Diluñishenu Wumi Hakumwakama Yehova

‘Mwakamenu Yehova, enu antu indi ajila, muloña amwakamaña hiyabulaña chumaku.’—MASAMU 34:9.

1, 2. (a) Njilanyi jiyedi mwamwenaña Kristendomu kumwakama Nzambi? (b) Malwihwinyi yitukushinshikahu?

 ANKOÑI amuKristendomu atañishaña nawu antu atela kumuchiina Nzambi, kakavulu elaña mwenimu kuhitila muntañishilu yabula kushindamena munsona nawu Nzambi wababeshaña akwanshidi mukesi kahelu. Ntañishilu yamuchidiwu yambuka nachuma chatañishaña Bayibolu kutalisha hadi Yehova hamu neyi Nzambi wukweti kukeña nawa wawuñaji. (Kutachika 3:19; Kuhituluka 32:4; Aroma 6:23; 1 Yowanu 4:8) Ankoñi amakwawu amuKristendomu atañishaña munjila yambukaku. Hiyahoshaña nawu twatela kumutiya Nzambi womaku. Ilaña atañishaña nawu Nzambi wetejaña antu ejima hichikweti muloña nachihandilu chawuku. Ichi nichena bayi neyi dichuma chatañishaña Bayiboluku.—Aŋalija 5:19-21.

² Kafwampi, Bayibolu yatwikoleshaña kumwakama Nzambi. (Chimwekeshu 14:7) Iyi ntañishilu yamuBayibolu yaleteshaña kwihula malwihu. Muloñadi Nzambi wakukeña chakeñeleñayi nindi tumwakameña? Indi Nzambi wakeñaña kumwakama munjilanyi? Indi kumwakama Nzambi kunateli kutuhetesha ñahi? Tukushinshika hanawa malwihu chitukutwalekahu kuhanjeka kwetu kwaMasamu 34.

Muloña Wutwatelela Kumwakama Nzambi

3. (a) Indi nshimbi yakumwakama Nzambi wayimonaña ñahi? (b) Muloñadi antu amwakamaña Yehova chekalilawu namuzañalu?

³ Yehova watelela kumutiya woma muloña hiNleñi nawa Mwanta wakuleña kwejima. (1 Petulu 2:17) Hela chochu, woma wamuchidiwu bayi neyi himutentu waweni wanzambi wawukatuku. Hiwoma wakumwakama hamuloña wanochu  chekalayi Yehova. Cheñi nawa hiwoma wakuchina kumuhilisha. Kwakama Nzambi kwamuchidiwu kwakuwahi nawa kwawahishaña nshakaminu yamuntu, bayi neyi kwaneñeshaña hela kufwisha mutentuku. Yehova ‘Nzambi wamuzañalu,’ wakeñaña yileñaleña yindi yawantu kudiluñisha wumi. (1 Timotewu 1:11) Hela chochu, hakwila mwenimu twatela kushakama kwesekeja nanshimbi yaNzambi. Ichi chinakulumbulula nawu antu amavulu atela kuhimpa chihandilu chawu. Ejima ahimpaña nshakaminu yawu amonaña walala wamazu añimbi yamasamu Davidi akwila nawu: ‘Tompenu mutiyi chawahayi Yehova; muntu wabatamaña mudi yena nakooleki. Mwakamenu Yehova, enu antu indi ajila, muloña amwakamaña hiyabulaña chumaku.’ (Masamu 34:8, 9) Ejima amwakamaña Yehova hiyabulenaña chuma chalemaku muloña akweti wulunda wawuwahi naNzambi.

4. Chikaninwinyi chakaninuwu aDavidi naYesu kutalisha hakutambwila yuma yakeñekaña kufuma kudi Yehova?

⁴ Ilukenu nenu, neyi chichadiña mumpinji yaDavidi, walemesheli antu jindi nakuyitena nindi “ajila.” Adiña ambadi yamuza wajila waNzambi. Adiña cheñi nakusha wumi wawu muwubanji hakumulondela Davidi. Hela chakwila amutemukileña Mwanta Sawulu, Davidi wakuhweleli nindi Yehova wukutwalekahu nakuyinka yuma yakeñeleñawu. Davidi wasonekeli nindi: ‘Nyenzi yanyitupa yabulaña, yatiyaña ninzala, kwinza amukeñakeñaña Yehova hiyakabula chuma chachiwahi nichimuku.’ (Masamu 34:10) Yesu wayikanini atumbanji twindi yuma yadifwanaku.—Matewu 6:33.

5. (a) Antu amuchidinyi amavulu ekalili atumbanji twaYesu? (b) Kufumbanyi kwahaniniyi Yesu kutalisha hansañu yakutiya woma?

⁵ Antu amavulu amutiyilileña Yesu adiña aYudeya abulili yuma nawa abulili kulema. Dichi Yesu “hakuyitiyila wushona, muloña akabakeni, apalañeni neyi nyikoku yakadi kabiña.” (Matewu 9:36) Komana antu wenawa abula kulema adiña nawuswa wakumulondela Yesu? Hakwila mwenimu, ateleleli kumutiya Yehova woma, bayi antuku. Yesu wahosheli nindi: ‘Bayi mutiya woma wena ajahaña mujimbaku, akuminaña mwomwenomu hohu, kutwesha kwila chuma chikwawu nehi. Nukuyilejañahu dehi yimukutiya woma; tiyenu woma yena wukweti ñovu jakwila ajaha anatila muntu muGehena; eña nukuyileja nami mutiyenu woma. Tujila twanyanya tutanu hiyatulandaña natumali tuyeduku? Hela chochu, hikwekala hela kamu kavulamenañawu kudi Nzambuku. Hela nsuki jenu jajeni ajichinda dehi jejima. Dichi bayi mutiyaña womaku, kulema kwenu kwabadika kulema kwatujila twatuvulu.’—Luka 12:4-7.

6. (a) Mazwinyi ahosheliyi Yesu akoleshaña eniKristu? (b) Muloñadi Yesu chekalilayi chakutalilahu chachiwahi hakumwekesha woma wakumwakama Nzambi?

⁶ Neyi akakumwakama Yehova ayikanjikija kudi ayilumbu jawu kuleka kumukalakela Nzambi, atela kwanuka kufumba kwaYesu kwakwila nawu: “Antu ejima akuñiteja kumesu awantu, niMwana kamuntu niyena wakayiteja kumesu awañelu jaNzambi. Muntu wukudikala kumesu awantu nindi hañilukaku niyena nawa akadikalayi kumesu awañelu jaNzambi.” (Luka 12:8, 9) Awa mazu anakoleshi eniKristu, sweje-e mumatuña mwalekeshawu kudifukula kwalala.  EniKristu amuchidiwu atwalekañahu kumuhameka Yehova mukubabala, hakupompa kwawiniKristu nihakushimwina. (Yililu 5:29) Yesu wemika chakutalilahu chachiwahi hakumwekesha “woma wakumwakama Nzambi.” (Aheberu 5:7) Kuhosha hadi Yesu, Mazu awuprofwetu ashimwineñahu dehi nawu: ‘Spiritu yaYehova yakashakama hadi yena, spiritu . . . yakutiya Yehova woma; chuma chakatiyayi kuwaha yowu kumutiya Yehova woma.’ (Isaya 11:2, 3) Dichi, Yesu washikila chikupu kutudizisha yuma yafumaña mukumutiya Nzambi woma.

7. (a) Indi eniKristu anakwiteja ñahi mutambi wadifwanaku nawuna watambikiliyi Davidi? (b) Indi anvwali atela kulondela ñahi chakutalilahu chachiwahi chaDavidi?

⁷ Ejima alondelaña chakutalilahu chaYesu nawa ovwahilaña ntañishilu yindi, anakwiteja mutambi wadifwanaku nawuna watambikiliyi Davidi nindi: ‘Inzenu, enu anyana, mutiyi kudami, niyileji kumwakama Yehova.’ (Masamu 34:11) Chadiña chashikila kudi Davidi kutambika antu jindi nindi “anyana” muloña amulemesheli hamu neyi nlomboli yawu. Davidi wakwashili antu jindi kumwakama Nzambi kulonda ekali anuñañana nakwikala nawuselewa waNzambi. Ichi hichakutalilahu chachiwahi kudi anvwali awiniKristu. Yehova wayinka ñovu kutalisha hadi anyanawu awamayala niawambanda kulonda ‘ayileleña nakuyibabesha nikuyikonkomwena mudi Yehova.’ (Aefwesesa 6:4) Anvwali akwashaña anyanawu kumutiya Yehova woma nikwikala amuzañalu mushakaminu yawu kuhitila mukuhanjeka nawu nsañu yakuspiritu mafuku ejima, nikuyilombola kudiza kwaBayibolu mpinji yejima.—Kuhituluka 6:6, 7.

Chakumwakama Nzambi Muwumi Wetu

8, 9. (a) Muloñadi nshakaminu yakumwakama Nzambi chiyawahila? (b) Chumanyi chabombelamu hakuhemba idimi detu?

⁸ Neyi chichashimunewa hakusambila, kumwakama Yehova hikwatukañeshaña kwikala amuzañaluku. Davidi wehwili nindi: ‘Muntwinyi natondi wumi, wakeña kushakama mafuku amavulu kulonda amoni yayiwahi?’ (Masamu 34:12) Chalala kumwakama Yehova dichuma chalema hakutwalekahu kuhanda nikwikala amuzañalu mushakaminu nikumona yayiwahi. Hela chochu, chaswayi kuhosha nawu, ‘Namwakamaña Nzambi.’ Ilaña hichapela kuchimwekesha nayililu yetuku. Dichi Davidi watwalekeluhu kulumbulula chitwatela kumwakama Nzambi.

⁹ ‘Hembaku idimi deyi dibuli kuhosha yatama, ninyivumbu yeyi yibuli kuhosha yakudimbana.’ (Masamu 34:13) Kapostolu Petulu amoneneni kuhosha mazu ahosheli Davidi hanichi chibalu chaMasamu 34 hanyima yakufumba eniKristu kulonda aditiyileña wushona. (1 Petulu 3:8-12) Kuhemba idimi detu kuyuma yatama chaya mukwila nawu kuleka kutandisha matuñu. Ilaña mpinji yejima tukufwilaña kuhosha mazu akukolesha neyi tunakuhosha nawantu amakwawu. Cheñi nawa, tukufwilaña kwikala ahamuka hakuhosha chalala.—Aefwesesa 4:25, 29, 31; Yakoba 5:16.

10. (a) Lumbululenu chichalumbulula kukaana yuma yatama. (b) Chumanyi chabombela mukwila yuma yayiwahi?

¹⁰ ‘Ambukaku kuyuma yatama, ilaku, chachiwahi; keñakeñaku kuwunda, wukuhañi chakuhaña.’ (Masamu 34:14) Twatondolwelaña yuma yatanyishayi Nzambi yidi neyi wuvumbi, nyevulu yanzekesi, wukombi, kupesha, madombu, kusheta nikuzatisha yitumbu yashetana. Twatondolwelaña cheñi yisela yamwekeshaña yuma yatama yamuchidiwu. (Aefwesesa 5:10-12) Ilaña twazatishaña mpinji yetu hakwila yuma yayiwahi. Chuma chasweja kuwaha chitwatela kwila hikuzata mpinji yejima mumudimu wakushimwina Wanta nikwilisha atumbanji nikukwashaku amakwawu kulonda akapuluki. (Matewu 24:14; 28:19, 20) Kwila chachiwahi chabombelamu cheñi kuloñesha nikuwanika kukupompa kwawiniKristu, kukwasha mudimu wamukaayi kejima kuhitila mukuhana mali, kwakamena Itala detu daWanta, nikwakamena eniKristu akankila yuma.

11. (a) Indi Davidi wazatishili ñahi yuma yahosheliyi kutalisha hakuwunda? (b) Chumanyi chiwatela kwila ‘hakumwekesha kuwunda’ muchipompelu?

 ¹¹ Davidi wemekili chakutalilahu chachiwahi hakumwekesha kuwunda. Davidi kachi wamujahili Sawulu kapampa kejima kayedi kamukoolekeleliyi. Kapampa kayedi kenaka, watondolweleli madombu kufumahu wahosheli nakavumbi namwanta, kufwila kuleta kuwunda. (1 Samweli 24:8-11; 26:17-20) Chumanyi chatela kuzatewa makonu neyi kudi nsañu yinakukeña kuluwañesha kuwunda kwamuchipompelu? Twatela ‘kukeñakeña kuwunda, nakukwihaña chakukwihaña.’ Dichi neyi tunamoni netu hosi kutiyañana namukwetu mukwakwitiya, twatela kwovwahila kufumba kwaYesu kwakwila nawu: ‘Sambilaku kutiyañana namana kweyi.’ Kufumahu tukutwalekahu nanyidimu yikwawu yakudifukula kwalala.—Matewu 5:23, 24; Aefwesesa 4:26.

Kwakama Nzambi Kwaletaña Nkisu Yayivulu

12, 13. (a) Nkiswinyi yatambwilañawu amwakamaña Nzambi makonu? (b) Akwakudifukula ashinshika keña adiluñishi wulokwinyi wabadika?

¹² ‘Mesu aYehova atalaña antu aloña, nimatu indi atiyililaña chakutambikawu.’ (Masamu 34:15) Nsañu yaNzambi yazatiliyi naDavidi yamwekesha nawu awa mazu alala. Makonu tukweti muzañalu chikupu nikuwunda kwakweni muloña tweluka netu Yehova nakutwihemba. Twakuhwelela netu wukutwinka yuma yitwakeñaña mpinji yejima hela tuhu hampinji yitudi nachineñi chasweja. Tweluka netu katataka akwakudifukula alala ejima keña atalañani nakulukukewa kwashimwineñahu dehi kwaGogi waMagogi ‘niifuku daYehova dakutiya woma nankashi.’ (Yoweli 2:11, 31; Ezekeli 38:14-18, 21-23) Hichikweti muloña nayuma yejima yitwamba kamona hayina mpinjuku, mazu aDavidi akashikijewa cheñi hadetu: ‘Atambikili, Yehova watiyili, wayipulwishili muyihuñu yawu yejima.’—Masamu 34:17.

¹³ Wenowu muzañalu wutukatiya hayina mpinji hakumona Yehova nakulemesha ijina dindi dabadika! Nyichima yetu yakatiya woma nankashi, nawa akwakudikaña ejima akayijilumuna. ‘Mesu aYehova adikaña mbe nawantu elaña chatama, kulonda abuli kuyanuka cheñi hanu hamaseki.’ (Masamu 34:16) Yenoyu nkisu yeneni yitwakatambwila hakupuluka nakwiñila mwituña daloña dadiha daNzambi!

Yikaninu yaYehova Yatukwashaña Kumika

14. Mazwinyi amunsona akatwikwasha kumika hela chakwila tudi nakukala?

¹⁴ Hakwila nawu tutwalekahu kumwovwahila Yehova mudinu ituña datama nawa dakala chakeñekaña kumika. Kumwakama Nzambi kwatwikwashaña nankashi kwovwahila. Hamuloña wamafuku atama yitunakushakamamu, ambuña aYehova amakwawu anakumona makabi ayileñelaña kuneña nankashi nikuyizeyesha. Hela chochu, atela kukuhwelala chikupu nawu neyi ashindamena hadi Yehova wukuyikwasha kumika. Mazu aDavidi ahanaña kukundeja kwalala: ‘Yehova wudi kwakwihi nawantu abaluka nyichima yawu mwivumu, wayamwinaña antu akweti  spiritu yachikeka puchi.’ (Masamu 34:18) Chidi chakukoleshewa muloña Davidi watwalekeluhu kuhosha nindi: ‘Yuma yakala yamonawu aloña yayivulu; ilaña yejima Yehova wayipulwishañamu.’ (Masamu 34:19) Hichikweti muloña nakukala kunateli kutwimwekenaku, Yehova wukweti ñovu jabadika jakutwipulwisha.

15, 16. (a) Kukalanyi kwelukiliyi Davidi hanyima yakusoneka Masamu 34? (b) Chikaninwinyi chinateli kutwikwasha kumika kweseka?

¹⁵ Chamanishiliyi tuhu kusoneka Masamu 34, Davidi watiyili kukala kwayimwekeneni antu amuNobi, hampinji yajahiliyi Sawulu antu hamu niatupristu amavulu. Watela waneñeli hakwiluka nindi kuhempula kwindi kuNobi dikwaletesheli kuzuwa kwaSawulu. (1 Samweli 22:13, 18-21) Chakubula nikujinooka Davidi walombeli wukwashu kudi Yehova nawa kuchiñeja kwakusañuka kwakumbidi “kwawaloña” kwamukundejeli.—Yililu 24:15.

¹⁶ Kuchiñeja kwakusañuka kwatwikoleshaña ninetu makonu. Tweluka netu chuma chejima chikwilawu ayilumbu jetu hichinateli kutwikatisha haya nyakaku. (Matewu 10:28) Davidi wamwekesheli chikuhwelelu chochimu munawa mazu: ‘Wahembaña mafwahindi ejima awaloña; nidimu dakukotokahu kwosi.’ (Masamu 34:20) Iyi vasi yashikijeweli chikupu kutalisha hadi Yesu. Hela chakwila Yesu amujahili nawukatu, kwosi niifwaha dindi ‘dakotokeli.’ (Yowanu 19:36) Munjila yikwawu, Masamu 34:20 yatwikana nawu, hichikweti muloña nakweseka kwamonañawu eniKristu awayishewa niakwawu ‘anyikoku yacheñiku,’ muloña hiyamba kayikatisha haya nyakaku. Mafwahawu hiyamba kayikotolaku, hinhoshelu yamuchifwikija.—Yowanu 10:16.

17. Kukalanyi kukayimwekena akwakubula kubalumuka munyichima ahela antu jaYehova?

¹⁷ Hakwila antu atama, hadi chambu. Keña amuni yuma yatama yatumbiliwu. ‘Yatama yakajaha antu atama; niwena akuhela aloña akatanya.’ (Masamu 34:21) Ejima atwalekañahu kukañesha antu jaNzambi akamona yuma yatama. Hakumwekana kwaYesu Kristu, “akayibabesha nakujilumuka kwahaya nyaka.”—2 Atesalonika 1:9.

18. Munjilanyi “Izaza deneni” muyanadikuliluwu, nawa chumanyi chikamonawu kumbidi?

¹⁸ Masamu aDavidi akunkulula nanawa mazu akushiika chikupu nawu: ‘Yehova wakuulaña wumi wawambuñindi; abatamaña mudi yena kwosi niwumu wakatanyaku.’ (Masamu 34:22) Kukamwihi nakumana kwayaaka yindi 40 yakuyula, Mwanta Davidi wahosheli nindi: “[Nzambi] wankuulili muyuma yakala yejima.” (1 Anyanta 1:29) Kufwana Davidi, akakumwakama Yehova adi kukamwihi nakutoñojoka hayuma yamwekeni nikuzañalala hamuloña wakuyikuula kukutama kwejima muloña wanshidi nikuyipulwisha mukweseka kwejima. Chayinu mpinji, eniKristu awayishewa amavulu atambwila dehi wuloku wawu wamwiwulu. “Izaza deneni” kufuma kunyunza yejima makonu ichi dinakudibomba naashalahu ana kwaYesu kuhitila mukumukalakela Nzambi nawa chakufumamu ekalaña nañimenu yayiwahi kumesu aYehova. Anakwila mwenimu muloña akuhwelela mashi aYesu apwekeli akweti ñovu yakukuula. Hampinji yinakwinza yaKuyula kwaKristu Kwekombakaji daYaaka, Izaza deneni dikahetela nankashi mumulambu wefutu danyiloña nikuyilisha kwikala antu awanina.—Chimwekeshu 7:9, 14, 17; 21:3-5.

19. Indi ‘amwizaza deneni’ anakufwila kwila chumanyi?

¹⁹ Muloñadi iku kukooleka kwejima chikwakekalila hadi “izaza deneni” dawakwakudifukula aNzambi? Hamuloña wakwila afwilaña kutwalekahu kumutiya Yehova woma, nikumulemesha hampinji yinakumukalakelawu. Chalala kumutiya Yehova woma kwaletesha kwikala nawumi wamuzañalu makonu nawa kwatukwashaña ‘kukwata kuwumi wowu wumi walala chikupu’—wumi wahaya nyaka mwituña daNzambi dadiha.—1 Timotewu 6:12, 18, 19; Chimwekeshu 15:3, 4.

Munakwanuka?

• Muloñadi chitwatelela kumwakama Nzambi, nawa kumwakama Nzambi kwalumbululadi?

• Indi kumwakama Nzambi kwatela kukuma ñahi yililu yetu?

• Wulokwinyi wafumaña mukumwakama Nzambi?

• Yikaninwinyi yatwikwashaña kumika?

[Malwihu aKuzatisha haKudiza]

[Mwevulu wudi hefu 29]

Akakumwakama Yehova azatishaña njila yakubabala neyi ayilekesha kudifukula

[Mwevulu wudi hefu 31]

Chuma chabadika kuwaha chitwatela kwilila antuñi netu hikuyileja nsañu yayiwahi yaWanta