Andemoni—Twatela Kudikaña Nawu Ñahi?

‘Añelu abulili kuhemba Wanta wawu, hiyakufuma mwawu mwashakaminañawu, [Nzambi] nayihembi mumaleñi ahaya nyaka mumwidima wiyila bwi, nayiswekeli kusompesha kwefuku odu deneni.’—YUDA 6.

1, 2. Malwihu amuchidinyi ehulañawu kutalisha hadi Satana Diyabolu niandemoni?

 KAPOSTOLU Petulu wasoñamishili nindi, “Babalenu, tonenu; mukwankunyi nenu [D]iyabolu wudi nakuya nakutambatamba nakukeñakeña akudyayi, neyi mutupa wabulumaña.” (1 Petulu 5:8) Kapostolu Pawulu wahosheli hadi andemoni nindi: ‘Hinakukeña enu kutambula hamu nawandemonuku. Himukutwesha kwila munwa mulupasa lwa[Yehova], munwa nawa mulupasa lwawandemonuku. Himukutwesha kwila mutambula kumesa ya[Yehova], mutambula nawa kumesa yawandemonuku.’—1 Akorinda 10:20, 21.

² Indi Satana Diyabolu niandemoni hiyanyi? Afuma kudihi nawa enjiluku mpinjinyi? Komana Nzambi diwayileñeli? Akweti ñovu yamuchidinyi yakuluwañesha antu? Kukiña kwamuchidinyi kutukweti kwakudikaña nawu?

Indi Satana niaNdemoni Afuma Kudihi?

3. Indi kañelu kaNzambi wekalili ñahi Satana Diyabolu?

³ Hatachi munsañu yanyaka yamuchidi wamuntu, hatachikili antu kushakama mwitempa daEdeni, kañelu kaNzambi wadikañili. Muloñadi? Muloña hatiyili kuwaha nachifulu chindi mukuloñesha kwaYehova kwamwiwuluku. Chayileñeliwu Adama naEvu, wekalili nakukooleka kwakuyilisha ovwahileña nikudifukula kudi yena chatela ovwahileña nikudifukula kudi Nzambi walala. Kuhitila mukudikaña naNzambi nikudimba antu atachi eyala namumbanda kulonda eli nshidi, iwu kañelu wadibalumwini yomweni kwikala Satana Diyabolu. Mukuhita kwampinji, añelu amakwawu niwena adikañili. Munjilanyi?—Kutachika 3:1-6; Aroma 5:12; Chimwekeshu 12:9.

4. Chumanyi cheliliwu añelu adikañili henohu Dibaji damumafuku aNowa kanda dinzi?

⁴ Nyikanda yonenawu yatulejaña nawu henohu Dibaji deneni damumafuku aNowa kanda dinzi, añelu amakwawu atachikili kukomoka chikupu ambanda hamaseki. Hamuloña wakwikala nayitoñojoka yatama, Bayibolu  yahosha nawu “anyana kaNzambi [amumawulu] amayala amweni anyana kawantu awambanda nawu akweti lubanji, asumbula niañodijawu, ejima akeñeluwu.” Awa maluwi hiyadiña atelelaku, nawa avweli muchidi wawanyana ateneneñawu nawu aNefwili. (Kutachika 6:2-4) Yileñaleña yakuspiritu yadikañili naNzambi yadibombeli hamu naSatana mukudikaña naYehova.

5. Chumanyi chayimwekeneni akwakudikaña chelili Yehova yaleti kujilumuna kuhitila muDibaji deneni?

⁵ Yehova chaleteliyi Dibaji hadi antu, aNefwili niamama jawu awuntu afwili. Ichi chayileñeleli añelu akwakudikaña kubalumuna nyijimba yawu yawuntu nakufunta muWanta wawaspiritu. Hela chochu, hiyatwesheli kufunta “mwaawu mwashakaminañawu” naNzambuku. Ilaña, ayishili “mumwidima wiyila bwi [wakuspiritu],” watenañawu nawu Tatarasi.—Yuda 6; 2 Petulu 2:4.

6. Indi andemoni adimbaña ñahi antu?

⁶ Kufuma tuhu hampinji yajimbesheliwu añelu “mwaawu mwashakaminañawu,” ekala andemoni amabwambu jaSatana nawa elaña yuma yatama yakeñañayi. Kufuma tuhu hayina mpinji andemoni hiyakweti cheñi ñovu yakuvwala nyijimba yawuntuku. Hela chochu, anateli kukokola amayala niambanda kudiñija munjila jashiyashana jawuvumbi watama. Andemoni cheñi mukubabala adimbaña antu kuhitila mukupesha, mwatela kubombela yuma yidi neyi kukaya, waña watenañawu nawu voodoo, nikuhoña. (Kuhituluka 18:10-13; 2 Kushindulula 33:6) Chuma chikayimwekena añelu atama dichikamumwekena niDiyabolu—akayijilumuna haya nyaka. (Matewu 25:41; Chimwekeshu 20:10) Chayinu mpinji, twatela kwimana akola nakudikaña nawu. Chikuwaha neyi tukushinshika chaswejayi Satana ñovu nichitwatela kudikaña nindi niandemoni jindi.

Indi Satana Wekala naÑovu Yamuchidinyi?

7. Satana wukweti ñovu yamuchidinyi hakaayi?

⁷ Satana namusawuli Yehova hadi yaaka yayivulu. (Yishimu 27:11) Nawa naluwañeshi antu amavulu nankashi. Ha 1 Yowanu 5:19 hahoshaña nawu, “Mpata yamunu mwishina yashakamaña mudi owu watama.” Dimuloña waweni Diyabolu wamwesekeleliyi Yesu kuhitila mukumwinka ñovu nikulema ‘kwamawanta amunu mwishina ejima.’ (Luka 4:5-7) Kapostolu Pawulu wahosheli hadi Satana nindi: ‘Neyi nsañu yayiwahi yitwashimwina yinabutewi, yinabutewi mudi antu adi nakujilumuka. Mudi wena nzambi yampata yamakonu naputishi mesu ayitoñojoka yawantu abula kwitiya; kuchina mwaana wansañu yayiwahi yalubanji lwakulema kwaKristu, chinfwana chaNzambi, kuyichila.’ (2 Akorinda 4:3, 4) Satana “hintwambi, hitata yachu” ilaña wadifwikijaña neyi “kañelu kachejeji.” (Yowanu 8:44; 2 Akorinda 11:14) Wukweti ñovu nijinjila jakuputishilamu yitoñojoka yawanyuli amukaayi niantu jawu. Nadimbi antu nansañu jamakudi nituheka twamunsakililu, nikutwamba.

8. Indi Bayibolu yahoshaña nawudi kutalisha hakuluwañesha kwaSatana?

⁸ Ñovu yaSatana nikuluwañesha kwindi yamwekeni mumpinji yakaprofwetu Danyeli, mu 536/535 B.C.E. Yehova chatemesheliyi kañelu kutwala nsañu yakumukolesha Danyeli, kañelu amukañesheli kudi “kalamba [kakuspiritu] ketuña dawaPeresi.” Iwu kañelu washinshika amulabesheli hadi mafuku 21 kushika nimpinji yenjili “Mikeli, kalamba wumu wahadi atulamba abadika” nakumukwasha. Nsañu yoyimu yahoshaña hadi ‘kalamba [ndemoni] wakuGreece.’ (Danyeli 10:12, 13, 20) Nawa haChimwekeshu  13:1, 2, Satana anamumwekeshi neyi “chanzañombi” wamwinkaña kanyama wamatuña nachiyulu “ñovu jindi, niitanda dindi dawanta niwanta weneni.”

9. Indi eniKristu anakulwa nawanyi?

⁹ Dihafumini kapostolu Pawulu kusoneka nindi: ‘Hitwalwishaña, nawantu akweti nyijimba namashuku, twalwishaña namawanta, nawakwañovu, nawakwakuyula mwidima wamakonu, nawaspiritu atama amumawulu.’ (Aefwesesa 6:12) Nimakonu, andemoni abulaña kumwekana anakulombolawu kudi Satana Diyabolu, diwu anakuluwañesha anyuli jawantu niantu ejima, nakuyileñela kukoña yuma yasweja kutama yawupondi, madombu nikujahañana. Tushinshikenu hachitwatela kudikaña chikupu nanawa aspiritu asweja ñovu.

Twatela Kudikaña Ñahi nawaNdemoni?

10, 11. Tunateli kudikaña ñahi naSatana niañelu jindi atama?

¹⁰ Hitukutwesha kudikaña naSatana niañelu jindi atama nañovu jetwetu aweni, hela nañovu jetu jakumujimba hela muyitoñojokaku. Pawulu wakonkomweneni nindi: “Ikalenu akwañovu mudi Mwanta, nimuñovu jindi jasweja nankashi.” Twatela kushindamena hadi Nzambi kulonda yatwikiñi. Pawulu watwalekelihu nindi: “Manyekenu yitwa yaNzambi yejima, kulonda mutweshaña kudikaña namaana aDiyabolu akudimbana. . . . Kwatenu kuyitwa yaNzambi yejima, kulonda mutweshi kwimana mwifuku datama, kulonda chimukukumisha kulwisha chochimwemana.”—Aefwesesa 6:10, 11, 13.

¹¹ Mapampa kayedi Pawulu wakonkomweneni akwawu eniKristu kumanyeka “yitwa yaNzambi yejima.” Izu dakwila nawu “yejima” datalisha mukwila nawu hichinakukeñeka kwikala nanyichima yiyedi hakudikaña nakulukuka kwawandemonuku. Hanu dinu, yumanyi yalema yayitwa yakuspiritu yinakukeñeka nankashi yatela kwikala naweniKristu hakwila adikañi nawandemoni?

‘Tunateli Kwimana Ñahi Akola’?

12. Indi eniKristu atela kupimpila ñahi mahinawu ansañu yalala?

¹² Pawulu walumbulwili nindi: ‘Dichi imanenu akola, nakupimpila mahina ansañu yalala; vwalenu hebwambu chikuñu chakujika chakuloña.’ (Aefwesesa 6:14) Iyi yikunku yiyedi yayitwa yinateniwu himuya, hela mushipi, nichikuñu chahebwambu chakola. Mushidika wakasishileña mushipi windi kulonda kujikilila mayindi (mbunda, makata, niivumu) nikukolesha mpoku yakabali. Chochimu, chalala chaBayibolu chakeñekaña kukasisha chikupu neyi mushipi, kulonda tukakeli kuchalala. Komana tukweti ndandanda yakutaña Bayibolu ifuku niifuku? Komana chisaka chejima chatañaña Bayibolu? Komana twekala nandandanda yakutañila hamu nachisaka nsona yefuku? Kubombelahu, komana twendelaña hamu nakulumbulula kwamunyikanda yasonekañawu kudi ‘nduñu wamaana nikashinshi’? (Matewu 24:45) Neyi dimutunakwila, tunakufwila kuzatisha kufumba kwaPawulu. Kukakela kuchalala kunateli kutukwasha kufuukula chachiwahi nikutukiña kubula kwila yuma yatama.

13. Tunateli kuhemba ñahi muchima wetu wachifwikija?

¹³ Chikuñu chacheni chakola chakujika hebwambu chadiña nakukiña ntulu, muchima, niyidi yikwawu yalema yamushidika. MwiniKristu nateli kukiña muntu windi wamukachi—kuhitila mukukeñesha kuloña kwaNzambi  nikukakela kunshimbi jaloña jaYehova. Chikuñu chakola chakujika hebwambu chachifwikija chatukwashaña kulemesha Izu daNzambi. ‘Chitwahela yuma yatama nakukeña yayiwahi,’ tukulekesha nyendu yetu kwenda “munjila yatama yejima.”—Amosa 5:15; Masamu 119:101.

14. Indi ‘kuvwala kunyendu yetu nkwabilu jakwenda nansañu yayiwahi yakuwunda’ chalumbulukadi?

¹⁴ Kakavulu amashidika akuRoma avwalileña nkwabilu yatelela kunyendu hakwenda njila yayilehi yamuRoma yahitili mwituña dejima. Indi mazu akutena nawu ‘vwalenu kunyendu nkwabilu jakwenda nansañu yayiwahi yakuwunda’ alumbulukadi kudi eniKristu? (Aefwesesa 6:15) Atalisha mukwila nawu tunadiloñeshi kulwa. Tunadiloñeshi kushimwina nsañu yayiwahi yaWanta waNzambi hampinji yejima yatelela. (Aroma 10:13-15) Kwikala akola mumudimu wawiniKristu chikutukiña ‘kumaana aSatana akudimbana.’—Aefwesesa 6:11.

15. (a) Chumanyi chinakumwekesha nawu nkebu yeneni yakukuhwelela yalema nankashi? (b) “Nyivu yakesi” yamuchidinyi yatela kuluwañesha chikuhwelelu chetu?

¹⁵ Pawulu watwalekelihu nindi: “Chuma chinabadiki chochakukwata nkebu [yeneni] yakukuhwelela, yimukutwesha kujima nachu nyivu yakesi yamukwakutama yejima.” (Aefwesesa 6:16) Kuleja kwakwila nawu kwatenu kunkebu yeneni yakukuhwelela anayitachiki nanhoshelu yakwila nawu “chuma chinabadiki,” chinakumwekesha nawu ichi chitwa chalema nankashi. Bayi tubula chikuhweleluku. Kufwana nkebu yeneni, chikuhwelelu chetu chatela kutukiña ‘kunyivu yakesi’ yaSatana. Makonu indi yumiyi yatela kwimenaku chumanyi? Yatela kwikala nyivu yamatuka, kutwamba, ninsañu yamakudi yatadikishañawu ayilumbu niakwakusekesha esekaña kuzeyesha chikuhwelelu chetu. Iyi “nyivu” yatela kwikala cheñi kweseka kwakufwila maheta, kukutwileñela kusweja kulanda yuma yayivulu nikuluwañesha amakwawu kutachika kwimbujola antu anadiñiji munshakaminu yakudimwekesha. Hekwawu alanda matala amaneni nawa amawahi ninyotoka hela adimwekeshaña nayingelingeli yawu yawuseya niyakuvwala yayiha yinediki. Hichikweti muloña wayuma yelaña amakwawuku, twatela kwikala nachikuhwelelu chakola chakujima iyi “nyivu yakesi.” Tunateli kukolesha ñahi nikuhemba chikuhwelelu chetu?—1 Petulu 3:3-5; 1 Yowanu 2:15-17.

16. Yumanyi yatela kutwikwasha kukolesha chikuhwelelu chetu?

¹⁶ Tunateli kukundama kwakwihi naNzambi kuhitila mukudiza Bayibolu halwetu mpinji yejima nikulomba chikupu. Tunateli kumulembelela Yehova kukolesha chikuhwelelu chetu hakwila tuzati kwesekana nakulomba kwetu nayililu yashikila. Chakutalilahu, komana twaloñeshaña chachiwahi Kudiza kwaKaposhi Kakutalila kamulungu nimulungu nankeñelu yakwakulahu? Neyi tukudizaña Bayibolu ninyikanda yashindamena haBayibolu chikuhwelelu chetu chikukola.—Aheberu 10:38, 39; 11:6.

17. Tunateli ‘kutambwila ñahi itepa dachikuñu dawamwinu’?

¹⁷ Pawulu wakunkulwili kulumbulula kwindi kwayitwa yakuspiritu nakufumba kwakwila nindi: “Tambulenu itepa dachikuñu dawamwinu, nimpoku yaspiritu yakabali, wowu mazu aNzambi.” (Aefwesesa 6:17) Itepa dachikuñu dajikilileña mutu wamushidika niwoñu, hashindamena kufuukula. Chochimu, kuchiñeja kwetu kwawiniKristu kwajikililaña yitoñojoka yetu. (1 Atesalonika 5:8) Chatela twinzesheña yitoñojoka yetu nayikonkwanyi  yamukaayi nikufwila maheta, twatela kusha yitoñojoka yetu hakuchiñeja kwatwinkayi Nzambi, neyi cheliliyi Yesu.—Aheberu 12:2.

18. Muloñadi wutukubula kudiwula ndandanda yetu yakutaña Bayibolu yefuku niifuku?

¹⁸ Kujikilila kwetu kwakukumishaku kukuluwañesha kwaSatana niandemoni jindi hiizu daNzambi, hela nsañu yasonekawu muBayibolu. Iwu himuloña wukwawu wukutuleñela kubula kudiwula ndandanda yetu yakutaña Bayibolu mpinji yejima. Kwilukisha chikupu Izu daNzambi kunateli kutwikiña kukutwamba kwaSatana ninsañu yamakudi yawandemoni hamu ninhoshelu yatama yawakwakusekesha.

‘Lombenuña Mafuku Ejima’

19, 20. (a) Chumanyi chikamumwekena Satana niandemoni jindi? (b) Chumanyi chatela kutwikolesha lwakuspiritu?

¹⁹ Satana, andemoni jindi, nikaayi katama keña ayifumishuhu. Satana neluki nindi ‘kunashali dehi kampinji kantesha hohu.’ Wudi nandombu yayeni yakulwa nanowu ‘anakuhemba mwanayilejuwu kudi Nzambi, achidi kukakela kushimuna nsañu yaYesu.’ (Chimwekeshu 12:12, 17) Chidi chalema kudikaña naSatana niandemoni jindi.

²⁰ Twatela kusakilila chikupu hakusoñamisha kwakumanyeka yitwa yaNzambi yejima. Pawulu wakunkulwili nsañu yindi yayitwa yakuspiritu naniku kufumba nindi: “Lombenuña mudi [s]piritu mafuku ejima, nikulomba nikulembelela kwejima, nikutonenamu mwahita kukakela kwejima nakulembelela akwakujila ejima.” (Aefwesesa 6:18) Kulomba kwatela kutukolesha lwakuspiritu nikutukwasha kwikala asoñama. Tuhembenu mazu aPawulu nakutwalekahu kulomba, kwila mwenimu chikutukwashaku kudikaña naSatana niandemoni jindi.

Yumanyi Yimunadizi?

• Indi Satana niandemoni jindi afuma kudihi?

• Indi Satana wukweti ñovu yamuchidinyi?

• Yumanyi yitukweti yakudikiña nachu kudi Satana niandemoni jindi?

• Tunateli kumanyeka ñahi yitwa yaNzambi yejima?

[Malwihu aKuzatisha haKudiza]

[Nyevulu yidi hefu 17]

‘Anyana kaNzambi awamayala amweni anyana kawantu awambanda’

[Mwevulu wudi hefu 19]

Komana munateli kutena nikulumbulula yuma yitanu nakamu yayitwa yetu yakuspiritu?

[Mwevulu wudi hefu 21]

Indi kukalakala iyi nyidimu kwatukiñaña ñahi kudi Satana niandemoni jindi?