Kwashenu Antu Amakwawu Kwovwahila Chuma Chatañishaña Bayibolu

‘Yahamaseki amawahi, wowu antu atiyaña mazu namuchima wawu wawuwahi walumbuluka, hiyakuyikwata nañovu, hiyakusoña nyikabu nikutatakenamu chikupu.’—LUKA 8:15.

1, 2. (a) Nkeñelwinyi yatuñilawu, mukanda waChumanyi Chacheni Chatañishaña Bayibolu? (b) Indi Yehova nakiswili ñahi mudimu wawantu jindi wakwilisha atumbanji muyaaka yamakonu?

 “MUKANDA weniwu wawuwahi chikupu. Atudizi ami awikeña chikupu. Nawukeña. Iwu mukanda wakwashanañaku kutachika kudiza kwaBayibolu nawantu chakadi kunata mpinji hayinsu yawu.” Dichahosheli payiniya wampinji yejima wawaYinsahu jaYehova kutalisha hamukanda waChumanyi Chacheni Chatañishaña Bayibolu? * Kutalisha hamukanda wowumu, mukwakushimwina Wanta  wachikulumpi wahosheli nindi: “Nadiñaku nakukooleka kwakukwasha antu kumwiluka Yehova hadi yaaka 50 yinazati nañovu mumudimu wakushimwina. Ilaña nateli kuhosha nami, iwu mukanda wakudizamu wadimena chikupu. Yakutalilahu yakusañumuna ninyevulu yidimu yayiwahi.” Komana dichiwatiyaña kutalisha hamukanda waChatañishaña Bayibolu? Iwu mukanda wakudizamu Bayibolu anawilishi kulonda kuyikwashaku kushikija nshimbi yaYesu yakwila nawu: “Dichi yenu mwakelishi atumbanji munyuza yejima, . . . Mwakayileji kuhemba yuma yejima yinayilejenu.”—Matewu 28:19, 20.

² Chakubula nikujina, Yehova wukweti muzañalu hakumona aYinsahu jindi kubadika hayihita 6.6 anakukeña kwovwahila nshimbi yaYesu yakwilisha atumbanji. (Yishimu 27:11) Mwalala Yehova nakukiswila mudimu wawu. Chakutalilahu, muchaaka chamudimu cha 2005 nsañu yayiwahi ayishimwinini mumatuña 235 nawa haavareji, kudiza kwaBayibolu kwakubadika ha 6,061,500 akwilombweli. Chafuminimu, antu amavulu ‘atiyili izu daNzambi nakuditeja bayi neyi nsañu yawantuku, ilaña chochidekala izu daNzambi.’ (1 Atesalonika 2:13) Hayaaka yiyedi yinahituhu, kubadika hachikunku chachihita chawatumbanji amaha anahimpi yihandilu yawu kwesekeja nayipimu yaYehova nawa anadihani aweni kudi Nzambi.

3. Malwihwinyi kutalisha hakuzatisha mukanda waChatañishaña Bayibolu yitukushinshikahu munichi chibaba?

³ Hayinu mpinji wukweti muzañalu wakulombola kudiza kwaBayibolu namuntu? Mukaayi kejima, mudi antu akweti ‘muchima wawuwahi nawa walumbuluka,’ neyi atiya izu daNzambi ‘akudikwata nakusoña nyikabu nikutatakena chikupu.’ (Luka 8:11-15) Lekenu tutali chimunateli kuzatisha mukanda waChatañishaña Bayibolu mumudimu wakwilisha atumbanji. Kuhanjika kwetu kukushindamena hamalwihu asatu: (1) Wunateli kutachika ñahi kudiza kwaBayibolu? (2) Jinjilanyi jakudizishilamu jazatikaña chiwahi? (3) Wunateli ñahi kukwasha muntu kwikala ntañishi Wezu daNzambi dasonekewa, Bayibolu bayi neyi kambanji hohuku?

Chiwunateli Kutachika Kudiza kwaBayibolu

4. Muloñadi antu amakwawu chiyanateleli kujinoka kudiza Bayibolu, nawa munjilanyi muwunateli kuyikwashila kushinda iku kujinoka kwawu?

⁴ Neyi chakwila akulejeli kuzambuka kaloña keneni nachintampu chimu, watela kukaana iyi yitoñojoka. Ilaña neyi alahu malola akudyatahu hakaloña kejima, chakubula nikujina watela kukeña kweseka kuzambuka. Chochimu, muntu wukweti nyidimu yayivulu watela kujinoka kudiza Bayibolu. Mwiniitala nateli kutoñojoka nindi mpinji yeneni niñovu yakeñekaña hakudiza Bayibolu. Munateli ñahi kumukwasha kulonda kuleka kujinoka? Kuhitila mukulombola kuhanjeka kwakwihi, kuhanjeka kunateli kumuhetesha, munateli kuzatisha mukanda waChatañishaña Bayibolu hakumulombola muntu kudiza Izu daNzambi mpinji yejima. Neyi muloñesha chiwahi, kufuntila kudi muntu wudi wejima kukwikala neyi ilola dakudyatahu kutalisha kuwulunda windi naYehova.

5. Muloñadi yiwunakukeñekela kutaña mukanda waChatañishaña Bayibolu?

⁵ Hela chochu, henohu kanda wukwashi muntu wacheñi kuhetela mumukanda waChatañishaña Bayibolu, watela kuwilukisha chikupu. Komana wataña dehi mukanda weniwu kufuma kutachi nakushika kunsa? Eyala  namumbanda asendeli iwu mukanda hampinji yakunooka hanyidimu nakuwitaña hampinji yadiñawu nakunooka kuchikumu chakaluñalwiji. Chelili ayisolomoki kudi mumbanda wumu wamunodi iluña walandishileña yuma kudi akakwendela maluña, wamweni mutu wahosheleña nawu Chumanyi Chacheni Chatañishaña Bayibolu? Wayilejeli adisumbula nindi maora antesha hohu anahituhu, walombeli kutalisha halwihu lwolumu, nakumulomba Nzambi kulonda yomwinki ñakwilu. Awa adisumbula atiyili kuwaha nakumwinka kopi yaniwu mukanda. Komana ‘wukwetiku mpinji’ yakutaña iwu mukanda, hela tuhu kapampa kayedi, hampinji yiwunakuhembelela muntu yiwadishiikili nindi hela hampinji yakunooka hamudimu hela kushikola? (Aefwesesa 5:15, 16) Neyi wila mwenimu, wukuwilukisha iwu mukanda wakudizamu Bayibolu nawa wukwikala nakukoleka kwakuhosha nawantu amakwawu kutalisha hayuma yidimu.

6, 7. Wunateli kuzatisha ñahi mukanda waChatañishaña Bayibolu hakutachika kudiza kwaBayibolu?

⁶ Hampinji yiwunakuhana mukanda weniwu mumudimu wakushimwina, zatishaku chiwahi yakutalilahu, jinsona, nimalwihu adi hamafu 4, 5 ni 6. Chakutalilahu wunateli kutachika kuhanjeka kuhitila mukuhosha neyi, “Hakukala kwejima kunakumona muchidi wamuntu makonu, wunateli kutoñojoka neyi nsulu yawunlomboli washindamenewa hichumanyi?” Hanyima yakutiyilila nakanañachima kuñakwilu yamwiniitala, tañaku 2 Timotewu 3:16, 17, nakulumbulula neyi Bayibolu yahanaña ñakwilu yalala kukukala kunakumona muchidi wamuntu. Kufumahu, lombolaku yitoñojoka yamwiniitala hamafu 4 ni 5, nakumwihula neyi: “Hakukala kunamwekeshuwu hanawa mafu, kumu kudihi kwakuneñeshaña nankashi?” Neyi mwiniitala natenuhu kumu, mwili yakwati mukanda kulonda wutañi nsona yadifwanaku muBayibolu yeyi. Kulondelahu, tañaku hefu 6, nikumwihula mwiniitala neyi, “Hamalwihu atanu nakamu yanateniwu heshina, lwihwinyi luwunakukeña lwakulewi?” Neyi mwiniitala nasakuluhu lwihu lumu, muleji kapetulu kanakuli olu lwihu, mushili mukanda, tiyañanenu mpinji yiwunateli kufuntilaku kulonda mukahanjeki hanolu lwihu.

⁷ Yuma yejima yanalumbululiwu yatela kusenda hohu kukamwihi najiminiti jitanu nakuyimanisha. Hela chochu, mujiminiti jantesha jeniji watela kwiluka yuma yinakuleñela mwiniitala kwakama, tañaku nikulumbulula jinsona jiyedi nawa alaku chikuku chakufuntilaku. Kuhanjeka kweyi kwakwihi namwiniitala kunateli kumukolesha nawa nikumuzañalesha hayuma yinamoniyi hampinji yayilehi. Chakufumamu, hela chakwila muntu wukweti nyidimu yayivulu nateli kwiteja kuhanjeka naneyi jiminiti jantesha hampinji yiwunakumukwashaku kwiteja mbadi yinahiñihu yinakutwala ‘munjila yalombolaña kuwumi.’ (Matewu 7:14) Mukuhita kwampinji neyi mwiniitala namwekeshi mpwila chikupu, munateli kuswijaku mpinji yakudiza. Ichi chinateli kuzatika kuhitila mukukwinka hakushakama nakudiza hampinji yayilehi yinapimiwu.

Jinjila jaKudizishilamu Jazatikaña Chiwahi

8, 9. (a) Munjilanyi muwunateleli kumuloñesha kadizi weyi waBayibolu kumika ikañesha nikukala kunateli kumonayi? (b) Kudihi kunateli kuwanika yuma yabulaña kusukuma nakesi yakutuña nachu chikuhwelelu chakola?

⁸ Neyi muntu yatachika kwovwahila chuma chatañishaña Bayibolu, nateli kumona kukala kunateli kukañesha wuya hambidi windi. Kapostolu Pawulu wahosheli nindi: “Antu ejima akeña nawu ashakami mudi Kristu Yesu nikwakama Nzambi, akumona makabisha.” (2 Timotewu 3:12) Pawulu wesekejeli iku kukala nakesi kanateli kukisañana yuma yakutuña nachu yabula kukola nakushiya yuma yidi neyi wuru, siliva nimalola awuseya chakubula kukisika. (1 Akorinda 3:10-13; 1 Petulu 1:6, 7) Hakwila wumukwashiku kadizi waBayibolu kwikala nayililu yakeñekaña hakwila nawu yomiki kukala kunateli kumonayi, watela kumukwashaku kuhitila mukutuña nayuma yabulaña kusukuma nakesi.

⁹ Ñimbi yamasamu wesekejeli “mazu aYehova [na]siliva yesekawu dehi muluteñi lwahamaseki, yakosawu dehi mapampa katanu nakayedi.” (Masamu 12:6) Chalala Bayibolu yikweti yuma yejima yalema wuseya yatela kuzatishewa hakutuña nachu chikuhwelelu chakola. (Masamu  19:7-11; Yishimu 2:1-6) Mukanda waChatañishaña Bayibolu wunakukuleja chiwatela kuzatisha Nsona chiwahi.

10. Wunateli kulombola ñahi yitoñojoka yakadizi kuBayibolu?

¹⁰ Hampinji yakudiza, lombolaku yitoñojoka yakadizi hajinsona jidi mukapetulu kimunakuhanjekahu. Zatishaku malwihu kulonda kumukwasha kadizi kutiyishisha nsona hanashindameni yikuma yamuBayibolu nikuyizatisha yomweni. Babalaku kulonda wubuli kumuleja yuma yakwila. Ilaña, imbujolaku chakutalilahu chaYesu. Hampinji yamwihwiluwu Yesu kudi iyala welukisha Nshimbi, wakwili nindi: “Munshimbi anasoneki nawudi? Watañañamu ñahi?” Ona iyala wakwili kufuma muNsona, nawa Yesu wamukwashili kwiluka chatela kuzatishayi nshimbi yomweni. Kuhitila mukuzatisha chakutalilahu, Yesu wamukwashili cheñi iwu iyala kumona ntañishilu chiyinateli kumukuma. (Luka 10:25-37) Mukanda waChatañisha Bayibolu wukweti yakutalilahu yayivulu yiwunateli kuzatisha kulonda kumukwasha kadizi kuzatisha nshimbi jamuNsona yomwenindi.

11. Nsañu yishika hadi yimwatela kutaña hakudiza kudi kwejima?

¹¹ Mukanda waChatañishaña Bayibolu wazatisha idimi dapela nawa datiyakana hakulumbulula Izu daNzambi, neyi chalumbulwileñayi Yesu nsañu yakola mumazu apela. (Matewu 7:28, 29) Imbujolaku chakutalilahu chindi. Lumbululaku nsañu chapela, chatiyakana nawa choloka. Bayi wuhita munsañu swayi-swayuku. Ilaña, lekaku nshakaminu yakadizi niwuswa yimwekeshi kuvula kwamaparakalafu yimwatela kuhanjeka hakudiza kudi kwejima. Yesu welukili mwakumina ñovu yawatumbanji twindi nawa hayitwikileña nsañu yayivulu kubadika hayakeñeleñawu hampinji yimuku.—Yowanu 16:12.

12. Indi apendikisi yatela kuzatishewa ñahi?

¹² Mukanda waChatañishaña Bayibolu wukweti apendikisi yidi nanyitu yansañu 14. Kwesekana nakukankila kwakadizi, eyi hamu neyi ntañishi yindi watela kwiluka iyi nsañu chiyatela kuzatishewa chiwahi. Chakutalilahu, neyi chakwila nsañu yimukolela kadizi kutiyishisha hela wudi namalwihu hansañu yikwawu muloña wayuma yetiyilimu hakusambila, chatela kwikala chashikila kulombola yitoñojoka yindi kumbadi yatelela yamu apendikisi nawa mwili yadizi oyu nsañu yomwenindi. Munjila yikwawu, kukankila kwakadizi kwatela kumwekesha nawu mutañi nindi hamu oyu nsañu. Apendikisi yikweti nyitu yansañu yalema yamuNsona, yidi neyi “‘Wumi’ ‘niSpiritu’—Indawa Mazu Mwamweni Alumbulukadi?” “niKwiluka ‘Babiloni Muneni.’” Munateli kukeña kuhanjeka iyi nyitu yansañu nakadizi. Chineli mwosi malwihu muniyi nyitu yansañu yidi muapendikisi, watela kwilukisha nsañu kulonda wutuñi malwihu alumbuluka.

13. Indi kulomba kwazataña mudimwinyi hakukolesha chikuhwelelu?

¹³ Masamu 127:1 yahosha nawu, “Chiña Yehova atuña itala, neyi nehi, akutuña akukabakana tuhu.” Dichi, neyi hampinji yiwunakuloñesha kulombola kudiza kwaBayibolu, lombaku wukwashu waYehova. Kulomba kuwukulomba hakutachika nihakukumisha kudiza kwatela kumwekesha wubwambu weyi wawuwahi naYehova. Mukoleshi kadizi kulomba maana kudi Yehova akutiyishisha Izu Dindi niñovu yakuzatisha kufumba kwadu. (Yakoba 1:5) Neyi wukwilaña mwenimu, kadizi wukwikala wakoleshewa kumika kweseka nawa wukutwalekahu kwikala wakola muchikuhwelelu.

Kwashenu Atudizi aBayibolu Kwikala Antañishi

14. Wuya hambidinyi watela kwilishawu atudizi aBayibolu?

¹⁴ Hakwila nawu atudizi etu aBayibolu ovwahili “yuma yejima” yalejeliyi Yesu atumbanji twindi, atela kuya hambidi kufuma hakwikala atudizi Ezu daNzambi nakwikala antañishi ezu. (Matewu 28:19, 20; Yililu 1:6-8) Chumanyi chiwatela kwila hakumukwasha kadizi kulonda yatwalekuhu kuya hambidi lwakuspiritu?

15. Muloñadi chiwatelela kumukolesha kadizi weyi waBayibolu kuwanika kukupompa kwawiniKristu?

¹⁵ Kufuma tuhu hakudiza katachi, muleji kadizi kuwanika kukupompa kwachipompelu hamu naneyi. Mulumbulwili neyi kukupompa dikwatela kudizilayi hamu neyi ntañishi Wezu daNzambi. Chimwahita nyilungu yashikila, hakukumisha kudiza kwaBayibolu kudi kwejima ikalenuku nakapinji kantesha kakulumbulula progiramu yanshimbi yakuspiritu  yiwatambwilaña kukupompa kwashiyashana nikupompa kwamaneni. Hoshaku namuzañalu hankisu yiwatambwilaña haniku kupompa. (Aheberu 10:24, 25) Neyi kadizi yatachika kupompa mpinji yejima, watela kwikala ntañishi Wezu daNzambi.

16, 17. Yikonkwanyi yimu yidihi yatela kwimikayi kadizi waBayibolu nikuyishikija?

¹⁶ Mukwashi kadizi waBayibolu kwimika yikonkwanyi yatela kushikijayi. Chakutalilahu, mukoleshi kulejaku ibwambu hela ntaña yindi yuma yinakudizayi. Cheñi nawa, mulejenu nenu watela kwimika chikonkwanyi chakutaña Bayibolu yejima. Neyi wumukwasha kwikala nachaaku chakutañaña Bayibolu mpinji yejima, ichi chaaku chikamuhetesha kumbidi neyi napapatishewi dehi. Kubombelahu, indi neyi wumuleja kadizi kwimika chikonkwanyi chakwanukaña nsona yimu yamuBayibolu yakulaña lwihu lwalema lwamukapetulu kadi kejima mumukanda waChatañishaña Bayibolu? Kuhitila mukwila mwenimu, wukekala “mukwakukalakala wakadi hakutiyila nsonyi, nakulumbulula mazu ansañu yalala mwayawu mwayawu.”—2 Timotewu 2:15.

¹⁷ Chatela kumutañisha kadizi kuhosha jinsona jinaloñeshiyi kumutu hela kujihosha munjila yacheñi, mukoleshi kulumbulula chazatikaña mavasi amuBayibolu hansañu yinakuhoshewa hampinji yinakwakulayi antu anamwihuli hamuloña wachikuhwelelu chindi. Kuhituluka mujimbadi mukwihihisha kunatela kumukwasha, eyi wukwikala neyi ntaña hela muntu wazatañayi nindi wunamwihuli kulonda alumbululi yuma yetiyayi. Neyi kadizi neteji, muleji chakwakula ‘nakudizoza nikalemesha chikupu.’—1 Petulu 3:15.

18. Neyi kadizi waBayibolu nashikuhu dehi kwikala mukwakushimwina wabula kupapatishewa, wukwashinyi wukwawu wuwatela kumukwasha?

¹⁸ Mukuhita kwampinji, kadizi watela kushikahu kuzata mumudimu wakushimwina. Konkomwenaku neyi kwitejawa kudibomba muniwu mudimu hikukooleka kwakweni. (2 Akorinda 4:1, 7) Neyi chakwila aeluda anamoni nawu kadizi nashikuhu kwikala mukwakushimwina wabula kupapatishewa, mukwashi kuloñesha chimwenu chapela nawa yenu nindi hamu mumudimu wakushimwina. Twalekenuhu kuzata nindi mpinji yejima mumbadi jashiyashana jamudimu wakushimwina nawa mudizishi chakuloñesha nichakwilisha kufuntilaku kwakuwahi. Chakutalilahu cheyi chachiwahi chikumukwasha chikupu.—Luka 6:40.

“Damwini Eyi Aweni niAntu Akukutiya”

19, 20. Chikonkwanyi chamuchidinyi chitwatela kwikala nachu, nawa muloñadi?

¹⁹ Chakubula kujina, wekala himudimu wakola wakukwasha muntu kulonda yeluki “nsañu yalala chikupu.” (1 Timotewu 2:4) Hela chochu, kwosi muzañalu weneni muchihandilu watela kwesekana nakuwaha kwekala mukukwasha muntu kwovwahila chuma chatañishaña Bayibolu. (1 Atesalonika 2:19, 20) Eña, okukooleka kutukweti kwakwikala ‘akwakukalakala hamu naNzambi’ muniwu mudimu wakutañisha mukaayi kejima!—1 Akorinda 3:9.

²⁰ Kuhitila mudi Yesu Kristu niañelu añovu, Yehova keña aleti wunsompeshi katataka hadi “antu abula kwiluka Nzambi, nihadi antu abula kwovwahila nsañu yaMwanta wetu Yesu yayiwahi.” (2 Atesalonika 1:6-8) Mawumi adi muwubanji. Komana wunateli kwilisha chikonkwanyi chakulombola kudiza kwaBayibolu kwahetala hela kumu mumukanda waChumanyi Chacheni Chatañishaña Bayibolu? Hampinji yiwunakuzata iwu mudimu, wukweti kukooleka ‘kwakudamwina eyi aweni niantu akukutiya.’ (1 Timotewu 4:16) Ayinu diyi mpinji yitwatela kunyakala kukwasha antu amakwawu kwovwahila chuma chatañishaña Bayibolu kubadika chichadiña kunyima.

[Tumazu twaheshina]

Yumanyi Yimunadizi?

• Mukanda waChatañishaña Bayibolu awituñila nkeñelwinyi?

• Munateli kutachika ñahi kudiza kwaBayibolu kuzatisha mukanda waChatañishaña Bayibolu?

• Jinjilanyi jakudizishilamu jazatikaña chiwahi?

• Munateli kumukwasha ñahi kadizi kwikala ntañishi Wezu daNzambi?

[Malwihu aKuzatisha haKudiza]

[Mwevulu wudi hefu 11]

Komana wunakuzatisha iwu mukanda chiwahi?