Chipompelu Chimuhameki Yehova

‘Nukushimwina ana kwami ijina deyi; . . . nukukuhamekela mukachi kachipompelu.’—AHEBERU 2:12.

1, 2. Muloñadi chipompelu chichawahila nankashi, nawa chikweti mudimwinyi weneni?

 KUFUMA tuhu kunyaka, antu ekala nawubwambu nikukiñewa muchisaka. Hela chochu, Bayibolu yashimunaña chisaka chikwawu chawantu amavulu amukaayi kejima anakudiluñisha wubwambu wabadika nikukiñewa makonu. Ichi chisaka hichipompelu chawiniKristu. Hela chakwila mwekala muchisaka chazatilaña hamu, hela nehi, munateli nawa munatweshi kusakilila hayuma yinaloñeshiyi Nzambi kuhitila muchipompelu. Dichi neyi mwapompaña nawaYinsahu jaYehova, munateli kwiteja nenu muchipompelu mwekala kudikunda kwakuwahi kumwadiluñishaña nikwikala akiñewa.

² Chipompelu hichekala hohu neyi izanvu dawantu dazatilaña hamuku. Hichidi neyi izanvu damuchituñilu hela chendu kwakuñulukilaña antu achisemwa chimu hela akeña yisela yoyimuku. Ilaña, nkeñelu yachipompelu yekala hohu yakumuhameka Yehova Nzambi. Iyi nkeñelu yatachikili dehi, neyi chakwonkomwenaña mukanda waMasamu. HaMasamu 35:18, twatañañahu nawu: “Nukukusakilila muchipompelu cheneni, nukukuhameka mukachi kawantu amavulu.” Chochimu, Masamu 107:31, 32 yatukwonkomwenaña nawu: “Antu mutenowu adi kumusakilila Yehova chaswejayi luwi! O chelilañayi anyana kawantu nyidimu yindi yakuhayamisha! Amutuumbakeshi nawa muchipompelu chawantu.”

3. Kwesekeja nachahosheliyi Pawulu, indi chipompelu chazataña mudimwinyi?

³ Kapostolu wawiniKristu Pawulu wahosheli hamudimu wukwawu walema wazataña chipompelu hakuhosha hadi “antu amwitala daNzambi, chochipompelu chaNzambi wamumi, chochishimi, nihakolela nsañu yalala.” (1 Timotewu 3:15) Indi Pawulu wadiña nakuhosha hachipompelu chimu chidihi? Indi Bayibolu yazatishaña ñahi izu dakwila nawu “chipompelu”? Indi chipompelu chatela kutwikwasha ñahi mukuhanda kwetu niyuma yitunakuchiñeja? Hakwila tuwani ñakwilu, tusambilenu kushinshika njila jashiyashana jazatishilañamu Izu daNzambi izu dakwila nawu “chipompelu.”

4. Munjilanyi izu dakutena nawu “chipompelu” muyavula kudizatishilawu muNyikanda yachiHeberu?

⁴ Izu dachiHeberu diyavula kubalumuna nawu “chipompelu” dafuma kukulumbulula kwakwila nawu “kupompa” hela “kupompesha.” (Kuhituluka 4:10; 9:10) Ñimbi yamasamu wazatishili izu dakwila nawu “chipompelu” kutalisha kudi añelu amwiwulu, nawa atela kudizatisha hakutena izanvu dawantu atama. (Masamu 26:5; 89:5-7) Hela chochu, kakavulu Nyikanda yachiHeberu yazatisha idi izu kutalisha kudi aIsarela. Nzambi wahosheli nindi Yakoba wukekala “mukanka [chipompelu] waweni wanyichidi yawantu,” nawa chamwekeni. (Kutachika 28:3; 35:11; 48:4) A Isarela ayitambikili, hela ayitondeli, kwikala “chipompelu chaYehova,” ‘chipompelu chaNzambi walala.’—Kuchinda 20:4; Nehemiya 13:1; Yoshuwa 8:35; 1 Samweli 17:47; Mika 2:5.

5. Izwinyi dachiGriki davula kubalumunawu nawu “chipompelu,” nawa munjilanyi mwatela kudizatishilawu?

⁵ Izu dadifwanaku dachiGriki daek·kle·siʹa, dafuma kumazu ayedi achiGriki alumbuluka nawu “kwidika hanzi” ‘nikutambika.’ Datela kuzatika cheñi kwizanvu dinapompi nakwila yuma yabula kukundama kunsakililu, chidi  neyi “chipompelu” chasañumwiniyi Demeterusa hakumwimakena Pawulu muEfwesesa. (Yililu 19:32, 39, 41) Kakavulu Bayibolu yazatishaña idi izu hakutena chipompelu chawiniKristu. Nyikanda yikwawu yabalumuna idi izu nawu “chipompelu,” ilaña The Imperial Bible-Dictionary yashimunaña nawu “muchitiyañenu chachiha . . . hiyamwekeshamu itala dadeni mwadiña nakupompela eniKristu nakudifukulaku.” Hela chochu, muNyikanda yachiGriki yawiniKristu, twawanañamu izu “chipompelu” dazatishawu munjila jiwaana jashiyashana.

Chipompelu chaNzambi chawaWayishewa

6. Indi Davidi niYesu elileñadi muchipompelu?

⁶ Kapostolu Pawulu hakuzatisha mazu aDavidi ekala haMasamu 22:22 kudi Yesu wasonekeli nindi: “Nukushimwina ana kwami ijina deyi; nukukwimbila tumina twakukuhameka mukachi kachipompelu. Dichi chamuwahilili yena [Yesu] kwikala neyi ana kwindi muyuma yejima, kulonda ekali kapristu muneni waluwi nakashinshi kunsañu yaNzambi.” (Aheberu 2:12, 17) Davidi wadiña nakumushimekela Nzambi mukachi kachipompelu chamuIsarela wakushankulu. (Masamu 40:9) Hanu dinu, chumanyi chateneneñayi Pawulu hakuhosha nindi Yesu wamuhamekeleleña Nzambi ‘mukachi kachipompelu’? Chipompelu chimu chidihi chateneneñayi?

7. Munjilanyi yatachi Nyikanda yachiGriki muyazatishila izu dakutena nawu “chipompelu”?

⁷ Nsañu yitwatañaña haAheberu 2:12, 17 yalema nankashi. Yamwekeshaña nawu Kristu amubombeleli hamukanka wawantu amuchipompelu mwashimwineñayi ijina daNzambi kudi ana kwindi. Indi ana kwindi adiña anyi? Adiñi antu atuñili chibalu ‘chanyana kaAbarahama,’ ana kwa Kristu awayishewa naspiritu, “akwakutambwila kutambika kwatambikawu mwiwulu.” (Aheberu 2:16–3:1; Matewu 25:40) Mwalala, nzatishilu yatachi ‘yachipompelu’ muNyikanda yachiGriki yawiniKristu mwekala antu amavulu amwizanvu dawatumbanji twaKristu awayishewa naspiritu. Awa 144,000 awayishewa atuña ‘chipompelu chawawedi asonekawu dehi mwiwulu.’—Aheberu 12:23.

8. Mazwinyi ahosheliyi Yesu akutuña Chipompelu chawiniKristu kumbidi?

⁸ Yesu washimwini nindi ichi “chipompelu” chawiniKristu akachituña. Kwakwihi nachaaka chimu nakufwa kwindi, Yesu wamulejeli Petulu nindi: “Yeyi Petulu, helolidi dihu nakatuñila chipompelu chami, niyisu ya[hadesi] yikachikañanya.” (Matewu 16:18) Petulu niPawulu ejima wawu elukili chikupu nawu Yesu diyi ilola ateneniwu. Petulu wasonekeli nindi owu atuñawu neyi “malola amomi” etala dakuspiritu helola, Kristu, adiña ‘antu ambala adimena; kulonda kutiyakesha kashinshi kakeni kaYena wayitambikili.’—1 Petulu 2:4-9; Masamu 118:22; Isaya 8:14; 1 Akorinda 10:1-4.

9. Indi chipompelu chaNzambi atachikili kuchituña mpinjinyi?

⁹ Mpinjinyi yatachikiliwu ‘antu ambala adimena’ kuyipompesha muchipompelu chawiniKristu? Hadiña haPentekosta 33 C.E. hechililiyi Nzambi spiritu yajila hadi atumbanji apompeleli muYerusalema. Hadodina ifuku, Petulu wahanini mpanji yayiwahi chikupu kwizaza dawaYudeya niantu abalumukili kwikala aYudeya. Amavulu chayitapili kunyichima hamuloña  wakufwa kwaYesu; abalumukili nawa ayipapatishili. Nsañu yamuBayibolu yashimunaña nawu antu makombakaji asatu abalumukili nawa ayipapatishili, kufumahu ekalili mbadi yachipompelu chaNzambi chachiha nawa chadiña nakukulilaku. (Yililu 2:1-4, 14, 37-47) Chadiña nakutohelaku muloña aYudeya amavulu niantu abalumukili kwikala aYudeya etejeli nawu aIsarela akumujimba hiyadiña cheñi chipompelu chaNzambuku. Ilaña, eniKristu awayishewa atuña ‘aIsarela aNzambi’ akuspiritu diwu enjili nakwikala chipompelu chaNzambi chalala.—Aŋalija 6:16; Yililu 20:28.

10. Kudikundanyi kwekala hakachi kaYesu nachipompelu chaNzambi?

¹⁰ Kakavulu Bayibolu yambulaña Yesu nawawayishewa, chidi neyi mazu akwila nawu ‘Kristu naChipompelu.’ Yesu diyi Mutu wachipompelu chaweniKristu awayishewa. Pawulu wasonekeli nindi Nzambi “wamukunjika dehi kwikala mutu wahewulu dayuma yejima kuchipompelu; chipompelu diwu mujimba windi.” (Aefwesesa 1:22, 23; 5:23, 32; Akolose 1:18, 24) Makonu, heseki hadi hohu ashalahu antesha awayishewa amunichi chipompelu. Tuneluki chikupu netu, mutu wawu, Yesu Kristu, wayikeña. Kuyakamena kwayakamenayi anakwilumbululi haAefwesesa 5:25 nawu: ‘Kristu wakeñeli chipompelu hakudihanahu yomweni kuchikoola.’ Wayikeña muloña adikitaña nakulambula kudi Nzambi “mulambu wakumuhameka mafuku ejima . . . yowu nyilambu yakunyivumbu yakwiteja ijina dindi,” neyi cheliliyi Yesu hampinji yadiñayi hamaseki.—Aheberu 13:15.

Nzatishilu Yikwawu Yezu ‘daChipompelu’

11. Munjilanyi yamuchiyedi mwazatishilaña Nyikanda yawiniKristu yachiGriki izu dakwila nawu “chipompelu”?

¹¹ Mpinji yikwawu, Bayibolu hiyazatishaña hohu izu dakwila nawu “chipompelu” kutalisha kwizanvu dawa 144,000 awayishewa atuña ‘chipompelu chaNzambuku.’ Chakutalilahu, Pawulu wasonekeleli izanvu dimu daweniKristu nindi: “Bayi mwila chuma chakudimbwisha hela aYudeya, [aGriki], hela chipompelu chaNzambuku.” (1 Akorinda 10:32) Chakubula kujina, neyi mwiniKristu muKorinda yakushankulu yaluwañesha, chadi kudimbwisha amakwawu. Komana ichi chiluwa chadi kudimbwisha aGriki ejima, aYudeya, hela awayishewa amumafuku aPawulu kushika nikulelu? Inehi. Muniyi vasi chinamwekani neyi “chipompelu  chaNzambi” chinatalishi kudi eniKristu adiñaku hampinji yimu. Chochimu, muntu nateli kuhosha chafumbañayi Nzambi, nichakwashañayi, hela kukiswila chipompelu, dikwila nawu eniKristu ejima hanoyu mpinji, kwejima kudiwu. Hadaha tunateli kuhosha hamuzañalu nikuwunda kudi muchipompelu chaNzambi makonu, dikwila nawu mukachi kawamana kwetu awiniKristu ejima.

12. Njilanyi yamuchisatu muyazatishilawu izu dakwila nawu “chipompelu” muBayibolu?

¹² Njila yamuchisatu Bayibolu muyazatishila izu dakwila nawu “chipompelu” datalisha kudi eniKristu ejima amwiluña dimu. Twatañaña nawu: “Mwahita Yudeya mwejima nimuŊalaliya nimuSamariya, chipompelu hichikumona kuwunda.” (Yililu 9:31) Mudina ituña deneni mwadiña mazanvu aweniKristu amavulu, ilaña ejima muYudeya, nimuŊalaliya, nimuSamariya wejima wawu ayiteneneña nawu “chipompelu.” Kushinshika hakuvula kwawantu apapatishiliwu haPentekosta 33 C.E. nikufuma haPentekosta, kwatela kwadiña mazanvu amavulu apompeleña mpinji yejima muYerusalema. (Yililu 2:41, 46, 47; 4:4; 6:1, 7) Herodi Agiripa I wayulili muYudeya kushika nichafwiliyi mu 44 C.E., nawa nsona ya 1 Atesalonika 2:14 yinalumbululi chikupu nawu kukamwihi na 50 C.E., muYudeya mwadiña yipompelu yayivulu. Neyi chitwatañaña nawu Herodi ‘wakabishileña antu amuchipompelu,’ ichi chinatalishi kuyipompelu yayivulu yapompeleleña muYerusalema.—Yililu 12:1.

13. Njilanyi yamuchiwana yavula kuzatisha Bayibolu izu dakwila nawu “chipompelu”?

¹³ Njila yamuchiwana mwavula kuzatishilawu izu dakwila nawu “chipompelu” yatalisha kudi eniKristu atuña chipompelu chimu hohu chamwiluña, chidi neyi mwitala. Pawulu wateneni “yipompelu yamuŊalija.” Mukabeta ketuña daRoma mwadiña yipompelu yayivulu yamaneni. Pawulu wazatishili izu dakwila nawu “yipompelu” kayedi hakutena Ŋalija, chabombelelimu yipompelu yakuAntiyoki, Deribi, Lisitira, niIkoniyumu. Akulumpi ashikahu, hela akwakutala akwawu, ayitondeli muniyi yipompelu. (1 Akorinda 16:1; Aŋalija 1:2; Yililu 14:19-23) Kwesekeja nachahosha nsona, yejimiyi yadiña “yipompelu yaNzambi.”—1 Akorinda 11:16; 2 Atesalonika 1:4.

14. Kushinshika hansona yantesha yazatisha izu dakwila nawu “chipompelu” tunateli kukunkulula netudi?

¹⁴ Mpinji yikwawu, kwatela kwadiña mazanvu anyanya hakupompa kwawiniKristu, atwesheleña kushikila mumatala awantu. Hela chochu, izu dakwila nawu “chipompelu” adizatishileña hakutena awa mazanvu. Mazanvu yitweluka adiña yipompelu diwana adiña mwitala daAkwila niPirisila, Nyamfwasa, Fwilemoni. (Aroma 16:3-5; Akolose 4:15; Fwilemoni 2) Ichi chatela kukolesha yipompelu yanyanya yejima makonu nawa yatela yapompelaña mumatala awantu. Yehova wakameneni yipompelu yanyanya yamuchidiwu yamuyaaka nkulakaji yatachi, nimakonu Yehova wakiswilaña yipompelu naspiritu yindi.

Yipompelu Yamushimekaña Yehova

15. Indi kuzatika kwaspiritu yajila akwimwekesheli ñahi muyipompelu yikwawu yahatachi?

¹⁵ Neyi chitwashimuna dehi kushikijewa kwaMasamu 22:22, Yesu wamushimekeli Nzambi mukachi kachipompelu. (Aheberu 2:12) Atumbanji twindi ashinshika niwena ateleli kwila chochimu. Muyaaka nkulakaji yatachi hampinji yawayishiluwu eniKristu alala naspiritu yajila kwikala anyana kaNzambi nianakwa Kristu, spiritu yatachikili kuzata mudi amakwawu munjila yambukaku. Atambwilili yawaana yakuhayamisha yaspiritu. Iyi spiritu ayimwekesheleleña kuhitila mumazu amaana hela kwiluka, ñovu yakuuka, hela kuprofweta, hela wuswa wakuhosha mumadimi abulili kwilukawu.—1 Akorinda 12:4-11.

16. Indi chawaana chaspiritu yakuhayamisha chadiñi nankeñelwinyi?

¹⁶ Kutalisha hakuhosha mumadimi, Pawulu wahosheli nindi: ‘Chiña nilombi nachamukunkulu chaspiritu nawa; chiña niimbi naspiritu ninakashinshi nawa.’ (1 Akorinda 14:15) Welukili nindi chadiña chalema kudi amakwawu kutiyishisha mazwindi  kulonda adizi. Chikonkwanyi chaPawulu chadiña chakuhameka Yehova muchipompelu. Wakonkomweneni amakwawu adiña nachawaana chaspiritu nindi: “Fwilenu nankashi yakukolesha nachu chipompelu,” dikwila nawu muchipompelu muyamwekesheleleña chawaana. (1 Akorinda 14:4, 5, 12, 23) Mwalala, Pawulu wadiña wakeña yipompelu, welukili nindi muyipompelu yejima, eniKristu adiña nakukooleka kwakumuhameka Nzambi.

17. Kutalisha kuyipompelu makonu, chumanyi chitwatela kwiluka?

¹⁷ Yehova nakutwalekahu kuzatisha nikukwasha chipompelu chindi. Makonu nakukiswila antu amavulu amwizanvu daweniKristu awayishewa ahamaseki. Iyi nkisu yinakumwekena muyakudya yayivulu yinakuloñeshawu yakuspiritu yinakutambwila antu jaNzambi. (Luka 12:42) Nakukiswila wumana kwetu wamukaayi kejima. Nawa nakukiswila yipompelu mutwahamekelaña Nleñi yetu kuhitila munzatilu yetu nikwakulahu kwakoleshaña chikuhwelelu chawamakwawu. Hakupompa atulejaña nikutufumba kulonda kumuhameka Nzambi hampinji yikwawu, hampinji yitwabulaña kwikala muchipompelu chetu.

18, 19. Chumanyi chatela kwilawu eniKristu ashinshika amuchipompelu chidi chejima?

¹⁸ Anukenu nenu kapostolu Pawulu wakonkomweneni eniKristu amuchipompelu chaFwilipi, Masidoniya nindi: “Dichi nalombi nami, musweji kusoña nyikambu yakuloña yafumaña kudi Yesu Kristu; kulonda kulemesha nikuhameka Nzambi.” Ichi chadi kubombela kuhosha nawamakwawu, abulili kwikala muchipompelu chawiniKristu, hachikuhwelelu chawu mudi Yesu nihakuchiñeja kwawu kwakuwahi. (Afwilipi 1:9-11; 3:8-11) Chochimu, Pawulu wakonkomweneni akwawu eniKristu nindi: “Dichi tumulambulenu Nzambi mulambu wakumuhameka mafuku ejima mudi Yesu, yowu nyikabu yakunyivumbu yakwiteja ijina dindi.”—Aheberu 13:15.

¹⁹ Komana mwekalaña namuzañalu hakumuhameka Nzambi “mukachi kachipompelu,” neyi cheliliyi Yesu, nikuzatisha nyivumbu yenu hakumuhameka Yehova kudi antu achidi kanda amwiluki nikumuhameka? (Aheberu 2:12; Aroma 15:9-11) Munjila yikwawu, ñakwilu yetu yatela kushindamena hachitwatoñojokaña kutalisha hamudimu wazataña chipompelu chetu munkeñelu yaNzambi. Muchibaba chinalondeluhu, tukadiza chinakulombolayi Yehova nikuzatisha chipompelu chetu nichichatela kutwikwasha muwumi wetu makonu.

Munakwanuka?

• Indi “chipompelu chaNzambi,” chaweniKristu awayishewa chatachikili ñahi?

• Njilanyi jikwawu jisatu Bayibolu muyazatishilaña izu dakwila nawu “chipompelu”?

• Kutalisha kuchipompelu, chumanyi Davidi, Yesu, nieniKristu amuyaaka nkulakaji yatachi chakeñeleñawu kwila, nawa chumichi chikutuletesha kwiladi?

[Malwihu aKuzatisha haKudiza]

[Mwevulu wudi hefu 9]

Yesu wadiña chikuku chachipompelu chimu chidi?

[Mwevulu wudi hefu 10]

Mazanvu aweniKristu apompeleña hamu neyi “chipompelu chaNzambi”

[Mwevulu wudi hefu 12]

Kufwana eniKristu muBenin, tunateli kuhamekela Yehova muyipompelu