Komana Kutama—Anakañanyi Kukwiyula?

Kansi weyala wakeña kwiluka yuma nanoni chuma mumasaña—mutendanzumbu yavumbikañawu hamaseki—napuuti mesu nawa nashali nawufwayi wahaya nyaka. Maama yawantu nombi mukeki windi wunavwaliki katataka, namusweki mukachi kezalela didi kunsa yanjila. Muntu wuyahañiluwu mudimu nafunti kumudimu kwazatilileñayi nakulooza muntu wudi wejima wunamoniyi, nkumininaku hakudijaha yomweni. Muntu weyala walemeshawu watamishaña anyana anyanya kuhitila mukwila nawu wuvumbi.

CHAWUSHONA, malipoti anzatilu yatama amuchidiwu anakuswejelaku munanu mafuku etu. Chawushona nankashi, nsañu yeniyi ayikoñaña muloña wakujilumuna muchidi wawantu, niwubanji wakuchinisha. Mukanda wasonekeluwu mu 1995 wahosheli nawu, “Chasweja kutama, iyi nkulakaji yayaaka makumi ayedi yadiña yaSatana. Mumakiñu akunyima antu hiyamwekesheli yililu nimpwila yakukeña kujaha yihita yawantu hamuloña wachaambu chekowa, nsakililu hela chifulu chawantuku.”

Hampinji yoyimu, antu anakutamisha mpepela, kukisañana iseki, kutepulula yuma yahamaseki yatukwashaña muwumi nikujaha nyitundu yayivulu yawatunyama kwakwihi nakuyijilumuna. Komana muchidi wamuntu wunateli kushinda kutama kwejimiku nikwilisha kaayi kwikala iluña dadiwahi? Indi kwiji kweseka kuzata mwenimu chikumwekana neyi tunakweseka kukomba menji amukaluñalwiji nakuyifuntisha hanyima nakakombu? Profesa wumu wasonekeli chikupu hansañu yakutama nindi: “Nafwilileña chikupu kuhimpa yuma mukaayi nikuwahisha kaayi. Ilaña kaayi hikanakuhimpikaku.” Hekwawu ninenu mwatiyaña chochimu.

Njila munakwendela kaayi atela kuyifwanisha neyi mbopolu yidi hakaluñalwiji hanakwikala wubanji weneni mafuku ejima. Hela chakwila kwosi niwumu wukukeña kuya muyina njila, ñovu jejima jakuhimpa nshakaminu jayaña mumenji. Kaayi kanakunyakashana kwenda kulonda kudiñija muwubanji wakubula kukañesha.

Munjila yikwawu, iku kutama kunaswejeluku hamuloña wakubula kumaninina kwaMuntu. (Aroma 3:23) Hela chochu, yuma yatama yinakuswejelaku, nawa yinakutwalekahu kubadika yililu yinateli kuleta wubanji kudi antu hohu. Komana muchidi wamuntu anakuwukakeja kudi yuma yakubula kumona namesu ilaña yañovu nawa yatama? Neyi chidi mwenimu, hichumanyi, nawa tunateli kudikiña ñahi? Chibaba chinalondeluhu chikuhanjeka hanawa malwihu.

[Mwevulu wudi hefu 3]

© Nyevulu yawaHeldur Netocny/Panos