Yehova Hinzambi Wahamekaña

‘Nzambi waloña, hakavulamena mudimu wenu hela kukeña kumwakeñeli ijina dinduku.’—AHEBERU 6:10.

1. Munjilanyi mwamwekesheleliyi Yehova kuhameka kudi Luti w akuMowabi?

 YEHOVA wahamekaña chikupu ñovu jawantu akeñeshaña kwila nkeñelu yindi, nawa wayikiswilaña nankashi. (Aheberu 11:6) Bowazi washinshika welukili iyi yililu yabadika yawuntu waNzambi, dichi wamulejeli Luti wakuMowabi wahembeleña muku windi wamumbanda wadiñi ntuluwa nindi: “Yehova akufweti namudimu weyi, akwinki niwuloku weyi walala kudi Yehova.” (Luti 2:12) Komana Luti amukiswilili kudi Nzambi? Eña! Kafwampi, nsañu yindi ayisoneka muBayibolu! Kubombelahu wasumbukili naBowazi nawa wekalili nkakulula yaMwanta Davidi niYesu Kristu. (Luti 4:13, 17; Matewu 1:5, 6, 16) Ichi hichakutalilahu chimu hayakutalilahu yayivulu yamuBayibolu chinakumwekesha chahamekañayi Yehova ambuñindi.

2, 3. (a) Chumanyi chaleteshaña kuhameka kwaYehova kwikala kwadimena? (b) Muloñadi Yehova chatweshelañayi kumwekesha kuhameka kwalala? Lumbululenu.

² Yehova wadi kuchimona neyi hichuma chaheña neyi chakwila hahamekeluku. Aheberu 6:10 yahosha nawu: “Muloña Nzambi waloña, hakavulamena mudimu wenu hela kukeña kumwakeñeli ijina dinduku, nanochu chimwakalakeleli akwakujila, nihanu muchidi kuyikalakela.” Chuma chinaleñeli iyi nhoshelu kwikala yadimena chidi chakwila nawu Nzambi wahamekaña antu adihanaña hela chakwila hiyakwakuputola nawa akañanyaña kushika mwashikila kulema kwindi.—Aroma 3:23.

³ Hamuloña wakubula kumaninina, tunateli kuditiya neyi nyidimu yetu yakumwakama Nzambi hiyalemaku nawa hitwatelela nikutambula nkisu yaNzambuku. Hakwila Yehova welukisha yitoñojoka yetu nikukala kwetu, nawa walemesha mudimu wetu wutwazataña namuchima wejima. (Matewu 22:37) Twili netu: Mama yawantu nawani chawaana—wusaña wawuseya wantesha hamesa. Nateli kumona ichi chawaana neyi chikweti wuseya wantesha nakuchidiwula. Hela chochu, mukanda wudi hamu nachawaana wunakumwekesha nawu china chawaana chinafumi kudi mwanindi wamumbanda wakansi, wazatisha mali indi ejima ahembeliyi nakuchilanda. Ichi dinu mama yawantu wukuchimwena chawaana munjila yacheñi. Hekwawu wukumukumbata mwanindi nakumwekesha kuhameka chikupu iku nakudila.

4, 5. Indi Yesu wamwimbujoleli ñahi Yehova hakumwekesha kuhameka?

⁴ Hamuloña wakwila weluka yitoñojoka yetu nimwakumina ñovu jetu, Yehova wahamekaña neyi chakwila tumwinka namuchima wumu hela chakwila  yantesha hela yayivulu. Muniyi njila, Yesu wadiña chakutalilahu chachiwahi chakumwekesha yililu yaTata yindi. Anukenu nsañu yamuBayibolu yanfwila wahanini tumali twanyanya. “[Yesu] hakubanduka, hakumona akwakuheta adi nakuumbila nyilambu yawu muchikasha chakuswekela mali. Hakumona mumbanda wanfwila kazweñi wumu, hakuumbilamu tumali twanyanya tuyedi. Hakwila nindi, Nukuyileja chalala nami, mumbandiwu wanfwila kazweñi, nombilumu nabadiki akwawu ejima. Muloña awa ejima anombilumu nyilambu yakumahetawu amavulu; ilaña yeniwu mumbanda nombilumu yawuzweñi windi, yejima yadiñi yakudikwasha nachu.”—Luka 21:1-4.

⁵ Eña, hakwiluka nshakaminu yaniwu mumbanda—nindi wadiña nfwila nawa kazweñi, Yesu welukili kulema kwachawaana chindi, nawa wachilemesheli. Chochimu niYehova wahamekaña. (Yowanu 14:9) Komana hichuma chakukundeja hakwiluka nawu hichikweti muloña nakukala kwenu, munateli kuwana wuselewa kumensu aNzambi yetu wahamekaña niMwaninduku?

Yehova Namwinki Wuloku kaEtiyopiya waMwakamaña Nzambi

6, 7. Muloñadi nawa munjilanyi mwamwekesheleliyi Yehova kuhameka kwindi kudi Ebedi Meleki?

⁶ Kakavulu Nsona jamwekeshaña nawu Yehova wayinkaña wuloku antu elaña nkeñelu yindi. Talenu chazatiliyi naEbedi Meleki kaEtiyopiya wamwakamaña Nzambi, ibwambu daYeremiya nawa ñamba wamwitala daMwanta Zedekiya wamuYuda wabula kushinshika. Ebedi Meleki welukili nindi atulamba amuYuda amutwambilili Yeremiya nawu nakudikaña nanfulumendi nawa amunatilili muwina, kulonda yafwilumu nanzala. (Yeremiya 38:1-7) Hakwiluka nawu Yeremiya amuheleli chikupu hamuloña wansañu yashimwineñayi, Ebedi Meleki washili wumi windi muwubanji nakuya kudi mwanta. KaEtiyopiya wahosheli chakubula woma nindi: “Eyi nkaka yami mwanta, antu awa mwejima mwanamukoñuwu kaprofwetu Yeremiya ananatiluwu muwina, anakoñi chatama. Mwenomu mwadiyi keña yafwilumu nanzala.” Neyi  chahosheliyi mwanta, Ebedi Meleki wasendeli amayala 30 nakuya nakumupulwisha kaprofwetu waNzambi.—Yeremiya 38:8-13.

⁷ Yehova wamweni neyi Ebedi Meleki wadiña nachikuhwelelu chamukwashiluku kushinda woma wateleli kutiyayi. Dichi Yehova wamuhamekeli Ebedi Meleki nakumuleja kuhitila mudi Yeremiya nindi: “Tiya, nakashikija mazu ami hamukaliwu kulonda henzi yatama, bayi yayiwahuku . . . Hakwila eyi nakakupulwisha hefuku odu. Hiyakakuhana kudi antu iwunatiyi womaku. Muloña ami chalala nakakwamwina . . . ; wumi weyi wukekala neyi chuma chakupupa kunjita, nanochu chiwunankuhweleli.” (Yeremiya 39:16-18) Mwalala, Yehova wamupulwishili Ebedi Meleki niYeremiya kudi atulamba atama amuYuda nawa mukuhita kwampinji nikudi eniBabiloni akisañeni Yerusalema. Masamu 97:10 ahoshaña nawu, “[Yehova] wahembaña chiwahi wumi wawantu indi ajila; wayipulwishaña kudi atama.”

“Tata Yeyi Wamonaña Kumbadi Wakakwinka Wufwetu Weyi”

8, 9. Neyi chachimwekesheliyi Yesu, kulomba kwamuchidinyi kwahamekañayi Yehova?

⁸ Wunsahu wukwawu wamwekeshaña nawu Yehova wahamekaña nikulemesha nhoshelu yetu yakumwakama Nzambi wunateli kumwekena hachahosha Bayibolu kutalisha hakulomba. Muntu wamaana wahosheli nindi, “[Nzambi] watiyaña kuwaha nakulomba kwalombañawu akwakwoloka.” (Yishimu 15:8) Mumafuku aYesu akulumpi jansakililu amavulu alombeleña hatooka, bayi nachikuhwelelu chalalaku, ilaña nankeñelu yakuzañalesha antu. Yesu wahosheli nindi, “Anatambuli dehi wufwetu wawu.” Walejeli atumbanji twindi nindi, “Ilaña eyi chiwukulomba, iñilaku mwitala deyi damukachi, wenzeluku, wulombi kudi Tata yeyi wudi kumbadi, niTata yeyi wamonaña kumbadi wukakwinka wufwetu weyi.”—Matewu 6:5, 6.

⁹ Ilaña Yesu hatanyishili kulomba kwahatookaku, muloña niyena walombeleña hatooka hampinji jikwawu. (Luka 9:16) Yehova wahamekaña chikupu neyi tumulombaña namuchima wakashinshi chakubula yitoñojoka yakuzañalesha amakwawu. Chalala, kulomba kwetu kwakumbadi hichinjikijilu chakumukeña Nzambi nikumukuhwelela. Hichakuhayamisha hakwila nawu Yesu kakavulu wakeñeleña iluña dakankawindi kulonda kulombelakuku. Hampinji yimu welili mwenimu, “hankunku yakucha.” Hampinji yikwawu, ‘wakandukili hampidi kwakadi antu, nakulomba.’ Nawa henohu kanda yatondi apostolu indi 12, Yesu wachiishili wufuku wejima nkawindi nakulomba.—Maku 1:35; Matewu 14:23; Luka 6:12, 13.

10. Neyi kulomba kwetu kumwekesha kashinshi ninkeñelu yakukeña kumuzañalesha Nzambi, chumanyi chitwatela kukuhwelela?

¹⁰ Shinshikenu Yehova chatiyilileñayi chikupu kukulomba kwaMwanindi kwakufuma kumuchima! Mwalala hampinji jikwawu Yesu walombeli “[na]kudila kwakweni nimadilu; amutiyili nanochu chadiña nawoma wakwakama Nzambi.” (Aheberu 5:7; Luka 22:41-44) Neyi kulomba kwetu kumwekesha kashinshi kamuchidiwu niyitoñojoka yakunama, tunateli kukuhwelela netu Tata yetu wamwiwulu watiyaña chikupu nakuhameka. Eña, “Yehova wudi kwakwihi nawantu ejima . . . akumutambika chalala chakubula kutwamba.”—Masamu 145:18.

11. Indi Yehova watiyaña ñahi hayuma yitwelaña kumbadi?

¹¹ Neyi chakwila Yehova wahamekaña neyi tulomba kudi yena kumbadi, watela cheñi kuhameka chikupu neyi tumwovwahila kumbadi! Eñañi, Yehova weluka yuma yitwelaña kumbadi. (1 Petulu 3:12) Dichi neyi twikala ashinshika nikwovwahila hampinji yitudi kwakankawetu, hichinjikijilu chachiwahi chakwila nawu tukweti “muchima walala chikupu” kumensu aYehova, muntu wukweti yitoñojoka yayiwahi nawa wakufwila kwila chuma chaloña. (1 Kushindulula 28:9) Yililu yamuchidiwu yazañaleshaña muchima waYehova.—Yishimu 27:11; 1 Yowanu 3:22.

12, 13. Munjilanyi mutunateli kuhembela yitoñojoka yetu nimuchima nakwikala neyi kambanji washinshika Nataneli?

¹² Chafumañamu, eniKristu ashinshika adikiñaña kunshidi yakujinda yinateli  kutamisha yitoñojoka nimuchima, yakufwana neyi kutala nyivwimbimbi yanzekesi nikutala madombu. Hela chakwila nshidi yikwawu yinateli kujindewa kudi antu, tweluka netu “yuma yejima yidi nzekesi, yidi hatooka kumesu ayena itwamba kadimona nindi.” (Aheberu 4:13; Luka 8:17) Kuhitila mukufwila kuleka yuma yamuhilishaña Yehova, tukweti chinleji chitooka nikwikala amuzañalu hakwiluka netu tukweti wuselewa waNzambi. Eñañi, hichakujinaku Yehova chalala wahamekaña muntu “wendaña choloka, wakoñaña mwaloña, wahoshaña nsañu yalala mumuchima windi.”—Masamu 15:1, 2.

¹³ Hanu dinu, tunateli kuhemba ñahi yitoñojoka yetu nimuchima mwituña munenzali kutama? (Yishimu 4:23; Aefwesesa 2:2) Kubombela hayuma yejima yatwinkañayi Yehova kulonda kukolesha chikuhwelelu chetu, twatela kuzata nañovu kulonda kukaana yuma yatama nakwila yayiwahi, twatela kuzata mukunyakashana kulonda kufwila kwatama kubuli kubaaba ivumu nakuvwala nshidi. (Yakoba 1:14, 15) Toñojokaku chiwunateli kuzañalala neyi chakwila Yesu yakuleja neyi chamulejeliyi Nataneli nindi: “Talenu [iyala] wakadi makasu.” (Yowanu 1:47) Nataneli yateneneñawu cheñi nawu Batolomewu, mukuhita kwampinji wadiña nakukooleka kwadimena kwakwikala wumu wawa apostolu 12 aYesu.—Maku 3:16-19.

“Kapristu Muneni waLuwi naKashinshi”

14. Indi ñakwilu yaYesu kuchuma cheliliyi Mariya yinesekani ñahi nawamakwawu?

¹⁴ Hakwikala “wamufwana chikupu [Yehova] Nzambi wakamonewaña,” mpinji yejima Yesu wadiña nakumwimbujola nankashi Tata yindi hakuhameka antu amukalakelaña Nzambi namuchima wutooka. (Akolose 1:15) Chakutalilahu, henohu kunashali mafuku atanu nakuhana wumi windi, Yesu niatumbanji twindi amakwawu adiña enyi mwitala daShimona wakuBetani. Nampinji yamelela, Mariya muhela Lazaru niMata, “hakunona literi yamalasha yimu asweja kulema wuseya” (washikila muwufwetu wachaaka chimu), hakuyiwayisha kunyendu nikumutu waYesu. (Yowanu 12:3) Amakwawu ahosheli nawu, “Nayikisañenidi chenichi?” Hela chochu, Yesu wamweni chuma chakoñeliyi Mariya munjila yacheñi chikupu. Wachimweni neyi chililu chakuhana cheneni nawa chabadika kulema kwesekeja nakufwa kwindi kwadiña hakamwihi nikujikewa. Dichi chatela kumuhoshola Mariya, Yesu wamulemesheli. Wahosheli nindi, “Mumatuña ejima amba kashimunawu iyi nsañu yayiwahi, amba katena nawa ninichi chuma chaneliyi mumbandiwu, kulonda kumwanakana nachu.”—Matewu 26:6-13.

15, 16. Twahetelañamu ñahi hakwila Yesu wahandili nikumukalakela Nzambi neyi muntu?

¹⁵ Oku kukooleka kutukweti hakwikala namuntu wahamekaña neyi Yesu hamu neyi Nyuli yetu! Kafwampi, chihandilu chaYesu hamu neyi muntu chamuloñesheli kuzata mudimu wamuhembeleliyi Yehova—wakukalakala neyi Kapristu Muneni nawa Mwanta, watachi kuchipompelu chawawayishewa kufumahu kuchawakwamatuña.—Akolose 1:13; Aheberu 7:26; Chimwekeshu 11:15.

¹⁶ Henohu Yesu kanda yenzi hamaseki, washili kashinshi kakeni kumuchidi wamuntu nawa wadiñi wayikeña chikupu. (Yishimu 8:31) Hakushakama neyi muntu, welukili chikupu chalumbuluka kukabakana nikumika kweseka kutwamonaña hakumukalakela Nzambi. Kapostolu Pawulu wasonekeli nindi, “Chamuwahilili yena kwikala neyi ana kwindi muyuma yejima, kulonda ekali kapristu muneni waluwi nakashinshi . . . Chakabiliyi yomweni nakumweseka, yena natweshi kukwasha antu akwesekawu.” Yesu watela ‘kutiya wushona nakuzeya kwetu,’ muloña ‘niyena amwesekeli nayuma yejima neyi chatwesekañawu etu, ilaña mudi yena nshidi mwosi.’—Aheberu 2:17, 18; 4:15, 16.

17, 18. (a) Indi nyikanda yitanu nayiyedi yasonekeleliyi yipompelu yakuAsia Minor yamwekeshañadi kutalisha hakuhameka kweneni kwaYesu? (b) Indi eniKristu awayishewa ayiloñesheli kwiladi?

¹⁷ Yesu welukili chikupu kweseka kwawatumbanji twindi hanyima yakwila anamusañuli  dehi. Shinshikenu hanyikanda yindi yitanu nayiyedi kuyipompelu yakuAsia Minor, hamu neyi chasonekeliyi kapostolu Yowanu. Kuchipompelu chaSimirina Yesu wahosheli nindi: “Neluki yihuñu yeyi niwuzweñi weyi.” Ahanu Yesu wahosheleña nindi, ‘Neluki chikupu kukala kweyi; Neluki chikupu yuma yiwunakuhitamu.’ Kufumahu, hamuloña wakwila wakabakeni nakushika nikukufwa, wadiñi nawushona waweni nikukana chikupu nindi: “Ikalaku washinshika nikukufwa, nakakwinka chibaaba chawumi.”—Chimwekeshu 2:8-10.

¹⁸ Nyikanda yasonekeleliyi yipompelu yitanu nayiyedi yenzala nanhoshelu yamwekesha nawu Yesu weluka chikupu kukala kwawatumbanji twindi nawa wahamekaña chikupu kutalisha hanshakaminu yawu yakashinshi. (Chimwekeshu 2:1–3:22) Ilukenu nenu antu ahosheleñayi nawu Yesu adiña eniKristu awayishewa akweti chikuhwelelu chakuyulila hamu nindi mwiwulu. Kufwana Mwanta wawu, adiña nakuyiloñesha hamudimu wawu walema wakukwasha kuyula naluwi lwalweni hakukooleka kwefutu danyiloña damulambu waKristu kumuchidi wamuntu wudi mukukala.—Chimwekeshu 5:9, 10; 22:1-5.

19, 20. Indi awa elisha ‘izaza deneni’ anakumuhameka ñahi Yehova niMwanindi?

¹⁹ Eña, kukeña kwaYesu hadi atumbanji twindi awayishewa akwihana cheñi nikudi ‘anyikoku indi acheñi’ ashinshika, hiyihita oyu yinakwilisha “izaza deneni . . . dawantu akunyunza yejima,” akapuluka “yihuñu oyu yeneni” yinakwinza. (Yowanu 10:16; Chimwekeshu 7:9, 14) Antu wenawa anakuhwila kukabadi kaYesu muloña anakuhameka ifutu danyiloña damulambu windi nichikuhwelelu chawu chakwikala nawumi wahaya nyaka. Munjilanyi muyahamekelañawu? Elaña mwenimu kuhitila ‘mukumukalakela Nzambi mudimu wajila nimwaana niwufuku.’—Chimwekeshu 7:15-17.

²⁰ Lipoti yamukaayi kejima yachaaka chamudimu cha 2006, yidi hamafu 27 nakushika ha 30, yinahani wunsahu wahatooka wakwila nawu awa akwakukalakala ashinshika mwalala anakumukalakela Yehova “nimwaana niwufuku.” Kafwampi, munichi chaaka chimu, wena hamu nezaza daweniKristu awayishewa ashalahu antesha azatili hamu maora 1,333,966,199 mumudimu wakushimwina—anesekani kubadika hayaaka 150,000!

Twalekenuhu Kuhameka!

21, 22. (a) Kutalisha hakuhameka, muloñadi eniKristu chatelelawu kushaku kashinshi chikupu makonu? (b) Chumanyi chitukadiza muchibaba chinalondeluhu?

²¹ Hakukalakala nawantu abula kumaninina, Yehova niMwanindi anakumwekesha kuhameka kweneni chikupu. Hela chochu chawushona, antu amavulu hiyatoñojokaña hadi Nzambuku, ilaña anashindameni hayuma yawu. Hakulumbulula hadi antu anakushakama ‘mumafuku akukuminina,’ Pawulu wasonekeli nindi: “Antu akekala akwakudikeña, akwakufwila mali . . . Abulaña kusakilila.” (2 Timotewu 3:1-5) Antu wenawa anambukiku chikupu naweniKristu, amwekeshaña kuhameka kudi Nzambi namuchima wawu wejima hayuma yejima yinayikoñeliyi kuhitila mukulomba kwakufuma kumuchima, nikukeña kwovwahila.—Masamu 62:8; Maku 12:30; 1 Yowanu 5:3.

²² Muchibaba chinalondeluhu, tukuhituluka muyuma yikwawu yayivulu yakuspiritu yatwinkayi Yehova hamuloña wakutwikeña. Hampinji yitunakushinshika haniyi ‘yawaana yayiwahi,’ kuhameka kwetu kwatela kuswejeluku chikupu.—Yakoba 1:17.

Munateli Kwakula Ñahi?

• Indi Yehova nadimwekeshi ñahi kwikala Nzambi wahamekaña?

• Neyi tudi kwakankawetu, tunateli kuzañalesha ñahi muchima waYehova?

• Munjilanyi mwamwekesheleliyi Yesu kuhameka?

• Chihandilu chindi hamu neyi muntu chamukwashili ñahi Yesu kwikala nyuli wukweti luwi nawa wahamekaña?

[Malwihu aKuzatisha haKudiza]

[Mwevulu wudi hefu 19]

Neyi nvwali wakeña kachuma kanyanya kamwanindi, Yehova wahamekaña neyi tumukalakela nañovu jetu jejima