Dizishenu Chuma Chacheni Chatañishaña Bayibolu

‘Kelishenu atumbanji munyuza yejima, . . . mwakayileji.’—MATEWU 28:19, 20.

1. Chumanyi chinateli kuhoshewa hakuvula kwaBayibolu?

 IZU DAYEHOVA, Bayibolu Yajila himukanda wumu hakachi kanyikanda yayikulu nawa diwu wasweja kuhanawu nankashi mukaayi. Chibalu chaBayibolu anachituntululi mumadimi akubadika ha 2,300. Kubadika hamapesenti 90 awantu adi mukaayi akweti Bayibolu mwidimi dawu.

2, 3. (a) Muloñadi chikunekalili kuluwankana kutalisha hantañishilu yaBayibolu? (b) Malwihwinyi yitukudizahu?

² Yihita yawantu atañaña chikunku chaBayibolu hefuku hefuku. Amakwawu ataña dehi Bayibolu yejima mapampa kakavulu. Yihita yamazanvu ansakililu yahoshaña nawu ntañishilu yawu yashindamena haBayibolu, ilaña hiyaditejaña namazanvu ansakililu jikwawu hachuma chatañishaña Bayiboluku. Kubombela hakuluwankana hikubula kutiyashana kwekala hakachi kawantu amunsakililu yimu. Amakwawu ajinookaña haBayibolu, kuyafuma nikulema kwayu. Amavulu ayimonaña neyi himukanda wajila wakuzatisha hohu hayidika kulonda kusanyika nachu hakushimuna wunsahu walala muchota chanyiloña.

³ Ilaña, Bayibolu yikweti izu daNzambi dikweti ñovu hela nsañu yakuleja muchidi wamuntu. (Aheberu 4:12) Hamu neyi aYinsahu jaYehova, tunakukeña netu antu adizi chuma chatañishaña Bayibolu. Tukweti muzañalu wakuzata mudimu wayinkeliyi Yesu Kristu atumbanji twindi hampinji yahosheliyi nindi: ‘Yenu mwakelishi atumbanji munyuza yejima, . . . mwakayileji.’ (Matewu 28:19, 20) Mumudimu wetu wakushimwina twawanañamu antu ashinshika nawa aneña hamuloña wakuluwankana kunatandi mukaayi. Akeñaña kwiluka walala kutalisha hadi Nleñi yetu nikufwila kudiza chuma chahoshaña Bayibolu kutalisha hakulema kwawumi. Lekenu tutali hamalwihu asatu aleñelaña antu amavulu kwakama. Munsañu yidi yejima, tukushinshika hachuma chaluwañeshañawu akulumpi jansakililu hakuhosha, kufumahu tukutala hachuma chacheni chatañishaña Bayibolu. Malwihu adi nawu: (1) Komana Nzambi watwakamenaña? (2) Muloñadi chitwekalila hanu hamaseki? (3) Chumanyi chamwekenaña neyi tunafwi?

Komana Nzambi Wakamenaña?

4, 5. Muloñadi antu chiyatoñojokelañawu nawu Nzambi hatwakamenañaku?

⁴ Lekenu tusambili kushinshika halwihu lwatachi, Komana Nzambi watwakamenaña? Chawushona, antu amavulu atoñojokaña nawu ñakwilu yidi yakwila nawu, inehi. Muloñadi chiyatoñojokelañawu muniyi njila? Njila yimu yidi yakwila nawu ashakamaña mwituña mwenzala kuhelañana, njita, nimakabi. Atoñojokaña nawu, ‘neyi mwalala Nzambi wakamenaña, mutenowu wadi kukañesha yuma yatama yamuchidiwu kuzatika.’

⁵ Muloña wukwawu watoñojokelañawu antu nawu Nzambi hatwakamenañaku wudi wakwila nawu akulumpi jansakililu diwu ayikojejaña kutoñojoka muniyi njila. Indi akulumpi jansakililu ahoshaña nawudi kakavulu neyi chakwila kunamwekani wubanji? Hampinji yajimbesheliyi mumbanda wumu anyanindi anyanya ayedi muwubanji wahamukwakwa, nkoñi yindi wahosheli nindi, “Kwadiña hikukeña kwaNzambi. Nzambi wakeñelañahu añelu amakwawu ayedi.” Neyi akulumpi jansakililu ahosha mazu amuchidiwu, dikwila nawu anakumutwiika Nzambi muloña hayuma yatama yamwekanaña. Henohu, kapostolu Yakoba wasonekeli nindi: “Muntu anesekuwu, bayi ela nindi,  Anañeseki kudi Nzambuku; muloña Nzambi hiyamwesekaña nayuma yatamaku, hela yena yomweni hesekaña muntuku.” (Yakoba 1:13) Yehova Nzambi hakojejaña chuma chatamaku. Chalala, “Nzambi walala kwila chuma chatama kwakulehi!”—Yoba 34:10.

6. Hinyi waleteshaña kutama nimakabi mukanu kaayi?

⁶ Hanu dinu, muloñadi chikunekalili makabi amavulu ñana? Muloña watachi wudi wakwila nawu, muchidi wamuntu wejima wakaana Nzambi kwikala Nyuli yawu, kuhitila mukubula kukeña kwovwahila nshimbi jindi niyipimu yindi. Antu mukubula kwiluka anadihani kudi Mukwankunyi naNzambi, Satana muloña “mpata yamunu mwishina yashakamaña mudi owu watama.” (1 Yowanu 5:19) Kwiluka iwu walala kwaleñelaña kutiyisha muloña yuma yatama chiyekalilaku. Satana himbanji, mukwakuhelañana, hisakutwamba nawa wukweti wukatu. Dichi twatela kukuhwelela kaayi kumwekesha yililu yaSatana. Dimuloña waweni kutama chikunavulili!

7. Nyiloñanyi yakojejaña makabi yitunakumona?

⁷ Kubula kumaninina himuloña wukwawu wunakukojeja makabi yitunakumona. Antu akwakuputola afwilaña kwikala abadika akwawu kulema, nawa chumichi kakavulu chakojejaña jinjita, makabisha, nilukadi. Mukwakutaŋisha 8:9 wahosha chikupu nindi: ‘Muntu wayulaña mukwawu muntu kulonda yamukatishi.’ Muloña wukwawu wunakukojeja makabi ‘himpinji nakululakana kwayilulakenu.’ (Mukwakutaŋisha 9:11) Kakavulu antu amonaña kukala hamuloña wakwikala heluña datama nihampinji yatama.

8, 9. Tuneluki ñahi netu chalala Yehova watwakamenaña?

⁸ Chakukundeja hakwiluka nawu Yehova hakojejaña makabuku. Hanu dinu, komana Nzambi wakamenaña yuma yinakumwekana muyihandilu yetu? Ñakwilu yakuzañalesha yidi yakwila nawu eña! Tweluka netu Nzambi wakamenaña hamuloña wakwila Izu dindi donenewa datulejaña muloña waweni wetejelayi antu kulondela njila yatama. Yitoñojoka yaNzambi yinabombelimu nyiloña yiyedi: wanta windi nikashinshi kawantu. Hamuloña wakwikala Nleñi wabadika ñovu, Yehova hatelela kutwileja muloña waweni wetejelayi makabuku. Hela chochu, watwilejaña hamuloña wakwila watwakamenaña.

⁹ Toñojokenu wunsahu wukwawu wunakumwekesha nawu Nzambi watwakamenaña. Nzambi “chamutiyishili kumuchima bwi” chelili kutama kusweji hamaseki mumpinji yaNowa. (Kutachika 6:5, 6) Komana Nzambi watiyaña mwacheñi makonu? Inehi, muloña hahimpañaku. (Malaki 3:6) Wahela kutama, nawa watiyaña kutama hakumona antu anakukabakana. Bayibolu yatañishaña nawu Nzambi keña yafumishuhu yuma yatama yejima yafuma muwunyuli wamuchidi wamuntu nikuluwañeshewa kwaDiyabolu. Komana iwu hiwunsahu wunakumwekesha chikupu nawu Nzambi watwakamenañaku?

10. Indi Yehova watiyaña ñahi hamakabi awantu?

¹⁰ Anlomboli jansakililu hiyamwimenañaku Nzambuku, muloña ahoshaña nawu makabi yitwamonaña ekala hikukeña kwindi. Kwambukaku, Yehova nakukeña kumanisha makabi awantu.  1 Petulu 5:7 yahoshaña nawu “Yena wayihembaña.” Ichi dichuma chacheni chatañishaña Bayibolu!

Muloñadi Chitwekalila Hanu Hamaseki?

11. Indi nsakililu jamukaayi jahoshaña nawudi kutalisha hawumi wahanu hamaseki?

¹¹ Lekenu tutali ntahi halwihu lwamuchiyedi lwehulañawu antu amavulu, Muloñadi chitwekalila hanu hamaseki? Nsakililu jamukaayi kakavulu jakulaña nawu hamaseki muntu washakamahu hohu hakapinji kantesha. Amonaña neyi iseki hiiluña dakunookelahu hohu hela dakuyikwashaku hohu hakuyilombola kuwumi wakwiluña dacheñi. Akulumpi jayipompelu amakwawu atañishaña chakutwamba nawu ifuku dimu Nzambi wamba kajilumuna adinu iseki. Hamuloña wantañishilu yamuchidiwu, antu amavulu anakunkululi nawu atela kwikala nanshakaminu yayiwahi hachidiwu nawumi muloña mbidi yawu hikufwa hohu. Chumanyi chacheni chatañishaña Bayibolu hamuloña wutwekalila hanu hamaseki?

12-14. Chumanyi chatañishaña Bayibolu kutalisha kunkeñelu yaNzambi kwiseki nikumuchidi wamuntu?

¹² Nzambi wukweti nkeñelu yayiwahi yafuukulayi kwiseki nikumuchidi wamuntu. Nzambi “wadileñeli [iseki] dibuli kwikala damukunkulwayi,” ilaña “wadiwumbili mushakami antu.” (Isaya 45:18) Nawa cheñi, Yehova “wahatishili iseki hamashina adu, kulonda dibuli kuswila chahaya nyaka.” (Masamu 104:5) Kudiza hayuma yeniyi kutalisha hankeñelu yaNzambi kwiseki nikumuchidi wamuntu kunateli kutukwasha kutiyishisha muloña wutwekalila hanu hamaseki.

¹³ Tupetulu twamukanda waKutachika 1 ni 2, twamwekeshaña nawu Yehova washiliku kashinshi kakeni hakuloñesha iseki kulonda muchidi wamuntu wakashakameñahu. Chamanini mpinji yakuleña kwabombelelumu iseki detu, yuma yejima yadiña ‘chiwahi nankashi.’ (Kutachika 1:31) Nzambi washili iyala watachi nimumbanda watachi, Adama naEvu mwitempa dadiwahi daEdeni nakuyinka yakudya yayivulu yayiwahi. Antu ayedi akusambila ayilejeli nawu: “Semununenu, muvuleña, muwanini heseki, mudovwahishi.” Ateleli kuvwala nyana yawanina, kutohesha chikupu ñinza yamukala wawu wetempa heseki dejima nikuyula chiwahi anyama.—Kutachika 1:26-28.

¹⁴ Hinkeñelu yaYehova yakwikala nachisaka chawantu awanina kushakama hamaseki haya nyaka. Izu daNzambi dahosha nawu: “Akwakuloña akaswana ituña, akashakamamu haya nyaka.” (Masamu 37:29) Eña, muchidi wamuntu wateleleli kudiluñisha wumi wahaya nyaka muParadisa hamaseki. Iyi diyi nkeñelu yaNzambi nawa dichuma chacheni chatañishaña Bayibolu!

Chumanyi Chamwekanaña Neyi Tunafwi?

15. Chumanyi chatañishaña nsakililu yayivulu yamukaayi kutalisha hachuma chamwekanaña neyi tunafwi?

¹⁵ Ichi dinu lekenu tuhanjiki halwihu lwamuchisatu lwehulañawu antu amavulu nawu: Chumanyi chamwekanaña neyi tunafwi? Nsakililu yayivulu yamukaayi yatañishaña nawu chuma chimu chekala mukachi kamuntu chatwalekañahu nakuhanda hanyima yakufwa kwamujimba. Mazanvu amakwawu ansakililu achidi akakela kuyitoñojoka yakwila nawu Nzambi wababeshaña antu atama kuhitila mukuyisha mwihuñu dahaya nyaka damukesi kahelu. Komana iwu diwu walala? Chumanyi chacheni chatañishaña Bayibolu kutalisha hansañu yakufwa?

16, 17. Kwesekeja naBayibolu, afu ekala ñahi?

¹⁶ Izu daNzambi dahosha nawu: “Amomi eluka dehi nawu, Twakafwa; hakwila afu hiyeluka chumaku, hiyakamona nawa cheñi wulokuku.” Chineli afu “hiyeluka chumaku,” dikwila nawu hiyatweshaña kutiya, nikumona, nikuhosha, kutiya yuma hela kutoñojokaku. Hiyatweshaña kutambula wuloku wudi wejimaku. Akutwesha ñahi? Hiyakutwesha kukoña mudimu wudi wejimaku. Cheñi nawu, “nimwakeñelañawu, nimwahelelañawu, nimwatiyilañawu ichima mwajiya dehi,” muloña hiyakutwesha kumwekesha yitoñojoka yidi yejimaku.—Mukwakutaŋisha 9:5, 6, 10.

¹⁷ Bayibolu yahosha haniyi nsañu munjila yapela nawa yatiyakana nawu—afu hiyatwalekañahu nakuhanda kwiluña dikwawuku. Kwosi chuma chafumaña mumujimba wetu neyi tunafwi nakutwalekahu kuhanda kulonda kuvwalika mumujimba wacheñi, neyi chahoshañawu antu akuhwelela mukufwa nakuvwalika muchuma chikwawu. Tunateli kuchilumbulula muniyi njila: Wumi wutwekala nawu wekala neyi muzuzu wakandulu. Neyi muzuzu anawujimi, hiwayaña kudi kwejimaku. Wakuminaña dakujima.

18. Neyi kadizi waBayibolu yadiza nindi afu hiyeluka chumaku, chumanyi chinateli kukunkululayi?

¹⁸ Toñojokaku hakulema kwanichi chalala chapela  ilaña chalema chikupu. Neyi kadizi waBayibolu yadiza nindi afu hiyelukahu chuma nichimuku, chaswayi kukunkulula nindi hela chakwila ankakulula jindi afwa dehi adiña asweja kuzuwa hampinji yachidiñawu amomi, hiyanatweshi kumukabishaku. Cheñi watela kwiluka swayi-swayi nindi ayindi akeñayi afwa dehi hiyatiyaña, nikumona, nikuhosha nikutiya yuma hela kutoñojokaku. Dichi, hiyanateli kutiya wudi hakwikala nkawawu mwituña dawafu hela kukabakana mwiluña dakuyandishilamu nakesuku. Hela chochu, Bayibolu yatañishaña nawu afu adi muyitoñojoka yaNzambi akayisañula. Iku hikuchiñeja kwakuwahi!—Yowanu 5:28, 29.

Mukanda Wawuha Wutukuzatishaña

19, 20. Hamu neyi eniKristu, mudimwinyi wutukweti, nawa mukandanyi wakudizamu Bayibolu wunaloñeshewi kulonda tuwuzatisheña mumudimu wetu wakushimwina?

¹⁹ Tunatali hohu hamalwihu asatu ehulañawu antu amavulu. Munjila yidi yejima, Bayibolu yatañishaña yuma yatiyakana nawa yoloka chikupu. Chidi chamuzañalu hakulejaku antu amakwawu anakukeña kwiluka hachuma chatañishaña Bayibolu! Ilaña kudi malwihu amakwawu amavulu nawa alema anakuleñela antu ashinshika kukeña ñakwilu yatiyakana. Hamu neyi eniKristu tukweti mudimu wakuyikwashaku kuwana ñakwilu kumalwihu amuchidiwu.

²⁰ Chekala chakala kutañisha walala wamuNsona munjila yapela nawa yatiyakana yakushika hamuchima. Hakwila chitukwashiku kumanisha kukala kweniku, ‘nduñu wamaana nikashinshi’ naloñeshi mukanda wunatuñewi kulonda tuwuzatisheña mumudimu wetu waweniKristu. (Matewu 24:45-47) Iwu mukanda wudi namafu 224, wunakuhosha nawu Chumanyi Chacheni Chatañishaña Bayibolu?

21, 22. Yumanyi yalema yawanewaña mumukanda waChumanyi Chacheni Chatañishaña Bayibolu?

²¹ Iwu mukanda wafumini haKupompa kwaNkambi kwawaYinsahu jaYehova kwamu 2005/2006 kwelileña nawu: “Kwovwahila Nzambi” nawa mukanda weniwu wukweti yuma yayivulu yalema. Chakutalilahu mudi mafu atanu ayuma yidimu yinaloñeshewi kulonda kukwashanaku hakutachika kudiza Bayibolu kwahetala. Mukuchiwana kwikala chapela kuhanjeka hanyevulu nijinsona jidi hanawa mafu akutachikila. Cheñi munatela kuzatisha nsañu yidi munichi chibalu kulonda kumuleja kadizi chakuwana tupetulu nimavasi amuBayibolu.

²² Nsonekelu yaniwu mukanda yapela nawa yatiyakana. Anazatishi ñovu yayeni kulonda kushika hamuchima wakadizi kuhitila mukumwihula mpinji yejima. Kapetulu kadi kejima kakweti malwihu akutachikilahu nawa kunsa yakapetulu kudi chikasha chinakwila nawu “Yuma Yatañishaña Bayibolu.” Chikasha chikweti ñakwilu yamuNsona kutalisha kumalwihu akutachikilahu. Nyevulu yayiwahi nimazu adi heshina danyevulu hamu tuhu niyakutalilahu yidi muniwu mukanda yikukwashaku kadizi kutiyishisha yitoñojoka yayiha. Hela chakwila iwu mukanda anawisoneki munjila yapela, mudi cheñi apendikisi yikuyikwashaku kudiza yuma yakunama hanyitu yansañu yalema 14 neyi chakwila kadizi nakukeña kwilukilahu nsañu yikwawu.

23. Yitoñojokanyi yinahanewi kutalisha hakuzatisha mukanda waChatañishaña Bayibolu hakudiza kwaBayibolu?

²³ Mukanda waChatañishaña Bayibolu anawuloñeshi kulonda kutwikwashaku kudizisha antu kwesekeja nahakumina kudiza kwawu nawa niantu anakufuma munsakililu yashiyashana. Neyi chakwila kadizi helukahu chuma chidi chejima muBayiboluku, chinateli kubadika hakudiza kamu hakwila nawu mumanishi kapetulu. Bayi muhita swayi muyuma yimunakudizaku, ilaña fwilenu kushika hamuchima wakadizi. Neyi hanatiyishishi  chakutalilahu chinazatishewi muniwu mukandaku, chilumbululenu hela zatishenu chakutalilahu chacheñi. Loñeshenu chiwahi, zatenu nañovu yenu yejima kulonda kuzatisha mukanda weniwu chikupu, nawa lombenu wukwashu waNzambi kulonda ‘kulumbulula mazu ansañu yalala choloka.’—2 Timotewu 2:15.

Lemeshaku Mudimu Weyi Walema Wuseya

24, 25. Yehova wayinka antu jindi mudimwinyi walema wuseya?

²⁴ Yehova wayinka antu jindi mudimu walema wuseya. Natwiteji kudiza chalala kutalisha hadi yena. Bayi tubula kuhameka haniwu mudimuku. Hela chochu, Nzambi wajinda nkeñelu yindi kudi antu adinka wanta nakuyisolola kudi adizoza. Haniyi nsañu Yesu welili nindi: “Eyi Tata, Mwanta wewulu niiseki, nakusakilili chiwajindili yumiyi kudi akwamaana nikudi ashinshika, hiwukuyimwekesha kudi anyikeki.” (Matewu 11:25) Hikalemesha kabulaña kumwekana kakutuchindila hamu nawakwakudizoza amukalakelaña Mwanta Wakuleña kwejima, Yehova.

²⁵ Nzambi watwinka cheñi kukooleka kwakudizisha antu acheñi hadi yena. Anukenu nenu Nzambi hiyamwimenañaku kudi anakutañisha jamakudi hadi yenaku. Dichi antu amavulu akweti mmwenu yatama hadi Yehova, muloña atoñojokaña nawu hakamenañaku nawa nawu hakweti wushonaku. Komana wunakukeña, kufwila chikupu kukwasha kwolola iyi nsañu? Komana wunakukeña antu ashinshika adi kwejima kwiluka walala hadi Nzambi? Chimwekeshi munjila yidi yejima kumwovwahila Nzambi kuhitila mukushimwina nikutañisha antu chuma chahosha Nsona hanyitu yansañu yalema. Akwakukeña alala atela kudiza chuma chacheni chatañishaña Bayibolu.

Ñakwilu Yenu Yidi Nawudi?

• Tweluka ñahi netu Nzambi watwakamenaña?

• Muloñadi chitwekalila hanu hamaseki?

• Chumanyi chamwekanaña neyi tunafwi?

• Yumanyi yidi mumukanda waChatañishaña Bayibolu yiwunahameki chikupu?

[Malwihu aKuzatisha haKudiza]

[Nyevulu yidi hefu 7]

Bayibolu yatañishaña nawu makabi akamana

[Mazu aKusakilila]

Hewulu kuchidiilu, kansi wamumbanda: © Bruno Morandi/age fotostock; kuchimunswa mumbanda: AP Photo/Gemunu Amarasinghe; heshina kuchidiilu, matunduka: © Sven Torfinn/Panos Pictures

[Mwevulu wudi hefu 9]

Akwakuloña akashakama haya nyaka muParadisa