Twayenu Tutuumbakeshi Ijina daYehova Hamu

‘Mulemeshenu Yehova nanami hamu, tutuumbakeshenu ijina dindi hamu.’—MASAMU 34:3.

1. Chakutalilahwinyi chachiwahi chemikiliyi Yesu hampinji yadiñayi namudimu windi hamaseki?

 HAWUFUKU waNisani 14, 33 C.E., Yesu niapostolu jindi embilili hamu kamina kakumuhameka Yehova mukapeka kahewulu muYerusalema. (Matewu 26:30) Iyi diyi yadiña mpinji yakukumishaku yakoñeliyi Yesu mwenimu nawatumbanji twindi. Hela chochu, chawahili kukunkulula nawu kupompa kweniku kuhitila mukwimba kamina kakumuhameka Yehova. Kufuma tuhu hatachikiliyi mudimu windi wakushimwina heseki nakushika nikunsa, Yesu wamuhamekeli Tata yindi nawa nikutiyakesha ijina Dindi chikupu. (Matewu 4:10; 6:9; 22:37, 38; Yowanu 12:28; 17:6) Kubombelahu, wetejeli mazu añimbi yamasamu akwakwila nawu: “Mulemeshenu Yehova nanami hamu, tutuumbakeshenu ijina dindi hamu.” (Masamu 34:3) Ichi hichakutalilahu chachiwahi chitwatela kwimbujola.

2, 3. (a) Tweluka ñahi netu Masamu 34 yikweti wuprofwetu walema? (b) Yumanyi yitukushinshika munichi chibaba nichinalondeluhu?

² Kapostolu Yowanu wamweni chuma chakuhayamisha chikupu chimwahitili maora antesha hanyima yakwimba kamina kakuhameka hamu naYesu. Wamweni Yesu niambanji  ayedi anakuyijahila hamutondu wakuyandishila. Mashidika aweniRoma akotweli nyendu yanana ambanji ayedi kulonda afwi swayi. Hela chochu, Yowanu washimwini nindi nyendu yaYesu hiyayikotweluku. Hampinji yashikiluwu amashidika hadi Yesu amuwanini wafwa dehi. Munsañu yindi yayiwahi, Yowanu walumbulwili nindi iku kwadiña hikushikijewa kwambadi yikwawu yaMasamu 34: “Hiyakakotola hoku ifwaha dindi nidimuku.”—Yowanu 19:32-36; Masamu 34:20.

³ Masamu 34 yikweti yikuma yikwawu yayiwahi yatela kudizawu eniKristu. Dichi, munichi chibaba nichinalondeluhu, tukuhituluka munshakaminu yasonekelelumu Davidi isamu nikushinshika hakukoleshewa kwawanewaña munidi isamu.

Davidi naMutemuki Sawulu

4. (a) Muloñadi Davidi chiyamuwayishiluwu hamu neyi mwanta wamuIsarela wakumbidi? (b) Muloñadi Sawulu ‘chamukeñeleliyi’ Davidi nankashi?

⁴ Hampinji yadiñayi Davidi kansi, Sawulu wadiñi mwanta muIsarela. Ilaña Sawulu wadikañili nakujimbesha wuselewa waYehova. Haniwu muloña kaprofwetu Samweli wamulejeli nindi: ‘Yehova natabuli dehi wanta waIsarela lelu kudeyi, bwe-chi! Nawinki dehi mukwenu wakubadika eyi.’ (1 Samweli 15:28) Kufumahu Yehova wamulejeli Samweli kumuwayisha Davidi, kabinda kaJesi, kwikala mwanta waIsarela wakahiñahu. Hampinji yeniyi, hakubula kwikala naspiritu yaNzambi, Mwanta Sawulu wakabakeni nayineñi. Davidi ñimbi welukisha, amuleteli kuGibeya nakumukalakela mwanta nawa tumina twaDavidi twamukundejeli Sawulu, nawa “wamukeñeli nankashi.”—1 Samweli 16:11, 13, 21, 23.

5. Muloñadi Sawulu chahimpililiyi yitoñojoka yindi kutalisha hadi Davidi, nawa Davidi amukanjikijili kwiladi?

⁵ Mukuhita kwampinji, Yehova wekalili naDavidi. Yehova wamukwashili Davidi kumushinda Goliyati wakuFwilistinu wadiña wataluka chikupu nawa wamukwashili hampinji yamulemesheluwu muIsarela hamuloña wakwilukisha jawushidika. Hela chochu, Yehova chamukiswililiyi Davidi chamuleñeleli Sawulu kutiya ichima, nawa wamuheleli David chikupu. Sawulu wamusoweli Davidi iyoña kapampa kayedi henohu nakumwimbila kadada. Kapampa kejima kayedi, Davidi watwesheli kuleya iyoña. Chesekeliyi Sawulu kamuchisatu nindi yamujahi, Davidi watoñojokeli nindi watela kutemuka kulonda kupulwisha wumi windi. Nkumininaku, hamuloña wakwila Sawulu watwalekeluhu kukeñesha kumukwata nakumujaha, Davidi wafwilili kufuma muIsarela nakuya nakukeña kwakuswama kwiluña dacheñi.—1 Samweli 18:11; 19:9, 10.

6. Muloñadi Sawulu chahaniniyi nshimbi yakujaha antu amuNobi?

⁶ Halwendu lwindi lwakuya kuñinza yaIsarela, Davidi wemeni mumusumba waNobi, mwadiña tabanaka yaYehova. Dichi, Davidi watemukili hamu nawakwenzi amukiñileña, nawa wayili nakukeña yakudya niyakunwa yawu. Sawulu welukili nindi kapristu muneni namwinki Davidi niantu jindi yakudya nimpoku yakabali yatambwiliyi Davidi kudi Goliyati wafwili. Hamuloña wakuzuwa, Sawulu wajahili antu ejima amumusumba kubombelahu niatupristu 85.—1 Samweli 21:1, 2; 22:12, 13, 18, 19; Matewu 12:3, 4.

Kupuluka Kukwawu Kukufwa

7. Muloñadi Gati chidadiña iluña datama kuswamamu Davidi?

⁷ Chafuminiyi muNobi, Davidi watemukili makilomita 40 kumujika nakuya kwiluña daFwilistinu nakukeña kwakuswama kudi Mwanta Akisha mumukala waGoliyati muGati. Hadaha Davidi watoñojokeli nindi Gati dadiña iluña dakukumishaku dakabula kumukeñekeñawu kudi Sawulu. Chakadi nikushimbula, añamba jamwanta wamuGati amwilukili Davidi. Davidi chatiyiliyi nindi anamwiluki, “wamutiyili mwanta wakuGati Akisha woma wakubadika.”—1 Samweli 21:10-12.

8. (a) Indi Masamu 56 yatulejañadi hachakuhumañana chaDavidi muGati? (b) Indi Davidi wapulukili ñahi kukufwa?

⁸ Afwilistinu amukwatili Davidi. Hekwawu diyi mpinji yasonekeliyi Davidi isamu namuchima windi wejima hamulombeliyi Yehova nindi: “Shaku madilu ami muchumpa cheyi.” (Masamu 56:8 nitunsona twahewulu) Dichi wamwekesheli chikuhwelelu chindi nindi Yehova hamba kajimbala makabi induku, ilaña wakamwakamena  nikumukiña chiwahi. Davidi watuñili kafuta kulonda kumudimba mwanta wawaFwilistinu. Wadimbeni kuzaluka. Hakumona chumichi, Mwanta Akisha wazuwilili añamba jindi hakumuletela muntu “wazaluka.” Chakubula kujinooka, Yehova wakiswilili kafuta kaDavidi. Davidi amufumishili mumusumba, nawa wapulukili kukala kukwawu kwadi kumuletela kufwa.—1 Samweli 21:13-15.

9, 10. Muloñadi Davidi chasonekeleliyi Masamu 34, nawa watoñojokeleña hadi anyi hampinji yasonekeliyi idi isamu?

⁹ Bayibolu hiyashimuna neyi chakwila ankwashi jaDavidi atemukili nindi kuGati hela ashalili nakumuhemba kulonda kumukiña munyikala yadiña kukamwihi naIsarelaku. Hela chochu, atela azañaleli hampinji yayilejeliyi Davidi chamupulwishiluwu cheñi kudi Yehova. Ayina yuma yamwekeni yalili chikuku chaMasamu 34, neyi chinamwekeshuwu hatunsona twahewulu. Mumavasi atanu nayedi akutachikilahu amasamu, Davidi wahamekeli Nzambi hakumupulwisha nawa watambikili ankwashi jindi kudibomba nindi kulonda kumutuumbakesha Yehova hamu neyi Mukwakupulwisha Wabadika wawantu Jindi.—Masamu 34:3, 4, 7.

¹⁰ Davidi niantu jindi awanini mwikela mwakuswama kuDulami kumpidi yaIsarela, kukamwihi namakilomita 15 kukabeta kamusela kaGati. A Isarela abulili kuzañalala nachiyulu chaMwanta Sawulu ayili nakudibomba naDavidi niantu jindi. (1 Samweli 22:1, 2) Hampinji yasonekeliyi Davidi mazu awanewaña haMasamu 34:8-22 watela watoñojokeleña hadi antu amuchidiwu. Yanukishu yawanewaña mumavasi wenawa yalema kudetu makonu nawa tukuhetelamu nankashi mukuhanjeka kwakunama kwesamu dadiwahi denidi.

Komana Walemesha Chikupu Yuma Yalemesheliyi Davidi?

11, 12. Nyiloñanyi yitukweti yitwatelela kutwalekahu kumuhameka Yehova?

¹¹ ‘Nukumukiswila Yehova nkisu mafuku ejima, kukanwa kami kukwikala yowu kumushimeka hohu.’ (Masamu 34:1) Hakushakama hamu neyi itunduka, Davidi wadiña nakutoñojoka hayuma yayivulu yakumujimba, neyi chinamwekeshi  mazu wenawa, hetejeli yina yuma kukañesha mpwila yindi yakumuhameka Yehovaku. Ichi hichakutalilahu chachiwahi kudetu neyi chakwila tumona kukala. Hela chakwila tudi hashikola, hamudimu, nawakwetu eniKristu, hela mumudimu wakushimwina, nkeñelu yetu yatela kwikala yakumuhameka Yehova chikupu. Tukweti nyiloña yayivulu yitwatelela kwila mwenimu. Chakutalilahu, hikwekala nkumishilu kuyuma yitwakeñaña kwiluka nawa nikudiluñisha munyidimu yayiwahi yaleñeliyi Yehovaku. Shinshikenu hayuma yinakoñiyi kuhitila mumbadi yindi yakuloñesha kwaheseki. Yehova nayizatishi chikupu antu ashinshika makonu hela chakwila hiyamanininaku. Komana nyidimu yaNzambi yinateli kwesekana nanyidimu yalemeshawu antu nankashi mukaayi? Komana himuneteji mazu asonekeliyi Davidi akwila nawu: “Hadi amaneni hihekala wakwesekana naneyuku, eyi [Yehova]; hela nyidimu yakweseka nanyidimu yeyi hiyekala kwokuku”?—Masamu 86:8.

¹² Kufwana Davidi, twafwilaña kutwalekahu kumuhameka Yehova hamuloña wanyidimu yindi yayiwahi. Hela chochu, tudi namuzañalu hakwiluka nawu Wanta waNzambi hayinu mpinji wudi mumakasa aNswana Davidi wahaya nyaka, Yesu Kristu. (Chimwekeshu 11:15) Chumichi chinakumwekesha nawu kukuma kwakanu kaayi kudi mukamwihi. Mbidi yahaya nyaka yawantu akubadika hamabiliyoni atanu nayimu yidi mukukala. Kudi kukankila kwakuleja antu haWanta waNzambi nankashi nichuma chiwakakoñela muchidi wamuntu mukunyakashana nikuyikwasha kumuhameka Yehova hamu. Mwalala chuma chatachi chitwatela kusha muwumi chatela kwikala chakuzatisha mpinji yidi yejima kulonda kukwashaku amakwawu kutambwila “nsañu yayiwahi” henohu mpinji kanda yimani.—Matewu 24:14.

13. (a) Indi Davidi wadisambili mudinyi nawa antu amuchidinyi atiyili? (b) Indi antu adizoza anakuyikwokola ñahi kuchipompelu chaweniKristu makonu?

¹³ ‘Muchima wami wukudisamba naYehova; muntu wawunda wakachitiya wakazañalala.’ (Masamu 34:2) Davidi hadinyamwini nayuma yidi yejima yakoñeliyuku. Chakutalilahu, hadisambili hanochu chamudimbiliyi mwanta wakuGatuku. Welukili nindi Yehova diyi wamukiñili hampinji yadiñayi muGati nawa wapulukili muloña Yehova diyi wamukwashili. (Yishimu 21:1) Dichi Davidi hadisambili yomwenuku, ilaña wadisambili mudi Yehova. Hamuloña wakwila Davidi wamulemesheli Yehova, chaleñeleli akwakudizoza kudikwokwela kudi Yehova. Yesu niyena walemesheli ijina daYehova, nawa chaletesheli kukokola antu adizoza nawa akeñeleña kudiza kudi Yena. Makonu akwakudizoza amunyuza yejima anakudikwokwela kuchipompelu chaweniKristu awayishewa mukaayi kejima, omu Yesu mwekalayi hamu neyi Mutu. (Akolose 1:18) Nyichima yawakwakudizoza wenawa ayisañumunaña neyi atiya ijina daNzambi anakudilemesha kudi ambuñindi adizoza nawa spiritu yaNzambi yayikwashaña kutiyishisha nsañu yamuBayibolu.—Yowanu 6:44; Yililu 16:14.

Kupompa KwaweniKristu Kwakoleshaña Chikuhwelelu Chetu

14. (a) Komana Davidi wazañaleli hakumuhameka Yehova kumbadi hohu? (b) Chakutalilahwinyi chemikiliyi Yesu kutalisha hakupompa kwakudifukula?

¹⁴ ‘Mulemeshenu Yehova nanami hamu, tutuumbakeshenu ijina dindi hamu.’ (Masamu 34:3) Davidi hazañaleli hakumuhameka Yehova kumbadi hohuku. Watambikili amabwambu jindi kudibomba nindi hamu kulonda kutuumbakesha ijina daNzambi. Chochimu, Yesu Kristu, Davidi Muneni wazañaleli hakumuhameka Yehova hatooka—mumasinagogi amudina iluña, nihayawija yamutembeli yaNzambi muYerusalema, nihampinji yadiñayi nawatumbanji twindi. (Luka 2:49; 4:16-19; 10:21; Yowanu 18:20) Wenowu muzañalu wekala mukwimbujola chakutalilahu chaYesu hakumuhameka Yehova hampinji yidi yejima hamu nawakwetu akakwitiya, sweje-e ‘chitunakumona ifuku odu hidikwinza nakuswila kwakwihi’!—Aheberu 10:24, 25.

15. (a) Indi yakuhumañana yaDavidi yakumini ñahi antu jindi? (b) Indi twahetelañamu ñahi mukupompa kwetu?

¹⁵ ‘Ami namukeñakeñeli Yehova, wañitiyili, wampulwishili muwoma wami wejima.’ (Masamu 34:4) Chakuhumañana chenichi chadiña chalema kudi Davidi. Dichi watwalekeluhu nakuhosha  nindi: ‘Kazweñi iwu wabileleli, Yehova wamutiyili, wamuhadishili muyihuñu yindi yejima.’ (Masamu 34:6) Hampinji yitunakuhanjeka nawakwetu akakwitiya, tukweti kukooleka kwakuvulu kwakuyileja hayakuhumañana yayiwahi hanochu Yehova chinatukwashiyi kumika muyuma yakala. Ichi chakoleshaña chikuhwelelu chawakwetu akakwitiya, neyi nhoshelu yaDavidi chiyakolesheli chikuhwelelu chawankwashi jindi. Kutalisha kudi Davidi, amabwambu jindi ‘atalili mesu kudi [Yehova] mucha nikucha to-o, hiyamba katiya nsonyi mumesuku.’ (Masamu 34:5) Hela chakwila amutemukileña Mwanta Sawulu hiyatiyili nsonyiku. Akuhweleleli nawu Nzambi wamukwashileña Davidi, nawa amwekeni kuzañalala. Munjila yoyimu, amaha akweti mpwila yakudiza nieniKristu alala anashimbuli akeñaña wukwashi kudi Yehova. Chineli anamoni wukwashi windi, kuzañalala kwawu kwamwekeshaña nawu anakufwila kutwalekahu kwikala ashinshika.

Hamekenu Wukwashu Wafumaña Kudi Añelu

16. Indi Yehova wazatishaña ñahi añelu jindi hakutupulwisha?

¹⁶ ‘Kañelu kaYehova wayituñila amwakama musumba kwi-ndo, wayipulwishaña.’ (Masamu 34:7) Davidi hatoñojokeli nindi Yehova hatela kumupulwisha hohu nkawinduku. Mwalala, Davidi wadiña wawayishewa waYehova, mwanta wamuIsarela wakumbidi; ilaña welukili nindi Yehova wazatishaña añelu jindi kukukiña akwakudifukula indi ashinshika, hela chakwila alema hela adizoza. Munanu mafuku, akakudifukula alala niwena anamoni kukiñewa kwaloñeshañayi Yehova. AkaNazi muGermany hamu tuhu niAngola, niMalawi, niMozambique nawa nimatuña amakwawu amavulu, nfulumendi yeteja makampeni akujilumuna aYinsahu jaYehova. Ñovu jawu jayili mumenji. Ilaña, antu jaYehova mumatuña wenawa anakuvulilaku hampinji yinakutuumbakeshawu ijina daNzambi hamu. Muloñadi? Muloña Yehova wazatishaña añelu jindi ajila kulonda kuyikiña nikuyihemba antu jindi.—Aheberu 1:14.

17. Munjilanyi mwatwikwashilañawu añelu jaNzambi?

¹⁷ Kubombelahu, añelu jaYehova akwashañaku kuzata chiwahi kulonda ejima akudimbwisha akwawu akuyifumisha hakachi kawantu jaYehova. (Matewu 13:41; 18:6, 10) Hela chakwila hitunateli kwiluka wukwashu weniwu hayina mpinjuku, añelu amanishaña kukala kunateli kukañesha mudimu wetu wakudi Nzambi, nawa atukiñaña kuyuma yinateli kukisañana wubwambu wetu naYehova. Atukiñaña nankashi mumudimu wakubidika “nsañu yayiwahi yahaya nyaka” kunyunza yejima, kushilahu nimaluña mwakala kushimwina. (Chimwekeshu 14:6) Wunsahu wamwekeshaña nawu añelu akwashanaña, kakavulu awisonekaña munyikanda yaBayibolu yasonekañawu aYinsahu jaYehova. * Yakuhumañana yamuchidiwu yayivulu nankashi nawa hiyatela kumonewa neyi yamwekeni yayenuku.

18. (a) Chumanyi chitwatela kwila hakwila nawu tuheteli muwukwashu wawañelu? (b)Yumanyi yikahanjekewa muchibaba chinalondeluhu?

¹⁸ Hakwila nawu tutwalekuhu kuhetela muwukwashu nikukiñewa kwawañelu, twatela kutwalekahu kutuumbakesha ijina daYehova hela mumpinji yekañesha. Anukenu nenu añelu jaNzambi akiñaña hohu ‘amwakamaña Yehova.’ Indi chumichi chinakulumbululadi? Indi kumwakama Nzambi chaya mudihi nawa tunateli kumwakama ñahi? Muloñadi Nzambi wakukeña chakeñelañayi nindi tumwakameña? Awa malwihu akahanjekewa muchibaba chinalondeluhu.

[Tumazu twaheshina]

Munateli Kwakula Ñahi?

• Kwesekanyi kwomikiliyi Davidi hamu neyi mukwenzi?

• Kufwana Davidi, chumanyi chitwakamenaña nankashi?

• Indi kupompa kwawiniKristu twakwimonaña ñahi?

• Indi Yehova wazatishaña ñahi añelu jindi hakutukwasha?

[Malwihu aKuzatisha haKudiza]

[Mapu yidi hefu 25]

(Neyi munakukeña kumona ntanjikilu yejima talenu mumukanda)

Rama

Gati

Zikilagi

Gibeya

Yerusalema

Adulami

Keyila

Heberoni

Zifwi

Horeshi

Mawoni

Nobi

Betelemi

Engedi

Karameli

Ijiya Damuñwa

[Mazu aKusakilila]

Mapu: Based on maps copyrighted by Pictorial Archive (Near Eastern History) Est. and Survey of Israel

[Mwevulu wudi hefu 25]

Hela chakwila wadiña neyi itunduka, Davidi watuumbakesheli ijina daYehova