Komana Mwakuhwelela Nenu Kwakekala Kusañuka?
Komana Mwakuhwelela Nenu Kwakekala Kusañuka?
‘Kwamba kekala kusañuka.’—YILILU 24:15.
1. Muloñadi kufwa chikwamwekenaña neyi hiyakwitondolwelañaku?
“MUKANU kaayi kufwa ninyisonku diyuma yitwakañanyaña kutondolwela.” Awa mazu, ayisonekeli mu 1789 kudi iyala walema weluka nsañu jamatuña nachiyulu wakwaAmerica, Benjamin Franklin, ayihamekaña kudi amakwawu nawu alumbuluka. Hela chochu, antu amavulu abula kashinshi atwambaña nawa hiyafwetaña nyisonkuku. Kufwa hiyakwitondolwelañaku. Chakadi wakutwikwasha kwosi watela kutondolwela kufwa, mukuhita kwampinji twafwaña. Kufwa kwatukupishaña wejima wetu. Shelu, wabulaña kwikuta—ijamu kwayaña muchidi wamuntu waminyaña antu yitwakeña. (Yishimu 27:20) Hanu dinu talenu awa mazu akukundeja.
2, 3. (a) Muloñadi chitukuhoshela netu amakwawu akafwa wanyi? (b) Chumanyi chitukudiza muchinu chibaba?
2 Izu daYehova datwinkaña kuchiñeja kwalala kwakusañuka, kusañukila cheñi kuwumi. Iku kusañuka hichilota hohuku, nawa kwosi yileñaleña yatela kumukañesha Yehova kushikija iku kuchiñeja. Hela chochu, antu amavulu makonu hiyeluka nawu antu amakwawu hiyakafwaku. Muloñadi? Muloña “izaza deneni” dakadi kutwesha kuchinda dakapuluka “yihuñu oyu yeneni” yinakwinza katataka. (Chimwekeshu 7:9, 10, 14) Akatwalekahu kuhanda, nakuchiñeja kwawumi wahaya nyaka. Dimuloña wukabululilawu kufwa. Kubombelahu, ‘kufwa akakwinoñesha.’—1 Akorinda 15:26.
3 Twatela kwikala nachikuhwelelu neyi chakapostolu Pawulu wahosheli nindi: “Kwamba kekala kusañuka kwawaloña nikwawabula kuloña.” (Yililu 24:15) Tusambilenu kudiza hamalwihu asatu ahoshaña hakusañuka. Lwihu lwatachi, chumanyi chinaleñeli iku kuchiñeja kwikali kwalala? Lwamuchiyedi, indi kuchiñeja kwakusañuka kunateli kuyikundeja ñahi halwenu? Lwamuchisatu, indi iku kuchiñeja kunateli kuyikwasha ñahi mukuhanda kwenu chakatataka?
Kusañuka Kukekala Kwoku
4. Indi kusañuka kunekali ñahi kwalema munkeñelu yaYehova?
4 Kudi yikuma yayivulu yinaleñeli kusañuka kwakekaluku. Sweje-e dinu, kusañuka kwalema nankashi munkeñelu yaYehova. Anukenu nenu, Satana waleñeleli muchidi wamuntu kuvulumuna, kwaletaña kufwa kwakadi kutondolwela. Yesu wahosheli hadi Satana nindi: “Yena wadiñi mbanji kufumisha kutachi.” (Yowanu 8:44) Ilaña Yehova wakanini nindi “mumbanda” hela kuloñesha kwindi kwafwana neyi nsumbuki mwiwulu, wakavwala “mwana” wakamuchika iwu “kapela mukulu” kumutu, nakumushinda Satana chikupu nikumujilumuna. (Kutachika 3:1-6, 15; Chimwekeshu 12:9, 10; 20:10) Yehova chatachikiliyi kumwekesha nkeñelu yindi chovu-chovu yaMwana wawuMesiya, chamwekeni nawu Mwana wukakoña yuma yayivulu kubadika hakujilumuna Satana. Izu daNzambi dahosha nawu: “Dichi chamumwekesheleluwu Mwana kaNzambi, kulonda akisañani nyidimu ya[D]iyabolu.” (1 Yowanu 3:8) Kufwa kwenza hamuloña wanshidi yitwaswana kudi Adama dichuma chabadika hanyidimu yaSatana yafuukulayi Yehova nindi wukayifumishahu kuhitila mudi Yesu Kristu. Muniyi njila, mulambu wefutu danyiloña nikusañuka kwaYesu kwalema nankashi.—Yililu 2:22-24; Aroma 6:23.
5. Muloñadi kusañuka chikwakalemeshela ijina daYehova?
5 Yehova nafuukuluhu kujilika ijina dindi dajila. Satana nasawuli ijina daNzambi nawa navulishi makudi. Watwambili chikupu nindi Adama naEvu ‘chalala hiyakafwaku’ neyi adya kumukabu wayilekesheliyi Nzambi. (Kutachika 2:16, 17; 3:4) Kufuma hayina mpinji, Satana navulishi kutwamba kwamuchidiwu, kudi neyi ntañishilu yakutwamba yakwila nawu wumi wahandaña hanyima yakufwa kwamujimba. Hela chochu, kuhitila mukusañuka, makudi ejima awa Yehova wakayileta hatooka. Wakamwekesha haya nyaka nawu yena hohu diyi Mukwakuhandisha nawa Mukwakusañula.
6, 7. Chumanyi chamwekeshaña nawu Yehova wakeñaña kusañula antu, nawa tweluka ñahi iyi yitoñojoka yindi?
6 Yehova wafwilaña kusañula afwa. Bayibolu yalumbululaña chikupu yitoñojoka yaYehova haniyi nsañu. Chakutalilahu, talenu awa mazu yiyonena ahosheli muntu washinshika Yoba nindi: “Muntu afwi ahandi cheñi? Nukuchiñililaña mumafuku anjita yami ejima, nichinakabalumuka hinidi wacheñi. Wadi kutambika, ami nadi kwitiya; wunafwili mudimu wakumakaseyi.” (Yoba 14:14, 15) Indi awa mazu alumbulukadi?
7 Yoba welukili nindi chafwayi, wukahembelela hadi mpinji yayilehi mutulu twakufwa. Iyi mpinji wayimweni nindi ‘himafuku anjita,’ mpinji yakuhembelela nichiyakamusañula. Welukili nindi kusañuka kukekala kwoku. Yoba welukili nindi mpinji yakabula kumonayi yihuñu yakenza. Muloñadi? Muloña welukili yitoñojoka yaYehova. Yehova ‘wafwilaña’ kumona cheñi ambuñindi ashinshika. Mwalala, Nzambi nakufwila chikupu kusañula antu ejima aloña. Cheñi Yehova wukayinka amakwawu kukooleka kwakushakama haya nyaka muParadisa hamaseki. (Luka 23:43; Yowanu 5:28, 29) Chineli Nzambi wafwilaña kushikija iyi nkeñelu yindi, hinyi watela kumukañesha?
8. Indi Yehova ‘nakoleshi ñahi chikaninu’ chetu chakuchiñeja kwakusañuka kwakumbidi?
8 Kusañuka kwaYesu kunakoleshi kuchiñeja kwetu kwakumbidi kwakusañuka. Hampinji yahaniniyi Pawulu mpanji muAtenisi, wahosheli nindi: “[Nzambi] nashumu dehi ifuku damba kasompeshayi matuña mwaloña, neyala anafuukuliyi dehi. Mwenomu nakoleshumu dehi kudi antu ejima, nanochu chanamusañuliyi mudi afu.” (Yililu 17:31) Amakwawu adiñi mwizaza amuseheli Pawulu chiyatiyiliwu nsañu yakusañuka. Antu antesha hohu diwu etiyili. Hadaha chikuma chakwila nawu iku kuchiñeja anakwikoleshi chayishikili hanyichima. Yehova wazatili chihayamisha cheneni hayihayamisha yejima, hampinji yamusañwiliyi Yesu. Wamusañwilili Mwanindi kuwumi wañovu yakuspiritu. (1 Petulu 3:18) Yesu asañwiliwu waswejeli kulema chikupu kubadika chadiñayi mwiwulu. Hakwikala nawumi wabulaña kufwa, nawa chinlonda chaYehova, ichi dinu Yesu nashikilimu kutambula mudimu wawuwahi kudi Tata yindi. Kuhitila mudi Yesu, Yehova wakoñaña kusañula kukwawu kwejima—kwawumi wamwiwulu hela kwawumi wahamaseki. Yesu yomweni wahosheli nindi: “Yami kusañuka; Yami kuhanda.” (Yowanu 5:25; 11:25) Kuhitila mukusañula Mwanindi, Yehova wayikana antu ejima akashinshi kuchiñeja kwamuchidiwu.
9. Indi nsañu yamuBayibolu yamwekeshaña ñahi nawu kusañuka kukekala kwoku?
9 Kusañuka akwimwekesheli kumesu awayinsahu nawa akwisoneka Mwizu daNzambi. MuBayibolu mwekala nsañu yalumbululawu chikupu yakusañuka kutanu nakusatu kwawantu asañwiliwu nakuhanda hanu hamaseki. Iyi yihayamisha bayi neyi ayikoñeleleña mukujindaku, ilaña ayikoñeleli hatooka, kakavulu hamesu awayinsahu. Yesu wamusañwili Lazaru, wafwili hadi mafuku awana, hamesu ezaza dawantu adilileña—chakadi kujina hadiña ataña jindi, amabwambu, niantuñi nindi. Wunsahu wakwila nawu Yesu amutemesheli kudi Nzambi wayishikili chikupu ayilumbu jaYesu amunsakililu chakwila etejeli nawu chamwekeni. Kutwala muna, akwatili mpuña yakwila nawu amujahi Yesu niLazaru. (Yowanu 11:17-44, 53; 12:9-11) Mwalala, tunateli kukuhwelela netu kusañuka kukekala kwoku. Nzambi natwinki nsañu yakunyima yakusañuka kulonda yitwikundeji nikukolesha chikuhwelelu chetu.
Kuchiñeja kwaKusañuka Kwatukundejaña
10. Chumanyi chatela kutwikwasha kuwana kukundeja munsañu yakusañuka yamuBayibolu?
10 Komana mwakeñaña kuyikundeja neyi mwiñila muyikatu yakufwa? Nsañu yakusañuka yasonekawu muBayibolu yatela kutwikundeja chikupu. Kutañaña nsañu yakusañuka, kutoñojokañahu, nikufwikija yuma yamwekeni yinateli kuleñela kuchiñeja kwakusañuka kwikala kwalala chikupu kudenu. (Aroma 15:4) Iyi nsañu hituheka hohuku. Kusañuka kwamwekeni kudi antu alala adi neyetu, adiñaku kunyuma. Tushinshikenu chantesha hachakutalilahu chimu—chakusañuka kwatachi kuyasonekawu muBayibolu.
11, 12. (a) Kukalanyi kwamumwekeneni ntuluwa wakuZarefwati, nawa wahosheli nindidi hatachi? (b) Lumbululenu chuma chamwitejeluwu Elija kudi Yehova kumwilila ntuluwa.
11 Fwikijenu chuma chamwekeni. Kaprofwetu Elija himwenyi mwitala damumbanda ntuluwa wakuZarefwati, nakushakama mwitala dantuluwa dahewulu. Himpinji yatama. Mwituña munaholoki chaaña ninzala. Antu amavulu anakufwa. Yehova namuzatishi dehi Elija kwila chihayamisha champinji yayilehi kulonda kusomwena chikuhwelelu chantuluwa wadizoza. Mumbanda ntuluwa nimwanindi weyala ashikili hanzala yayeni, ashalili hohu natuyakudya twakudya kamu, ilaña Elija wamwinkeli wuña nimanji akubula kumana muchihayamisha. Kulondelahu, kukala kunamumwekeni mumbanda. Kukashimuka mwana hakukata, nawa hohenohu yaleka nikwona. Ntuluwa naneñi chikupu. Chakala nankashi kushakama chakadi ñovu niwukwashu weyala, ichi dinu najimbeshi dehi mwanindi wumu hohu. Hamuloña wachineñi, hakumuhoshola Elija niNzambi yindi Yehova. Indi kaprofwetu wukwiladi?
12 Elija hanamuhosholi ntuluwa hamuloña wakumutwinka muloña wakutwambaku. Ilaña, hakumwila nindi: “Nyinki mwaneyi.” Hanyima yakumutwala mwana wafwa mwitala dahewulu, Elija hakulomba nakubilela nindi mwana amufuntishili wumi windi. Nkumininaku, Yehova hakutiyilila. Toñojokenu muzañalu wunatiyi Elija hakumona wumi wamwana hiwukufuntamu cheñi. Mwana hakutona, nawa mesu indi hiyakumona. Elija hakumusulwisha mwana nakumutwala kudi mama yindi hakuhosha nindi: “Tala, mwaneyi iwu nahandi dehi.” Natiyi muzañalu nankashi. Hakuhosha nindi: “Ichi dinu neluki dehi komana eyi wumuntu waNzambi, niizu daYehova didi mukanwa keyi dalala.” (1 Anyanta 17:8-24) Chikuhwelelu chindi mudi Yehova nimudi ñimenu yindi hichikukolelaku nankashi.
13. Muloñadi nsañu yaElija yakusañula mwana kantuluwa chiyatukundejaña makonu?
13 Kutoñojoka hansañu yamuchidiwu kwatela kuyikundeja chikupu. Chinamwekani hatooka to-o nawu Yehova natweshi kushinda kufwa chilumbu chetu. Toñojokenu hefuku dakatiyawu antu amavulu hamaseki muzañalu neyi watiyili ntuluwa hakusañuka kwawantu amavulu afwa dehi. Mwiwulu nimwena mwakekala muzañalu weneni chakazañalalayi Yehova hakumuleja Mwanindi kuzata mudimu wakusañula mukaayi kejima. (Yowanu 5:28, 29) Komana mwafwishahu dehi muntu yimwakeña? Wenowu muzañalu wutukweti hakwiluka netu Yehova natweshi nawa wakasañula afwa!
Kuchiñeja Kweyi niChihandilu Cheyi Makonu
14. Indi kuchiñeja kwakusañuka kunateli kukukwasha ñahi muchihandilu cheyi?
14 Indi kuchiñeja kwakusañuka kunateli kukukwasha ñahi muchihandilu cheyi makonu? Iku kuchiñeja kunateli kukukolesha neyi wumona makabi, kukala, kuyandishewa, hela wubanji. Satana nakukeña eyi wuchineña kufwa chikupu kulonda mukudikeñela wuhimpi kashinshi keyi nakukana kwakukiña kwamukunkulwayi. Anukaku neyi Satana wamulejeli Yehova nindi: “Muntu wukuhana yuma yakwetiyi yejima nawumi windi.” (Yoba 2:4) Hakuhosha mazu amuchidiwu, Satana watutwambilili wejima wetu kubombelahu nineyi. Komana mwalala wukuleka kumukalakela Yehova neyi wumona kukala? Kuhitila mukutoñojoka hakuchiñeja kwakusañuka, wunateli kukolesha chikuhwelelu cheyi kulonda wutwalekuhu kwila nkeñelu yaTata yeyi wamwiwulu.
15. Indi mazu aYesu ekala haMatewu 10:28 atela kutukundeja ñahi neyi tumona kukala?
15 Yesu wahosheli nindi: “Bayi mutiyaña woma ajahaña mujimbaku, hiyanatweshi kujaha muntu wamukachiku; ilaña tiyenu woma yena natweshi kukisañana nimuntu wamukachi nimujimba mukaluña kachinana [Gehena].” (Matewu 10:28) Hitwatela kumuchiina Satana hela antu jindiku. Eña, amakwawu anateli kwikala nañovu yakutwikatisha, hela kutwijaha. Hela chochu, kutama kuyatela kwilawu kwakampinji kantesha hohu. Yehova natweshi nawa wakafumishahu kutama kwejima kunayandishiwu antu jindi ashinshika, nikuyisañula. Yehova hohu diyi yitwatela kutiya woma, kwakama nikulemesha. Yena hohu diwukweti ñovu yakujilumuna wumi nikuchiñeja kwejima kwawumi wakumbidi, nateli kukisañana mujimba niwumi muGehena. Ilaña, Yehova hanakukeña yuma yamuchidiwu yikakumwekenuku. (2 Petulu 3:9) Muloña wakuchiñeja kwakusañuka, etu hamu neyi ambuña aNzambi mpinji yejima twakuhwelela chikupu netu tudi akiñewa. Wumi wahaya nyaka wunakutwihembelela neyi tutwalekahu kwikala ashinshika, nawa kwosi chuma chatela kwilayi Satana niantu jindi.—Masamu 118:6; Aheberu 13:6.
16. Indi kuchiñeja kwetu kwakusañuka kwakwashaña ñahi yuma yalema yitwatanjikaña?
16 Neyi twakuhwelela netu kusañuka kukekala kwoku, yuma yejima yitukwilaña yikumwekeshaña nawu tudi nakuchiñeja. Tweluka netu ‘hela tukuhanda hela tukufwa, tudi ambala aYehova.’ (Aroma 14:7, 8) Hakutanjika yuma yalema, twatela kuzatisha kufumba kwaPawulu kwakwila nawu: “Bayi mulondeja mwelañawu antu amakonuku; ilaña yitoñojoka yenu yibalumuki kwikala yayiha; kulonda mushinshiki mwaya muchima waNzambi, diwu wawuwahi, watiyishaña kuwaha, walala chikupu.” (Aroma 12:2) Antu amavulu anakutemukila kuwanisha yuma yejima yakuyizañalesha, yuma yejima yinakukeñeshawu, niyuma yinabuli kufuukulawu kuheta. Muloña wumi awimonaña neyi wakampinji kantesha, anakufwila hohu cheseki, hakwila dinu neyi hiyakwakudifukula, kudifukula kwawu hikwesekana ‘namwaya muchima waNzambuku.’
17, 18. (a) Indi Izu daYehova dahoshaña nawudi hakukeha kwampinji yakuhanda kwawantu, ilaña chumanyi chatwifuukwilayi Nzambi? (b) Muloñadi chitwamuhamekelaña Yehova mpinji yejima?
17 Mwalala, wumi wakampinji kantesha. ‘Mwaka waya dehi, hitukutuuka,’ hadaha yaaka 70 hela 80. (Masamu 90:10.) Antu ahandaña hohu chakapinji kantesha neyi matahu, neyi wulelu wukuhita, neyi mpepela. (Masamu 103:15; 144:3, 4) Ilaña Nzambi hafuukwili nindi tushakameña yaaka yantesha yakukula nikuheta maana nikwiluka, kufumahu hitukushinakaja nakutachika kukata nikufwaku. Yehova wayileñeli antu nankeñelu yakuhanda haya nyaka. Bayibolu yatulejaña nawu: “Washa dehi nawa mpinji yahaya nyaka munyichima yawu.” (Mukwakutaŋisha 3:11, NW) Komana Nzambi, hiNzambi wawukatu wakwila yatwinka nkeñelu yamuchidiwu kufumahu yakañanyi kuyishikija? Inehi, muloña “Nzambi diyi kukeña.” (1 Yowanu 4:8) Kuhitila mukusañuka wakayinka antu afwa wumi wahaya nyaka.
18 Hamuloña wakuchiñeja kwakusañuka, twakekala amomi kumbidi. Makonu bayi tunyakala kukoña nyidimu yejima yakumbiduku. Bayi tuzatisha “chikupu” idi ituña dinakujilumukaku. (1 Akorinda 7:29-31; 1 Yowanu 2:17) Kwambukaku nawantu abula kuchiñeja kwalala, tukweti chawana chachiwahi chakwiluka netu neyi twikala ashinshika kudi Yehova Nzambi, twakamutuumbakesha haya nyaka nikuluña nawumi. Mpinji yejima, tumuhamekeña Yehova nañovu yetu yejima wunaleñeli kuchiñeja kwakusañuka kwikalaku.
Mukwakula Nenudi?
• Indi nsañu yakusañuka yatela kutwitiyisha ñahi?
• Yumanyi yinaleteshi kuchiñeja kwakusañuka kwikalaku?
• Indi kuchiñeja kwakusañuka kwatela kuyikundeja ñahi?
• Indi kuchiñeja kwakusañuka kunateli kukwasha ñahi chihandilu cheyi?
[Malwihu aKuzatisha haKudiza]
[Mwevulu wudi hefu 20]
Yoba welukili nindi Yehova wafwilaña kusañula antu aloña
[Mwevulu wudi hefu 23]
‘Tala, mwaneyi iwu nahandi dehi’