Muloña Wukumanina Makabi Ejima Katataka

‘Diyi Ilola, mudimu windi walala chikupu.’—KUHITULUKA 32:4.

1, 2. (a) Muloñadi chimwalemeshela kuchiñeja kwakuhanda haya nyaka? (b) Chumanyi chakañeshaña antu amavulu kukuhwelela Nzambi wakana yikaninu yayiwahi yakumbidi?

 KOMANA mwatiyaña kuwaha kufwikija wumi chiwakekala muParadisa? Hadaha mwadimonaña munakutohesha adinu iseki dadiwahi nikudiza nyichidi yayuma yasweja kuvula yikweti wumi. Hadaha mwatoñojokaña hakuwaha kumwakatiya hakuzata nawantu amakwawu hakuwahisha iseki nikudibalumuna dejima kwikala itempa. Hela munateli kutoñojoka hanyidimu yimukadiza yakuleñaleña nyevulu, kufuukula mwakutuñila, tumina, hela nyidimu yikwawu yimwabulaña kwikala nampinji yakuyizata muchihandilu chamakonu chakadi kunooka. Hela chochu, mwalemesha kuchiñeja kwakuhanda kwatenaña Bayibolu nawu “wumi walala chikupu”—kwesekeja nachafuukwiliyi Yehova nindi tukashakameña, haya nyaka.—1 Timotewu 6:19.

² Tudi namuzañalu nikukooleka kwalema kwakulejaku amakwawu iku kuchiñeja kwamuBayibolu, hidimuku? Hela chochu, antu amavulu akaanaña kuchiñeja kwamuchidiwu. Akaanaña nawu hikaheka, hichilota hohu chawantu adimbañawu swañu. Chatela nikuyikalila kukuhwelela Nzambi wakana wumi wahaya nyaka muParadisa. Muloñadi? Chuma chakabishaña antu amakwawu hikukala kwakutama, neyi chiyakwitenañawu kakavulu. Atoñojokaña nawu neyi Nzambi wekala kwoku nawa watwesha yejima nikukeña, kutama nimakabi adi mukaayi chiña kwekala kwosi. Atoñojokaña nawu, kwosi Nzambi wetejaña kutama watela kuhanda, hela neyi wudi kwoku, dikwila nawu hidiyi watwesha yejimaku hela hatwakameñaku. Antu amakwawu etejaña yitoñojoka yamuchidiwu. Mwalala Satana namwekeshi nawu weluka kuputisha chikupu yitoñojoka yawantu.—2 Akorinda 4:4.

3. Lwihwinyi lwasweja kukala lutwatela kukwasha antu kwakula, nawa muloñadi wutwatela kuyikwashila?

³ Hamu neyi aYinsahu jaYehova, tukweti mudimu wadimena wakukwasha antu anakudimbawu kudi Satana nimaana akanu kaayi. (1 Akorinda 1:20; 3:19) Tuneluki muloña waleñelaña antu amavulu kubula kukuhwelela yikaninu yamuBayibolu. Muloña hiyamwiluka Yehovaku. Hadaha hiyeluka ijina dindi hela kulema kwaduku, nawa hiyelukisha hela eluka wanyi yililu yindi hela chahembañayi yikaninu yindi. Atwikiswila hakwikala nakwiluka kwamuchidiwu. Kakavulu, chachiwahi kuhituluka munjila yitwatela kukwashilamu antu adi ‘nayitoñojoka yidi mumwidima’ kulonda tuwani ñakwilu yalwihu lwasweja kukala lwehulañawu antu nawu, “Muloñadi Nzambi chetejelayi kutama nimakabi?” (Aefwesesa 4:18) Tukusambila kushinshika chitwatela kwakula chachiwahi. Kuhiñahu tukuhanjeka hayililu yaYehova chiyamwekenaña munjila yinazatilimu naniku kutama.

Chitwatela Kwakula Chachiwahi Lwihu

4, 5. Chumanyi chitwatela kusambila kwila neyi muntu yehula muloña wetejelayi Nzambi makabi? Lumbululenu.

⁴ Neyi muntu yehula nindi muloñadi Nzambi chetejelayi makabi, twakulaña ñahi? Keña tutachiki hohenohu kumulumbulwila chikupu, kutachika nachuma chazatikili mwitempa daEdeni. Mpinji yikwawu, chinateli kuzatika. Hela chochu, mwatela kwikala asoñama. Twatela kwikala nahakutachikila. (Yishimu 25:11;  Akolose 4:6) Tushinshikenu hayikuma yisatu yamuNsona yitwatela kulumbulula mukwihihisha henohu kanda twakuli lwihu.

⁵ Chatachi, neyi chakwila muneluki chikupu nenu iwu muntu naluwankani chikupu nakuvula kwakutama kudi mukaayi, hadaha kutama kunamuluwañeshi hela kunaluwañeshi antaña jindi akeñayi. Komana chikuwaha neyi mukutachika kumutiyila luwi chikupu. Kapostolu Pawulu wafumbili eniKristu nindi: ‘Dilenu nawakwakudila.’ (Aroma 12:15) Kumwekesha luwi, hela “kutiyila akwenu wushona,” kunateli kukolesha muntu. (1 Petulu 3:8) Neyi yeluka nindi tunamwakameni, watela kutiya yuma yitukuhosha.

6, 7. Muloñadi wutwatela kumuhamekela hohenohu muntu washinshika wukwihula lwihu lwakala lwamuBayibolu lwamukabishaña?

⁶ Chamuchiyedi, twatela kuhameka muntu washinshika hakwihula ilu lwihu. Antu amakwawu atoñojokaña nawu muloña wakwila ayandaña namalwihu amuchidiwu, hiyakweti chikuhwelelu hela hiyamulemesha Nzambuku. Hekwawu mukulumpi wansakililu wayilejahu dehi nindi hiyakweti chikuhweleluku hela hiyamulemesha Nzambuku. Hela chochu, kwihula malwihu amuchidawa hikwamwekeshaña kubula chikuhweleluku. Muloña, antu achikuhwelelu amumpinji yakunyima ehwili malwihu amuchidiwu. Chakutalilahu, Davidi ñimbi wamasamu wehwili nindi: “Wunemenidi kwakulehi, eyi Yehova? Chiyakumona antu yihuñu wunabataminidi?” (Masamu 10:1) Chochimu, kaprofwetu Habakuki niyena wehwili nindi: ‘Eyi Yehova, nukudila dile-e kushika kumwakanyi chakadi eyi kutiya? Nabidiki kudeyi jamadombu, eyi kwamwina nehi? Wanmwekeshelañadi kuluwa? Wantalishilañadi kuyuma yakala? Muloñadi kumesu ami chikunakumwekana nikukisañana nimadombu, kudi nakunyamuka nikuzuñazuña [niyikonkojola]?’—Habakuki 1:2, 3.

⁷ Awa adiña amayala akashinshi amulemesheli Nzambi chikupu. Komana ayihosholeli hakwihula malwihu akala amuchidiwu? Inehi, Yehova wakeñeli nindi malwihu awu alala ayisoneki Mwizu dindi. Makonu, muntu wunakwakama hamuloña wakutama kunasweji watela wudi nanzala yakuspiritu—nakukeña ñakwilu yahanaña Bayibolu hohu. Anukenu nenu Yesu wahamekeli antu adi nanzala yakuspiritu, hela “atuzweñi muspiritu.” (Matewu 5:3) Tudi nakukooleka chikupu kwakukwasha antu amuchidiwu kuwana muzañalu wakaniniyi Yesu.

8. Ntañishilu yamuchidinyi yaluwalala yinaleñeli antu kwiteja nawu Nzambi diyi waletaña makabi, nawa twatela kuyikwasha ñahi?

⁸ Chamuchisatu, twatela kumukwasha muntu yeluki nindi Nzambi hidiyi wunakuleñela kutama kunasweji mukaayiku. Antu amavulu ayitañishaña nawu Nzambi diyi wunakuyula kanu kaayi kitudimu, cheñi nawu kunyima Nzambi wafuukwilili chadimu yuma yejima yinakutumwekena, nawa wukweti nyiloña yakala kulumbulula yamuleñelaña kukabisha antu. Iyi ntañishilu  yakutwamba. Amusawulaña Nzambi nakumumwekesha neyi diwaletaña kutama nimakabi adi mukaayi. Dichi twatela kuzatisha Izu daNzambi kulonda kwolola nsañu yamuchidiwu. (2 Timotewu 3:16) Yehova hidiyi nyuli wakanu kaayi katamaku; Satana Diyabolu diyi. (1 Yowanu 5:19) Yehova helukilaña chadimu yuma yikamwekena yileñaleña yindi yikweti maanaku; yejima wayinkaña wuswa nikukooleka kwakutonda yayiwahi niyatama, yoloka niyaheña. (Kuhituluka 30:19) Cheñi Yehova hidiyi waletaña kutamaku; wahela kutama nawa wakamenaña antu ayandishañawu.—Yoba 34:10; Yishimu 6:16-19; 1 Petulu 5:7.

9. Yitwanyi yinaloñeshi ‘nduñu wamaana nikashinshi’ kulonda kukwasha antu kutiyishisha muloña wetejelayi Yehova Nzambi makabi?

⁹ Chimwaala chikuku chamuchidiwu, mukumona nenu muntu wunakuyitiyilila nakukeña kwiluka muloña wetejelayi Nzambi makabi kutwalekahu. ‘Nduñu wamaana nikashinshi’ naloñeshi nyikanda yayivulu yakuyikwashaku. (Matewu 24:45-47) Chakutalilahu, hakupompa kwaNkambi kwamu 2005/06, “kwaKwovwahila Nzambi” hedikili tilakiti yidi namutu wakwila nawu Makabi Ejima Keña Amani!. Neyi iyi tilakiti mukweti mwidimi denu, mwatela kwilukisha nsañu yidimu. Chochimu, mukanda waChumanyi Chacheni Chatañishaña Bayibolu?, wudi mumadimi 157 wukweti kapetulu kamukuma kanakuhosha hanilu lwihu lwalema. Zatishenu chikupu yitwa yamuchidiwu. Yalumbululaña chachiwahi nsañu yayeni yamuNsona yawanta wakuleña kwejima yatachikili muEdeni nichaletesheli Yehova yazati nakuna kukala muniyi njila. Hakuhanjeka haniyi nsañu, ilukenu nenu, munakumwenzulwila muntu wunakuyitiyilila yitoñojoka yakwiluka yuma yasweja kulema. Hikwiluka Yehova niyililu yindi yabadika kuwaha.

Hoshenu haYililu yaYehova

10. Chumanyi chiyakañanyaña amavulu kutiyishisha Nzambi chetejelayi makabi, nawa kwilukanyi kwatela kuyikwasha?

¹⁰ Hakukwasha antu kutiyishisha muloña wetejelayi Yehova antu kudiyula aweni muñovu yaSatana, esekenu kuyileja hayililu yaYehova yabadika kuwaha. Antu amavulu eluka nawu Nzambi wasweja ñovu; enjilila dehi kutiya chamutenañawu antu amakwawu nawu Nzambi Watwesha Yejima. Hela chochu, chatela kuyikalila kutiyishisha chabulaña kuzatishayi ñovu yindi yasweja kulonda kumanisha kutama nimakabi hohenohu. Hadaha akañanyaña kwiluka yililu yaYehova yikwawu, yidi neyi kujila, wuñanji, maana, nikukeña. Yehova wamwekeshaña iyi yililu munjila yaloña, nawa yesekana. Dichi Bayibolu yahoshaña nawu: “Mudimu windi walala chikupu.” (Kuhituluka 32:4) Mwatela kukonkomwena ñahi haniyi yililu hakwakula malwihu avula kwihulawu haniyi nsañu? Tushinshikenu hayakutalilahu yantesha.

11, 12. (a) Muloñadi kwanakena chikwabulili kuzatika hampinji yavulumwinuwu Adama naEvu? (b) Muloñadi Yehova chikabulilayi kwiteja nshidi kutwalekahu haya nyaka?

¹¹ Komana Yehova chiña wayanakeneni hohu Adama naEvu? Haniyi nsañu kwanakena hikwadi kuzatikaku. Hamu neyi antu aloña, Adama naEvu afuukwiluhu kukaana wanta waYehova mumushikila nakwiteja wunlomboli waSatana. Chakadi kujina, akwakudikaña hiyamwekesheli chinjikijilu chakubalumuka mumuchimaku. Dichi, neyi antu ehula nawu muloñadi Yehova chabuliliyi kuyanakenayi, dikwila nawu anakwihula muloña wabuliliyi Yehova kukeheshaku nshimbi jindi nakwiteja nshidi nikudikaña. Ñakwilu yinabombelumu chililu chalema chaYehova—chakujila kwindi.—Kwidika 28:36; 39:30.

¹² Kakavulu Bayibolu yakonkomwenaña hakujila kwaYehova. Chawushona, hakuwana neyi antu antesha mukanu kaayi katama diwu eluka ichi chililu. Yehova wawunyoji, wutooka, nawa wambukaku kukutama kwejima. (Isaya 6:3; 59:2) Kutalisha hanshidi, naloñeshi njila yakuyitokeshelamu, nikuyifumishahu, nawa hamba kayileka haya nyakaku. Neyi chakwila Yehova wakeñeleña kwiteja nshidi kutwalekahu, chiña tudana kuchiñeja kwakumbidi. (Yishimu 14:12) Mumpinji yafuukulayi, Yehova wakelisha yileñaleña yejima kwikala yajila. Ichi  chakamwekana, muloña diyi nkeñelu yaYena Wajila.

13, 14. Muloñadi Yehova chafuukwiluhu kubula kuyijilumuna akwakudikaña muEdeni?

¹³ Komana Yehova chiña wayikisañeni hohu akwakudikaña muEdeni nakuleña antu acheñi? Mwalala wadiña nañovu yakwila mwenimu; katataka yazatishi iyi ñovu kulonda yajilumuni antu ejima atama. Antu amakwawu anateli kwihula nawu ‘muloñadi,’ ‘chabuliliyi kuyijilumuna hayoyina mpinji yikwadiña akwanshidi asatu hohu mukaayi? Komana kutanda kwashindi—nimakabi ejima yitunakumona mukaayi—hiyateleleli kuyikañeshaku?’ Muloñadi Yehova chabuliliyi kwila mwenimu? HaKuhituluka 32:4 hahosha nawu: ‘Mwatwalañayi mwejima mwawuñaji hohu.’ Yehova wekala nayitoñojoka yabadika yawuñaji. Mwalala, “Yehova wakeña wuñaji.” (Masamu 37:28) Muloña wakukeña wuñaji, dichabuliliyi Yehova kujilumuna akwakudikaña muEdeni. Muloñadi?

¹⁴ Kudikaña kwaSatana kwaleteli lwihu kutalisha hakuloña kwawanta waNzambi. Wuñaji waYehova wakeñekeleña nawu lwihu lwaSatana alwakuli kushindamena hawuñaji. Akwakudikaña ateleleli kuyijilumuna, ilaña hikwadi kuhana ñakwilu yashikilaku. Kwadi kumwekesha nawu Yehova wabadika ñovu, ilaña ñovu yindi hiyayilwishiluku. Kubombelahu, Yehova wadiña wayileja dehi Adama naEvu nkeñelu yindi. Ateleleli kuvwala anyana nakwinzesha iseki, kudovwahisha, nikwikala anyanta ayileñaleña yejima yahamaseki. (Kutachika 1:28) Neyi Yehova wakuminini dakujilumuna Adama naEvu, nkeñelu yindi yafuukwiliyi kutalisha kudi antu yadikwikala yamukunkulu. Wuñanji waYehova hiwatela kwiteja chuma chamuchidiwu kuzatikaku, muloña nkeñelu yindi yashikijewaña mpinji yejima.—Isaya 55:10, 11.

15, 16. Twatela kuyikwasha ñahi antu neyi afuukulahu njila jikwawu “jakumanishilamu” kukala kwamwekeni muEdeni?

¹⁵ Kudihu muntu mukuleña kwejima wateleleli kumanisha kudikaña namaana asweja  kubadika Yehova? Antu amakwawu anateli kufuukula “njila yawu yakumanishilamu” kudikaña kwamuEdeni. Neyi afuukula mwenimu, komana hiyanakumwekesha nawu wena anateli kutoñojokahu njila yayiwahi yakumanishilamu iwu muloñaku? Hiyatela kufuukula mwenimuku muloña wayitoñojoka yatama, ilaña akañanyaña kumutiyishisha Yehova nimaana indi asweja kubadika. Hakusonekela eniKristu muRoma, kapostolu Pawulu wasandujoleli chikupu mumaana aNzambi, kubombelahu ‘ninsañu yajindawu’ yankeñelu yaYehova yakuzatisha Wanta wawuMesiya kulonda kukuula muchidi wamuntu washinshika nikujilika ijina Dindi dajila. Indi Pawulu watoñojokeli ñahi hamaana aNzambi wafuukwili iyi nkeñelu? Kapostolu wakunkulwili mukanda windi nanawa amazu: “Kudi yena Nzambi, mwinimaana kanka windi, kwikali kulema mudi Yesu Kristu haya nyaka. Amena.”—Aroma 11:25; 16:25-27.

¹⁶ Pawulu welukili nindi Yehova diyi ‘mwinimaana kanka windi’—wasweja maana mukaayi kejima. Hinyi hakachi kawantu abula kuwanina watela kuwana njila yayiwahi yakumanishilamu kukala kwejima—mwaka akatenihu tuhu nikuzuñesha kwaSatana kutalisha kukuloña kwawanta waNzambi? Komana, twatela kukwasha antu ekali nawoma wowumu wutwamutiyaña Nzambi ‘wukweti maana mumuchima.’ (Yoba 9:4) Chitwatiyishisha chachiwahi maana aYehova, tukukuhwelela chikupu netu njila yindi yakumanishilamu kukala diyi njila yabadika.—Yishimu 3:5, 6.

Kwiluka Mudimu Wazataña Chililu chaYehova Chabadikamu

17. Indi kutiyishisha chikupu kukeña kwaYehova kwatela kukwasha ñahi antu anakukabakana namakabi etejayi Nzambi?

¹⁷ “Nzambi diyi kukeña.” (1 Yowanu 4:8) Hakuhosha awa mazu abadika kuwaha, Bayibolu yamwekeshaña chililu chaYehova chabadikamu, chililu chabadika hayililu yindi yejima nawa chayitiyishaña antu kuwaha chikupu anakukabakana nanshidi yinakuswejelaku. Yehova namwekeshi kukeña munjila yejima yinazatilimu nanshidi yinasweji chikupu kukisañana yileñaleña yindi. Kukeña kwamuleñesheli Yehova kuyinka anyana kaAdama naEvu akwanshidi kuchiñeja, nakuyiloñeshela njila yakwinjilamu kudi Yena nikwikala nawubwambu wawuwahi naYena. Kukeña kwamuleñesheli Nzambi kuhana ifutu damuloña denzulwili njila yakwanakena nshidi chikupu nikwikala cheñi nawumi wawanina wahaya nyaka. (Yowanu 3:16) Kukeña cheñi kunamuleñeshi kwikala wadiwunjika namuchidi wamuntu, nakuyinka antu amavulu kukooleka kwakukaana Satana nakutonda Yehova kwikala Mwanta wawu.—2 Petulu 3:9.

18. Kwiluka kwamuchidinyi kunatuleteshi twikali namuzañalu, nawa chumanyi chitwakadiza muchibaba chinalondelihu?

¹⁸ Pasita wumu hampinji yahosheleñayi kwizaza dapompeli nakwanakana ifuku dajahañeniwu ambanji, wahosheli nindi: “Tuneluki wanyi Nzambi chetejelayi kutama nimakabi kutwalekahu.” Chawushona nankashi! Komana hitudi amuzañalu hakutiyishisha iyi nsañuku? (Kuhituluka 29:29) Chineli Yehova wasweja maana, woloka, nawa wukweti kukeña, tuneluki netu keña yamanishi makabi ejima. Nawa, nakani kwila mwenimu. (Chimwekeshu 21:3, 4) Indi antu afwili dehi? Komana njila yaYehova yakumanishilamu kukala kwamuEdeni yinayileñeli kubula kwikala nakuchiñeja kwakusañuka? Inehi. Kukeña kunamuleñeli kuyinka niwena kuchiñeja, kwakusañuka. Iwu diwukekala mutu wansañu muchibaba chinalondelihu.

Mukwakula Nenudi?

• Chumanyi chitwatela kumuleja muntu wukwihula nindi muloñadi Nzambi chetejelayi makabi?

• Indi kujila kwaYehova niwuñanji windi wunamwekani ñahi munjila yazatililimu nawakwakudikaña muEdeni?

• Muloñadi chitwatela kukwashila antu eluki chikupu kukeña kwaYehova?

[Malwihu aKuzatisha haKudiza]

[Mwevulu wudi hefu 15]

Fwilenu kukwasha antu anakuyanda namakabi mukaayi

[Nyevulu yidi hefu 17]

Davidi naHabakuki akashinshi amwihwili Nzambi malwihu alumbuluka