Kukeñakeña Ñakwilu Yaloña

Natweshi ñahi kudihemba kumujimba kulonda kwikala wakola?

Chumanyi chinatela kwila kulonda nizañalesheña chisaka chami?

Natweshi ñahi kuwahisha kukooleka kwakutwalekahu kuzata hamudimu wami?

KOMANA wadihulahu dehi malwihu amuchidiwu? Komana wawanini ñakwilu yayiwahi yazatikili chiwahi? Chaaka nichaaka, kwakwihi nanyikanda 2,000 yashiyashana ayisonekaña kulonda kuhana kufumba hansañu yamuchidiwu ninsañu yikwawu yalema. MuBritain hohu, akwakutaña azatishaña mali akushika ku 80 miliyoni amali akuBritain hachaaka nichaaka hakulanda nyikanda yafumbaña kutalisha hachakumika nakukala kwamuwumi. MuUnited States, nyikanda yahosha hanochu muntu chinateliyi kumanisha kukala yomwenindi ayilandishaña hamali akushika ku $600 miliyoni mali akuAmerica hachaaka nichaaka. Bayi neyi yeyi wakeñaña hohu kufumba kwakuwahi kutalisha hachakuzata nawumi wamafuku ejimaku.

Kutalisha hakufumba kwekala muniyi nyikanda yayivulu, nsoneki wumu wahosheli nindi: “Nyikanda yayivulu yayiha yafuntulukaña hohu hayuma yasonekeluwu dehi.” Chalala, kufumba kwakuvulu kwekala muniyi nyikanda kwamwekeshaña maana asonekawu mumukanda waswejesha kushimbula mukaayi. Iwu mukanda diwasweja kuhanawu mukaayi kejima. Awituntulula wejima hela chibalu mumadimi akushika ku 2,400. Kunyeñumuka kaayi kejima, kubomba ejima hamu apulinta makopi akushika ku 4.6 biliyoni. Iwu mukanda hiBayibolu.

Bayibolu yahosha hatooka nawu: “Nyikanda yajila yejima ayonena dehi kudi Nzambi; yawaha kuleja nachu, nikutanyisha nachu, nikwolola nachu, nikufumba nachu mwaloña.” (2 Timotewu 3:16) Chalala Bayibolu hiyayisonekeli neyi himukanda watela kuzatishayi muntu hakumanisha kukala yomweninduku. Mudimu waweni waBayibolu hikushimuna nkeñelu yaNzambi kudi muchidi wamuntu. Hela chochu, Bayibolu yikweti yuma yayivulu yahosha kutalisha hachakumanisha kukula kwavula kwamwekanaña kudi wejima wetu, yakana nawu ejima alondelaña kufumba kwaBayibolu akadiza chakuhetelamu awenawu. (Isaya 48:17, 18) Neyi kufumba kwamuBayibolu kunazatishewi mpinji yejima kwazatikaña, hichikweti muloña namuchidi wamuntu, chisemwa hela shikola yatañayuku.