Ilenu Chipompelu Chituñewi

‘Chipompelu hichikumona kuwunda, hichikudituña.’—YILILU 9:31.

1. Malwihwinyi yitwatela kwihula kutalisha ‘kuchipompelu chaNzambi’?

 HEFUKU daPentekosta 33 C.E., Yehova wetejeli chikupu izanvu dawatumbanji twaKristu hamu neyi muza wawuha, “aIsarela ambala aNzambi.” (Aŋalija 6:16) Awa eniKristu awayishewa naspiritu ekalili “chipompelu chaNzambi” neyi chayitenaña Bayibolu. (1 Akorinda 11:22) Chumanyi chabombelamu mukwikala chipompelu chaNzambi? Indi “chipompelu chaNzambi” chadi kulombolewa ñahi? Nawa chadi kuzatika ñahi hanu hamaseki, hichidi namuloña neluña kwashikamineñawu antu amunichi chipompeluku? Indi ichi chinabombelimu ñahi yihandilu yetu nimuzañalu?

2, 3. Indi Yesu wahosheli ñahi nindi chipompelu chikekala nantanjikilu?

² Neyi chitwamona muchibaba chinafumuhu, Yesu washimwineñahu dehi kutuñewa kwanichi chipompelu chawatumbanji awayishewa, wamulejeli kapostolu Petulu nindi: “Helolidi [Yesu Kristu] dihu nakatuñila chipompelu chami, niyisu ya[Hadesi] yakachikañanya.” (Matewu 16:18) Kubombelahu, henohu Yesu wuchidi nawapostolu indi, waheni nshimbi chikazatikaña chipompelu chadiña kwakwihi nakutuñewa nichichakalombolewaña.

³ Yesu watañishileña mumazu nimunzatilu nindi amakwawu muchipompelu akalombolaña. Akalombolaña kuhitila mukukalakela amakwawu amwizanvu dawu. Kristu nindi: “Mweluka dehi anyanta jawa[kamatuña] chayiyulañawu, niantu awu alema chekalañawu nawanta hadi wena; ilaña mukachi kenu bayi mwakekala chochochuku. Yowu wukukeña kwikala muneni mukachi kenu ekali mukwakuyikalakela. Yowu wukukeña kwikala mukwakubadika mukachi kenu ekali nduñu yenu.” (Maku 10:42-44) Chakubula kujina, “chipompelu chaNzambi” hichakapalañanaku, antu adambula wumu namukwawu, kufwana neyi chipompelu chabula wunlomboliku. Ilaña, chakekala nantanjikilu yayiwahi, nawantu azatilaña hamu nikutiyañana.

4, 5. Tuneluki ñahi netu chipompelu chakeñekeleña kufumba kwakuspiritu?

⁴ Yesu wukekala Mutu wachina “chipompelu chaNzambi” wahosheli nindi apostolu indi niamakwawu adizilili kudi yena akekala nanyidimu yadimena muchipompelu. Akazataña nyidimwinyi? Mudimu walema wukekala wakudizisha antu amuchipompelu hadi Yehova. Anukenu nenu Yesu wasañwiliwu, wamulejeleli Petulu hamesu awapostolu amakwawu, nindi: “Eyi Shimona mwana kaYowanu, wankeña?” Petulu hakwakula nindi: “Eña Mwanta, eyi weluka chinakukunda.” Yesu hakumwila nindi: “Diishaña twanami twanyikoku. . . . Biñaña anyikoku jami. . . . Diishaña anyikoku jami.” (Yowanu 21:15-17) Wadiña mudimu walema chikupu.

⁵ Tunamoni mazu ahosheliyi Yesu netu antu anakupompeshelawu muchipompelu adi neyi anyikoku amwiyinda. Awa anyikoku—amayala awiniKristu, ambanda, nianyana—akakeña kudiishewa nikuyibiña chiwahi lwakuspiritu. Kubombelahu cheñi, chineli Yesu walejeli atumbanji twindi kudizisha amakwawu nikwilisha atumbanji, muntu wamuha wejima wadi kwikala mukoku windi adi kumudizisha chakuzata mudimu waNzambi.—Matewu 28:19, 20.

6. Ntanjikilwinyi yiyelili ‘muchipompelu chaNzambi’ chachiha chatuñiliwu?

⁶ Mpinji yatuñiliwu “chipompelu chaNzambi,” antu amuchipompelu apompeleña  mpinji yejima nakudiza nikudikolesha wumu namukwawu: “Hiyakukakela mbe mukuleja kwawapostolu nimukukundañana, nimukuhumuna mankendi, nimukulomba.” (Yililu 2:42, 46, 47) Wunsahu wukwawu walumbuluka wansañu yanyaka wudi wakwila nawu amayala ashikahu ayinkeli mudimu wakwakamena nsañu jikwawu jalema. Bayi neyi ayitondeleña hamuloña wakutaña chikupu hela kwilukisha nyidimuku. Awa adiña amayala ‘enzala dehi spiritu nimaana.’ Hakachi kawu hadiña Setefwanu, nawa nsañu yashimunaña nawu wadiña ‘iyala wasweja kukuhwelela, wenzala spiritu yajila.’ Hamuloña wakunuñañana muchipompelu “mazu aNzambi hiyakuya nakudinuñanuña; niatumbanji hiyakuya nakuvula nankashi muYerusalema.”—Yililu 6:1-7.

Amayala Azatishiliwu Kudi Nzambi

7, 8. (a) Indi apostolu niakulumpi amuYerusalema akalakeleña neyi anyi mukachi kaweniKristu akusambila? (b) Chumanyi chafuminimu hampinji yahaniniwu nshimbi muyipompelu?

⁷ Mwalala, apostolu alombwileña muntanjikilu yayipompelu yatachi, ilaña hiyalombweleña nkawawuku. Mpinji yimu, Pawulu niamabwambu jindi afuntili kuSiriya wakuAntiyoki. Yililu 14:27 yahoshaña nawu: “Chanashikuwu, hiyakupompesha chipompelu, hiyakushimuna yuma yejima yaneliyi Nzambi nawena.” Hampinji yachidiñawu nachina chipompelu, kwedikili ntaadi yakwila nawu aJentili akakwitiya akeñekeleña kuyalamisha. Hakwila nawu amanishi iyi nsañu, aPawulu niBaranaba ayitumini ‘kudi apostolu niakulumpi amuYerusalema,’ adiña nakukalakala neyi izaza dalombolaña.—Yililu 15:1-3.

⁸ Eluda wawiniKristu Yakoba, mana kwa Yesu wakuwanamu wabulili kwikala kapostolu, diyi walombweli hampinji ‘yapompeluwu hamu apostolu niakulumpi nakutoñojoka haniyi nsañu.’ (Yililu 15:6) Chelili anahanjeki dehi nikutoñojokahu chiwahi haniyi nsañu nawukwashu waspiritu yajila, akunkulwili kwesekeja namwaya Nsona. Asonekeli nsañwiyi munyikanda nakuyitemesha kuyipompelu. (Yililu 15:22-32) Antu atambwili nsañu iyi etejeli nawa atachikili kuyizatisha. Chumanyi chafuminimu? Amana kwetu niahela ayituñili nikuyikolesha. Bayibolu yahoshaña nawu: “Yipompelu hiyikudikolesha mukwitiya kwakukuhwelela, akakwitiya hiyakuya nakusemwañana hefuku hefuku.”—Yililu 16:5.

9. Nyidimwinyi yashimuna Bayibolu yatela kuzatawu amayala awiniKristu ashikahu?

⁹ Indi yipompelu yazatikileña ñahi mpinji yejima? Chakutalilahu, toñojokenu yipompelu yahachitutu chaKeleta. Hela chakwila antu amavulu ashakamineña hachina chitutu adiñi nayaaku yatama, amakwawu ahimpili yililu yawu nakwikala eniKristu alala. (Titusa 1:10-12; 2:2, 3) EniKristu ahachitutu chaKeleta ashakamineña munyisumba yashiyashana, nawa adiña kwakulehi nezaza dalombweleña muYerusalema. Iku hikwadiña kukala kweneniku, hela chochu, muloña “akulumpi” awiniKristu ayitondeli muyipompelu yejima yahachitutu chaKeleta, neyi chochiyatondeleña mumaluña amakwawu. Amayala amuchidiwu awanishili yuma yakeñekaña yitwatañaña muBayibolu. Ayitondeli kwikala aeluda, hela akwakutala akwawu, ateleli ‘kukonkomwena antu mwaya kuleja kwalala, nakukonkolola akwatandi.’ (Titusa 1:5-9; 1 Timotewu 3:1-7) Amayala amakwawu niwena ashikileñahu kukwasha chipompelu neyi ankoñi akuzatila.—1 Timotewu 3:8-10, 12, 13.

10. Kwesekeja naMatewu 18:15-17, indi kukala kweneni akwimanisheleña ñahi?

¹⁰ Yesu wahosheli nindi ntanjikilu yamuchidiwu yikazatika. Anukenu nsañu yekala haMatewu 18:15-17, hahosheliyi nindi mpinji yikwawu kukala kunateli kumwekana hakachi kawantu jaNzambi ayedi, neyi wumu navulumuni mukwawu. Wunavulumuniwu wukuya kudi mukwawu kulonda ‘yakamukonkololi mwanaluwiyi’ kwakankawawu, mwayedi wawu. Neyi iyi njila kumanisha kukala nehi, atambikilileñahu muntu wumu hela ayedi elukili wunsahu wejima kulonda ayikwashi. Indi neyi chakwila nsañu kumana nehi? Yesu wahosheli  nindi: ‘Neyi kwonti kwindi kutiyilila wena nawa, lejaku chipompelu; neyi saña adikañilayi, kutiyilila chipompelu nehi, mufwanishi kweyi neyi mwinimatuña, hela neyi nsonkeshi.’ Hampinji yahosheliyi Yesu awa mazu, aYudeya achidiña “chipompelu chaNzambi,” dichi awa mazu aYesu hakusambila atalishili kudi wena. * Hela chochu, chipompelu chawiniKristu neyi chinatuñewi dehi, mazu aYesu adi kuyizatisha muchipompelu chawiniKristu. Iwu hiwunsahu wukwawu wakumwekesha nawu antu jaNzambi adi kwikala nachipompelu mwakudikoleshela nikulombola mwiniKristu wudi wejima.

11. Mudimwinyi wazatileñawu aeluda hakumanisha kukala?

¹¹ Chochimu, akulumpi hela akwakutala akwawu, adiña nakwimenaku chipompelu hakusompa hela kumanisha nyiloña hela kuhosha nyiloña yayiluwa. Ichi chinesakani nayuma yakeñekaña hakwila aeluda ashikuhu yashimunawu haTitusa 1:9. Mwamweni, aeluda amuchipompelu adiña abula kuwanina neyi chadiñayi Titusa, atemesheliwu muyipompelu kudi Pawulu kulonda ‘aloñeshi yuma yaluwankeni.’ (Titusa 1:4, 5) Makonu, anakutondawu kwikala aeluda chiña amwekesha chikuhwelelu nikudihana kwawu hadi mpinji yayilehi henohu kanda ayitondi. Dichi amakwawu muchipompelu atela kukuhwelela munshimbi nimukunlombola kwahaninañawu muniyi ntanjikilu.

12. Mudimwinyi wukwetiwu aeluda kutalisha kuchipompelu?

¹² Pawulu wahosheli kudi aeluda akuchipompelu chaAefwesesa nindi: ‘Dihembenu enu aweni, hembenu ninyikoku yejima yanayikunjikuwu kudi spiritu yajila kwikala atubiña, mudiishi chachiwahi chipompelu chaNzambi chalandiliyi namashi aMwanindi.’ (Yililu 20:28) Dichinakumwekana nimakonu, akwakutala akwawu muyipompelu ayitondaña kulonda ‘abiñeña chipompelu chaNzambi.’ Atela kwila mwenimu mukukeña, bayi nakwikala anyanta hadi anyikokuku. (1 Petulu 5:2, 3) Akwakutala akwawu atela kukolesha nikukwasha ‘anyikoku ejima.’

 Kakelenu kuChipompelu

13. Mpinji yikwawu, chumanyi chinateli kumwekana muchipompelu, nawa muloñadi?

¹³ Aeluda niantu ejima amuchipompelu hiyawaninaku, kakavulu yiluwa hela kukala kwamwekanaña, neyi chikwamwekeneña muyaaka nkulakaji yatachi henohu apostolu amakwawu achidi hohu. (Afwilipi 4:2, 3) Mukwakutala akwawu hela muntu mukwawu nateli kuhosha mazu adi neyi akadi kalemesha, awukatu, hela adi neyi akutwamba. Hadaha tunateli kutoñojoka netu chuma chatama chinakumwekana, ilaña aeluda anakumwekana neyi aneluki, ilaña kwawu anakuzatilahu wanyi. Eña, hadaha nsañu yeniyi anayisompi hela anakuyisompa kwesekeja nachahosha Nsona nikwesekeja nawunsahu wutunabuli kwiluka. Hela chakwila chuma chabula kwitejewa munsona chinakumwekana, toñojokenu hachuma chamwekeni: Hampinji yayilehi muchipompelu chakuKorinda mwadiña chiluwa cheneni, chipompelu chadiñi nakwakamenayi Yehova. Mukuhita kwampinji, Yehova wamweni chikupu nindi kukala akwimanishili, chachiwahi nawa chakola. (1 Akorinda 5:1, 5, 9-11) Twatela kudihula netu, ‘Neyi chakwila nashakamineña muKorinda, nadi kwila ñahi hayina mpinji?’

14, 15. Muloñadi amakwawu chiyalekeleli kumulondela Yesu, nawa chumanyi chitwatela kudizilaku?

¹⁴ Talenu chuma chikwawu chinateli kumwekana muchipompelu. Twili netu muntu wudi nakukala kwakutiyishisha nikwiteja ntañishilu yamuNsona. Hekwawu wasandujoleli muBayibolu nimunyikanda yamuchipompelu nikulomba wukwashu kudi akwawu eniKristu apama, naeluda. Chochimu, chichidi chamukalila kutiyishisha hela kwiteja chikuma. Chumanyi chatela kwilayi? Kukamwihi nachaaka chimu henohu Yesu kanda yafwi, kukala kwamuchidiwu kwamwekeni. Wahosheli nindi yena diwadiña ‘dinkendi dawumi’ nawa nindi hakwila muntu yohandi haya nyaka watela ‘kudya musunyi waMwana kamuntu, nikunwa mashi indi.’ Chumichi chayihayamishili atumbanji twindi amakwawu. Chatela akeñi kuyilumbulwila hela kuwunda nakuhembelela nawu Yehova wakwolola nsañu hampinji yatelela, atumbanji amavulu “hiyakufutumuka, kwenda nawa cheñi nindi [Yesu] nehi.” (Yowanu 6:35, 41-66) Cheñi, neyi chakwila twadiña kwoku, chiña twelili ñahi?

 ¹⁵ Munanu mafuku, amakwawu analeki kudikunda nachipompelu, anakutoñojoka nawu akumukalakelaña Nzambi kankawawu. Anateli kuhosha nawu muloña ayituntwishili, nakutoñojoka nawu chiluwa chichidi, hela hiyinateli kwiteja ntañishilu yimuku. Komana kufuukula kwawu kwakuwahi? Hela chakwila mwiniKristu wejima watela kwikala nawubwambu wahalwindi naNzambi, hitunateli kukaana netu Nzambi nakuzatisha chipompelu chamukaayi kejima neyi chelileñayi mumafuku awapostoluku. Kubombelahu, Yehova wazatishili nakukiswila yipompelu yamuyaaka nkulakaji yatachi, watondeleña aeluda ashikahu niankoñi akuzatila kulonda kukwasha yipompelu. Dichinakumwekana nimakonu.

16. Neyi muntu yekala mukweseka kwakufuma muchipompelu, chumanyi chatela kutoñojokayi?

¹⁶ Neyi mwiniKristu nakutoñojoka nindi watela kushindamena hohu hadi Nzambi chakadi kudikunda nachipompelu, dikwila nawu nakukaana ntanjikilu yafuukulayi Nzambi—yachipompelu chamukaayi kejima niyipompelu yawantu jaNzambi. Muntu watela kudifukula kudi Nzambi kankawindi hela kudikunda nawantu antesha hohu, hanu dinu ntanjikilu yachipompelu yawaeluda niankoñi akuzatila yidi kudihi? Chochimu, Pawulu hampinji yasonekelili chipompelu chamuKolose nakuyileja nindi mukanda awitañi cheñi nimuchipompelu chaLayodekeya, wahosheli nindi ‘yashimata nikutuñewa mudi yena [Kristu].’ Dichi antu amuchipompelu diwu ateleli kuhetelamu muniyi ntanjikilu, bayi antu adambwili kuchipompeluku.—Akolose 2:6, 7; 4:16.

Chishimi niHakolela Nsañu Yalala

17. Indi 1 Timotewu 3:15 yatutañishaña nawudi kutalisha hachipompelu?

¹⁷ Mumukanda windi watachi wasonekeleliyi eluda wawiniKristu Timotewu, kapostolu Pawulu walumbulwili yuma yakeñekaña kudi aeluda niankoñi akuzatila hakwila ashikihu muyipompelu. Kuhiñahu, Pawulu wateneni ‘chipompelu chaNzambi wamumi,’ nindi ichi ‘dichishimi nihakolela nsañu yalala.’ (1 Timotewu 3:15) Chipompelu chejima chaweniKristu awayishewa dichadiña chishimi muyaaka nkulakaji yatachi. Nawa chinamwekani chikupu nawu mwiniKristu wejima waadi kutambwila iyi nsañu yalala hohu kuhitila muchipompelu. Dikwatañishileñawu chalala chamuBayibolu, kuchihakwilaku nikuyikolesha.

18. Muloñadi kupompa chikwalemena?

¹⁸ Chochimu, chipompelu chawiniKristu chamukaayi kejima didi itala daNzambi, “chishimi nihakolela nsañu yalala.” Kuwanika kukupompa mpinji yejima nikwakulahu hakupompa kwachipompelu dichuma cheneni chakoleshaña wubwambu wetu naNzambi, nikudiloñesha kwila nkeñelu yindi. Hakusonekela chipompelu chakuKorinda, Pawulu wateneni yuma yahosheleñawu hakupompa. Wasonekeli nindi wakeñeli nsañu yiyahosheleña hakupompa yihanukeña nikutiyakana kulonda ‘kukolesha’ antu enjileña kukupompa. (1 Akorinda 14:12, 17-19) Ninetu makonu tunateli kukoleshewa neyi twiluka netu Yehova Nzambi weteja ntanjikilu yayipompelu nawa nakuyakamena.

19. Muloñadi wumwatela kukakela kuchipompelu chenu?

¹⁹ Mwalala, neyi tunakukeña kukoleshewa hamu neyi eniKristu, twatela kutwalekahu kwikala muchipompelu. Hadi mpinji yayilehi chipompelu chakañeshaña ntañishilu yakutwamba, nawa Nzambi wachizatishaña kulonda kutiyakesha nsañu yayiwahi yaWanta windi wawuMesiya mukaayi kejima. Chakadi kujina, Nzambi nakoñi yuma yayivulu kuhitila muchipompelu chawiniKristu.—Aefwesesa 3:9, 10.

[Tumazu twaheshina]

Munakwanuka?

• Muloñadi chitwatela kukuhwelela netu Nzambi wukuzatishaña yipompelu hamaseki?

• Mudimwinyi wazataña aeluda muchipompelu hela chakwila awanina wanyi?

• Indi chipompelu chinayikoleshi ñahi?

[Malwihu aKuzatisha haKudiza]

[Mwevulu wudi hefu 15]

Apostolu niakulumpi muYerusalema akalakeleña neyi izaza dalombolaña

[Mwevulu wudi hefu 16]

Aeluda niankoñi akuzatila atambwilaña nshimbi kulonda kukalakala nyidimu yawu yamuchipompelu