Ovwahilenu Nakudizoza Kudi Atubiña Akweti Kukeña

‘Ovwahilenu anlomboli jenu nakuyitiyilila.’—AHEBERU 13:17.

1, 2. Nsonanyi yamwekeshaña nawu Yehova niYesu hiyatubiña akweti kukeña?

 YEHOVA NZAMBI niMwanindi Yesu Kristu, Hiyatubiña akweti kukeña. Isaya waprofweteli nindi: ‘Tiyenu, Mwanta Yehova wakenza neyi chenzaña mukwañovu, chikasa chindi chakamuyulila. . . . Wakadiisha mukanka windi wanyikoku neyi kabiña, wakakuñwila anyana muchikasa chindi, wakayisendela hantulu yindi, adi nakwamwisha wakayendeshaña chovu-chovu.’—Isaya 40:10, 11.

² Iwu wuprofwetu wakutuñulula washikijeweli katachi hampinji yafuntiluwu aYudeya asheleluhu muYuda mu 537 B.C.E. (2 Kushindulula 36:22, 23) Washikijeweli cheñi hampinji yayifumishiluwu ashalahu awayishewa ‘muBabiloni Muneni’ mu 1919 kudi Kirusi Muneni, Yesu Kristu. (Chimwekeshu 18:2; Isaya 44:28) Yesu diyi “chikasa” chaYehova chakuyulila, wapompeshaña hamu anyikoku nikuyibiña chiwahi. Yesu yomweni wahosheli nindi: ‘Ami yami kabiña walala, neluka anyikoku yami, nianyikoku ami añiluka.’—Yowanu 10:14.

3. Indi Yehova wamwekeshaña ñahi kukeña munjila yakamenañawu anyikoku indi?

³ Wuprofwetu waIsaya 40:10, 11 wakonkomwena nawu Yehova walombolaña antu jindi chiwahi. (Masamu 23:1-6) Hampinji yazatileñayi hamaseki, Yesu niyena wamwekesheli luwi lwindi kudi atumbanji twindi niantu amakwawu. (Matewu 11:28-30; Maku 6:34) Yehova niYesu aheleli wukatu wawatubiña hela anlomboli amuIsarela adiwili chakubula nsonyi nikukabisha anyikoku jawu. (Ezekeli 34:2-10; Matewu 23:3, 4, 15) Yehova wakanini nindi: “Nakaamwina mukanka wami wanyikoku, hiyakayikwataña nawa cheñuku. Nakasompesha hakachi kanyikoku nanyikoku. Ami nakayinyamwina kabiña wumu, wakayidiishaña, yowu kambuñami Davidi. Diyi wakayidiishaña, diyi wakekala kabiña kawu.” (Ezekeli 34:22, 23) Muyinu mpinji yakukumisha, Yesu Kristu Davidi Muneni, diyi “kabiña wumu” watondawu kudi Yehova hadi ambuñindi ejima hamaseki, eniKristu awayishewa naspiritu ‘nianyikoku acheñi.’—Yowanu 10:16.

 Yesu niAtubiña Anyanya Hiyawaana Yafuma Kudi Yehova kuChipompelu

4, 5. (a) Chawaananyi chachiwahi chayinkayi Yehova antu jindi hamaseki? (b) Chawaananyi chahanayi Yesu kuchipompelu chindi?

⁴ Yehova waheni chawaana chalema kuchipompelu chawiniKristu, hakuyinka antu Jindi hamaseki “kabiña wumu,” Yesu Kristu. Ichi chawaana chaNlomboli wamwiwulu achishimwineñahu dehi haIsaya 55:4 nawu: “Tiya, namuhani ekali chinsahu chanyuza yawantu, ekali nlomboli yanyunza yawantu, nimukwakuyileja mwakwila.” Wejima wawu eniKristu awayishewa niantu ‘amwizaza deneni’ afuma mukachi kanyuza yejima, ninyichidi yejima, niantu ejima, nimadimi ejima. (Chimwekeshu 5:9, 10; 7:9) Atuña chipompelu chamukaayi kejima, “mukanka wumu,” walombolañawu kudi “kabiña wumu,” Yesu Kristu.

⁵ Yesu niyena wahana yawaana yayiwahi kuchipompelu chindi hamaseki. Wahana atubiña anyanya ashinshika amwimbujolaña Yehova niYesu nakulombola nyikoku chiwahi. Kapostolu Pawulu wahosheli hanichi chawaana chachiwahi mumukanda wasonekeleliyi eniKristu muEfwesesa. Wasonekeli nindi: “Chakandaminiyi kwiwulu watweli ankoli muwunkoli, wayinkeli antu yamukunkulu. Washilumu amakwawu ekali apostolu, amakwawu atuprofwetu, amakwawu akwakushimuna nsañu yayiwahi, amakwawu atubiña, amakwawu akwakuleja antu; kulonda kukolesha akwakujila ekali alala, akalakeli akwawu, atuñi chachiwahi mujimba waKristu.”—Aefwesesa 4:8, 11, 12.

6. Indi ankoñi awayishewa adiña nakuzata mumazaza awaeluda ayifwikija ñahi haChimwekeshu 1:16, 20, nawa chumanyi chitunateli kuhosha hadi aeluda atondawu amwizaza danyikoku yacheñi?

⁶ Iyi ‘yamukunkulu mudi antu’ hiyankoñi, hela aeluda atondawu kudi Yehova niMwanindi, kuhitila mudi spiritu yajila kulonda kwakamena nyikoku chiwahi. (Yililu 20:28, 29) Hakusambila awa ankoñi ejima adiña amayala awiniKristu awayishewa. Ana adiña nakukalakala mumazaza awaeluda mukachi kachipompelu chawawayishewa ayifwikija haChimwekeshu 1:16, 20 ‘natutumbwa’ hela “añelu” adi muchikasa chachidiilu chaKristu, chaya mukwila nawu wayilombolaña. Hela chochu, muyinu mpinji yakukuminina chineli aeluda awayishewa adi hamaseki anakukehelaku, aeluda amavulu awiniKristu adi muyipompelu ekala amwizaza danyikoku yacheñi. Chineli aeluda ayitondaña kudi añimenu Ezaza Dalombolaña datwamininañawu naspiritu yajila, niwena ekala muchikasa chachidiilu (hela ayilombolaña) kudi Kabiña Wamuwahi, Yesu Kristu. (Isaya 61:5, 6) Chineli aeluda muyipompelu amwovwahilaña Kristu Mutu wachipompelu, twatela kuzatila nawu hamu chikupu.—Akolose 1:18.

Twatela Kwovwahila niKutiyilila Atubiña Anyanya

7. Kufumbanyi kwaheniyi kapostolu Pawulu hayililu yetu kutalisha kudi ankoñi awiniKristu?

⁷ Atubiñetu amwiwulu, Yehova Nzambi niYesu Kristu akeñaña nawu twovwahileña nikutiyilila atubiña anyanya yenkawu nyidimu muchipompelu. (1 Petulu 5:5) Kapostolu Pawulu amoneneni kusoneka nawu: “Anukenu anlomboli jenu ayilejeli mazu aNzambi; shinshikenu chashakaminuwu, imbujolenu kukuhwelela kwawu. Ovwahilenu anlomboli jenu nakuyitiyilila, muloña ahembaña nyichima yenu [wumi wenu], nawu [amba] kashimunamu; kulonda eli mwenimu namuzañalu bayi nakuneñaku, muloña neyi akuneña hichikuyikwasha enuku.”—Aheberu 13:7, 17.

8. Chumanyi chatwilejayi Pawulu nindi ‘tushinshiki,’ nawa tunateli ‘kwovwahila’ ñahi?

⁸ Ilukenu nenu Pawulu natuleji ‘kushinshika’ hela kutala nakanañachima yafumaña muyililu yakashinshi kawaeluda nikwimbujola yakutalilahu yachikuhwelelu chamuchidiwu. Kufumahu, natwifumbi kulonda twovwahileña nikutiyilila wunlomboli wanawa amayala atondawu. Muntu wadiza jaBayibolu R. T. France walumbulula nindi muchiGriki  chacheni, izu datuntululawu nawu “Ovwahilenu” bayi neyi “didu izu dadeni dazatishañawu hakwovwahilaku, ilaña dalumbulula ‘kushinjila,’ chaya mukwila nawu kwiteja wunlomboli wawu.” Twovwahilaña aeluda bayi neyi muloña atwileja kuyovwahila Mwizu daNzambi hohuku, ilaña hamuloña wakwila atushinjila cheñi nawu atukeñelaña yuma yayiwahi yashindamena kuWanta waNzambi, nichihandilu chetu chakumujimba niwuspiritu wetu. Chalala tukwikala namuzañalu neyi tukudikeñela kwiteja wunlomboli wawu.

9. Muloñadi chichekalila chalema kudetu ‘kutiyilila’ kushilahu hakwikala ovwahila?

⁹ Hela chochu, tunateli kwila ñahi neyi chakwila hituneteji netu munsañu yimu wunlomboli wawaeluda bayi neyi diyi njila yayiwahi yakwililamu yumaku? Iyi diyi mpinji yitwatela kumwekesha kutiyilila. Chekala chaswayi kwovwahila neyi chakwila yuma yejima yidi chiwahi nawa tuneteji, ilaña tukumwekesha netu twatiyililaña chikupu neyi twiteja hela chakwila halwetu hitunatiyishishi nshimbi yinahanewuku. Petulu wekalili kapostolu, mukuhita kwampinji wamwekesheli kutiyilila kwamuchidiwu.—Luka 5:4, 5.

Yikuma Yiwana Yitwatelelela Kwovwahila Anlomboli awiniKristu

10, 11. Munjilanyi ankoñi ‘mwalejeleluwu mazu aNzambi’ akwawu eniKristu amuyaaka nkulakaji yakusambila nimakonu?

¹⁰ HaAheberu 13:7, 17, yinasonekuwu hewulu, kapostolu Pawulu wahana yikuma yiwana hamuloña wutwatelela kwovwahila nikutiyilila ankoñi awiniKristu. Muloña watachi wudi wakwila nawu ‘atwilejaña mazu aNzambi.’ Anukenu nenu ‘yamukunkulu mudi antu’ yahaniniyi Yesu muchipompelu yekalaku kulonda “kukolesha akwakujila.” (Aefwesesa 4:11, 12) Yesu wakolesheli yitoñojoka niyililu yaweniKristu amuyaaka nkulakaji yakusambila kuhitila mukuyinka atubiña anyanya, amakwawu ayoneneni kusonekela yipompelu nyikanda. Yesu wazatishili ankoñi atondewa naspiritu kulombola nikukolesha eniKristu akusambila.—1 Akorinda 16:15-18; 2 Timotewu 2:2; Titusa 1:5.

¹¹ Makonu Yesu watwilombolaña kuhitila mudi ‘nduñu wamaana nikashinshi,’ amwimenañaku kudi Izaza Dalombolaña niaeluda atondewa. (Matewu 24:45) Hamuloña wakulemesha “Kabiña muneni,” Yesu Kristu, twashaña kashinshi kukufumba kwaPawulu kwakwila nawu: “Yilukenu [Yilemeshenu] akalakalaña mukachi kenu, ayilombolaña mudi Mwanta nakuyifumba.”—1 Petulu 5:4; 1 Atesalonika 5:12; 1 Timotewu 5:17.

12. Indi ankoñi ‘ahembaña ñahi wumi wetu’?

¹² Muloña wamuchiyedi wakutiyilila ankoñi awiniKristu wudi wakwila nawu “ahembaña nyichima [wumi wetu].” Neyi amona chuma chidi chejima muyililu yetu chinateli kusha wuspiritu wetu muwubanji, ekala adiloñesha kutwifumba nayitoñojoka  yakutwikolesha. (Aŋalija 6:1) Izu dachiGriki datuntululawu nawu ‘kuhemba’ dalumbulula nawu ‘kubula kukaama tulu.’ Kwesekeja namuntu wumu wadiza jaBayibolu, daya ‘mukwila nawu kutwalekahu kutona kwakabiña.’ Kubombela hakutwalekahu kwikala atona lwakuspiritu, aeluda atela kubula kumona tulu nawufuku muloña wakwakamena nshakaminu yetu yawuspiritu. Komana twatela kuzatila hamu chikupu nawatubiña anyanya akweti kukeña azataña nañovu hakwimbujola kwakamena kwakuwahi kwaYesu Kristu, “kabiña kanyikoku muneni.”—Aheberu 13:20.

13. Indi eniKristu ejima niankoñi amba kashimunamu kudinyi nawa mujinjilanyi?

¹³ Muloña wamuchisatu wutwatelela kuzatila hamu nawankoñi wudi wakwila nawu atwihembaña hamu ‘neyi amba kashimunamu.’ Ankoñi eluka nawu hiyatubiña anyanya akalakalaña muwunlomboli wawa Atubiña amwiwulu, Yehova Nzambi niYesu Kristu. (Ezekeli 34:22-24) Yehova diyi Mwini anyikoku, ‘wayilandili namashi aMwanindi,’ nawa Wayimonaña ankoñi neyi akashimunamu kwesekeja nachahembañawu mukanka Windi, chatela kwikala ‘naluwi.’ (Yililu 20:28, 29) Dichi wejima wetu twamba kashimunamu kudi Yehova kwesekeja nanjila yitwalondelaña nshimbi jindi. (Aroma 14:10-12) Neyi twovwahila aeluda atondewa tunakuhana wunsahu wakumwekesha kutiyilila kwetu kudi Kristu, Mutu wachipompelu.—Akolose 2:19.

14. Chumanyi chinateli kuletesha ankoñi awiniKristu kukalakala ‘nachineñi,’ nawa chumanyi chikufumamu?

¹⁴ Pawulu waheni muloña wamuchiwana wutwatela kudizoza nakutiyilila ankoñi aweniKristu. Wasonekeli nindi: “Kulonda eli mwenimu namuzañalu bayi nakuneñaku, muloña neyi akuneña hichikuyikwasha enuku.” (Aheberu 13:17) Nanyidimu yawu yakola yakutañisha, kubiña, nikulombola mumudimu wakushimwina, kuhemba yisaka yawu, nikwakamena nyiloña muchipompelu, eluda awiniKristu ekala nanyidimu yayivulu. (2 Akorinda 11:28, 29) Neyi tubula kuyitiyilila, dikwila nawu tunakuyishilaku nyidimu yikwawu. Ichi ‘chikuyineñesha.’ Neyi twikala naspiritu yakudikaña tukumuhilisha Yehova nawa hichikutukwashaku. Ilaña neyi twovwahila nikuzatila nawu hamu, aeluda atela kuzata mudimu wawu namuzañalu, nawa chumichi chaletaña kunuñañana nimuzañalu hakuzata mumudimu wakushimwina Wanta.—Aroma 15:5, 6.

Twatela Kumwekesha Kutiyilila

15. Tunateli kumwekesha ñahi kwovwahila nikutiyilila kwetu?

¹⁵ Kudi jinjila jajivulu jitwatela kuzatila hamu nawankoñi atondewa. Hamuloña wakwinjilila njila yakuzatilamu yayiha mwiluña dakushimwina, komana aeluda analoñeshi kuhumañana kwakuya mwiha hamafuku nimpinji yinakukeñeka kuhimpa munzatilu yetu? Twatela kushaku kashinshi chikupu kulonda kukwasha iyi ntanjikilu yayiha. Neyi twila mwenimu tunatweshi kutambwila nkisu yitwabula kukuhwelela. Komana nkoñi wamudimu nakwendela Kudiza kwaMukanda haChipompelu kutwekala? Twatela kuwanika mumudimu wakushimwina chikupu neyi chinatwesheki munowu mulungu. Komana tunatambwili mpanji muShikola yaMudimu waTeokalatiki ntahi ndi? Twatela kufwila kuwanikaku kulonda kuhana mpanji yetu. Komana nkoñi waKudiza kwaMukanda haChipompelu nabidiki nindi himpinji yezaza detu yakuwahisha Itala daWanta? Twatela kumukwasha chikupu kwesekeja mwakumina ñovu jetu nikukola kwetu lwakumujimba. Muniji njila ninjila jikwawu, twamwekeshaña kutiyilila kwetu kudi amayala atondawu kudi Yehova niMwanindi kwakamena mukanka.

16. Neyi eluda hanakwila yuma kwesekeja nanshimbuku, muloñadi ichi chichikubulila kutwinka wuswa wakudikaña?

¹⁶ Hampinji yikwawu eluda hanateli kwila yuma kwesekeja nanshimbi yezaza danduñu  wakashinshi Niizaza dawu Dalombolañaku. Neyi natwalekuhu kwila muniyi njila, wamba kashimunamu kudi Yehova, “Kabiña, Mukwakuhemba wumi [wetu].” (1 Petulu 2:25) Ilaña yiluwa yidi yejima yakwilayi eluda wudi wejima hiyatela kutwinka wuswa wakubula kwovwahilaku. Yehova hakwashaña antu adikañañaku.—Kuchinda 12:1, 2, 9-11.

Yehova Wakiswilaña Antu Anuñañana

17. Indi yililu yetu yatela kwikala ñahi kutalisha hadi ankoñi jetu?

¹⁷ Yehova Nzambi weluka nindi amayala atondayi hamu neyi ankoñi hiyamanininaku. Hela chochu, nakuyizatisha nawa kuhitila mudi spiritu yindi, walombolaña antu jindi hamaseki. Chekala chalala kudi aeluda niejima wetu nawu “ñovu jabadika nankashi jiikali jambala jaNzambi, jibuli kwikala jetwetu aweni.” (2 Akorinda 4:7) Dichi twatela kumusakilila Yehova hachuma chinakukoñayi kuhitila mudi ankoñi ashinshika, nawa twatela kuzatila nawu hamu.

18. Neyi tutiyilila ankoñi jetu, chumanyi chacheni chitunakwila?

¹⁸ Ankoñi azataña chikupu kulonda kukalakala kwesekeja nanshimbi yaYehova yahanayi kudi atubiña atondayi kutala mukanka windi mumafuku akukuminina, neyi mazu awanewaña haYeremiya 3:15 nawu: “Nakayinka nitubiña twamwaya muchima wami, akayidiishaña nikwiluka nikashinshi.” Chalala aeluda adi mukachi ketu anakukoña mudimu wawuwahi wakutañisha nikukiña nyikoku yaYehova. Wejima wetu tutwalekenuhu kuhameka hanyidimu yawu kuhitila mukudikeñela kuzatila nawu hamu, mukwovwahila nikutiyilila kwetu. Neyi tukwila mwenimu, tukumwekesha kuhameka kwetu kudi Atubiña amwiwulu, Yehova Nzambi niYesu Kristu.

Chakuhitulukamu

• Munjilanyi mwamwekeshela Yehova niYesu Kristu kwikala Atubiña akweti kukeña?

• Kubombela hakwovwahila, muloñadi kutiyilila chikwakeñekelaña?

• Mujinjilanyi mutwatelela kumwekeshela kutiyilila kwetu?

[Malwihu aKuzatisha haKudiza]

[Mwevulu wudi hefu 29]

Aeluda awiniKristu ovwahilaña wunlomboli waKristu

[Nyevulu yidi hefu 31]

Kudi jinjila jajivulu jitwatela kumwekeshela kutiyilila kwetu kudi atubiña atondawu kudi Yehova