Izu daYehova daDumi

Yikuma Yamaneni Kufuma muMukanda waYeremiya

KUKALA kwalejeliyi Yeremiya antu jindi kwayitiyishili woma. Tembeli yajila yakudifukwilamu yadiña hakachi muYerusalema hankulakaji yayaaka yisatu akayocha yejima. Musumba waYerusalema niituña daYuda akayijilumuna nakushala kwamahembi nawa antu ashakamañamu akayitwala muwunduñu. Wunsahu weniwu nikubidika kwawunsompeshi wukwawu wekala mumukanda waYeremiya mukanda wahiñamu kutoha muBayibolu. Washimuna cheñi hayuma yahitilimu Yeremiya hampinji yazatileñayi mudimu windi wawukaprofwetu nakashinshi hadi yaaka 67. Nsañu yekala mumukanda weniwu hiyayisoneka mundondaku, ilaña ayisoneka kwesekeja nayuma yazatikileña.

Muloñadi mukanda wamuBayibolu waYeremiya chiwunekalili walema kudetu? Kushikijewa kwawuprofwetu weniwu kwakoleshaña chikuhwelelu chetu mudi Yehova Mukwakushikija yikaninu yindi. (Isaya 55:10, 11) Mudimu wazatileñayi Yeremiya wawuprofwetu niyililu yawantu kutalisha kunsañu yindi yinadifwanuku nayamakonu. (1 Akorinda 10:11) Hela chochu, nsañu yasonekawu hanochu Yehova chazatiliyi nawantu jindi yamwekeshaña yililu yindi nichitunateli kudizilaku yuma yayivulu.—Aheberu 4:12.

“ANTU AMI ANAKOÑI YUMA YATAMA YIYEDI”

(Yeremiya 1:1–20:18)

Mumwaaka wekumi nayisatu wakuyuula kwaYosiya mwanta wawaYuda, diyi mpinji yatachikiliyi Yeremiya mudimu windi wawuprofwetu nawa hahitili yaaka 40 nakushika kukujilumuna kwaYerusalemu mu 607 B.C.E. (Yeremiya 1:1, 2) Yeremiya wabidikili nankashi nakushimuna hatooka kutama kwawaYuda nihawunsompeshi waYehova kutalisha hadi Yerusalema chelili kunashali dehi yaaka 18 yakuyuula kwaYosiya. Yehova wahosheli nindi, “Yerusalema nukumubalumuna kwanyilumba nyilumba, nyikala yamuYuda nukuyibalumuna kwikala yihembi yakadi akushakamamu.” (Yeremiya 9:11) Muloñadi? Wahosheli nindi, “Muloña antu ami anakoñi yuma yatama yiyedi.”—Yeremiya 2:13.

Mazu wenawa ahosheli cheñi hakufuntisha ashaliluhu abalumukili munyichima. (Yeremiya 3:14-18; 12:14, 15; 16:14-21) Yeremiya amukaanini. “Mukulumpi wawakwakutala itala daYehova” wamweteli Yeremiya nakumusha mumpompa wufuku wejima.—Yeremiya 20:1-3.

Malwihu amuNsona Anayakuli:

Yeremiya 1:11, 12—Indi kusoñamisha kwaYehova kutalisha kwiizu didi kunadifwani ñahi “(na)kamutondu kamumondi”? Mutondu wamumondi himutondu wumu wekala hakachi kanyitondu yakenukaña tachi mumpinji yanooña. Muchifwikija Yehova ‘wamenekeleña  nakuyitemesha atuprofwetu jindi’ budidi kulonda kusoñamisha antu hawunsompeshi windi nawa ‘watwalekeluhu kwikala watona’ kushika tuhu nimpinji yashikijeweli wuprofwetu wawu.—Yeremiya 7:25.

Yeremiya 2:10, 11—Chumanyi chaleñeleli yililu yawaIsarela abulili chikuhwelelu kwikala yambukaku? Nyuza yabulili kumwakama Nzambi yakumujika waKitimi niyakumusela wakuKedari akuñulwileña tunzambi twakunyunza yacheñi nakutubomba hatunzambi twawu, iyi yitoñojoka yakuhiñisha tunzambi twakunyuza yacheñi yadiña hichishimashima. Hela chochu, aIsarela amushili Yehova nakuhiñisha kulema kwaNzambi wamumi nawankishi.

Yeremiya 3:11-22; 11:10-12, 17—Muloñadi Yeremiya chabombelelumu wanta wanyitaña ikumi wakukabeta kaluwunda mukubidika kwindi hela chakwila Samariya amujilumwini mu 740 B.C.E? Hamuloña wakwila kujilumuna kwaYerusalema mu 607 B.C.E. kwadiña hichinjikijilu chawunsompeshi waYehova kumuza wejima waweniIsarela bayi neyi kudi aYudeya hohuku. (Ezekeli 9:9, 10) Hanyima yakujilumuna Yerusalema wanta wanyitaña ikumi, adiña nakuwimenaku muYerusalema kuhitila mukuyibombelamu eniIsarela kudi kañanda kaNzambi waprofweteleña.

Yeremiya 4:3, 4—Indi nshimbi yeniyi yinakulumbululadi? A Yudeya abulili chikuhwelelu akeñekeleña kuloñesha nyichima yawu, kuyovwahisha nikufumisha yuma yatama yadiña munyichima yawu. Ateleleli kufumisha “nyivumbu yawudima” munyichima yawu dikwila nawu kuleka kutoñojoka yuma yatama nikufuukula kwatama. (Yeremiya 9:25, 26; Yililu 7:51) Chumichi chakeñekaña kuhimpa nshakaminu, nakuleka yuma yatama nikwila yuma yakeñañayi Nzambi.

Yeremiya 4:10; 15:18—Munjilanyi Yehova mwadimbililiyi antu adikañili nindi? Mumafuku aYeremiya kwadiña atuprofwetu ‘aprofweteleña jakutwamba’. (Yeremiya 5:31; 20:6; 23:16, 17, 25-28, 32) Yehova hayitejeli nawu ahosheña nsañu yakutwambaku.

Yeremiya 16:16—Indi mazu akwila nawu Yehova ‘wakatambeka akwakulowa anshi amavulu’ ‘niayibinda amavulu’ anakulumbululadi? Anakulumbulula kutemesha amashidika kulonda kuya nakukeña aYudeya abulili chikuhwelelu akasompeshayi Yehova. Kwesekeja nachahosha Yeremiya 16:15 iyi vasi yinakulumbulula cheñi kukeña-keña eniIsarela abalumukili munyichima.

Yeremiya 20:7—Munjilanyi Yehova mwazatishililiyi ñovu jindi hadi Yeremiya nikumudimba? Hamuloña wakumudiwula nikumukaana nikumukabisha hampinji yashimwineñayi hawunsompeshi waYehova, Yeremiya watela waditiyili nindi hadiña nañovu yakutwalekahuku. Hela chochu, Yehova wazatishili ñovu jindi kulonda kukañesha yitoñojoka yeniyi nawa wamukolesheli Yeremiya kutwalekahu. Dichi Yehova wamudimbili Yeremiya kuhitila mukumuzatisha kulonda kumanisha yuma yamweniyi kaprofwetu nindi hanateli kuyitweshaku.

Yuma Yitukudizilaku:

Yeremiya 1:8. Mpinji jikwawu Yehova nateli kupulwisha antu jindi kumakabi kuhitila mukuzatisha ansompeshi abula chambu nikuhiñisha akulumpi janyidimu akalisha namawahi nyichima, hela kuhitila mukukolesha akwakudifukula indi kulonda kumika.—1 Akorinda 10:13.

 Yeremiya 2:13, 18. A Isarela abulili chikuhwelelu akoñeli yuma yiyedi yatama. Ashili Yehova nsulu yamuzañalu nawa mukwakukiña. Aditapilili ishima dachifwikija awenawu kuhitila mukukeña wukwashi kufuma kudi amashidika amuEjipitu niAshuri. Makonu, kushiya Nzambi walala nakukeña maana awantu ninsañu yamatuña nachiyulu yamukaayi chidi neyi kuhiñisha “kaseloki kamenji amomi” “[na]mashima abaloka.”

Yeremiya 6:16. Yehova wakoleshaña antu jindi adikañaña kuhulumana nakudishinshika kulonda kufunta “munjila” yawankakulula jawu ashinshika. Twatela kudishinshika mpinji yejima kulonda kumona neyi tunakwenda munjila yakeñayi Yehova.

Yeremiya 7:1-15. Chayileñeleli aYudeya kubula kupuluka muloña akuhweleleli mutembeli nawu dimu mwakudikiñila. Twatela kwendaña nachikuhwelelu bayi chakumona namensuku.—2 Akorinda 5:7.

Yeremiya 15:16, 17. Kufwana Yeremiya tunateli kudikaña kukutuzeyesha. Tunateli kwila mwenimu kuhitila mukudiluñisha nakutaña Bayibolu halwetu, nikutumbakesha ijina daYehova kuhitila mumudimu wakushimwina nikudizisha, nawa nikutondolwela kudikunda kwatama.

Yeremiya 17:1, 2. Nyilambu yahanineñawu aYudeya yamutiyishili Yehova kumuchima kutama muloña wayuma yatama yakoñeleñawu. Yililu yatama yaleñelaña nyilambu yetu yakumuhameka Yehova kuyikaana.

Yeremiya 17:5-8. Twatela hohu kukuhwelela antu nimashikola ahewulu neyi chakwila azata kwesekeja nankeñelu yaNzambi ninshimbi jamuBayibolu. Twatela kukuhwelela mudi Yehova nkawindi neyi tunakukeña kupuluka, kuwunda kwalala nikukiñewa.—Masamu 146:3.

Yeremiya 20:8-11. Bayi twiteja kadiwu, ikañesha, hela makabisha kufuntisha hanyima mudimu wetu wakushimwina Wantaku.—Yakoba 5:10, 11.

“IÑIJENU NSHIÑU JENU MUMPANDA YAMWANTA WAKUBABILONI”

(Yeremiya 21:1–51:64)

Yeremiya wabidikili kutalisha hawunsompeshi wamawanta awana amuYuda akukumishaku niatuprofwetu akutwamba, atubiña atama, niatupristu atama. Kutalisha kudi ashalahu ashinshika adi neyi nyikuyu yayiwahi Yehova wahosheli nindi: ‘Nakasha mesu ami hadi wena munjila yayiwahi.’ (Yeremiya 24:5, 6) Kapetulu 25 kalumbulula wuprofwetu wusatu mukwihihisha hawunsompeshi walumbululawu chikupu mutupetulu tukwawu.

Atupristu niatuprofwetu atuñili kafuta kakumujaha Yeremiya. Yeremiya wayilejeli nindi atela kuzatila mwanta wakuBabiloni. Yeremiya wamulejeli Mwanta Zedekiya nindi: “Iñijenu nshiñu jenu mumpanda yamwanta wakuBabiloni.” (Yeremiya 27:12) Hela chochu, “Wapalañesheli aIsarela wakayipompesha.” (Yeremiya 31:10) Haniwu muloña aRekabi ayikanini. Yeremiya amushili “[mukaleya] muchipañu chawatulamba.” (Yeremiya 37:21) Yerusalema amujilumwini, nawa antu amavulu ayitwalili muwunkoli. Yeremiya ninsoneki yindi Baruki adiña hakachi kenzavu dawantu abulili kusendawu muwunkoli. Hela chakwila Yeremiya wayisoñamishili kubula kuya kuEjipitu ilaña antu atiyili woma ayili. Tupetulu 46-51 twalumbulula hamazu ahosheliyi Yeremiya kutalisha kudi nyuza.

Malwihu amuNsona Anayakuli:

Yeremiya 22:30—Kamona awamazu akañesheli Yesu Kristu kuswana hetanda daDavidi? (Matewu 1:1, 11) Hidimuku. Iku kufuukula kwakañesheli mwana wudi wejima wankakulula yaYehoyakini kubula “kushakama hetanda  daDavidi . . . muYudaku.” Yesu wadiña nyuli wakwiwulu bayi hetanda damuYudaku.

Yeremiya 23:33—Indi chiteli chaYehova hichumanyi? Mumafuku aYeremiya, kubidika kwabidikileñayi kaprofwetu kutalisha hakujilumuka kwaYerusalema kwadiña hichiteli kudi akwawu amuna mwituña. Antu abulileña kutiyilila adiña neyi hiyiteli kudi Yehova munjila yakwila wayikaanini. Chochimu nsañu yamuNsona kutalisha hakujilumuka kwaKristendomu hichiteli kudi Kristendomu, nawa antu abulaña kutiyilila kumazu hiyiteli kudi Nzambi.

Yeremiya 31:33—Indi nshimbi yaNzambi ayisonekaña mumuchima munjilanyi? Neyi muntu yaswejesha kukeña nshimbi yaNzambi chakwila wudi nachipepa chakukeñesha kwila nkeñelu yaYehova, muniyi njila tunateli kuhosha netu nshimbi yaNzambi ayisoneka mumuchima windi.

Yeremiya 32:10-15—Muloñadi chiyasonekeleluwu nshimbi jiyedi jakuditeja jadifwana? Nshimbi yakuditeja yabuliliwu kusweka, yadiña yakwesejelaku. Nshimbi yakuditeja yaswekeluwu yadiña yakuyikwashaku kulonda kumona neyi yikwawu yaloña. Yeremiya watwimikila chakutalilahu kutalisha hakulondeja nshimbi jeniji jatelela neyi kunamwekani kukala nawantaña niakwetu akakwitiya.

Yeremiya 33:23, 24—Indi “yisaka yiyedi” yinashimunuwu hanu hiyanyi? Chisaka chimu hichisaka chevumu daMwanta Davidi, nawa chikwawu hichisaka chawatupristu anyana kaAroni. Kujilumuna kwaYerusalema nitembeli yaYehova, kwamwekesheli neyi Yehova wayikaanini yeniyi yisaka yiyedi nawa hamba kekala nawanta hanu heseki hela kufuntisha kudifukula kwinduku.

Yeremiya 46:22—Muloñadi izu daEjipitu chinadifwanishiluwu nakapela? Ichi anateli kuchifwanisha kumuswalu wakapela wunakutemuka, hela nsonyi jatiyili muza waEjipitu hamuloña wakumona kukala. Iku kwesekeja kunakumwekesha neyi chadiñi chuma chamukunkulwayi kudi aFwaro amuEjipitu avwalileña chifwikija chakapela kumutu wamweneñawu nawu wajila kulonda kudikiña nachu kudi kapela wamumbanda wejina daUatchit.

Yuma Yitukudizilaku

Yeremiya 21:8, 9; 38:19. Henohu Yerusalema kanda amujilumuni Yehova wayilejeli antu ashakamineñamu abulili kubalumuka munyichima akeñeleñayi kujilumuna chuma chiyateleleli kwilawu. Mwalala “wushona windi wawuvulu.”—2 Samweli 24:14; Masamu 119:156.

Yeremiya 31:34. Twakundejewaña hakwiluka netu Yehova hanukaña nshidi jawantu anakenañayi nammwenu yakukeña kutusompesha kumbiduku.

Yeremiya 38:7-13; 39:15-18. Yehova havulamenaña nyidimu yetu yakashinshi yabombelamu ‘kukalakela akwakujilaku.’—Aheberu 6:10.

Yeremiya 45:4, 5. Neyi chichadiña mumufuku akukuminina amuYuda, kushakama muyinu mpinji ‘yamafuku akukuminina’ himpinji yakukeña yuma yamaneni yidi neyi maheta, yifulu yeneni, hela kwikala nayuma yakumujimba yakudikiña nachuku.—2 Timotewu 3:1; 1 Yowanu 2:17.

YERUSALEMA ANAMOCHI

(Yeremiya 52:1-34)

Muchaaka cha 607 B.C.E. Zedekiya wadiña nayaaka 11 hawanta windi. Mwanta Nebukaneza wamuBabiloni wakuchikili Yerusalema hadi tukweji 18. Hefuku damuchitanu nachiyedi dakakweji kamuchitanu, muchaaka cha 19 chaakuyula kwaNebukaneza, mukulumpi wawatulama Nebuzaradani wayili kuYerusalema. (2 Anyanta 25:8) Hekwawu hanzi yamusumba hadiña nakushakamayi, Nebuzaradani watañili nshakaminu yamuYerusalema nawa wafukwili kukoñahu chuma chimu. Hanyima yamafuku asatu, mukakweji kekumi ‘weñilili’ muYerusalema. Chalondeleluhu wocheli musumba.—Yeremiya 52:12, 13.

Yeremiya walumbulula nsañu kutalisha hakuhumuka kwaYerusalema. Kulumbulula kwindi kwalumbulula hayikuma yimu yawanewaña hamukeña. Yikuma yeniyi yawanewaña muBayibolu hamukanda waMukeña.

[Mwevulu wudi hefu 8]

Kubidika kwaYeremiya kwabombelelumu wunsompeshi waYehova kutalisha hadi Yerusalema

[Mwevulu wudi hefu 9]

Indi Yehova ‘wazatishili ñahi ñovu jindi hakumukwasha Yeremiya’?

[Mwevulu wudi hefu 10]

‘Neyi chidi iyi yikuyu yayiwahi dichi chinakafuukula niankoli awaYuda.’—Yeremiya 24:5