Komana Kwalama hiChinjikijilu Chakukula?

MUMALUÑA amavulu amukanu kaayi, alamishaña anyikeki awamayala muloña wakukañesha yikatu. Kumaluña amakwawu chekala hichisemwa amayala kwikala abula kwalama muwumi wawu wejima. Ilaña kudi antu amakwawu, chidi neyi aYudeya niaMozilemu kwalama kwabadika hakukañesha hohu yikatu; kwalama kwalema kwesekeja nansakililu.

Hela chochu, mumatuña amakwawu chidika chakwalamisha achilaña neyi mwana weyala nakuli dehi. Ichi chabombelamu kutwala mwana weyala kumukaanda, kweniku amwalamishaña nawa amuhembelaña kwankawindi hadi nyilungu yayivulu nakushika tuhu hampinji yakakusuka chilonda. Haniyi mpinji, mwana weyala wadizaña tushidikilu nawa amudizishaña chakwikala mukulumpi. Komana kwalama kwamuchidiwu kwalema chakwila achimwekeshi nawu mwana weyala nashikuhu hakwikala mukulumpi? Tutalenu chuma chahosha Bayibolu chamonañayi Nzambi kwalama.—Yishimu 3:5, 6.

Chamonañayi Nzambi Kwalama

Antu amakwawu akushankulu adi neyi aEjipitu, adiña nakwalamisha, hikuketula muvumbu wachidi chalusemu chamuntu weyala. Hela chochu, Abarahama hasemukili muchisemwa chamuchidiwuku. Kafwampi yaaka yayivulu yakuhanda kwindi, Abarahama wadiña chidima. Hela chakwila wadiña chidima, Abarahama wadiña muntu wakola chikupu. Abarahama wakupishili amashidika awanyanta awana akwatili mwihwindi Loti nakuyishinda. (Kutachika 14:8-16) Chimwahitili yaaka 14, Nzambi wamulejeli Abarahama kwalama hamu tuhu nikwalamisha amwitala dindi ejima. Muloñadi Nzambi chamulejeliyi kwila mwenimu?

Bayi neyi chadiña chinjikijilu chakwila nawu Abarahama wakulili kufuma hawukampululu weyala nakwikala mukulumpuku. Kafwampi wadiña nayaaka 99 yakusemuka. (Kutachika 17:1, 26, 27) Nzambi washimwini chamulejeleliyi kwila mwenimu, hakuhosha nindi: “Akayalamisha nyivumbu yenu; chakekala chuma chakwilukisha nachu chitiyañenu chetu chitunatiyañani ninami ninenu.” (Kutachika 17:11) China chitiyañenu chaAbarahama chabombelelumu chikaninu chaNzambi chakwila nawu kuhitila mudi Abarahama, nkisu yeneni yikekala hadi “yisaka yaheseki yejima.” (Kutachika 12:2, 3) Dichi, kwesekeja nachamonañayi Nzambi, kwalama bayi neyi kwalumbulula kukulaku. Akwilishileña kumwekesha nawu muntu wakundama kudi aIsarela ankakulula jaAbarahama, adiña nakukooleka ‘kwakuhemba mazu aNzambi.’—Aroma 3:1, 2.

Chimwahitili yaaka, muza waIsarela hiwadiña washikilamu hawuna mudimuku, muloña akaanini Lubutu lwalala lwaAbarahama, Yesu Kristu. Dichi, ayikaanini kudi Nzambi, nawa kwalama kwawu kwekalili kwabula kulema kumesu aNzambi. Hela chochu, eniKristu amakwawu amuyaaka nkulakaji yakusambila C.E. akonkomweneni nawu kwalama kwachidiña hinshimbi yaNzambi. (Yililu 11:2, 3; 15:5) Haniwu muloña, kapostolu Pawulu wamutemesheli Titusa kuya ‘nakuloñesha yuma yasheli’ muyipompelu yashiyashana. Pawulu wamusonekeleli Titusa nindi: “Kudi antu amavulu, asweja akwakwalama, hiyakwakuluwalala  nakutavula mukanwa, nakudimbana; chiña ayimweneshi. Antu awa aluwañeshaña matala amavulu, nakuleja yuma yabula kutela kuleja antu; alonda kuheta chatama.”—Titusa 1:5, 10, 11.

Kufumba kwaPawulu kuchidi kuzatika. Chikwikala chashiyashana naNsona kudi mwiniKristu walala kushinjila muntu mukwawu nindi mwanindi amwalamishi. Chatela kwikala “kavuba,” mwiniKristu watela kushiya iyi nsañu kudi anvwali aweni afuukuluhu. (1 Petulu 4:15) Cheñi nawa, Pawulu amoneneneni kusoneka hansañu yakwalama kwesekeja naNshimbi yamwinkeluwu Mosi nawu: “Muntu atambikawu iku walama dehi, bayi abalumuka kwikala neyi chidimaku. Muntu atambikawu iku kanda aalami, bayi amwalamishaku. Kwalama hichumaku, nikubula kwalama hichumaku; chuma chalema yowu kuhemba mwayilejawu kudi Nzambi. Antu ejima ekali mwomwadiñililu hayitambikiluwu.”—1 Akorinda 7:18-20.

Komana “Kwiñija Mukaanda” Chaluwa?

Indochu neyi anvwali awiniKristu anakukeña kwalamisha anyanawu? Komana chikwikala chesekana naBayibolu kutwala anyanawu kumukaanda wunalumbululiwu hakusambila? Kuya kumukaanda chabombelamu yuma yayivulu kubadika hakwalamisha. Muntu wuneñili kumukaanda wukwikala nawulunda nawanyana awamayala niayilombweji abula kwikala akwakudifukula aYehova hadi nyilungu yayivulu. Yuma yayivulu yatañishañawu kumukaanda yashiyashana nanshimbi yayiwahi yamuBayibolu. Bayibolu yasoñamisha nawu: “Kudikunda nawantu atama kwatamishaña maana amawahi.”—1 Akorinda 15:33.

Cheñi nawa, kwekala cheñi wubanji wakumujimba kunyikaanda yeniyi. Mu 2003 magazini yimu yasoñamishili antu nawu: ‘Kwalamisha kwakuhayamisha kunamwekani cheñi chinu chaaka cha 2003, nawu kudi malipoti ajiñufwa ninsañu yakukatisha nyijimba yinasonekewi mwahita kaayi kejima kudi akwakusoneka nsañu amaneni. . . . Kuhosha mukwihihisha, makonu ‘nyikaanda yayivulu’ yamukunkulwayi nawa yidi nawubanji.’ (South African Medical Journal)

Kubombela hawubanji wunateli kwikala kumujimba wamukwenzi, kwekala wubanji weneni wakuspiritu. Yuma yatañishañawu niyakoñañawu kumukaanda yakundama chikupu kukupesha nikudifukula kudi ankakulula. Chakutalilahu, chatela eteji nawu kubula kwalamisha chiwahi nikubula wunyoji diyuma yaletesheli lufu lwenilu, antu amavulu akuhwelela nawu kulowana hela kuhilisha ankakulula afwa dehi dikwakojejaña iku kukala. Kutalisha kunuñañana nansakililu yakutwamba, Bayibolu yahosha nawu: “Bayi mudibombaña nawabula kwitiya mumpanda yoyimuku. Kuloña nakuluwa akutwesha kulondañana? Hela chejeji namwidima akutwesha kutiyañana? . . . Dichi dinu Yehova nahoshi nindi, Fumenu mukachi kawu, ambukenumu, bayi mukunka kuchuma chatamaku, ninami nukuyitambula.” (2 Akorinda 6:14-17) Kwesekeja naniku kufumba, chikusweja kutama kudi anvwali awiniKristu neyi akutwala mwanawu kumukaanda.

Chumanyi Chaleteshaña mwiniKristu Kukula?

Hela chakwila mwiniKristu walama hela halamaku, hichamwekeshaña nawu nakuluku. Chuma chacheni chakamenañayi mwiniKristu walala hikumuzañalesha Nzambi, bayi ‘kukeña kuyilemesha kudi antu munyijimbaku.’—Aŋalija 6:12.

Hela chochu, hakwila nawu yamuzañaleshi Nzambi, mwiniKristu chiña ‘yaalama mumuchima.’ (Kuhituluka 10:16; 30:6; Matewu 5:8) Ichi hichazatikaña kuhitila mukuketula nampokuku, ilaña hikukaana kufwila kwatama niyitoñojoka yakudivwimba, chidi neyi yitoñojoka yakwila nawu kwalama kwakumujimba dichuma chaleteshaña muntu kwikala wabadika akwawu. Kuhitila mukutatakena kweseka nikwimana “chakola mukukuhwelela,” mwiniKristu nateli kudimwekesha kwikala iyala, chili walama hela halamaku.—1 Akorinda 16:13; Yakoba 1:12.