Chitwatela Kwiluka Kudifukula Kwalala

NSAKILILU yayivulu yahoshaña nawu yuma yatañishañawu yafumaña kudi Nzambi. Hela chochu, twatela kusha kashinshi kumazu aYowanu kapostolu kaYesu wasonekeli nindi: ‘Enu akwetu twakeña, bayi mwitejaña mazu ejima onenewaku, chiña kuyitompa mwiluki neyi afuma kudi Nzambi, muloña atuprofwetu akutwamba amavulu anayi nakutambatamba mukachi kawantu.’ (1 Yowanu 4:1) Tunateli kweseka ñahi chuma kulonda kwiluka neyi chafuma kudi Nzambi?

Yuma yejima yafuma kudi Nzambi yamwekeshaña wuntu windi, sweje-e chililu chindi chabadika, chakukeña. Chakutalilahu, wuswa wetu wakwipula ivumba, watuleñelaña kutiya kuwaha ivumba depukaña kunyiseki (ayizatishaña hakutelekesha mafu hela neyi yihemba), depukaña kujinkenu, hela kumankendi anochuwu katataka, kwamwekeshaña kukeña kwaNzambi. Wuswa wetu wakumona kuholoka kwetañwa, ipupula, hela chimwemweta chamwana wanyanya wamwekeshaña chatwikeñayi Nzambi. Chochimu nihawuswa wetu wakutiya tumina twatuwahi, kwimba kwakajila, hela izu damuntu wutwakeña. Hela tuhu chatuleñawu neyi antu akubula kumaninina, twamwekeshaña kukeña kwaNzambi. Dichi chitwamwenaña walala wamazu aYesu akwila nawu: ‘Mukuhana mwekala muzañalu weneni kubadika wekala mukutambwila.’ (Yililu 20:35) Twatiyaña kuwaha hakumwekesha kukeña muloña atwileñeli neyi “chochekalayi Nzambi.” (Kutachika 1:27) Hela chakwila Yehova wekala nayililu yikwawu yayivulu, kukeña dichi chililu chindi chabadika nankashi.

Nyikanda yafuma kudi Nzambi yatela kumwekesha kukeña kwindi. Nsakililu yamukaayi yekala nanyikanda yayivulu yayikulu. Indi nyikanda yamuchidiwu yatweshaña ñahi kumwekesha kukeña kwaNzambi?

Chalala chidi nawu, nyikanda yayivulu yayikulu yahosha hansakililu yalumbulula chantesha kutalisha hanochu chatukeñayi Nzambi hela chitwatela kumukeña. Dichi, yihita yawantu yakañanyaña kuwana ñakwilu neyi ehula nawu, “Muloñadi chitwamwenaña wunsahu wakukeña kwaNzambi muyileñaleña henohu kukabakana nikutama kunakutwalekahu?” Munjila yikwawu, Bayibolu dimukanda wawukulu wansakililu walumbulula chiwahi kukeña kwaNzambi. Yatudizishaña cheñi chitwatela kumwekesha kukeña.

Mukanda Wahosha haKukeña

Izu daNzambi Bayibolu, damulumbulula Yehova hamu neyi ‘Nzambi wakukeña.’ (2 Akorinda 13:11) Bayibolu yalumbulula ochu kukeña chikwamuleñeleli Yehova kwinka antu atachi wumi wakubula kukata nikufwa. Ilaña kudikaña nawanta waNzambi kwaleteli makabi kumuchidi wamuntu. (Kuhituluka 32:4, 5; Aroma 5:12) Yehova wazatilihu chuma chimu kulonda kufuntisha chuma chajimbeli. Izu daNzambi dahosha nawu: “Chaswejeliyi Nzambi kukeña mpata yamunu mwishina, waheni Mwanindi wunu hohu, kulonda muntu  wukumukuhwelela aheti wumi wahaya nyaka, akabuli kunoña.” (Yowanu 3:16) Nyikanda Yajila yatwalekahu kulumbulula kukeña kwaNzambi hampinji yalumbululaña chaloñeshayi Nzambi nfulumendi yamaninina yinakuyulewa naYesu kulonda kuleta kuwunda kumuchidi wawantu wovwahila.—Danyeli 7:13, 14; 2 Petulu 3:13.

Bayibolu yahosha mukwihihisha kutalisha hayuma yatela kwilayi muntu nawu: ‘Keñaku Yehova Nzambi yeyi namuchima weyi wejima nawumi weyi wejima namaaneyi ejima. Dilu lunshimbi lwabadika lwakusambila. Kudi nawa lwamuchiyedi lwafwana neyi ilu nawu, Keñaku mukwenu neyi chiwadikeña eyi aweni. Hanshimbi iji jiyedi dihu halemena Nshimbi jejima.’ (Matewu 22:37-40) Bayibolu yadimwekeshaña kwikala yonenewa kudi Nzambi. Chineli yamwekesha chikupu wuntu windi, tunateli kwiluka chikupu netu yafuma kudi ‘Nzambi wakukeña.’—2 Timotewu 3:16.

Kuhitila mukuzatisha ilu lushimbi, tunateli kwiluka nyikanda yalala yayikulu yafuma kudi Nzambi. Akwakudifukula alala ayilukilaña cheñi hakukeña, muloña amwimbujolaña Nzambi hakumwekesha kukeña.

Chakwiluka Antu Amukeña Nzambi

Antu amukeña Nzambi chikupu anayiluki, sweje-e makonu chineli tunakushakama mumafuku ashimunawu Bayibolu nawu “mafuku akukuminina.” Antu anakuswejelaku kwikala “akwakudikeña, akwakufwila mali, . . . antu akeñaña yakuditiyisha aweni kuwaha, kukeña Nzambi nehi.”—2 Timotewu 3:1-4.

Wunateli kwiluka ñahi antu amukeña Nzambi? Bayibolu yahosha nawu: “Kumukeña Nzambi yowu kwila mwatulejañayi; mwatulejañayi himwakalaku.” (1 Yowanu 5:3) Kumukeña Nzambi kwaleñelaña antu kulemesha nshimbi jajiwahi jamuBayibolu. Chakutalilahu, Izu daNzambi dikweti nshimbi kutalisha hawuvumbi nimaluwi. Kuhumañana kweyala namumbanda akwiteja hohu mukachi kamaluwi, nawa maluwi atela kwikala ahaya nyaka. (Matewu 19:9; Aheberu 13:4) Hampinji yawanikiliyi mumbanda wamuSpain wadiza jansakililu kukupompa kwawaYinsahu jaYehova kwadizileñawu chikupu nshimbi jajiwahi jamuBayibolu, wahosheli nindi: “Kupompa kwankolesheli nankashi, bayi hakutiyishisha hohu jimpanji jamuNsonaku, ilaña kuhitila cheñi mukunuñañana kwekala hakachi kawu, chalemeshawu nshimbi yamuBayibolu niyililu yawu yayiwahi.”

Kubombela hakukeña kwamukeñawu Nzambi, eniKristu alala ayilukilaña swayi munjila muyamwekeshelañawu kukeña kudi atuñi nawu. Mudimu wawu walema nankashi wekala wakuleja antu amakwawu kuchiñeja kumu hohu kwamuchidi wamuntu, Wanta waNzambi. (Matewu 24:14) Kwosi chuma chinateli kuleta nkisu yayivulu yahaya nyaka kudi atuñi nawu kubadika kuyikwasha kumwiluka Nzambi. (Yowanu 17:3) EniKristu alala amwekeshaña cheñi kukeña kwawu munjila jikwawu. Akwashaña antu anakukabakana. Chakutalilahu, hampinji yikwaholokeli mutentanshi muItaly, chipapilu chansañu chamunodu iluña chashimwini nawu aYinsahu jaYehova “azatishili njila yayiwahi, yakukwasha antu akabakeni, chakubula kutala hansakililu yamuntu.”

Kubombela hakukeña Nzambi niatuñi nawu, eniKristu alala adikeña wumu namukwawu. Yesu wahosheli nindi: ‘Nukuyileja lushimbi lwaluha nami, Mukeñañani. Chinayikeñami, ninenu nawa keñañanenu. Neyi mukukeñañana, dihu hakayilukilawu antu ejima nawu mudi atumbanji twami.’—Yowanu 13:34, 35.

Komana kukeña kwekala hadi eniKristu alala kwekala kwambuka chikupu? Ichi dichatoñojokeleñayi mumbanda wejina daEma wazatileña mwitala damuntu wumu. Wazatilaña muLa Paz, Bolivia, mwekala kakavulu chambu chamuchidi chakwambula aheta nawatuzweñi. Wahosheli nindi: “Mpinji yatachi yinayili kukupompa kwawaYinsahu jaYehova, namweni iyala wavwalili chachiwahi nashakami nakuhanjeka namumbanda waku India. Kanda nimoneñahu dehi chuma chamuchidiwuku. Hanoyu mpinji, nelukili nami awa atela kwikala antu jaNzambi.” Chochimu, kankaña wakuBrazil wejina daMiriam wahosheli nindi: “Hinelukili chakwikala namuzañalu, hela tuhu muchisaka chamuku. Mpinji yatachi yinamweni kukeña anakukwimwekesha munzatilu yamuntu kwadiña hakachi kawaYinsahu jaYehova.”  MuUnited States, mukulumpi wachikunzulemba chachisanji chanyivwimbimbi wasonekeli nindi: “Neyi antu amavulu adiña nachikuhwelelu neyi chenu, chiña ituña hidadikwikala munjila yamuchidiwuku. Nindi nsoneki wansañu, neluka chikupu nami kuloñesha kwenu kwashindamena hakukeña nawa mwakuhwelela chikupu mudi Nleñi.”

Keñenu Kudifukula Kwalala

Kukeña hichuma chambulaña kudifukula kwalala. Yesu wafwanishili kuwana kudifukula kwalala nakuwana njila yaloña nakutonda kwendelamu. Diyi njila yimu hohu yatwalaña kuwumi wahaya nyaka. Yesu wahosheli nindi: “Iñililenu kuchisu chanyanya; muloña chisu cheneni, ninjila yabwambañana yaya kukujilumuka, mweñilaña amavulu. Muloña chisu chanyanya, ninjila yanyanya yaya kuwumi, ayimonaña antesha.” (Matewu 7:13, 14) Izaza dimu hohu daweniKristu alala diwu endaña mukunuñañana naNzambi munjila yakudifukula kwalala. Hela chochu, chalema kutonda nsakililu yiwekalamu. Neyi wunawani iyi njila nakutonda kwendelamu, wunawani njila yayiwahi yawumi muloña diyi njila yakukeña.—Aefwesesa 4:1-4.

Toñojokaku hamuzañalu yiwunateli kutiya hampinji yiwunakwendela munjila yakudifukula kwalala! Chidi neyi kwenda naNzambi. Kudi Nzambi wunateli kudiza maana nikukeña kulonda kudiluñisha muzañalu wawuwahi nawantu amakwawu. Kudi yena wunateli kudiza chekala nkeñelu yawumi, nawa wunateli kutiyishisha yikaninu yaNzambi nikwikala nakuchiñeja kwampinji yakumbidi. Hiwamba katoña hakutonda kudifukula kwalalaku.

[Mwevulu wudi hefu 3]

Hakachi kanyikanda yejima yayikulu yansakililu, Bayibolu hohu diyi yashimuna hakukeña kwaNzambi

[Nyevulu yidi hefu 5]

EniKristu alala ayiluka muloña amwekeshaña kukeña