Mwatela Kwiteja Izu daNzambi Kuyula Nyendu Yenu

‘Izu deyi hiinoñu dakunyendu yami, hichejeji chamunjila yami.’—MASAMU 119:105.

1, 2. Muloñadi antu amavulu chakañenyawu kuwana kuwunda nimuzañalu walala?

 KOMANA munateli kwanuka mpinji yimwehwilihu muntu kuyileja njila? Hekwawu mwashikili kwakwihi neluña kumwayileña ilaña mwajimbeli njila yimwakeñeleña kuyilamu. Hadaha mwajimbeli chikupu chakwila mwakeñeleña nikuhimpa yitoñojoka. Muniyi njila, chikuwaha neyi mwihula muntu welukisha adina iluña. Muntu yeniwu nateli kuyikwashaku kulonda mushiki kwiluña kumunakuya.

² Hayaaka yayivulu, muchidi wamuntu wuneseki kudilombola muchihandilu chawu chakubula kukeña wunlomboli kudi Nleñi yawu, Yehova Nzambi. Hela chochu, hamuloña wakubula kushindamena hadi Nzambi, antu abula kuwanina hiyakweti kuchiñejaku. Hiyanatweshi kuwana njila yalombolaña kukuwunda nimuzañalu walalaku. Muloñadi chakañenyawu kuwana kuwunda nimuzañalu walala? Kubadika hayaaka 2,500 yinahituhu, kaprofwetu Yeremiya wahosheli nindi: “Njila yamuntu hiyekala mudi yomwenuku, mudi muntu wendaña himwekala yakuyula nyendu yinduku.” (Yeremiya 10:23) Muntu wesekaña kudilombola yamweni chakubula kwiteja wukwashu wawuwahi watela kumona kukala kwakubula kukañesha. Mwalala, muchidi wamuntu wakeñekaña kulombolewa.

3. Muloñadi Yehova Nzambi diyi wunatweshi kulombola muchidi wamuntu hohu, nawa chumanyi chakanayi?

³ Yehova Nzambi diyi hohu wunatweshi kuleta wunlomboli weniwu. Muloñadi? Muloña weluka chikupu nleñelu yawantu kubadika muntu wudi wejima. Nawa Nzambi weluka chikupu chajimbeli muchidi wamuntu. Weluka cheñi chuma chakeñekaña hakwila nawu afunti munjila yaloña. Kubombelahu, Yehova hakwikala Nleñi, mpinji yejima weluka yuma yayiwahi yitwakeñaña. (Isaya 48:17) Dichi twatela kukuhwelela chikupu muchikaninu chindi chasonekawu haMasamu 32:8 nawu: “Nukukuleja maana, nukukuleja ninjila yeyi yuwukwenda; nukukulombola nadisu dami.” Tunateli kukuhwelela chikupu netu Yehova wahanaña wunlomboli wawuwahi. Hanu dinu Yehova watwilombolaña munjilanyi?

4, 5. Indi mazu aNzambi anateli kutulombola ñahi?

⁴ Ñimbi yamasamu walombeli kudi Yehova nindi: “Izu deyi hiinoñu dakunyendu yami, hichejeji chamunjila yami.” (Masamu 119:105) Nsañu yaNzambi niyanukishu yekala muBayibolu yinateli kutwikwasha kushinda kukala kutunateli kumona muwumi wetu. Neyi tutaña Bayibolu nikwiteja kutwilombola dikwila nawu tunakulondeja mazu alumbululawu haIsaya 30:21 akwila nawu: “Mwakatiya namatu enu izu dakunyima yenu nawu, Njila iyi, endenu mwomwenimu.”

⁵ Ilukenu nenu Masamu 119:105 yashimuna hayuma yiyedi yadifwana yakoñaña Izu daNzambi. Chatachi, dazatikaña neyi inoñu dakunyendu yetu. Neyi tumona kukala munshakaminu yetu, nshimbi yawanewaña muBayibolu yatela kulombola nyendu yetu kulonda kufuukulahu chachiwahi nikutondolwela nyihetu yamukaayi. Chamuchiyedi, yanukishu yaNzambi yatoñekaña munjila yetu, yatwikwashaña kufuukula kwesekana nakuchiñeja kwetu kwakushakama haya nyaka muParadisa yakanayi Nzambi. Neyi chejeji chashikila chitoñeka munjila yidi hambidi, tunateli kwiluka yuma yayiwahi hela yatama  yafumaña munzatilu yidi yejima. (Aroma 14:21; 1 Timotewu 6:9; Chimwekeshu 22:12) Lekenu tushinshiki chikupu ochu mazu aNzambi ekala muBayibolu chiyatela kwikala inoñu dakunyendu yetu nichejeji chamunjila yetu.

“Inoñu daKunyendu Yami”

6. Indi mazu aNzambi anateli kwikala ñahi inoñu dakunyendu yetu?

⁶ Mafuku ejima twafuukulaña hayuma. Kufuukula kukwawu kwamwekanaña neyi hikwalemaku, ilaña mpinji jikwawu tunateli kuhumañana nayuma yinateli kweseka kashinshi ketu, kubula kudiñija munsañu jamatuña nachiyulu, nikukeña kwila wuvumbi. Hakwila nawu tushindi kweseka kweniku chachiwahi, twatela ‘kufumba yitoñojoka yetu yakwambula yayiwahi nayatama.’ (Aheberu 5:14) Kuhitila mukudiza kwiluka kwalala kwekala Mwizu daNzambi nikwiluka nshimbi jamuBayibolu, dikwila nawu tunakudizisha yitoñojoka yetu kulonda kufuukulahu yuma yinateli kumuzañalesha Yehova.—Yishimu 3:21.

7. Lumbululenu njila yimu omu mwiniKristu munateli kumukokwelawu kulonda kudikunda nawakwawu akunyidimu abula kwitiya.

⁷ Shinshikenu hanichi chakutalilahu. Komana wudi mukulumpi wunakukeña kuzañalesha muchima waYehova? (Yishimu 27:11) Neyi dimu tunayihameki. Ilaña toñojokaku neyi chakwila akwenu yiwazataña nawu akwinka itikiti kulonda wuyi nawu nakuhema. Atiyaña kuwaha kuzata neyi hamudimu nawa anakukeña wuyi nawu nakuhema kwiluña dacheñi. Wunateli kutoñojoka chikupu neyi awa antu hiyantu amawahi. Munshakaminu yawu anateli kumwekesha yililu yayiwahi. Chumanyi chiwatela kwila? Komana kunateli kumwekana wubanji wudi wejima neyi witeja kuya nawu? Indi Izu Nzambi dinateli kukukwasha ñahi kufuukulahu chiwahi haniyi nsañu?

8. Nshimbinyi yamuNsona yatukwashaña kutoñojoka hansañu yakudikunda?

⁸ Shinshikenu hanshimbi jantesha jamuNsona. Nshimbi yatachi yimwatela kwanuka yawanewaña ha 1 Akorinda 15:33 yahoshaña nawu: “Kudikunda nawantu atama kwatamishaña maana amawahi.” Komana kukakela kuniyi nshimbi chakeñekaña kutondolwela chikupu antu abula kwitiya? Ñakwilu yamuNsona kunilu lwihu yidi yakwila nawu inehi. Kafwampi kapostolu Pawulu wakeñeli “antu ejima” kubombelahu niabula kwitiya. (1 Akorinda 9:22) Chuma chalema chakeñekaña kudi eniKristu hikukeña antu amakwawu—kubombelahu niabula kwitiya. (Aroma 10:13-15) Munjilanyi mutunateleli kulondela kufumba ‘kwakwilila antu ejima chachiwahi’ neyi tudambula kudi antu anateli kukeña wukwashu kudetu?—Aŋalija 6:10.

9. Kufumbanyi kwamuBayibolu kwatukwashaña kwesekeja wulunda wetu nawantu yitwazataña nawu?

⁹ Hela chochu, hekala chambu cheneni hakachi kakwikala chiwahi nawantu yimwazataña nawu nikudikunda nawu chikupu. Nshimbi yikwawu yamuNsona yahosha chochimu. Kapostolu Pawulu wasoñamishili eniKristu nindi: “Bayi mudibombaña nawabula kwitiya mumpanda yoyimuku.” (2 Akorinda 6:14) Indi mazu akwila nawu “bayi mudibombaña . . . mumpanda yoyimuku” anakulumbululadi?  MaBayibolu amakwawu azatisha awa mazu nawu, ‘bayi mwinza hamuku,’ ‘bayi mweseka kuzatila hamu neyi antu esekanaku,’ hela ‘lekenu kukwata wubwambu wabula kutelela.’ Mpinjinyi wubwambu nawantu yitwazataña nawu hiwekalilaña wabula kutelela? Indi wubwambu wahambakanaña mpinjinyi nakudibomba mumpanda yimu? Izu daNzambi, Bayibolu dinateli kulombola nyendu yenu muniyi nsañu yakudikunda.

10. (a) Indi Yesu watondeli ñahi amabwambu? (b) Malwihwinyi anateli kukwasha muntu kufuukulahu chiwahi kutalisha hakudikunda?

¹⁰ Shinshikenu hachakutalilahu chaYesu wakeñeli muchidi wamuntu kufuma tuhu hampinji yaleñeluwu muchidi wamuntu. (Yishimu 8:31) Hampinji yadiñayi hamaseki, wakwatili wubwambu wakola nawatumbanji twindi. (Yowanu 13:1) Yesu ‘wakeñeli’ iyala wadiña nayitoñojoka yaluwa kutalisha hansakililu. (Maku 10:17-22) Yesu wadiña cheñi namwakukumina kutalisha hakusakula amabwambu alala. Yesu hadikundili nawantu abulileña kukeña kwila nkeñelu yaTata yinduku. Hampinji yimu Yesu wahosheli nindi: “Neyi mukwila munukuyileja mukwikala amabwambu jami.” (Yowanu 15:14) Mwalala munateli kukwata wubwambu nawantu yimwazataña nawu. Ilaña dihulenu nenu: ‘Komana iwu muntu wakeñaña kwila yuma yahoshayi Yesu? Komana wakeñaña kudiza hadi Yehova, yatulejeliyi Yesu nindi tudifukuleñaku? Komana wekala nayililu yayiwahi yawiniKristu yidi neyi yami?’ (Matewu 4:10) Hampinji yimunakuhosha nawantu yimwazataña nawu nikuyileja chikupu hakuzatisha nshimbi yamuBayibolu, ñakwilu yanawa malwihu yikwikala yatiyakana.

11. Shimunenu yakutalilahu hanochu mazu aNzambi chinateli kukiñawu nyendu yetu.

¹¹ Kudi yuma yayivulu yikwawu yinateli kuleñela mazu aNzambi kwikala neyi inoñu dakunyendu yetu. Chakutalilahu, mwiniKristu wabula mudimu anateli kumwinka mudimu wunakukeñayi swayi-swayi. Hela chochu, mudimu weniwu wunakukeñeka mpinji yeneni, nawa neyi eteja wuna mudimu, wukuleka kuwanewa kukupompa kwawiniKristu kwakuvulu nawa hakutwesha kuzataña nyidimu yikwawu yakudifukula kwalalaku. (Masamu 37:25) MwiniKristu mukwawu anateli kumweseka chikupu kuhitila mukutala yisela yabula kuditeja nanshimbi yamuBayibolu. (Aefwesesa 4:17-19) Mukwawu niyena anateli kumudimbwisha swayi hamuloña wakubula kumaninina kwawakwawu akakwitiya. (Akolose 3:13) Munsañu yejima yamuchidiwu, twatela kwiteja Izu daNzambi kwikala inoñu dakunyendu yetu. Mwalala,  neyi tulondeja nshimbi jamuBayibolu, tunateli kushinda chiwahi kukala kudi kwejima kwamwekanaña munshakaminu. Izu daNzambi “[d]awaha kuleja nachu, nikutanyisha nachu, nikwolola nachu, nikufumba nachu mwaloña.”—2 Timotewu 3:16.

“Chejeji Chamunjila Yami”

12. Munjilanyi mazu aNzambi mwanekaliluwu chejeji chamunjila yetu?

¹² Masamu 119:105 niyena yahosha nawu mazu aNzambi hichejeji chamunjila yetu, yatumunyikilaña njila yidi hambidi. Tweluka yuma yakamwekana kumbidi, muloña Bayibolu yashimuna chalumbuluka nshakaminu yamukaayi yamakabi niyuma yakafumamu. Mwalala, tuneluki netu tunakushakama ‘mumafuku akukuminina’ ayinu nshakaminu yatama. (2 Timotewu 3:1-5) Kwiluka yuma yikamwekana kumbidi chatela kutuleñela kutoñojoka chikupu hanshakaminu yetu makonu. Kapostolu Petulu wasonekeli nindi: “Ochu chineli yumiyi yejima yakasuñunuka chochichi, shakamenu nakujila nakwakama Nzambi, nakutalila nakukeña nankashi chakenza ifuku daNzambi.”—2 Petulu 3:11, 12.

13. Indi kunyakashana kwampinji yitudimu kunakumi ñahi yitoñojoka ninshakaminu yetu?

¹³ Yitoñojoka yetu ninshakaminu yetu yatela kwiluka chikupu nawu “Mpata yamunu mwishina yikuhita, nikufwila kwayu kwatama.” (1 Yowanu 2:17) Kulondela nshimbi jamuBayibolu chikatukwasha kufuukulahu chachiwahi kutalisha hayikonkwanyi yetu yakumbidi. Chakutalilahu Yesu wahosheli nindi: “Ilaña sambilenu kukeña wanta windi nikuloña kwindi, niyuma yejimiyi akayishilaku.” (Matewu 6:33) Atwansi amavulu akuhwelela mazu aYesu atela kuyihameka, hamuloña wakwikala mumudimu wampinji yejima. Antu amakwawu niyisaka yikwawu, anadihani kuya kumaluña acheñi kunakukeñeka chikupu akwakushimwina haWanta.

14. Indi chisaka chimu chawiniKristu chatohesheli ñahi mudimu wawu wakushimwina?

¹⁴ Shinshikenu eniKristu awana amuchisaka chimu atuntukili kufuma mwituña daUnited  States nakuya kuDominican Republic nakuzatila chipompelu chadiña mumbaka yadiña nawantu 50,000. Chipompelu chenichi chikweti akwakushimwina haWanta akushika ku 130. Ilaña, haApril 12, 2006, antu akushika ku 1,300 awanikili kuChanukishu chakufwa kwaKristu. Iha damwiluña denidi ‘datookashana dehi to-o, dinashiki dehi hakumuna’ chakwila chimwahitili tukweji tutanu tata yawantu nimaama yawantu nawa nimwanawu weyala niwamumbanda alombweleña atudizi aBayibolu 30. (Yowanu 4:35) Tata yawantu nindi: “Chipompelu chikweti amana kwetu niahela 30 enza nakukwashana kunu. Antu akushika ku 20 afuma kuUnited States, awa anashali afuma kuBahamas, Canada, Italy, New Zealand, nikuSpain. Enjili neyena deneni dakuzata mumudimu wakushimwina hamu nawamana kwetu amunidi iluña azatileña nañovu.”

15. Nkiswinyi yimunadiluñishi hamuloña wakutwamijaku Wanta muwumi wenu?

¹⁵ Chakubula nikujinooka, antu amavulu hiyatweshaña kuya kwiluña dikwawu kunakukeñeka nankashi akwakushimwina kulonda kuzatilakuku. Ilaña owu anakuzata mumudimu wakushimwina hela anatweshi kuhimpa nshakaminu yawu kulonda kukalakala mumudimu wakushimwina akatambwila nkisu jajivulu hakuzatila kumaluña kunakukeñeka nankashi akwakushimwina. Hichikweti muloña nakwiluña kumwazatilañaku, mwatela kuzañalala hampinji yimunakukalakela Yehova nañovu jenu jejima. Neyi mutwamijaku Wanta muwumi wenu, Yehova wakana nindi “nakayihuñunwina nkisu yayivulu yakukañanya nihakuyitambwila.”—Malaki 3:10.

Twatela Kuhetela Muwunlomboli waYehova

16. Twakahetelamu ñahi hakwiteja mazu aNzambi kutwilombola?

¹⁶ Neyi chitunamoni, mazu aYehova atwilombolaña munjila jiyedi jadifwana. Azatikaña neyi inoñu dakunyendu yetu kulonda kutwikwasha kutwalekahu kwenda munjila yayiwahi nikutwilombola neyi hitukufuukulahu. Mazu aYehova atoñekaña munjila yetu kulonda kumona chiwahi yuma yidi kumbidi. Mazu wenawa atwikwashaña kulondela kusoñamisha kwaPetulu kwakwila nawu: “Dikwatishenu munyichima yenu, babalenu, chiñejenu chalala luwi lwakayiletelawu hakamwekanayi Yesu Kristu.”—1 Petulu 1:13.

17. Indi kudiza Bayibolu kunateli kutukwasha ñahi kulondela wunlomboli waNzambi?

¹⁷ Twatela kwiluka chikupu netu Yehova watwilombolaña. Lwihu ludi lwakwila nawu, Komana mukwovwahila iwu wunlomboli? Hakwila nawu mutiyishishi wunlomboli waloñeshayi Yehova, mwatela kwikala nachaaku chakutañaña Bayibolu mafuku ejima. Mwatela kutoñojoka hayuma yimunakutaña, tiyishenu nkeñelu yaYehova muyuma yimunakutaña, nawa toñojokenu jinjila jamboka-mboka munateleli kuyikwashila nsañu yimunakutaña munshakaminu yenu. (1 Timotewu 4:15) Hampinji yimunakufuukulahu hayuma zatishenu ‘maana enu.’—Aroma 12:1.

18. Nkiswinyi yitwatambwilaña neyi twiteja Izu daNzambi kutwilombola?

¹⁸ Neyi tukwiteja mazu wenawa kutulombola, nshimbi jekala Mwizu daNzambi jikutufumba nikutwilombola hampinji yitunakufuukula njila yayiwahi yitwatela kulondela. Tunateli kukuhwelela netu mazu aYehova alejaña ‘wakadi maana kwikala namaana.’ (Masamu 19:7) Neyi twiteja Bayibolu kutulombola, twakekala nachinleji chitooka nimuzañalu wafumaña hakumuzañalesha Yehova. (1 Timotewu 1:18, 19) Neyi tukwiteja mazu aNzambi kulombola nyendu yetu mafuku ejima, Yehova wakatwinka nkisu yakukumishaku yawumi wahaya nyaka.—Yowanu 17:3.

Munakwanuka?

• Muloñadi chichalemena kwiteja Yehova Nzambi kulombola nyendu yetu?

• Munjilanyi mazu aNzambi mwanateleluwu kwikala inoñu dakunyendu yetu?

• Indi mazu aNzambi anateli kwikala ñahi chejeji chamunjila yetu?

• Indi kudiza Bayibolu kunateli kutukwasha ñahi kulondela wunlomboli waNzambi?

[Malwihu aKuzatisha haKudiza]

[Mwevulu wudi hefu 19]

Indi kudikunda nawantu abula kwitiya kunateli kwikala ñahi kwabula kutelela?

[Mwevulu wudi hefu 20]

Amabwambu jaYesu adikundiliyi nawu adiña antu elileña nkeñelu yaYehova

[Nyevulu yidi hefu 21]

Komana nshakaminu yetu yamwekeshaña nawu twatwamijaku Wanta?