelihu afuntishiluwu. Makonu, mazu aHagayi anakushikijewa cheñi kutalisha kutembeli yaYehova yeneni yakuspiritu.

⁹ Yihita yawantu yahwila dehi kutembeli yachifwikija kulonda kudifukula kudi Nzambi ‘muchalala nispiritu,’ nawa hachaaka nichaaka antu akubadika ha 200,000, alumbululawu hamu neyi “yuma yatiyaña nyuza yejima kuwaha,” anakutwalekahu kuhwila mutembeli. (Yowanu 4:23, 24) Chakutalilahu, lipoti yamukaayi kejima yachaaka chamudimu cha 2006 yinakumwekesha nawu antu 248,327 apapatisheweli chinjikijilu chakudihana kwawu kudi Yehova. Ichi chinakwimenaku avareji yawantu 680 amaha hefuku nifuku! Kukeña kwawu kwakeñawu chalala nimpwila yawu yakumukalakela Yehova neyi akwakushimwina Wanta kwahanaña wunsahu wakwila nawu chalala ayikwokweli kudi Nzambi.—Yowanu 6:44, 65.

10, 11. Shimunaku chakuhumañana chinakumwekesha chatachikañawu antu kulemesha chalala chamuBayibolu.

¹⁰ Amavulu hadi awa ashinshika ayikwokweli kuchalala muloña amweni ‘chambu chidi hakachi kawaloña nawatama, niwamukalakelaña Nzambi, niwabulaña kumukalakela.’ (Malaki 3:18) Talenu chakutalilahu chaWayne naVirginia, adisumbula adiña muchipompelu chaProtestanti ilaña akañenyi kuwana ñakwilu yakumanisha mpwila kumalwihu awu amavulu ansakililu. Adiña ahela njita nawa atiyileña kutama hampinji  yamweneñawu akulumpi jansakililu anakukiswila amashidika niyitwa. Chelili awa adisumbula anakuli dehi, achimweni neyi anayidiwuli kudi antu amakwawu amuchipompelu, hela chakwila Virginia watañishili Sande suku hadi yaaka yayivulu. Ahosheli nawu, “Kwosi muntu watwihempwileña hela wakameneneña nshakaminu yetu yakuspirituku. Chipompelu chatili maana hohu hamaletu. Twaluwankeni.” Aswejeliluku kuluwankana nankashi chelili chipompelu chawu chiteji yililu yawutumwa.

¹¹ Kufuma haniyi mpinji, mwijukulwa Wayne naVirginia wamumbanda nimwanawu wamumbanda ekalili aYinsahu jaYehova. Hela chakwila Wayne naVirginia aneñeli hakusambila, mukuhita kwampinji ahimpili yitoñojoka yawu nakwiteja kudiza kwaBayibolu. Wayne wahosheli nindi, “mutukweji tusatu hohu tunadizi yuma yayivulu kutalisha haBayibolu kubadika yitwadizili hadi yaaka 70 yinahituhu! Hitwelukili netu ijina daNzambi diyi Yehovaku, nawa kwosi nsañu jitwelukiluhu kutalisha haWanta niParadisa yahamaseki.” Hashimbwili wanyi, awa adisumbula ashinshika atachikili kuwanika kukupompa kuchipompelu chawaYinsahu jaYehova nikushimwina. Virginia wahosheli nindi, “Tunakukeña kuleja antu ejima chalala.” Wejima wawu apapatisheweli nayaaka 80 mu 2005. Ahosheli nawu, “Tunawani izaza daweniKristu alala ditunamoni neyi dihutwatela kuwanewa.”

Hamekenu Hakwikala ‘Awahila Nyidimu Yayiwahi Yejima’

12. Chumanyi chayinkañayi Yehova ambuñindi mpinji yejima, nawa chumanyi chitwatela kwila hakwila tuhetelumu?

¹² Mpinji yejima Yehova wayikwashaña ambuñindi kwila nkeñelu yindi. Chakutalilahu, Nowa watambwilili nshimbi yatiyakana yalumbulwileña chakutuña watu—mudimu wateleli kuzatewa chiwahi hampinji yimu hohu! Nawa dichichadiña. Muloñadi? Muloña “dicheliliyi Nowa; mwejima mwamulejeliyi Nzambi dimu mweliliyi.” (Kutachika 6:14-22) Nimakonu, Yehova wayidizishaña chikupu antu jindi kulonda eleña nkeñelu yindi. Hela chochu, mudimu wetu wabadika kulema wakushimwina nsañu yayiwahi yaWanta waNzambi wemikawu nikukwashaku antu atelela kwikala atumbanji twaYesu Kristu. Neyi chichadiña kudi Nowa, kutwesha kwetu kwashindamena hakwovwahila. Twatela kulondela nshimbi jahanañayi Yehova kuhitila Mwizu dindi nikuloñesha kwindi mukwovwahila.—Matewu 24:14; 28:19, 20.

13. Yehova watwifumbaña kuhitila mukuzatisha chumanyi?

¹³ Hakwila tuzati iwu mudimu wetu chiwahi, twatela kudiza ‘chakuzatisha chiwahi’ chitwa chetu chacheni—Izu daNzambi—chekala ‘chachiwahi kuleja nachu, nikutanyisha nachu, nikwolola nachu, nikufumba nachu mwaloña; kulonda muntu waNzambi awanini chikupu, awahili nyidimu yayiwahi yejima.’ (2 Timotewu 2:15; 3:16, 17) Neyi chochichadiña muyaaka nkulakaji yakusambila, Yehova watwifumbaña chiwahi kuhitila muchipompelu chawiniKristu. Makonu, muyipompelu 99,770 kunyeñumuka kaayi kejima, Shikola yaMudimu waTeokalatiki niKupompa kwaMudimu kwekalañaku mulungu nimulungu kulonda kutwikwasheñaku mumudimu wakushimwina. Komana wahamekaña haniku kupompa kwalema kuhitila mukuwanika nikuzatisha yuma yiwadizaña?—Aheberu 10:24, 25.

14. Indi ambuña aYehova amwekeshaña ñahi kuhameka kwawu hakukooleka kwakumukalakela Nzambi? (Bombelenuhu mazu amakwawu kufuma hachati yidi hamafu 27-30)

¹⁴ Kuhitila mukuzata nañovu mumudimu wakushimwina, yihita yawantu jaNzambi kunyeñumuka kaayi kejima anakumwekesha kuhameka kwawu hakufumba kuyatambwilañawu. Chakutalilahu, muchaaka chamudimu cha 2006 akwakushimwina aWanta 6,741,444 azatili maora ejima hamu 1,333,966,199 mumbadi yejima yamudimu wakushimwina, ichi chabombelelumu nikulombola kudiza kwaBayibolu kwahetala 6,286,618. Iwu hiwunsahu wumu wahakachi kawunsahu wakukolesha wunatanjikuwu halipoti yamukaayi kejima. Mwani tunayileji kutala chiwahi haniyi lipoti kulonda mukoleshewi, neyi chochakolesheweleñawu ana kwetu amuyaaka nkulakaji yakusambila namalipoti akukula kwamudimu wakushimwina mumpinji yawu.—Yililu 1:15; 2:5-11, 41, 47; 4:4; 6:7.

15. Muloñadi wudi wejima chikubulilayi kuneña kutalisha hamudimu windi wamuchima wejima kudi Yehova?

 ¹⁵ Kuhameka kweneni kwayaña kudi Nzambi hachaaka hachaaka kwamwekeshaña kusakilila kwakweni kukwetuwu ambuña aYehova hakukooleka kwakumwiluka Yehova nikushimwina hadi yena. (Isaya 43:10) Mwalala, mulambu wakuhameka wahanañawu ana kwetu niahela atushinakaji, akata, niayifwayi watela kwesekana namulambu wanyanya wanfwila. Ilaña bayi tuvulamena netu Yehova niMwanindi ahamekaña ejima amukalakelaña Nzambi namuchima wejima, hampinji yinakuzatawu yejima yikutweshawu kuzata.—Luka 21:1-4; Aŋalija 6:4.

16. Yitwanyi yakutañishilamu yinaloñeshiyi Yehova muyaaka yamakonu?

¹⁶ Kubombela hakutufumba kwamumudimu wakushimwina, kuhitila mukuloñesha kwindi, Yehova watwinka yitwa yayiwahi yakutañisha nachu. Muyaaka yakatataka, yitwa yeniyi yinabombelumu nyikanda yidi neyi The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life niwakatataka, Chumanyi Chacheni Chatañishaña Bayibolu? Antu asakililaña chikupu hayumiyi ayizatishaña chiwahi mumudimu wakushimwina.

Zatishenu Chiwahi Mukanda waChatañishaña Bayibolu

17, 18. (a) Chibalwinyi chamukanda waChatañishaña Bayibolu chiwakeña kukonkomwena mumudimu weyi wakushimwina? (b) Indi nkoñi wumu wañinza wahosheli nindidi kutalisha hamukanda waChatañishaña Bayibolu?

¹⁷ Mukanda waChumanyi Chacheni Chatañishaña Bayibolu? wunakumwekesha kwikala chawana mumudimu wakushimwina muloña wukweti tupetulu 19, niapendikisi yalumbulula yuma yejima nawa awusoneka mwidimi dapela nawa datiyakana. Chakutalilahu kapetulu 12 kahosha hamutu wunakwila nawu “Kushakama Nshakaminu Yamuzañaleshaña Nzambi.” Iyi nsañu yalumbululaña kudi kadizi chinateli kwikalayi ibwambu daNzambi, chuma chimu chakañanyañawu amavulu kwiluka hela kutoñojoka nawu chatela kuzatika. (Yakoba 2:23) Indi iwu mukanda wakuzatisha hakudiza Bayibolu anakuwutambwila ñahi?

¹⁸ Nkoñi wañinza wakuAustralia nalumbululi nindi mukanda waChatañishaña Bayibolu waletaña “ikoku daleteshaña mwiniitala kutachika kuhanjeka swayi-swayi.” Wabombeliluhu nindi,  himukanda wapela kuwuzatisha chakwila “wahana chikuhwelelu nimuzañalu kudi akwakushimwina Wanta mumudimu wakushimwina. Dimuloña waweni amakwawu chinakutenenawu mukanda iwu nawu wawuwahi neyi Wuru!”

19-21. Shimunaku yakuhumañana yinakumwekesha kulema kwamukanda waChatañishaña Bayibolu.

¹⁹ Mumbanda wumu wakuGuyana wamulejeli payiniya hachinsu chindi nindi, “Nzambi diyi wunakutemeshi.” Nfumwa nona mumbanda wamushiyili hamu nanyanawu yanyanya yiyedi. Payiniya wabakwili mukanda waChatañishaña Bayibolu hakapetulu 1 nakutaña nañovu parakalafu 11, heshina damutu wanyanya wunakwila nawu “Indi Nzambi Watiyaña Ñahi Hakuheña Kwatwimwekenaña?” Payiniya wahosheli nindi, “yikuma yamushikili nankashi. Kafwampi, wanyamukili nakuya kwikeki dakaditala kindi kakulandishila yuma nakudililaku chikupu.” Iwu mumbanda wetejeli kudiza Bayibolu kwampinji yejima namuhela wakunodu iluña nawa nakutwalekahu kuya hambidi.

²⁰ José washakamaña mwituña daSpain, wafwishili iñodindi muwubanji wahamukwakwa. Wakeñeleña kudikudeja kuhitila mukunwa yitumbu yashetana, nawa watambwili wukwashu kudi antu adiza hayitoñojoka yawantu. Hela chochu, antu adiza hayitoñojoka yawantu hiyatwesheli kwakula lwihu lwamukabishileña José nankashuku: “Muloñadi Nzambi chetejeliyi nindi iñodami yafwi?” Ifuku dimu José wadibulakeni naFrancesc, wazatileña hakampani yoyimu. Francesc wahosheli nindi ahanjeki hakapetulu 11 kamukanda waChatañishaña Bayibolu kakweti mutu wunakwila nawu “Muloñadi Nzambi Chetejelayi Makabi?” Kulumbulula kwamuNsona nichakutalilahu chantañishi namwana washikola kwamuzañalesheli José chikupu. Watachikili kudiza nankashi, wawanikili kukupompa kwañinza, nawa chayinu mpinji nakuwanika kukupompa Hetala daWanta damunodi iluña.

²¹ Roman mukwakulanda nakulandulula wukweti yaaka 40 wakuPoland, wadiña nakulemesha Izu daNzambi mpinji yejima. Ilaña hamuloña wakusweja kudiñija mumudimu windi, wayililuku hambidi chantesha hohu mukudiza kwindi kwaBayibolu. Hela chochu, wawanikili kukupompa kwankambi nawa watambwili mukanda waChatañishaña Bayibolu. Kufumahu, wayililuku hambidi chikupu. Wahosheli nindi, “naniwu mukanda ntañishilu yejima yamuBayibolu yinamwekani yinenzi hamu nakutuña mwevulu washikila.” Chayinu mpinji Roman nakudiza Bayibolu mpinji yejima nawa nakuyilaku hambidi chiwahi.

Twalekenuhu naKuhameka

22, 23. Tunateli kutwalekahu ñahi kumwekesha kuhameka kwetu hakuchiñeja kwatushilawu hambidi?

²² Neyi chalumbulwiluwu haKupompa kwaNkambi kwakuzañalesha kwakwila nawu, “Kupuluka Kudi Mukamwihi!” eniKristu alala akeñeshaña ‘kukuulewa chahaya nyaka’ kwakanayi Nzambi nawa kunapeleshuwu namashi aYesu Kristu apwekeli. Kwosi njila yayiwahi yakumwekeshelamu kuhameka kwakufuma mumuchima wetu haniku kuchiñeja kwalema kubadika hakutwalekahu kutookesha ‘nyidimu yafwa kulonda kukalakala mudimu wajila waNzambi wamumi.’—Aheberu 9:12, 14.

²³ Eña, kubadika hayihita yitanu nachimu yawakwakushimwina Wanta akashinshi akakela mumudimu waNzambi henohu ikañesha dakukeña kwikala adikeña dinakuswejelaku mpinji yejima mwalala hichuma chakuhayamisha. Cheñi hiwunsahu wunakumwekesha nawu ambuña aYehova ahamekaña chikupu mudimu wakumukalakela Nzambi, chiyeluka nawu ‘kukalakala kwawu mudi Mwanta hikwamukunkulwayuku.’ Komana iku kuhameka bayi kumanaku!—1 Akorinda 15:58; Masamu 110:3.

Munateli Kwakula Ñahi?

• Chumanyi chatwidizishañayi ñimbi yamasamu kutalisha hakuhameka Nzambi niyuma yakuspiritu?

• Indi mazu adi haHagayi 2:7 anakushikijewa ñahi makonu?

• Indi Yehova nakudizisha ñahi antu jindi kulonda kumukalakela chikupu?

• Chumanyi chiwatela kwila kulonda wumwekeshi kuhameka kweyi hakuwaha kwaYehova?

[Malwihu aKuzatisha haKudiza]

 [Chati yidi hefu 27-30]

LIPOTI YAWAYINSAHU JAYEHOVA YACHAAKA CHAMUDIMU CHA 2006 YAMUKAAYI KEJIMA

(Talenu bound volume)

 (Talenu bound volume)

[Nyevulu yidi hefu 31]

Yehova watufumbaña chikupu kulonda kwila nkeñelu yindi