Muloñadi Chitwatelela Kuhosha Walala?

HAMPINJI yadiñayi nayaaka 18, Manfred wadiña nakuzata mudimu wakudiza kuzata mukasanji. * Hakampani hazatileñayi amuloñesheleli kuyaña nakuwanewa kukudiza kukwawu hamu nawatudizi amakwawu mafuku ayedi mumulungu wudi wejima. Ifuku dimu akashikola ayilejeli kuya swayi kwesekeja nandandanda yawu. Kwesekeja nanshimbi jahakampani, atudizi ateleleli kufunta nakuzata hampinji yejima yashaliluku. Chatela ayi nakuzata, adiyilili wejima wawu nakuhema, kufumishaku hohu Manfred wafuntili kumudimu. Kukasumuka, mukulumpi wamudimu watalaña atudizi waditulili. Chamumweniyi Manfred, wamwihwili nindi: “Muloñadi lelu chiwunabulili kwikala mushikola? Nawa indi atudizi amakwawu adi kudihi?” Indi Manfred watela kwakula nindidi?

Chuma chakala chinamumwekeni Manfred hichakutalilahu chachiwahi. Komana watela kushimuna walala, hela hanateli kushimuna walalaku kulonda kuhoshelaku akwawu akashikola? Kushimuna wunsahu walala chikuletesha amakwawu kwikala mukukala nikumuhela kudi akwawu. Komana chachiwahi kushimuna mwakutwamba hampinji yamuchidiwu? Indeyi wadi kwila ñahi? Tukuhosha cheñi hadi Manfred, ilaña lekenu ntahi tutali hachuma chabombelamu neyi anatutambiki kufuukulahu kuhosha chalala hela nehi.

Walala niMakasu —Hiyuma Yeneni Yadilwishaña

Kufuma tuhu hatachikili nsañu yanyaka yamuchidi wamuntu, yuma yejima yashindameneni hawalala. Hikwadiñahu kuhimpa nsañuku, kwadiña kwosi kudila hamutu hela kuluwañesha walala. Yehova, Nleñi , “hiNzambi wansañu yalala.” Izu dindi hiwalala; hanateli kutwambaku, nawa wahishaña kutwamba niakwakutwamba.—Masamu 31:5; Yowanu 17:17; Titusa 1:2.

Neyi chidi chenichi, hanu dinu makasu atachikili ñahi? Yesu Kristu waheni ñakwilu yatiyakana hampinji yalejeliyi akwakukañesha amunsakililu, akeñeleña kumujaha nindi: ‘Enu tata yenu Diyabolu; mwakeñaña kwila mwafwilañayi tata yenu. Yena wadiña mbanji kufumisha kutachi; yena hemanaña munsañu yalalaku, muloña himwekala nsañu yalala mudi yenaku. Chahoshañayi yakutwamba wahosha yindi yomweni; yena hintwambi, hitata yachu.’ (Yowanu 8:44) Mwalala, Yesu wakunjikileña kuyuma yamwekeni mwitempa daEdeni hampinji yakojejeliyi Satana antu ayedi atachi kudikaña naNzambi nikwikala akwanshidi nikumona yihuñu yakufwa.—Kutachika 3:1-5; Aroma 5:12.

Mazu aYesu amulumbulula Satana chikupu neyi ‘hitata yantwambi,’ diyi ntachiki yakutwamba nimakasu. Satana watwalekahu kwikala mwanta  weswejeshaña makasu, kafwampi, ‘nakudimba antu ampata yamunu mwishina ejima.’ Wudi namuloña weneni hakutama kunakoñewi kudi antu makonu hamuloña wakutwamba kunawanishiyi.—Chimwekeshu 12:9.

Ndombu yeneni yekala hakachi kawalala nimakasu, yatachikiluwu kudi Satana Diyabolu, yichidi kutwalekahu nañovu nimakonu. Yawanina muchidi wawantu wejima nawa yakuma muntu wudi wejima. Nshakaminu yamuntu yelukishaña kukabadi kwekalayi walala hela makasu. Owu ekala kukabadi kaNzambi ashindamesha njila jawu jawumi hachalala Chezu daNzambi, Bayibolu. Wejima wabulaña kulondeja njila yalala waholokelaña mumakasa aSatana chakwiluka hela chakubula kwiluka muloña “mpata yamunu mwishina yashakamaña mudi owu watama.”—1 Yowanu 5:19; Matewu 7:13, 14.

Muloñadi Chikwekalila Chaaku chaKutwamba?

Chalala chakwila nawu “mpata yamunu mwishina” yidi muñovu yaSatana chatulejaña muloña waweni watwambilañawu antu amavulu. Ilaña tunateli kudihula netu, ‘Muloñadi Satana, ‘tata yantwambi,’ chelilañayi ichi?’ Satana welukili nindi Yehova diyi Mwanta walala wayuma yejima Yaleñeliyi, kubombelahu niantu ayedi atachi. Hela chochu, Satana wakeñeleña ichi chifulu cheneni nawa chadimena chabulili kumutelela. Hamuloña walwisu niyitoñojoka yakudikeña, wakeñeli kutambula chifulu chaYehova. Hakwila nawu yatweshi kwila mwenimu, Satana wazatishili kutwamba nimakasu.—1 Timotewu 3:6.

Indi makonu chidi ñahi? Komana hiwuneteji neyi lwisu niyitoñojoka yakudikeña yinasweji nankashi diyi yaleteshaña antu amavulu kutwambaku? Lwisu lwakulanda nakulandulula, nsañu yamatuña nachiyulu yamajika kanwa, ninsakililu yakutwamba yinenzali namakasu, wunsahu wakutwamba, kudila hamutu, niwupwapoki. Muloñadi? Komana himuloña wakwila antu kakavulu anayisañumuni nalwisu niyitoñojoka yakukeña kuyilaku hambidi hela kwikala namaheta, niñovu, hela chifulu chinabuli kuyitelelaku? Nyuli wamaana, Mwanta Solomoni wamuIsarela wakushankulu, wasoñamishili nindi: “Ilaña muntu wadihindaña nindi ekali mukwakuheta, hakabula kubabeshewaku.” (Yishimu 28:20) Nawa kapostolu Pawulu wasonekeli nindi: “Kufwila mali diwu muji wayuma yatama yejima.” (1 Timotewu 6:10) Chochimu nakufwila chikupu kwikala nañovu hela chifulu.

Chikuma chikwawu chaleñelaña kutwamba hiwoma—kutiya woma wayuma yafumaña muchuma chinamwekani hela chinateli kutoñojokawu amakwawu neyi walala wunashimunewi. Chekala chakusemuka nachu hohu chakwila nawu antu akeñaña kuyikeña hela kuyiluka kudi amakwawu. Hela chochu, nkeñelu yamuchidiwu yinateli kuyileñela kuluwañesha walala, hela tuhu hakachuma kantesha, kulonda kujikilila kukala kunateli kumwekana, kusweka wunsahu walumbuluka hela kumwekesha nawu wudi nayililu yayiwahi. Solomoni wasonekeli chachiwahi nindi: “Kutiya antu woma chaletaña muhetu; ilaña muntu wakuhwelelaña Yehova wakashakama hamwena zo-o.”—Yishimu 29:25.

Kwikala Ashinshika Kudi Nzambi waChalala

Indi Manfred wahosheli nindidi chamwihwiluwu kudi mukulumpi wahakampani kulumbulula? Manfred washimwini walala. Wahosheli nindi: “Ntañishi watwileja kuya swayi lelu, dichi ami nenza nakuzata. Hakwila awa amakwawu hinateli kuyihoshelakuku. Hekwawu munateli kuyihula awenawu hamuntu hamuntu.”

Manfred wateleleli kwakula mukubabala, nawa chakuluwañesha, kulonda kumukeña kudi atudizi amakwawu. Ilaña wadiña nayikuma yayiwahi yakushindamena kuchalala nakashinshi. Manfred hiwumu wawaYinsahu jaYehova. Kashinshi kindi kamuleñeleli kuhemba chinleji chindi chitooka. Nawa cheñi chamuleñeleleli kumukuhwelela kudi amwiñija mudimu. Kukabadi kakudiza kwindi, Manfred amutwalili kudipatimenti yatuñañawu yingelingeli namalola awuseya, kuyabulileña kwitejawu nankashi atudizi kuzatilaku. Hanyima yayaaka 15 hampinji yamwinkeluwu Manfred chifulu cheneni hakampani, mukulumpi wanyidimu yowumu wamutemesheleli nshiña nakumuhameka nikumuleja hachuma chamwekeni hakushimuna walala.

Chineli Yehova hiNzambi wachalala, wejima wukukeña kwikala nawubwambu waweni nayena watela ‘kuleka kutwamba’ nawa watela ‘kuhosha nsañu  yalala.’ Kambuña Nzambi watela kukeña walala. Iyala wamaana wasonekeli nindi, “Chinsahu washinshika hatwambañaku.” Hanu dinu, kutwamba hichumanyi?—Aefwesesa 4:25; Yishimu 14:5.

Komana Kutwamba Hichumanyi?

Kutwamba kwejima hinsañu yabula kwikala yalala, ilaña bayi neyi nsañu yejima yabula kwikala yalala hikutwambaku. Muloñadi? Dikishonari yalumbulula izu dakutwamba hamu neyi “kushimuna yuma yinelukewi hela yinakuhweleli nhoshi nindi hiyalalaku nayitoñojoka yakukeña kutwamba.” Mwalala, kutwamba kwabombelamu yitoñojoka yakukeña kudimba muntu. Muniyi njila, kuhosha nsañu yabula kwikala yalala chakubula kwiluka—chidi neyi kuleja muntu wunsahu wunabuli kulumbuluka chiwahi hela jinambala jaluwankana—hichinesekani nakushimuna mwakutwambaku.

Cheñi nawa, twatela kwiluka neyi chakwila muntu wunakwihula nsañu watelela kumuleja wunsahu wejima. Chakutalilahu, neyi chakwila Manfred amwihwili malwihu wowamu kudi mukulumpi wahakampani kacheñi. Komana Manfred wateleleli kushimuna wunsahu wejima? Hidimuku. Chineli ona mukulumpi hadiña nañovu hansañu yamuchidiwuku, Manfred hadi kwikala nañovu yakuyilumbululaku. Mwalala, hela tuhu muniyi njila, chadi kwikala chaluwa kushimuna nsañu yakutwamba.

Chakutalilahwinyi chemikiliyi Yesu Kristu kutalisha hakutwamba? Hampinji yimu, Yesu wahosheleña nawantu abulili kwikala atumbanji twindi ilaña amwekesheli mpwila yakwiluka ñendelu yindi. Amulejeli nawu “Fumaku kunu yaña kweyi muYudeya.” Indi Yesu wayakwili nindidi? “Enu kwenu yenuña kuchawija [muYerusalema], ami kwami kukanduka kuchawija kanda, muloña mpinji yami kanda yishiki chikupu.” Hashimbwili hohu chantesha, Yesu wayili kuchawija kuYerusalema. Muloñadi chakwililiyi muyina njila? Muloña hiyateleleli kwiluka nsañu yejima yanshakaminu yinduku. Yesu hahosheli wunsahu wamakasuku, hayilejeli wunsahu wejimaku kulonda kukañeshaku wubanji wateleli kumukoñawu yena niatumbanji twindi. Iku hikwadiña kutwambaku, kapostolu Petulu wasonekeli kutalisha hadi Kristu nindi: “Yena havulumwinuku; mukanwa kindi himwadiñi makasuku.”—Yowanu 7:1-13; 1 Petulu 2:22.

Indi Petulu yomweni? Hawufuku wamukwatiluwu Yesu, komana Petulu hatwambili mapampa kasatu nakudikala nindi hamwiluka Yesuku? Eña, Petulu watiyili antu woma nawa watwambili. Ilaña mukunyakashana ‘wedikili nakudila nankashi’ nawa wabalumukili mumuchima, nawa amwanakeneni nshidi yindi. Cheñi nawa, wadizilili kuchiluwa chindi. Mafuku alondeleluhu, wahosheleña hatooka kutalisha hadi Yesu nikukaana chikupu kuleka hampinji yamulekesheluwu kudi akulumpi awaYudeya amuYerusalema. Chakubula nikujonoka chiluwa chaPetulu chakapinji kantesha nikufutumuka mukunyakashana chinateli kwikala chakutukolesha wejima wetu, tunateli kuzeya mumpinji yakukala nakuhosha yamukunkulwayi mumazu hela munzatilu.—Matewu 26:69-75; Yililu 4:18-20; 5:27-32; Yakoba 3:2.

Walala Wakekalaku Haya Nyaka

Yishimu 12:19 yalumbulula nawu, “Nyivumbu yahoshaña yalala yakakola ngu haya nyaka; ilaña idimi dakutwamba hidaheta mpinjuku.” Dimu, nhoshelu yalala yindi nachinjikijilu chahaya nyaka. Wubwambu wawantu wakolaña nawa wazañaleshaña neyi antu aditeja kuhoshaña walala nikuzata kwesekeja nawalala. Chakubula nikujonoka, walala waletaña nkisu yakatataka. Ichi chinabombelumu, kwikala nachinleji chitooka, ijina dadiwahi, wubwambu wakola mumaluwi, muchisaka, kudi amabwambu, nimukulanda nakulandulula.

Munjila yikwawu, kutwamba kwasolokaña mukuhita kwampinji. Idimi dahoshaña yakutwamba dinateli kutwamba hakapinji kantesha, ilaña makasu hiyakatwalekahu hampinji yayilehuku. Kubombelahu, Yehova Nzambi wansañu yalala, naloñeshi mpinji yashikila yakumanisha makasu ninowu anakuvulisha kutwamba. Bayibolu yakana nawu Yehova wakafumishahu kuluwañesha kwaSatana Diyabolu, tata yantwambi, wunakudimba antu ejima heseki. Katataka Yehova keña yafumishuhu kutwamba niakwakutwamba ejima.—Chimwekeshu 21:8.

Kwenoku kukundeja kwakekalaku kumakumishilu chikela “nyivumbu yahoshaña yalala” akayikolesha ngu haya nyaka!

[Tumazu twaheshina]

[Mazu ekoku adi hefu 4]

Lwisu niyitoñojoka yakudikeña diyi yaleteshaña antu amavulu kutwamba

[Mazu ekoku adi hefu 5]

Kutwamba kwejima hinsañu yabula kwikala yalala, ilaña bayi neyi nsañu yejima yabula kwikala yalala hikutwambaku