Ovwahilenu Kristu niNduñu Yindi Wakashinshi

‘Mwanta windi . . . wakamwinka mudimu wakuhemba yuma yindi yahetayi yejima’—MATEWU 24:45-47.

1, 2. (a) Kwesekeja naBayibolu, indi Nlomboli yetu hinyi? (b) Chumanyi chamwekeshaña nawu Kristu walombolaña chipompelu chawiniKristu chikupu?

 “BAYI ayitenaña nawa nawu anlomboluku, muloña nlomboli yenu wuduku wumu hohu, diyi Kristu.” (Matewu 23:10.) Yesu wayilejeli atumbanji twindi mazu wenawa hatooka to-o nindi, kwosi muntu wunateli kwikala nlomboli yawu hamaseki. Nlomboli yawu wumu wamwiwulu—Yesu Kristu. Yesu amutonda kudi Nzambi kwikala Nlomboli. Yehova ‘wamusañwili mudi afu . . . nakumukunjika kwikala mutu wahewulu dayuma yejima kuchipompelu; chipompelu diwu mujimba windi.’—Aefwesesa 1:20-23.

² Chineli Kristu diyi “mutu wahewulu dayuma yejima” kutalisha kuchipompelu chawiniKristu, diyi wayulaña yuma yejima yazatikaña mukachi kachipompelu. Wamonaña yuma yejima yazatikaña muchipompelu. Wakeñaña kwiluka chikupu neyi eniKristu ejima, hela chipompelu chinakulondela nshimbi yawiniKristu nawa chikweti wulunda wakola naNzambi. Ichi achimwekesheli hatooka muchimwekeshu chamumwekesheluwu kapostolu Yowanu hakukuma kwayaaka nkulakaji yakusambila C.E. Kutalisha kuyipompelu yitanu nayiyedi, Yesu walumbulwili kapampa katanu nindi welukili nzatilu yawu, niyililu yawu yayiwahi nikuzeya kwawu, dichi wayifumbili nakuyikolesha kwesekeja nanzatilu yawu. (Chimwekeshu 2:2, 9,  13, 19; 3:1, 8, 15) Twatela kukuhwelela chikupu netu Kristu welukili cheñi chiyadiñawu lwakuspiritu kuyipompelu yikwawu yakuAsia Minor, Palestine, Syria, Babylonia, Greece, Italy, nimaluña amakwawu. (Yililu 1:8) Indochu makonu?

Nduñu waKashinshi

3. Muloñadi chichinekalili chashikila kumwesekeja Kristu neyi mutu nawa chipompelu chindi neyi mujimba?

³ Hanyima yakusañuka kwindi nawa henohu kanda yakandami mwiwulu kudi Tata yindi, Yesu walejeli atumbanji twindi nindi: “Ñovu jamwiwulu nijahamaseki jejima anajinyinki.” Wahosheli cheñi nindi: “Tiyenu, ami nidi nenu mafuku ejima nikwakakumina nyaka.” (Matewu 28:18-20) Watwalekeluhu kwikala nawu hamu neyi Mutu wawu wunakuyiyula. Munyikanda yayisonekeleliyi eniKristu muEfwesesa niKolose, kapostolu Pawulu wafwanishili chipompelu chawiniKristu ‘namujimba,’ owu Kristu wekalayi neyi Mutu. (Aefwesesa 1:22, 23; Akolose 1:18) Mukanda (The Cambridge Bible for Schools and Colleges) wahosha nawu iyi nhoshelu yachifwikija ‘yesekeja mujimba nachipompelu hiyahosha hohu hakulema kwaMutuku, ilaña nawu Mutu diwalombolaña antu amuchipompelu. Hiyitwa yindi.’ Izazanyi dazatishañayi Kristu hamu neyi chitwa chindi kufuma hampinji yamwinkeluwu Wanta mu 1914?—Danyeli 7:13, 14.

4. Neyi chashimwineñahu dehi muwuprofwetu waMalaki, chumanyi chamweniyi Yehova niYesu Kristu hampinji yenjiluwu nakutala tembeli yakuspiritu?

⁴ Wuprofwetu waMalaki washimwineñahu dehi nawu Yehova, “Mwanta [walala],” hamu ‘nantemesha yindi yachitiyañenu,’ Mwanindi Yesu Kristu, yaswanyikayi hawanta, katataka yakenzi nakusompesha nikutala “tembeli” Yindi hela itala dachifwikija dakudifukwilamu. ‘Mwaaka wakusompesha itala daNzambi’ washika dehi, watachikili mu 1918. * (Malaki 3:1; 1 Petulu 4:17) Antu ahosheleña nawu adifukulaña kudi Nzambi munjila yaloña hamaseki ayesekeli chikupu. Yipompelu yaKristendomu yatañishileña yuma yabulileña kumulemesha Nzambi hadi yaaka yayivulu ayikaanini muloña adibombeleli mukujaha antu Munjita yaMukaayi Kejima yakusambila. EniKristu ashalahu awayishewa naspiritu nawa ashinshika ayesekeli, nakuyitookesha wukwila neyi nakesi nikuyiteja kwikala naYehova ‘antu alambulaña nyilambu mukuloña.’—Malaki 3:3.

5. Kwesekeja nawuprofwetu waYesu kutalisha ‘hakwinza’ kwindi, hinyi wekalili “nduñu” wakashinshi?

⁵ Kwesekeja nawuprofwetu waMalaki, chinjikijilu chikweti yuma yayivulu yashiyashana chayinkeliyi Yesu atumbanji twindi kulonda kutwesha kwiluka mpinji ‘yamba kenzayi nihamba kakuma nyaka yamakonu’ chabombelelumu kwiluka izaza ‘danduñu.’ Yesu wahosheli nindi: ‘Indi nduñu wamaana nikashinshi anenkuwu kudi mwanta windi mudimu wakuhemba amwitala dindi, nakuyinka yakudya yawu hampinji yatelela hinyi? Owu nduñu akawanawu nakwila mwenomu hakenzayi mwanta windi, diyi wukazañalala. Nukuyileja chalala nami, Wakamwinka mudimu wakuhemba yuma yindi yahetayi yejima.’ (Matewu 24:3, 45-47) ‘Chenjiliyi’ nakumutala “nduñu” mu 1918, Kristu wawanini atumbanji ashalahu awayishewa nawa ashinshika atachika dehi kuzatisha magazini yeniyi, kutachika mu 1879 ninyikanda yikwawu yashindamena haBayibolu nakuhana ‘yakudya yakuspiritu hampinji yatelela.’ Wetejeli izaza dawawayishewa hamu neyi chitwa chindi, hela “nduñu,” nawa mu 1919 wayinkeli mudimu wakutala yuma yindi yahetayi yejima hamaseki.

Kwakamena Yuma Yahetayi Kristu haMaseki

6, 7. (a) Indi Yesu wahosheli mazwinyi amakwawu kutalisha hadi “nduñu” wakashinshi? (b) Komana Yesu watalishili mudihi hakuzatisha izu dakwila nawu “kalama”?

⁶ Chikwashalili tukweji twantesha henohu Yesu kanda yahoshi hawuprofwetu wachinjikijilu chakwinza kwindi kubombelahu ‘ninduñu’ wamwimenañaku hamaseki, Yesu wahosheli mumazu ambukaku chantesha hadi “nduñu” nikulumbulula hanyidimu yindi. Yesu  wahosheli nindi: ‘Kalama wamaana nikashinshi, akushilawu kudi mwanta windi mudimu wakutala mukala windi, enkeña añamba jindi yakudya yawu hampinji yatelela, yowinyi? Nukuyileja chalala nami, wakamukunjika mudimu wakuhemba yuma yahetayi yejima.’—Luka 12:42, 44.

⁷ Ahanu, nduñu anamuteni nawu kalama izu dabalumunawu kufuma mwizu dachiGriki dalumbuluka “mukwakutala hetala hela yuma yahetayi muntu.” Izaza dakalama bayi neyi hizanvu dawantu amaana alumbululaña yikuma yayiwahi kufuma muBayiboluku. Kubombela hakuhana yakudya yakuspiritu ‘hampinji yatelela,’ “kalama washinshika” amwinka mudimu wakutala atulama ejima aKristu nikwakamena chipompelu chaKristu ninyidimu yejima “[ya]yuma yindi yahetayi” hamaseki. Indi yuma yejima yaKristu yadiña yumanyi?

8, 9. ‘Yumanyi yahetayi’ yenkawu nduñu mudimu wakuyihemba?

⁸ Nyidimu yanduñu yabombelamu kutala matala azatishañawu kudi atumbanji twaKristu kuzatilamu nyidimu yawu yawiniKristu, adi neyi chishina chamukaayi kejima nitusanji twamutayi twawaYinsahu jaYehova, hamu tuhu nimaluña adifukwilañamu—Matala aWanta, niMatala aKupompelamu kupompa kwamaneni—kunyeñumuka kaayi kejima. Nduñu watalaña cheñi mudimu wasweja kulema wamaprogiramu akoleshaña chikuhwelelu akudiza Bayibolu mulungu nimulungu nikupompa kwamaneni kwekalañaku hampinji hampinji. Hakupompa kweniku, atañishaña nsañu yakushikijewa kwawuprofwetu wamuBayibolu, niwunlomboli wawuwahi wahanewaña hampinji yatelela hachakuzatisha nshimbi yamuBayibolu muwumi wetu.

⁹ Nyidimu yakalama yabombelamu cheñi kwakamena nyidimu yejima yalema yakushimwina “nsañu iyi yawanta yayiwahi” nikwilisha “atumbanji munyuza yejima.” Ichi chabombelamu kuleja antu kwila yuma yejima yahosheliyi Kristu hamu neyi Mutu wachipompelu kwila haniyi mpinji yakukuminina. (Matewu 24:14; 28:19, 20; Chimwekeshu 12:17) Mudimu wakushimwina nikudizisha waleta “izaza deneni” dawamabwambu jawashalahu awayishewa nawa ashinshika. Chakubula nikujinooka iyi “yuma yatiyaña nyuza yejima kuwaha” ayichindila hakachi ‘kayuma yahetayi’ Kristu yakamenañawu kudi nduñu wakashinshi.—Chimwekeshu 7:9; Hagayi 2:7.

Izaza Dalombolaña Demenañaku Izaza daNduñu

10. Izazanyi denkeluwu mudimu wakufuukula hayuma muyaaka nkulakaji yakusambila nawa chumanyi chafumineñamu muyipompelu?

¹⁰ Chakubula nikujinooka, mudimu weneni wanduñu wakashinshi waya mukwila nawu atela kufuukulaña hayuma yayivulu. Muchipompelu chaweniKristu akusambila, apostolu niaeluda muYerusalema diwu adiña nakwimenaku izaza danduñu hakufuukula hayuma yachipompelu chejima chawiniKristu. (Yililu 15:1, 2) Kufuukula kwezaza dalombolaña muyaaka nkulakaji yakusambila adiña nakukwihana muyipompelu kuhitila munyikanda niañimenu adiña nakwenda. EniKristu akusambila atiyileña kuwaha kutambwila wunlomboli weniwu wawuwahi nawa kuzatila kwawu hamu nezaza dalombolaña kwadiña nakuleta kuwunda nikunuñañana.—Yililu 15:22-31; 16:4, 5; Afwilipi 2:2.

11. Anyi azatishañayi Kristu kulombola chipompelu chindi makonu, nawa izaza daweniKristu awayishewa twatela kudimona ñahi?

¹¹ Neyi chichadiña mumpinji yaweniKristu akusambila, izaza danyanya dawankoñi awayishewa naspiritu diwu elisha Izaza Dalombolaña dawatumbanji twaKristu hamaseki makonu. Kuhitila “muchikasa chindi chachidiilu” chañovu yazatishañayi, Kristu hamu neyi Mutu wachipompelu walombolaña awa antu ashinshika hampinji yakamenañawu mudimu waWanta. (Chimwekeshu 1:16, 20) Albert Schroeder wadiña Mwizaza Dalombolaña, nawa wazatili hampinji yayilehi owu wakumisha chihandilu chindi chahamaseki katata, wasonekeli munsañu yachihandilu chindi nindi: “Izaza Dalombolaña dabulakanaña haChisatu haChisatu, neyi hiyakubulakana atachikaña nakulomba wunlomboli waspiritu yaYehova. Azataña nañovu yayeni nakumona nawu nsañu yejima yinahoshuwu niyuma yejima yinafuukuluwu yinaditeji Nezu daNzambi  Bayibolu.” * Twatela kukuhwelela awa eniKristu awayishewa nawa ashinshika. Kutalisha kudi Izaza Dalombolaña, twatela kulondela nshimbi yakapostolu Pawulu yakwila nawu: “Ovwahilenu anlomboli jenu nakuyitiyilila, muloña ahembaña nyichima yenu [wumi wenu].”—Aheberu 13:17.

Twatela Kulemesha Nduñu waKashinshi

12, 13. Yikumanyi yawanewaña muNsona yatwileñelaña kulemesha izaza danduñu?

¹² Muloña waweni wutwalemeshelaña chikupu izaza danduñu wakashinshi wudi wakwila nawu, neyi twila mwenimu achina twalemeshaña Mwanta, Yesu Kristu. Pawulu wasonekeli kutalisha hadi awayishewa nindi: “Muntu atambikiluwu hadiñayi mwana, nekali dehi nduñu yaKristu. Ayilandili dehi nawuseya.” (1 Akorinda 7:22, 23; Aefwesesa 6:6) Dichi neyi twovwahilaña nakutiyilila wunlomboli wanduñu wakashinshi Niizaza Dalombolaña, dikwila nawu tunakwovwahila Kristu, Mwanta wanduñu. Neyi tumwekesha kalemesha kakeni kuchitwa chazatishañayi Kristu hakwakamena yuma yindi yahetayi hamaseki dikwila nawu ‘tuneteji hatooka netu Yesu Kristu diyi Mwanta, kulonda kumulemesha Nzambi Tata.’—Afwilipi 2:11.

¹³ Muloña wukwawu wamuNsona wutwalemeshelaña nduñu wakashinshi wudi wakwila nawu eniKristu awayishewa hamaseki ayimwekesha muBayibolu neyi “tembeli” mwashakamañayi Yehova “mudi spiritu.” Haniwu muloña ekala, ‘ajila.’ (1 Akorinda 3:16, 17; Aefwesesa 2:19-22) Izaza denidi dalumbululawu neyi tembeli yajila didenkayi Yesu mudimu wakwakamena yuma yahetayi, dikwila nawu nyidimu yikwawu niwuswa wekala mukachi kachipompelu chawiniKristu wambala wanidi izaza danduñu. Hamuloña wanichi, antu ejima ekala muchipompelu achimonaña neyi himudimu wawu wajila wakwovwahila nikulemesha wunlomboli wafumaña kudi nduñu wakashinshi Niizaza Dalombolaña. Chalala, “anyikoku acheñi” achimonaña neyi hikukoleka kwakweni hakukwasha izaza danduñu hakwakamena nyidimu yaMwanta.—John 10:16.

Kukwasha Izaza daNduñu

14. Indi anyikoku acheñi alondelaña ñahi munyima yezaza danduñu wawayishewa nakukalakala neyi ‘akwakukalakala chakubula kuyifweta’ neyi chaprofweteliyi Isaya?

¹⁴ Kudizoza nikutiyilila kwanyikoku yacheñi kudi awayishewa ‘aIsarela aNzambi’ akwishimwineñahu dehi muwuprofwetu waIsaya nawu: ‘Yehova nindi, akwakukalakala chakubula kuyifweta amuEjipitu, niyuma yalandujolañawu aEtiyopiya, yakenza kudeyi, yakekala yeyeyi, niaSheba amayala ataluka, akenza kudeyi, akekala eyeyi; akakulondelaña munyima; akenza kudeyi iku adi mumaleñi; akadimbukila kudeyi, akakulembelela nawu, Chalala Nzambi wudi mudeyi hohu; hikudi wacheñuku, Nzambi wacheñi kwosi.’ (Isaya 45:14) Muchifwikija, makonu  anyikoku acheñi alondelaña izaza danduñu wawayishewa munyima Niizaza Dalombolaña nakulondela wunlomboli wawu. Hamu neyi ‘akwakukalakala chakubula kuyifweta,’ anyikoku acheñi adikeñelaña kuzatisha ñovu jawu nimali awu hakukwasha mudimu wakushimwina wenkeliyi Yesu atumbanji twindi awayishewa hamaseki.—Yililu 1:8; Chimwekeshu 12:17.

15. Indi wuprofwetu waIsaya 61:5, 6 washimwineñahu dehi ñahi kutalisha hawulunda wekala hakachi kanyikoku yacheñi niIsarela wakuspiritu?

¹⁵ Anyikoku acheñi akweti muzañalu nawa ahamekaña hakumukalakela Yehova kuhitila mwizaza danduñu Niizaza Dalombolaña. Awa awayishewa ayimonaña neyi ‘aIsarela aNzambi.’ (Aŋalija 6:16) Hamu neyi “antu akwacheñi” nawa “antu akumpata jacheñi” achifwikija, azatilaña hamu naIsarela wakuspiritu namuzañalu neyi ‘andimi’ nawa ‘akwakuloñesha nyivinyu’ kuhitila muwunlomboli wanawa awayishewa, “atupristu twaYehova” nawa “akwakumukalakela Nzambi.” (Isaya 61:5, 6) Azataña nañovu mumudimu wakushimwina iyi nsañu yaWanta yayiwahi nikwilisha atumbanji kunyuza yejima. Akwashaña izaza danduñu namuchima wumu hakubiña nikwakamena anyikoku amaha.

16. Chumanyi chaleteshaña anyikoku acheñi kukwasha chikupu nduñu wamaana nikashinshi?

¹⁶ Anyikoku acheñi eluka nawu ahetelañamu mukuzata nañovu kwanduñu wakashinshi hakuyinkaña yakudya yakuspiritu hampinji yatelela. Mukudizoza eluka nawu chakubula nduñu wamaana nikashinshi, hiyadi kwiluka walala walema wamuBayibolu, kutalisha hawanta waYehova, hakujilika ijina daYehova, haWanta, nimawulu amaha nimaseki amaha, hawumi, nichekalawu afu nihakumwiluka Yehova, niMwanindi, nispiritu yajilaku. Hamuloña wakuhameka chikupu nikwovwahila, anyikoku acheñi akwashaña ‘amana kwaKristu’ hamaseki hayinu mpinji yakukuminina.—Matewu 25:40.

17. Chumanyi Izaza Dalombolaña chamonañawu kwikala chalema kwila, nawa tukadiza hachumanyi muchibaba chinalondeluhu?

¹⁷ Hamuloña wakwikala antesha, awayishewa hiyanateli kuwanika muyipompelu yejima nakutala yuma yahetayi Kristuku. Hamuloña wanichi, Izaza Dalombolaña datonda amayala mukachi kanyikoku yacheñi hayifulu yakutala tusanji twamutayi, nimujinkambi, nimujiñinza nimuyipompelu yawaYinsahu jaYehova. Komana yililu yetu kutalisha hadi atubiña anyanya, yakuma ñahi kwovwahila kwetu kudi Kristu ninduñu wakashinshi? Tukushinshika hanichi muchibaba chinalondeluhu.

[Tumazu twaheshina]

Kuhitulukamu

• Indi Nlomboli yetu hinyi, nawa chumanyi chinakumwekesha nawu weluka yuma yejima yazatikaña muyipompelu?

• Hampinji yakuwahisha ‘mutembeli,’ anyi awaninuwu nakukalakala neyi nduñu wakashinshi, nawa yumanyi yayinkeluwu kwakamena?

• Yikumanyi yamuNsona yitwatelela kulondela hakwovwahila nikukwasha nduñu wakashinshi?

[Malwihu aKuzatisha haKudiza]

[Nyevulu yidi hefu 25]

“Yuma yahetayi” yakamenañayi “kalama” yabombelamu matala, maprogiramu akukolesha lwakuspiritu, nimudimu wakushimwina

[Mwevulu wudi hefu 26]

Anyikoku acheñi akwashaña nduñu wakashinshi kuhitila mukushimwina nañovu yejima